৭. সত্তমো পৰিচ্ছেদো

সব্বসঙ্গহৱিভাগো

৬১৭. চতুপঞ্ঞাস ধম্মা হি, নামনামেন ভাসিতা;

অট্ঠাৰসৱিধা ৱুত্তা, ৰূপধম্মাতি সব্বথা.

৬১৮. অভিঞ্ঞেয্যা সভাৱেন, দ্ৱাসত্ততি সমীৰিতা;

সচ্চিকট্ঠপৰমত্থা, ৱত্থুধম্মা সলক্খণা.

৬১৯. তেসং দানি পৱক্খামি, সব্বসঙ্গাহিকং নযং;

আভিধম্মিকভিক্খূনং, হত্থসাৰমনুত্তৰং.

৬২০. দুকা তিকা চ খন্ধাযতনতো ধাতুসচ্চতো;

পটিচ্চসমুপ্পাদা চ, পচ্চযা চ সমঞ্ঞতো.

৬২১. পচ্চযো এৱ নিব্বানমপচ্চযমসঙ্খতং;

অসঙ্খাৰমনুপ্পাদং, সস্সতং নিচ্চলক্খণং.

৬২২. পচ্চযা চেৱ সঙ্খাৰা, সঙ্খতা চ ততোপৰে;

উপ্পাদৱযধম্মা চ, পচ্চযট্ঠিতিকা তথা.

৬২৩. নিব্বানং ৰূপধম্মা চ, ৱিপ্পযুত্তাৱ কেৱলং;

আৰম্মণা এৱ নাম, নালম্বন্তি হি কিঞ্চিপি.

৬২৪. একুপ্পাদনিৰোধা চ, একালম্বণৱত্থুকা;

সংসট্ঠা সম্পযুত্তা চ, সহজাতা যথাৰহং.

৬২৫. অঞ্ঞমঞ্ঞেনুপত্থদ্ধা, সব্বত্থ সহৱুত্তিনো;

সাৰম্মণাৰম্মণা চ, চিত্তচেতসিকা মতা.

৬২৬. ৱিপস্সনায ভূমীতি, তত্থ তেভূমকা মতা;

লোকিযা পৰিযাপন্না, ৱট্টধম্মা সউত্তৰা.

৬২৭. সক্কাযধম্মা সভযা, তীৰমোৰিমনামকং;

সংযোজনিযা সমলা, তথা নীৱৰণীযকা.

৬২৮. সংক্লেসিকা পৰামট্ঠা, উপাদানীযসাসৱা;

ওঘনীযা যোগনীযা, গন্থনীযাতি ভাসিতা.

৬২৯. অঞ্ঞে অপৰিযাপন্না, ৱিৱট্টা চাৱিপস্সিযা;

লোকুত্তৰানুত্তৰা চ, নোসংযোজনিযাদযো.

৬৩০. কম্মজাতা উপাদিন্না, নাম ৱুচ্চন্তি সাসৱা;

অনুপাদিন্নকা নাম, ততো সেসা পৱুচ্চৰে.

৬৩১. ধম্মা সপ্পটিভাগাতি, কুসলাকুসলা মতা;

অপ্পটিভাগধম্মাতি, তদঞ্ঞে পৰিদীপযে.

৬৩২. সৰণা চ পহাতব্বা, দ্ৱাদসাকুসলা পন;

তদঞ্ঞে অৰণা নাম, পহাতব্বা ন কেহিচি.

৬৩৩. ৰূপিনো ৰূপধম্মা চ, নামধম্মা অৰূপিনো;

এৱমাদিপ্পভেদেন, দ্ৱিধা ভেদং ৱিভাৱযে.

৬৩৪. বালা ধম্মা তপনীযা, কণ্হা চ কটুকপ্ফলা;

অসেৱিতব্বা সাৱজ্জা, দ্ৱাদসাকুসলা মতা.

৬৩৫. পণ্ডিতা চাতপনীযা, সুক্কা চ সুখদাযকা;

সেৱিতব্বানৱজ্জা চ, কুসলা একৱীসতি.

