৫. পঞ্চমো পৰিচ্ছেদো

কম্মৱিভাগো

৩২৮. ৱিভাগং পন কম্মানং,

পৱক্খামি ইতো পৰং;

কম্মপাকক্ৰিযাভেদে,

অমোহায সমাসতো.

৩২৯. কম্মপচ্চযকম্মন্তি, চেতনাৱ সমীৰিতা;

তত্থাপি নানক্খণিকা, পুঞ্ঞাপুঞ্ঞাৱ চেতনা.

৩৩০. দেতি পাকমধিট্ঠায, সম্পযুত্তে যথাৰহং;

কম্মস্সাযূহনট্ঠেন, পৱত্তত্তা হি চেতনা.

৩৩১. ক্লেসানুসযসন্তানে, পাকধম্মা হি জাযৰে;

পহীনানুসযানং তু, ক্ৰিযামত্তং পৱত্ততি.

৩৩২. মূলভাৱা চ সব্বেসং, তথেৱাৱজ্জনদ্ৱযং;

জনিতানি চ কম্মেহি, ৱিপাকানি পৱত্তৰে.

৩৩৩. চিত্তুপ্পাদৱসেনেৱ, কম্মং তেত্তিংসধা ঠিতং;

কম্মচতুক্কভেদেহি, ৱিভাৱেয্য ৱিচক্খণো.

৩৩৪. পচ্চুপ্পন্নাদিকণ্হাদি-জনকাদিগৰাদিতো;

দিট্ঠধম্মাদিকামাদি-ভেদা ছধা যথাক্কমং.

৩৩৫. যং পাপং সুখৱোকিণ্ণং, অকিচ্ছেন কৰীযতি;

পচ্চুপ্পন্নসুখং কম্মং, আযতিং দুক্খপাকজং.

৩৩৬. কিচ্ছেন দুক্খৱোকিণ্ণং, যদি পাপং কৰীযতি;

পচ্চুপ্পন্নে চ তং দুক্খং, আযতিং দুক্খপাকজং.

৩৩৭. কিচ্ছেন দুক্খৱোকিণ্ণং, যদি পুঞ্ঞং কৰীযতি;

পচ্চুপ্পন্নম্হি তং দুক্খং, আযতিং সুখপাকজং.

৩৩৮. যং পুঞ্ঞং সুখৱোকিণ্ণং, অকিচ্ছেন কৰীযতি;

পচ্চুপ্পন্নসুখঞ্চেৱ, আযতিং সুখপাকজং.

৩৩৯. ৱিসসংসট্ঠমধুৰং, সৱিসং তিত্তকং তথা;

গোমুত্তমধুভেসজ্জ-মিচ্চোপম্মং যথাক্কমং.

৩৪০. সমাদানে ৱিপাকে চ, সুখদুক্খপ্পভেদিতং;

কম্মমেৱং চতুদ্ধাতি, পকাসেন্তি তথাগতা.

৩৪১. আনন্তৰিযকম্মাদি, একন্তকটুকাৱহং;

কণ্হং কণ্হৱিপাকন্তি, কম্মং দুগ্গতিগামিকং.

৩৪২. পঠমজ্ঝানকম্মাদি, একন্তেন সুখাৱহং;

সুক্কং সুক্কৱিপাকন্তি, কম্মং সগ্গূপপত্তিকং.

৩৪৩. ৱোকিণ্ণকম্ম ৱোকিণ্ণ-সুখদুক্খূপপত্তিকং;

কণ্হসুক্কং কণ্হসুক্ক-ৱিপাকন্তি সমীৰিতং.

৩৪৪. অকণ্হসুক্কমীৰেন্তি, অকণ্হসুক্কপাকদং;

কম্মং লোকুত্তৰং লোকে, গতিকম্মক্খযাৱহং.

৩৪৫. ইতি ৱট্টপ্পৱত্তম্হি, ক্লেসৱোদানভেদিতং;

কম্মক্খযেন সঙ্গয্হ, চতুধা কম্মমীৰিতং.

