৯. নৱমো পৰিচ্ছেদো

দসানুস্সতিৱিভাগো

১১০০. সদ্ধাপব্বজিতো যোগী, ভাৱেন্তোনুস্সতিং পন;

দসানুস্সতিভেদেসু, ভাৱেয্যঞ্ঞতৰং কথং.

১১০১. অৰহং সুগতো লোকে, ভগৱা লোকপাৰগূ;

ৱিজ্জাচৰণসম্পন্নো, ৱিমুত্তিপৰিনাযকো.

১১০২. জেট্ঠো সম্মাভিসম্বুদ্ধো, সেট্ঠো পুৰিসসাৰথী;

সত্থা দেৱমনুস্সানং, বুদ্ধো অপ্পটিপুগ্গলো.

১১০৩. সব্বলোকহিতো বন্ধু, সমত্তৰতনালযো;

সত্তানমনুকম্পায, জাতো নাথো সিৱংকৰো.

১১০৪. চক্খুমা তিত্থকুসলো, ধম্মস্সামী তথাগতো;

মচ্চুধেয্যৱিমোক্খায, পটিপাদযি পাণিনো.

১১০৫. সত্থৱাহো মহাযোগ্গো, মগ্গামগ্গযুধন্ধৰো;

সিৰিসত্থমধিগ্গয্হ, ৱিচৰিত্থ মহাপথং,

১১০৬. অনোমো অসমো ধীৰো,

লোকহীতপৰক্কমো;

সব্বাকাৰৱৰোপেতো,

অচ্ছেৰব্ভুতপুগ্গলো.

১১০৭. অত্থভূতো ধম্মভূতো,

ব্ৰহ্মভূতো মহাযসো;

ঞাণালোকপৰিচ্ছিন্ন-

ঞেয্যাসেসপৰিগ্গহো.

১১০৮. আনুভাৱৱসিপ্পত্তো, আসভণ্ডাননিচ্চলো;

মহন্তমৰিযাদোযমনন্তগতিগোচৰো.

১১০৯. সব্বা ভিঞ্ঞাবলপ্পত্তো, ৱেসাৰজ্জৱিসাৰদো;

সব্বসম্পত্তিনিট্ঠানো, গুণপাৰমিপূৰকো.

১১১০. অপ্পমেয্যো মহানাগো, মহাৱীৰো মহামুনি;

মহেসী মহিতাচাৰো, মহামহো মহিদ্ধিকো.

১১১১. সব্বত্থসিদ্ধিসঞ্চাৰো, মহেসীগণপূজিতো;

ৰাজাধিৰাজমহিতো, দেৱব্ৰহ্মাভিৱন্দিতো.

১১১২. অভিভূয তযো লোকে, আদিচ্চোৱ নভন্তৰে;

ৱিৰোচতি মহাতেজো, অন্ধকাৰে পভঙ্কৰো.

১১১৩. ব্যামপ্পভাপৰিক্খিত্তো, কেতুমালাহলঙ্কতো;

দ্ৱত্তিংসলক্খণাসীতিঅনুব্যঞ্জনসোভিতো.

১১১৪. ছব্বণ্ণৰংসিললিতো, ৰতনগ্ঘিযসন্নিভো;

সমিদ্ধিৰূপসোভগ্গো, দস্সনেয্যংৱ পিণ্ডিতং.

১১১৫. ফুল্লং পদুমসণ্ডংৱ, কপ্পৰুক্খোৱলঙ্কতো;

নভংৱ তাৰকাকিণ্ণং, উত্তমো পটিদিস্সতি.

১১১৬. সত্থুকপ্পমহাৱীৰপুত্তেহি পৰিৱাৰিতো;

সব্বলোকমহিদ্ধায, ধম্মৰাজা সযংৱসী.

১১১৭. নিদ্ধোতমলচন্দোৱ, নক্খত্তপৰিৱাৰিতো;

খত্তসঙ্ঘপৰিব্যুড়্হো, চক্কৱত্তীৱ সোভতি.

১১১৮. ইচ্চানন্তগুণাকিণ্ণমসেসমলনিস্সটং;

সব্বসম্পত্তিদাতাৰং, ৱিপত্তিৱিনিবন্ধকং.

১১১৯. দযাপৰমহোৰত্তং, ভগৱন্তমনুস্সৰং;

ভাৱেতি পঞ্ঞৱা যোগী, বুদ্ধানুস্সতিভাৱনং.

১১২০. স্ৱাখাতো তেন সদ্ধম্মো, সম্বুদ্ধেন সতীমতা;

পচ্চত্তপটিৱেধেন, পস্সিতব্বো যথাৰহং.

১১২১. তণ্হাদলিদ্দনাসায, মনোৰথসমিদ্ধিযা;

কালন্তৰমনাগম্ম, পচ্চক্খফলদাযকো.

১১২২. উপনিস্সযৱন্তানং, ‘‘এহি পস্সা’’তি দস্সিযো;

পচ্চত্তমেৱ ৱিঞ্ঞূহি, ৱেদিতব্বো সভাৱতো.