৬৩৬. ক্ৰিযা ৱিপাকা ৰূপঞ্চ, নিব্বানন্তি চতুব্বিধা;

ৱুত্তা অব্যাকতা নাম, ধম্মা তব্বিপৰীততো.

৬৩৭. হীনা ধম্মা পৰিত্তা চ, কামাৱচৰভূমিকা;

ৰূপাৰূপা পৱুচ্চন্তি, মজ্ঝিমা চ মহগ্গতা.

৬৩৮. অপ্পমাণা পণীতা চ, ধম্মা লোকুত্তৰা মতা;

সংকিলিট্ঠসংক্লেসিকা, দ্ৱাদসাকুসলা তথা.

৬৩৯. অসংকিলিট্ঠসংক্লেসিকা, ধম্মা তেভূমকাপৰে;

অসংক্লিট্ঠাসংক্লেসিকা, নৱ লোকুত্তৰা সিযুং.

৬৪০. ৱিপাকা তে পৱুচ্চন্তি, ৱিপাকা চতুভূমকা;

ৱিপাকধম্মা নামাতি, কুসলাকুসলা মতা.

৬৪১. ক্ৰিযা ৰূপঞ্চ নিব্বানং, ন পাকং ন তু পচ্চতি;

আচযগামিনো ধম্মা, পুঞ্ঞাপুঞ্ঞাৱ সাসৱা.

৬৪২. ৱুত্তাপচযগামিনো, কুসলানুত্তৰা পন;

ক্ৰিযা ৰূপঞ্চ নিব্বানং, পাকা চোভযৱজ্জিতা.

৬৪৩. পঠমানুত্তৰো মগ্গো, দস্সনং ভাৱনাপৰে;

তদঞ্ঞে দ্ৱযনিম্মুত্তা, সব্বেপি পৰমত্থতো.

৬৪৪. সত্ত লোকুত্তৰা হেট্ঠা, ৱুত্তা সেক্খাতি তাদিনা;

অৰহত্তফলমেৱ, অসেক্খন্তি পকাসিতং.

৬৪৫. লোকিযাপি চ নিব্বানং, ভাসিতোভযৱজ্জিতা;

এৱমাদিপ্পকাৰেহি, তিৱিধাতি ৱিভাৱযে.

৬৪৬. অতীতানাগতং ৰূপং, পচ্চুপ্পন্নমথাপৰং;

অজ্ঝত্তং ৱা বহিদ্ধা ৱা, সুখুমোড়াৰিকং তথা.

৬৪৭. হীনং পণীতং যং দূৰে, সন্তিকে ৱা তদেকতো;

সব্বং ৰূপং সমোধায, ৰূপক্খন্ধোতি ৱুচ্চতি.

৬৪৮. তথেৱ ৱেদনাক্খন্ধো, নাম যা কাচি ৱেদনা;

সঞ্ঞাক্খন্ধোতি সঞ্ঞা চ, ৰাসিভাৱেন ভাসিতা.

৬৪৯. ৱট্টধম্মেসু অস্সাদং, তদস্সাদোপসেৱনং;

ৱিনিভুজ্জ নিদস্সেতুং, খন্ধদ্ৱযমুদাহটং.

৬৫০. ৱিৱাদমূলসংসাৰ-কমহেতুনিদস্সনং;

সন্ধায ৱেদনা সঞ্ঞা, কতা নানাতি কেচন.

৬৫১. চিত্তসংসট্ঠধম্মানং, চেতনামুখতো পন;

সঙ্খাৰক্খন্ধনামেন, ধম্মা চেতসিকা মতা.

৬৫২. সব্বভেদং তথা চিত্তং, ৱিঞ্ঞাণক্খন্ধ সম্মতং;

ভেদাভাৱেন নিব্বানং, খন্ধসঙ্গহনিস্সটং.

৬৫৩. আলম্বনীযভাৱেন, উপাদানোপকাৰতো;

পঞ্চুপাদানক্খন্ধাতি, লোকুত্তৰৱিৱজ্জিতা.