৩৪৬. জনকঞ্চেৱুপত্থম্ভ-মুপপীড়োপঘাতকং;

চতুধা কিচ্চভেদেন, কম্মমেৱং পৱুচ্চতি.

৩৪৭. জনেতি জনকং পাকং, তং ছিন্দতুপপীড়কং;

তং পৱত্তেতুপত্থম্ভং, তং ঘাতেতোপঘাতকং.

৩৪৮. কৰোতি অত্তনো পাক-স্সাৱকাসন্তি ভাসিতং;

পাকদাযককম্মং তু, যং কিঞ্চি জনকং ভৱে.

৩৪৯. বাধমানককম্মং তু, তং পাকমুপপীড়কং;

উপঘাতকমীৰেন্তি, তদুপচ্ছেদকংপৰে.

৩৫০. গৰুকাসন্নমাচিণ্ণং, কটত্তাকম্মুনা সহ;

কম্মং চতুব্বিধং পাক-পৰিযাযপ্পভেদতো.

৩৫১. মহগ্গতানন্তৰিযং, গৰুকম্মন্তি ৱুচ্চতি;

কতং চিন্তিতমাসন্ন-মাসন্নমৰণেন তু.

৩৫২. বাহুল্লেন সমাচিণ্ণমাচিণ্ণন্তি পৱুচ্চতি;

সেসং পুঞ্ঞমপুঞ্ঞঞ্চ, কটত্তাকম্মমীৰিতং.

৩৫৩. দিট্ঠধম্মে ৱেদনীযমুপপজ্জাপৰে তথা;

পৰিযাযৱেদনীযমিতি চাহোসিকম্মুনা.

৩৫৪. পাককালৱসেনাথ, কালাতীতৱসেন চ;

চতুধেৱম্পি অক্খাতং, কম্মমাদিচ্চবন্ধুনা.

৩৫৫. দিট্ঠধম্মে ৱেদনীযং, পঠমং জৱনং ভৱে;

অলদ্ধাসেৱনত্তাৱ, অসমত্থং ভৱন্তৰে.

৩৫৬. ৱেদনীযং তুপপজ্জপৰিযোসানমীৰিতং;

পৰিনিট্ঠিতকম্মত্তা, ৱিপচ্চতি অনন্তৰে.

৩৫৭. সেসানি ৱেদনীযানি, পৰিযাযাপৰে পন;

লদ্ধাসেৱনতো পাকং, জনেন্তি সতি পচ্চযে.

৩৫৮. ৱুচ্চন্তাহোসিকম্মানি, কালাতীতানি সব্বথা;

উচ্ছিন্নতণ্হামূলানি, পচ্চযালাভতো তথা.

৩৫৯. চতুধা পুন কামাদিভূমিভেদেন ভাসিতং;

পুঞ্ঞাপুঞ্ঞৱসা দ্ৱেধা, কামাৱচৰিকং ভৱে.

৩৬০. অপুঞ্ঞং তত্থ সাৱজ্জ-মনিট্ঠফলদাযকং;

তং কম্মফস্সদ্ৱাৰেহি, দুৱিধং সম্পৱত্ততি.+

৩৬১. কাযদ্ৱাৰং ৱচীদ্ৱাৰং, মনোদ্ৱাৰন্তি তাদিনা;

কম্মদ্ৱাৰত্তযং ৱুত্তং, ফস্সদ্ৱাৰা ছ দীপিতা.

৩৬২. কম্মদ্ৱাৰে মনোদ্ৱাৰে, পঞ্চদ্ৱাৰা সমোহিতা;

ফস্সদ্ৱাৰমনোদ্ৱাৰং, কম্মদ্ৱাৰত্তযং কতং.

৩৬৩. তথা হি কাযৱিঞ্ঞত্তিং, জনেত্ৱা জাতচেতনা;

কাযকম্মং ৱচীকম্মং, ৱচীভেদপৱত্তিকা.