১১২৩. সব্বাসৱসমুগ্ঘাতী, সুদ্ধো সোৱত্থিকো সিৱো;

পিহিতাপাযকুম্মগ্গো, মগ্গো নিব্বানপত্তিযা.

১১২৪. ক্লেসসংকটদুগ্গম্হা, দুক্খক্খন্ধমহব্ভযা;

খেমন্তভূমিং নিয্যাতি, অচ্চন্তমনুপদ্দৱং.

১১২৫. পুঞ্ঞতিত্থমিদং নাম, মঙ্গলঞ্চ সিৱঙ্কৰং;

হিতোদযসুখাধান-মমতাহাৰমুত্তমং.

১১২৬. অৱিজ্জাপটলুদ্ধাৰৱিজ্জানেত্তোসধং ৱৰং;

পঞ্ঞাধাৰমিদং সত্থং, ক্লেসগণ্ডপ্পভেদকং.

১১২৭. চতুৰোঘনিমুগ্গানং, সেতুবন্ধো সমুগ্গতো;

ভৱচাৰকৰুদ্ধানং, মহাদ্ৱাৰো অপাৰুতো.

১১২৮. সোকোপাযাসৱিদ্ধানং, পৰিদেৱসমঙ্গিনং;

সল্লনীহৰণোপাযো, অচ্চন্তসুখমীৰিতো.

১১২৯. ব্যসনোপদ্দৱাপেতো, সংক্লেসমলনিস্সটো;

উজুসম্মত্তনিযতো, পটিপত্তিৱিসুদ্ধিযা.

১১৩০. সুদ্ধসীলপৰিক্খাৰো, সমাধিমযপঞ্জৰো;

সম্মাসঙ্কপ্পচক্কঙ্গো, সম্মাৱাযামৱাহনো.

১১৩১. সতিসাৰথিসংযুত্তো, সম্মাদিট্ঠিপুৰেজৱো;

এস ধম্মৰথো যাতি, যোগক্খেমস্স পত্তিযা.

১১৩২. ৱিপত্তিপটিবাহায, সব্বসম্পত্তিসিদ্ধিযা;

সব্বখন্ধৱিমোক্খায, ধম্মং দেসেসি চক্খুমা.

১১৩৩. হিতেসী সব্বপাণীনং, দযাপন্নো মহামুনি;

ধম্মালোকং পকাসেসি, চক্খুমন্তানমুত্তমো.

১১৩৪. যং ধম্মং সম্মদঞ্ঞায, খেমমগ্গপ্পতিট্ঠিতা;

পাপকাপগতা ধীৰা, পস্সদ্ধিদৰথাসযা.

১১৩৫. ভৱযোগা ৱিনিমুত্তা, পহীনভযভেৰৱা;

অচ্চন্তসুখমেধেন্তি, সোত্থিপত্তা মহেসযো.

১১৩৬. তমেৱমুত্তমং ধম্মং, চিন্তেন্তো পন পণ্ডিতো;

ভাৱেতীতি পকাসেন্তি, ধম্মানুস্সতিভাৱনং.

১১৩৭. চত্তাৰো চ পটিপন্না, চত্তাৰো চ ফলে ঠিতা;

এস সঙ্ঘো উজুভূতো, পঞ্ঞাসীলসমাহিতো.

১১৩৮. পলাপাপগতো সুদ্ধো, পটিপত্তিপতিট্ঠিতো;

পৰিগ্গহিতসদ্ধম্মো, সমিদ্ধিগুণসোভিতো.

১১৩৯. পহীনাপাযগমনো, পাপক্লেসৱিনিস্সটো;

পৰিপন্থসমুচ্ছেদী, ভৱচাৰকভেদকো.

১১৪০. উত্তমদমথপ্পত্তো, সুৱিনীতো মহেসিনা;

ৱিজ্জাৱিমুত্তিৱোদাতো, আজানীযপথে ঠিতো.

১১৪১. সুগতোৰসি সম্ভূতো, সুচিধম্মসিৰিন্ধৰো;

পটিপাদিতসম্পত্তো, ধম্মসাসনসেৱিতো.

১১৪২. ভযভেৰৱনিস্সঙ্গো, জিনতেজানুপালিতো;

মোনেয্যপথসঞ্চাৰো, সুগতোৱাদভাজনো.

১১৪৩. অপ্পমাদপৰিত্তাণো, সীলালঙ্কাৰভূসিতো;

চেতোসমাধিসন্নদ্ধো, পঞ্ঞাযুধসমুজ্জলো.

১১৪৪. উজুমগ্গমধিট্ঠায, মাৰকাযপ্পদালনো;

অপৰাজিতসঙ্গামো, ললিতোদাতৱিক্কমো.

১১৪৫. মচ্চুধেয্যমতিক্কন্তো, বোধিধম্মপ্পতিট্ঠিতো;

ছড়াভিঞ্ঞাবলপ্পত্তো, সমাৰাধিতসাসনো.

১১৪৬. অনুবোধিমনুপ্পত্তো, পভিন্নপটিসম্ভিদো;

সামঞ্ঞপাৰমিপ্পত্তো, তোসেতি জিনমানসং.

