৪. চতুত্থো পৰিচ্ছেদো

পকিণ্ণকৱিভাগো

২১১. ইতো পৰং কিচ্চতো চ, দ্ৱাৰালম্বণৱত্থুতো;

ভূমিপুগ্গলতো ঠানা, জনকা চ যথাৰহং.

২১২. সঙ্গহো চ পৱত্তি চ, পটিসন্ধিপৱত্তিসু;

চিত্তুপ্পাদৱসেনেৱ, সংখিপিত্ৱান নিয্যতে.

২১৩. ৰূপাৰূপমহাপাকা, মুপেক্খাতীৰণদ্ৱযং;

চুতিসন্ধিভৱঙ্গানি, চিত্তানেকূনৱীসতি.

২১৪. আৱজ্জনং তু যুগড়ং, দস্সনং সৱনং তথা;

ঘাযনং সাযনঞ্চেৱ, ফুসনং সম্পটিচ্ছনং.

২১৫. তীণি তীৰণচিত্তানি, একং ৱোট্ঠব্বনং মতং;

পঞ্চদ্ৱাৰে মনোদ্ৱাৰে, তদাৱজ্জননামকং.

২১৬. পঞ্চপঞ্ঞাস জৱনকিচ্চানীতি ৱিনিদ্দিসে;

ক্ৰিযা চাৱজ্জনং হিত্ৱা, কুসলাকুসলপ্ফলং.

২১৭. তদালম্বণচিত্তানি, ভৱন্তেকাদসেৱ হি;

মহাৱিপাকচিত্তানি, অট্ঠ সন্তীৰণত্তযং.

২১৮. পঞ্চকিচ্চন্তি ভাসন্তি, উপেক্খাতীৰণদ্ৱযং;

চতুকিচ্চা মহাপাকা, তিককিচ্চা মহগ্গতা.

২১৯. দুকিচ্চমিতি ৱোট্ঠব্বং, সুখতীৰণমীৰিতং;

পঞ্চৱিঞ্ঞাণজৱনমনোধাতুত্তিকং পন.

২২০. এককিচ্চাতি ভাসন্তি, অট্ঠসট্ঠি ৱিভাৱিনো;

ইচ্চেৱং কিচ্চভেদেন, চিত্তুপ্পাদা ৱৱত্থিতা.

২২১. চক্খুসোতঘানজিৱ্হা-কাযধাতু যথাক্কমং;

পঞ্চদ্ৱাৰা ভৱঙ্গং তু, মনোদ্ৱাৰং পৱুচ্চতি.

২২২. ঘানাদযো তযো ৰূপে, পঞ্চ চক্খাদযো তথা;

অৰূপে নত্থুভযত্থ, তদালম্বণমানসং.

২২৩. ছ দ্ৱাৰা ৱীথিচিত্তানি, সত্ত কামীসু ৰূপিসু;

দ্ৱাৰত্তযং ছ চিত্তানি, মনোদ্ৱাৰমৰূপিসু.

২২৪. পটিসন্ধাদিভূতা হি, অৱসানে চুতিট্ঠিতা;

মজ্ঝে ভৱঙ্গং ছেত্ৱান, পচ্চেকং ৱীথি জাযতি.

২২৫. ৰূপাদাৰম্মণে চক্খু-পসাদাদিম্হি ঘট্টিতে;

আৱজ্জনাদযো হোন্তি, ভৱঙ্গদ্ৱিচলা পৰং.

২২৬. পৰিণামে ভৱঙ্গস্স, আলম্বে গহণাৰহে;

তথা ৱীথি মনোদ্ৱাৰে, যথাসম্ভৱতো ভৱে.

২২৭. আৱজ্জা পঞ্চৱিঞ্ঞাণং, সম্পটিচ্ছনতীৰণং;

ৱোট্ঠব্বকামজৱনং, তদালম্বণমানসং.

২২৮. সত্তেৱং ৱীথিচিত্তানি, চিত্তুপ্পাদা চতুদ্দস;

চতুপঞ্ঞাস ৱিত্থাৰা, পঞ্চদ্ৱাৰে যথাৰহং.

২২৯. উপ্পাদট্ঠিতিভঙ্গানং, ৱসা চিত্তক্খণং তযং;

ৰূপানং ঠিতি একূন-পঞ্ঞাসঞ্চ দুকে দুকং.

২৩০. পৰিত্তেতিপৰিত্তে চ, মহন্তেতিমহন্তকে;

ৱোট্ঠব্বমোঘজৱনং, তদালম্বন্তি তং কমা.

২৩১. আৱজ্জনঞ্চ জৱনং, মনোদ্ৱাৰে তু গোচৰে;

ৱিভূতে তু তদালম্বং, ৱিত্থাৰা সত্তসট্ঠি তে.

২৩২. কামে জৱনসত্তাল-ম্বণানং নিযমে সতি;

ৱিভূতেতিমহন্তে চ, তদালম্বণমীৰিতং.

২৩৩. পঞ্চদ্ৱাৰে মনোধাতু, পচ্চেকম্হি যথাক্কমং;

পঞ্চৱিঞ্ঞাণযুগড়ং, পচ্চেকং তু পকাসিতং.