৩৬৪. ৱিঞ্ঞত্তিদ্ৱযসম্পত্তা, মনোকম্মন্তি ৱুচ্চতি;

ভেদোযং পৰিযাযেন, কম্মানমিতি দীপিতো.

৩৬৫. পাণঘাতাদিকং কম্মং, কাযে বাহুল্লৱুত্তিতো;

কাযকম্মং ৱচীকম্মং, মুসাৱাদাদিকং তথা.

৩৬৬. অভিজ্ঝাদি মনোকম্মং, তীসু দ্ৱাৰেসু জাযতি;

দ্ৱীসু দ্ৱাৰেসু সেসানি, ভেদোযং পৰমত্থতো.

৩৬৭. ফস্সদ্ৱাৰমনোদ্ৱাৰে, ৱিঞ্ঞত্তিদ্ৱযমীৰিতং;

পঞ্চদ্ৱাৰে দ্ৱযং নত্থি, অযমেত্থ ৱিনিচ্ছযো.

৩৬৮. অক্খন্তিঞাণ কোসজ্জং, দুস্সিল্যং মুট্ঠসচ্চতা;

ইচ্চাসংৱৰভেদেন, অট্ঠদ্ৱাৰেসু জাযতি.

৩৬৯. কম্মদ্ৱাৰত্তযঞ্চেৱ, পঞ্চদ্ৱাৰা তথাপৰে;

অসংৱৰানং পঞ্চন্নং, অট্ঠ দ্ৱাৰা পকাসিতা.

৩৭০. তত্থ কম্মপথপ্পত্তং, পটিসন্ধিফলাৱহং;

পাণঘাতাদিভেদেন, দসধা সম্পৱত্ততি.

৩৭১. পাণাতিপাতো ফৰুসং, ব্যাপাদো চ তথাপৰো;

ইচ্চেৱং তিৱিধং কম্মং, দোসমূলেহি জাযতি.

৩৭২. মিচ্ছাচাৰো অভিজ্ঝা চ, মিচ্ছাদিট্ঠি তথাপৰা;

ইচ্চেৱং তিৱিধং কম্মং, লোভমূলেহি জাযতি.

৩৭৩. থেয্যাদানং মুসাৱাদো, পিসুণং সম্ফলাপনং;

কম্মং চতুব্বিধম্মেতং, দ্ৱিমূলেহি পৱত্ততি.

৩৭৪. ছন্দাদোসা ভযা মোহা, পাপং কুব্বন্তি পাণিনো;

তস্মা ছন্দাদিভেদেন, চত্তালীসৱিধং ভৱে.

৩৭৫. ইচ্চাপুঞ্ঞং পকাসেন্তি, চতুৰাপাযসাধকং;

অঞ্ঞত্থাপি পৱত্তম্হি, ৱিপত্তিফলসাধনং.

৩৭৬. তিৱিধং পন পুঞ্ঞং তু, অনৱজ্জিট্ঠপাকদং;

দানং সীলং ভাৱনা চ, তীসু দ্ৱাৰেসু জাযতি.

৩৭৭. মহত্তগাৰৱা স্নেহা, দযা সদ্ধুপকাৰতো;

ভোগজীৱাভযধম্মং, দদতো দানমীৰিতং.

৩৭৮. পুঞ্ঞমাচাৰৱাৰিত্ত-ৱত্তমাৰব্ভ কুব্বতো;

পাপা চ ৱিৰমন্তস্স, হোতি সীলমযং তদা.

৩৭৯. দানসীলৱিনিমুত্তং, ভাৱনাতি পৱুচ্চতি;

পুঞ্ঞং ভাৱেন্তি সন্তানে, যস্মা তেন হিতাৱহং.

৩৮০. জনেত্ৱা কাযৱিঞ্ঞত্তিং, যদা পুঞ্ঞং কৰীযতি;

কাযকম্মং তদা হোতি, দানং সীলঞ্চ ভাৱনা.