১১৪৭. নেকাকাৰৱৰূপেতো, নানাসম্পত্তিফুল্লিতো;

ৱিপত্তিপথনিত্তিণ্ণো, অভিবুদ্ধিপৰাযণো.

১১৪৮. আহুনেয্যো পাহুনেয্যো,

দক্খিণেয্যো সুদুল্লভো;

সদেৱকস্স লোকস্স,

পুঞ্ঞক্খেত্তমনুত্তৰং.

১১৪৯. যত্থ সুদ্ধিম্হি নিদ্দোসে, সদ্ধাবীজং পতিট্ঠিতং;

অচ্চন্তং পৰিপাচেতি, সম্পত্তিফলমুত্তমং.

১১৫০. যং ফলং পৰিভুঞ্জন্তা, ৱিমুত্তিৰসসেৱনং;

অচ্চন্তসুখিতা ধীৰা, ভৱন্তি অজৰামৰা.

১১৫১. তং ফলং পত্থযন্তেন, সঙ্ঘানুস্সতিভাৱনা;

ভাৱেতব্বা পনিচ্চেৱমিতি ভাসন্তি পণ্ডিতা.

১১৫২. পঞ্চসীলং দসসীলং, পাতিমোক্খমুপোসথং;

চাতুপাৰিসুদ্ধিসীলং, ধুতঙ্গপৰিৱাৰিতং.

১১৫৩. এৱমেতেসু যং কিঞ্চি, সমাদায ৰহোগতো;

তমানিসংসং গুণতো, ফলতো চ ৱিচিন্তযে.

১১৫৪. আদি চেতং পতিট্ঠা চ, মুখং পমুখমুত্তমং;

মূলং কুসলধম্মানং, পভৱং পটিপত্তিযা.

১১৫৫. সাসনোতৰণদ্ৱাৰং, তিত্থং সদ্ধম্মৱাপিযা;

পাৰিসুদ্ধিপদট্ঠানং, মগ্গো খেমন্তপাপকো.

১১৫৬. সাধু সিক্খাসমাদানং, বাহুসচ্চৱিভূসনং;

অৰিযাচাৰচাৰিত্ত-মৱণ্ণমলৱজ্জনং.

১১৫৭. কুলপুত্তঅলঙ্কাৰো, পাপজল্লপৱাহনং;

অনপাযি সুগন্ধঞ্চ, মহাপুৰিসসেৱিতং.

১১৫৮. পচ্ছানুতাপহৰণং, পীতিপামোজ্জৱড্ঢনং;

নেক্খম্মভাৱনোপেতং, পব্বজ্জাৱেসসোভনং.

১১৫৯. সোপানং সগ্গলোকস্স, দড়্হাপাযৱিধানকং;

অনুপদ্দৱসম্পত্তি, সমত্থগুণসূদনী.

১১৬০. ক্লেসপঞ্জৰৱিচ্ছেদি, ৱিপত্তিপথৱাৰণং;

সোত্থিকম্মসমুট্ঠানং, অসাধাৰণমঙ্গলং.

১১৬১. ‘‘সুলদ্ধা ৱত মে লদ্ধা, সদ্ধা সুগতসাসনে;

সীলং মে যস্স কল্যাণং, পৰিসুদ্ধমখণ্ডিতং.

১১৬২. ‘‘দুল্লভো ৱত মে লদ্ধো,

মহালাভো অনপ্পকো;

যোহমক্খলিতাচাৰো,

উপঘাতৱিৱজ্জিতো.

১১৬৩. ‘‘ধম্মঙ্কুৰিতসন্তানো, মূলজাতোস্মি সাসনে;

উজুমগ্গং সমাৰুড়্হো, পিহিতা সভযা দিসা.

১১৬৪. ‘‘অৱঞ্চা ৱত মে জাতি, আৰদ্ধা খণসম্পদা;

পতিট্ঠিতোম্হি সদ্ধম্মে, সফলং মম জীৱিতং’’.

১১৬৫. ইত্থং নানপ্পকাৰেন, চিন্তেন্তো গুণমত্তনো;

সীলক্খন্ধস্স ভাৱেতি, সীলানুস্সতিভাৱনং.

১১৬৬. সদ্ধায সীলৱন্তেসু, দত্ৱা দানং যথাৰহং;

নিদ্ধোতমলমচ্ছেৰো, ৱিৱিত্তো তমনুস্সৰে.

১১৬৭. দানং নিধানমনুগং, অসাধাৰণমুত্তমং;

অৱিনাসসুখাধানং, অচ্চন্তং সব্বকামদং.

১১৬৮. কোপদাহোপসমনং, মচ্ছেৰমলসোধনং;

পমাদনিদ্দাৱুট্ঠানং, লোভপাসৱিমোচনং.

১১৬৯. চেতোৱিকাৰদমনং, মিচ্ছামগ্গনিৱাৰণং;

ৱিত্তিলাভসুখস্সাদো, ৱিভৱোদযমঙ্গলং.