২৩৪. মনোদ্ৱাৰে তু জৱনং, মহগ্গতমনুত্তৰং;

সুখতীৰণৱোট্ঠব্বং, পৰিত্তজৱনং ছসু.

২৩৫. মহাৱিপাকচিত্তানি, উপেক্খাতীৰণদ্ৱযং;

ছসু দ্ৱাৰেসু জাযন্তি, ৱীথিমুত্তানি চেকদা.

২৩৬. সত্ততি ৱীথিচিত্তানি, ৱিপাকা তু মহগ্গতা;

নৱ ৱীথিৱিমুত্তা চ, দুৱিধাপি দসীৰিতা.

২৩৭. ইচ্চেৱং দ্ৱাৰভেদেন, ৱিভাৱেত্ৱা ততো পৰং;

ঞেয্যা গোচৰভেদেন, চিত্তুপ্পাদা যথাৰহং.

২৩৮. ৰূপসদ্দগন্ধৰসফোট্ঠব্বা পঞ্চ গোচৰা;

সেসঞ্চ ৰূপপঞ্ঞত্তিনামঞ্চ ধম্মগোচৰং.

২৩৯. পঞ্চদ্ৱাৰে ৱত্তমানং, পঞ্চালম্বং যথাক্কমং;

ছালম্বণং মনোদ্ৱাৰে, অতীতানাগতম্পি চ.

২৪০. পঞ্ঞত্তাতীতৱত্তন্তং, ছদ্ৱাৰগ্গহিতং পন;

ছড়াৰম্মণসঙ্খাতং, যেভুয্যেন ভৱন্তৰে.

২৪১. নিমিত্তগতিকম্মানং, কম্মমেৱাথ গোচৰং;

পটিসন্ধিভৱঙ্গানং, চুতিযাৱ যথাৰহং.

২৪২. পঞ্চালম্বে মনোধাতু, পচ্চেকম্হি যথাক্কমং;

পঞ্চৱিঞ্ঞাণযুগড়ং, পচ্চেকং তু পকাসিতং.

২৪৩. কামপাকানি সেসানি, হসনঞ্চ পৰিত্তকে;

ঞাণহীনানিপুঞ্ঞানি, জৱনানি অনিম্মলে.

২৪৪. তিহেতুকামপুঞ্ঞানি, পুঞ্ঞাভিঞ্ঞা চ লোকিযা;

সব্বালম্বে পৱত্তন্তি, অগ্গমগ্গফলং ৱিনা.

২৪৫. ক্ৰিযাভিঞ্ঞা চ ৱোট্ঠব্বং, ক্ৰিযা কামে তিহেতুকা;

সব্বালম্বে পৱত্তন্তি, নিব্বানে নিম্মলা সিযুং.

২৪৬. দুতিযঞ্চ চতুত্থঞ্চ, আৰুপ্পেসু মহগ্গতে;

মহগ্গতঞ্ঞে ৱোহাৰে, অযমালম্বণে নযো.

২৪৭. চক্খুসোতঘানজিৱ্হা-কাযহদযৱত্থুনা;

কামলোকে ছৱত্থূনি, নিস্সিতা সত্ত ধাতুযো.

২৪৮. পঞ্চৱিঞ্ঞাণধাতূ চ, তাসং পুব্বাপৰত্তযং;

মনোধাতু ততো সেসা, মনোৱিঞ্ঞাণধাতু চ.

২৪৯. চতস্সো ধাতুযো ৰূপে, তীণি ৱত্থূনি নিস্সিতা;

অৰূপে তু অনিস্সায, ধাত্ৱেকাৱ পৱত্ততি.

২৫০. পঞ্চপ্পসাদে নিস্সায, পচ্চেকং তু যথাক্কমং;

পঞ্চৱিঞ্ঞাণযুগড়ং, ভৱতীতি পকাসিতং.

২৫১. কামপাকানি সেসানি, মগ্গাৱজ্জনমাদিতো;

হসনং পটিঘাৰূপা-ৱচৰং ৱত্থুনিস্সিতং.

২৫২. দ্ৱেচত্তালীস নিস্সায, অনিস্সায চ জাযৰে;

অনিস্সায ৱিপাকানি, আৰুপ্পেতি সমীৰিতং.

২৫৩. ইচ্চেৱং ৱত্থুভেদেন, চিত্তুপ্পাদা পকাসিতা;

ততো পৰং ৱিভাৱেয্য, ভূমিভেদেন পণ্ডিতো.

২৫৪. নিৰযে পেতলোকে চ, তিৰচ্ছানাসুৰে তথা;

পাপকম্মোপপজ্জন্তি, পাপপাকায সন্ধিযা.

২৫৫. ভূমিস্সিতেসু দেৱেসু, মনুস্সেসুপি হীনকা;

অহেতুকায জাযন্তি, পুঞ্ঞপাকায সন্ধিযা.

২৫৬. চাতুমহাৰাজিকা চ, তাৱতিংসা চ যামকা;

তুসিতা চেৱ নিম্মানৰতিনো ৱসৱত্তিনো.