৬৫৪. যথা থূলং হিতত্থায, পৰিগ্গাহকযোগিনং;

ধম্মা তেভূমকা এক-ভূমিভাৱায দেসিতা.

৬৫৫. ভাজনং ভোজনং তস্স, ব্যঞ্জনং ভোজকো তথা;

ভুঞ্জিতা চাতি পঞ্চেতে, উপমেন্তি যথাক্কমং.

৬৫৬. গিলানসালা গেলঞ্ঞং, অসপ্পাযোপসেৱনা;

সমুট্ঠানং গিলানোতি, উপমেন্তি চ পণ্ডিতা.

৬৫৭. চাৰকো কাৰণং তত্থ, অপৰাধো চ কাৰকো;

অপৰাধকতো চোৰো, ইতি চোপমিতা পুন.

৬৫৮. নিচ্চাধিপীড়নট্ঠেন, ভাৰাতি পৰিদীপিতা;

ক্লেসদুক্খমুখেনেতে, খাদকা চ নিৰন্তৰং.

৬৫৯. অনত্থাৱহিতা নিচ্চমুক্খিত্তাসিকৱেৰিনো;

মচ্চুমাৰাভিধেয্যত্তা, ৱধকাতি চ ভাসিতা.

৬৬০. ৱিমদ্দাসহনং ৰূপং, ফেণপিণ্ডংৱ দুব্বলং;

মুহুত্তৰমণীযত্তা, ৱেদনা বুব্বুড়ূপমা.

৬৬১. মৰীচিকূপমা সঞ্ঞা, ৱিপল্লাসকভাৱতো;

সঙ্খাৰাপি চ নিস্সাৰা, কদলিক্খন্ধসাদিসা.

৬৬২. নানপ্পকাৰং চিন্তেন্তং, নানাক্লেসৱিমোহিতং;

পলম্ভতীতি ৱিঞ্ঞাণং, মাযাসমমুদীৰিতং.

৬৬৩. ইচ্চেৱং পঞ্চুপাদানক্খন্ধা খন্ধা চ কেৱলং;

পঞ্চক্খন্ধাতি নামেন, দেসিতাতি ৱিভাৱযে.

৬৬৪. অজ্ঝত্তঞ্চ বহিদ্ধা চ, ৱিঞ্ঞাণুপ্পত্তিকাৰণং;

দ্ৱাৰালম্বণভেদেন, দ্ৱেধাযতনমীৰিতং.

৬৬৫. চক্খাদজ্ঝত্তিকং তত্থ, ছদ্ৱাৰাযতনং ভৱে;

বাহিৰাযতনং নাম, তথা ৰূপাদিগোচৰং.

৬৬৬. ইতি ৱীথিপ্পৱত্তানং, দ্ৱাৰালম্বণসঙ্গহো;

আগমে অভিধম্মে তু, সব্বথাপি যথাৰহং.

৬৬৭. তথাহনন্তৰাতীতো, জাযমানস্স পচ্ছতো;

মনো সব্বোপি সব্বস্স, মনস্সাযতনং ভৱে.

৬৬৮. তথা পুব্বঙ্গমট্ঠেন, সহজানমৰূপিনং;

দ্ৱাৰভাৱেন ৱিঞ্ঞাণং, সব্বমাযতনং মতং.

৬৬৯. মনাযতনমিচ্চেৱং, পসাদাযতনং তথা;

পঞ্চৱিঞ্ঞাণধম্মানং, ইতি ছদ্ধা ৱিভাৱযে.

৬৭০. পঞ্চপ্পসাদৱিসযা, পঞ্চাযতনসম্মতা;

সেসং ৰূপঞ্চ নিব্বানং, সব্বে চেতসিকাতি চ.

৬৭১. একূনসট্ঠিধম্মানং, ধম্মাযতনসঙ্গহো;

ইতি ছদ্ধা পকাসেন্তি, বাহিৰাযতনং বুধা.

৬৭২. সুঞ্ঞগামোৱ দট্ঠব্ব-মজ্ঝত্তিকমসাৰতো;

গামঘাতকচোৰাৱ, তং হনন্তংৱ বাহিৰং.