৩৮১. ৱচীৱিঞ্ঞত্তিযা সদ্ধিং, যদা পুঞ্ঞং কৰীযতি;

ৱচীকম্মং মনোকম্মং, ৱিনা ৱিঞ্ঞত্তিযা কতং.

৩৮২. তংতংদ্ৱাৰিকমেৱাহু, তংতংদ্ৱাৰিকপাপতো;

ৱিৰমন্তস্স ৱিঞ্ঞত্তিং, ৱিনা ৱা সহ ৱা পুন.

৩৮৩. দানং সীলং ভাৱনা চ, ৱেয্যাৱচ্চাপচাযনা;

পত্তানুমোদনা পত্তি-দানং ধম্মস্স দেসনা;

সৱনং দিট্ঠিজুকম্ম-মিচ্চেৱং দসধা ঠিতং.

৩৮৪. কামপুঞ্ঞং পকাসেন্তি, কামে সুগতিসাধকং;

অঞ্ঞত্থাপি পৱত্তম্হি, সম্পত্তিফলসাধকং.

৩৮৫. চিত্তুপ্পাদপ্পভেদেন, কম্মং ৱীসতিধা ঠিতং;

কামাৱচৰমিচ্চেৱং, ৱিভাৱেন্তি ৱিভাৱিনো.

৩৮৬. ৰূপাৱচৰিকং কম্ম-মপ্পনাভাৱনামযং;

কসিণাদিকমাৰব্ভ, মনোদ্ৱাৰে পৱত্ততি.

৩৮৭. পথৱাপো চ তেজো চ,

ৱাযো নীলঞ্চ পীতকং;

লোহিতোদাতমাকাসং,

আলোকোতি ৱিসাৰদা.

৩৮৮. কসিণানি দসীৰেন্তি, আদিকম্মিকযোগিনো;

উদ্ধুমাতং ৱিনীলঞ্চ, ৱিপুব্বকং ৱিখাদিতং.

৩৮৯. ৱিচ্ছিদ্দকঞ্চ ৱিক্খিত্তং, হতৱিক্খিত্তলোহিতং;

পুড়ৱং অট্ঠিকঞ্চেতি, অসুভং দসধা ঠিতং.

৩৯০. বুদ্ধে ধম্মে চ সঙ্ঘে চ, সীলে চাগে চ অত্তনো;

দেৱতোপসমাযঞ্চ, ৱুত্তানুস্সতিভাৱনা.

৩৯১. মৰণে সতি নামেকা, তথা কাযগতাসতি;

আনাপানসতিচ্চেৱং, দসধানুস্সতীৰিতা.

৩৯২. মেত্তা কৰুণা মুদিতা, উপেক্খা ভাৱনাতি চ;

চতুব্ৰহ্মৱিহাৰা চ, অপ্পমঞ্ঞাতি ভাসিতা.

৩৯৩. আহাৰে তু পটিক্কূল-সঞ্ঞেকাতি পকাসিতা;

চতুধাতুৱৱত্থানং, চতুধাতুপৰিগ্গহো.

৩৯৪. চত্তাৰোৰুপ্পকা চেতি, চত্তালীস সমাসতো;

কম্মট্ঠানানি ৱুত্তানি, সমথে ভাৱনানযে.

৩৯৫. আনাপানঞ্চ কসিণং, পঞ্চকজ্ঝানিকং তহিং;

পঠমজ্ঝানিকা ৱুত্তা, কোট্ঠাসাসুভভাৱনা.

৩৯৬. মেত্তাদযো চতুজ্ঝানা, উপেক্খা পঞ্চমী মতা;

আৰুপ্পাৰুপ্পকা সেসা, উপচাৰসমাধিকা.

৩৯৭. কসিণাসুভকোট্ঠাসে,

আনাপানে চ জাযতি;

পটিভাগো তমাৰব্ভ,

তত্থ ৱত্ততি অপ্পনা.

৩৯৮. কম্মট্ঠানেসু সেসেসু, পটিভাগো ন ৱিজ্জতি;