৬৭৩. নামপ্পৱত্তিমুড়্হানং, তদুপ্পত্তিককাৰণং;

দ্ৱাদসাযতনানীতি, ৱুত্তমিত্থং মহেসিনা.

৬৭৪. সমত্তা ভাৱমত্তেন, ধাৰেন্তীতি সলক্খণং;

দ্ৱাৰালম্বতদুপ্পন্ন-পৰিযাযেন ভেদিতা.

৬৭৫. মনাযতনমেত্থাহ, সত্ত ৱিঞ্ঞাণধাতুযো;

একাদস যথাৱুত্তা, ইচ্চট্ঠাৰস ধাতুযো.

৬৭৬. অন্তাদিকা মনোধাতু, মনোৱিঞ্ঞাণধাতুযা;

পৱেসাপগমে দ্ৱাৰ-পৰিযাযেন তিট্ঠতি.

৬৭৭. ভেৰীতলদণ্ডঘোস-সমং ছক্কং যথাক্কমং;

কট্ঠাৰণিপাৱকাদি-সমঞ্চ তিৱিধং ভৱে.

৬৭৮. দুক্খং সমুদযো চেৱ, নিৰোধো চ তথাপৰো;

মগ্গো চাতি চতুদ্ধাহ, সচ্চং সচ্চপৰক্কমো.

৬৭৯. ভাৰো চ ভাৰদানঞ্চ, ভাৰনিক্খেপনং তথা;

ভাৰনিক্খেপনূপাযো, ইচ্চোপম্মং যথাক্কমং.

৬৮০. ৰোগো ৰোগনিদানঞ্চ, ৰোগৱূপসমো তথা;

ৰোগভেসজ্জমিচ্চেৱ-মুপমাহি চ দীপিতং.

৬৮১. ৱিসৰুক্খো ৰুক্খমূলং, ৰুক্খচ্ছেদো তথাপৰো;

ৰুক্খচ্ছেদকসত্থন্তি, চতুধোপমিতং তথা.

৬৮২. তীৰমোৰিমসঙ্খাতং, মহোঘো পাৰিমং তথা;

তদতিক্কমুপাযোতি, উপমেন্তি চ তং বুধা.

৬৮৩. সচ্ছিকত্ৱান পচ্চক্খ-মিচ্চোপম্মং যথাক্কমং;

সমাচিক্খি ৱিমোক্খায, সচ্চং তচ্ছনিযামতো.

৬৮৪. তথা হি দুক্খং নাবাধং, নাঞ্ঞং দুক্খা চ বাধকং;

বাধকত্তনিযামেন, দুক্খসচ্চমিতীৰিতং.

৬৮৫. তং ৱিনা নাঞ্ঞতো দুক্খং, ন হোতি ন চ তং ততো;

দুক্খহেতুনিযামেন, সচ্চমাহ ৱিসত্তিকং.

৬৮৬. নাঞ্ঞা নিব্বানতো সন্তি, ন চ সন্তং ন তং যতো;

সন্তভাৱনিযামেন, নিব্বানং সচ্চমুত্তমং.

৬৮৭. নাঞ্ঞং মগ্গাচ নিয্যানং, অনিয্যানো ন চাপি সো;

তস্মা নিয্যানভাৱেন, মগ্গো সচ্চন্তি সম্মতো.

৬৮৮. ইতি তচ্ছাৱিপল্লাস-ভূতভাৱো চতূসুপি;

সচ্চট্ঠোতি ৱিনিদ্দিট্ঠো, দুক্খাদীস্ৱৱিসেসতো.

৬৮৯. পীড়নট্ঠো সঙ্খতট্ঠো, সন্তাপট্ঠো চ ভাসিতো;

ৱিপৰীণামট্ঠো চাতি, দুক্খস্সেৱং চতুব্বিধা.

৬৯০. আযূহনা নিদানা চ, সংযোগা পলিবোধতো;

দুক্খস্সমুদযস্সাপি, চতুধত্থা পকাসিতা.