২৫৭. ইচ্চেৱং ছসু দেৱেসু, মনুস্সেসু চ জাযৰে;

মহাৱিপাকসন্ধীহি, কামপুঞ্ঞকতা জনা.

২৫৮. ব্ৰহ্মানং পাৰিসজ্জা চ, তথা ব্ৰহ্মপুৰোহিতা;

মহাব্ৰহ্মা চ জাযন্তি, পঠমজ্ঝানসন্ধিযা.

২৫৯. পৰিত্তা অপ্পমাণাভা, জাযন্তাভস্সৰা তথা;

দুতিযজ্ঝানপাকায, ততিযায চ সন্ধিযা.

২৬০. পৰিত্তসুভপ্পমাণসুভা চ সুভকিণ্হকা;

চতুত্থায তু জাযন্তি, ততিযজ্ঝানভূমিকা.

২৬১. ৱেহপ্ফলা অসঞ্ঞী চ, সুদ্ধাৱাসাতি সত্তসু;

পঞ্চমায চ জাযন্তি, অসঞ্ঞীচিত্তৱজ্জিতা.

২৬২. অৱিহা চ অতপ্পা চ, সুদস্সা চ সুদস্সিনো;

অকনিট্ঠাতি পঞ্চেতে, সুদ্ধাৱাসা পকাসিতা.

২৬৩. আকাসানঞ্চাযতনপাকাদীহি যথাক্কমং;

আকাসানঞ্চাযতনভূমিকাদীসু জাযৰে.

২৬৪. চুতিসন্ধিভৱঙ্গানং, ৱসা পাকা মহগ্গতা;

কামে সহেতুকা পাকা, তদালম্বণতোপি চ.

২৬৫. যথাৱুত্তনিযামেন, ভূমীস্ৱেকাৱ জাযৰে;

চিত্তুপ্পাদেসু সব্বত্থ, ন ত্ৱেৱাসঞ্ঞিনো মতা.

২৬৬. ঘানজিৱ্হাকাযধাতু-নিস্সিতং মানসং তথা;

পটিঘদ্ৱযমিচ্চেৱমট্ঠ হোন্তেৱ কামিসু.

২৬৭. চক্খুসোতঞ্চ ৱিঞ্ঞাণং, মনোধাতু চ তীৰণং;

কামৰূপেসু জাযন্তি, যথাসম্ভৱতো দস.

২৬৮. ৱোট্ঠব্বকামপুঞ্ঞানি, ৱিপ্পযুত্তানি দিট্ঠিযা;

উদ্ধচ্চসহিতঞ্চেতি, সব্বত্থেতানি চুদ্দস.

২৬৯. কঙ্খিতং দিট্ঠিযুত্তানি, সুদ্ধাৱাসৱিৱজ্জিতে;

সিতঞ্চ ৰূপজৱন-মাৰুপ্পাপাযৱজ্জিতে.

২৭০. কামক্ৰিযা সহেতূ চ, উদ্ধং লোকুত্তৰত্তযং;

চতুত্থাৰুপ্পজৱনং, সব্বত্থাপাযৱজ্জিতে.

২৭১. সেসমাৰুপ্পজৱনং, হিত্ৱাপাযং যথাক্কমং;

উদ্ধমাৰুপ্পভূমিঞ্চ, জাযতীতি ৱিভাৱযে.

২৭২. সোতাপত্তিফলাদীনি, চত্তাৰানুত্তৰানি তু;

সুদ্ধাৱাসমপাযঞ্চ, হিত্ৱা সব্বত্থ জাযৰে.

২৭৩. সুদ্ধাৱাসমপাযঞ্চ, হিত্ৱাৰূপঞ্চ সব্বথা;

পঠমানুত্তৰো মগ্গো, সেসট্ঠানেসু জাযতি.

২৭৪. সত্ততিংস অপাযেসু, কামেসীতি পকাসিতা;

পঞ্চপঞ্ঞাস সুদ্ধেসু, ৰূপেস্ৱেকূনসত্ততি.

২৭৫. ছচত্তালীস আৰুপ্পে, উপ্পজ্জন্তি যথাৰহং;

ইচ্চেৱং ভূমিভেদেন, চিত্তুপ্পাদা পকাসিতা.

২৭৬. তিহেতুসত্তে সব্বানি, দ্ৱিহেতুকাহেতুকে পন;

পৰিত্তানি ৱিৱজ্জেত্ৱা, ঞাণপাকক্ৰিযাজৱে.

২৭৭. পুথুজ্জনানং সম্ভোন্তি, দিট্ঠিযুত্তঞ্চ কঙ্খিতং;

সোতাপন্নাদিতিণ্ণম্পি, ফলং হোতি যথাসকং.

২৭৮. ৱীতৰাগস্স জৱনং, ক্ৰিযা চন্তিমনুত্তৰং;

পুথুজ্জনাদিতিণ্ণম্পি, পটিঘং সমুদীৰিতং.

২৭৯. জৱা পুথুজ্জনাদীনং, চতুন্নং সেস সাসৱা;

সাসৱাৱজ্জপাকানি, পঞ্চন্নমপি দীপযে.

২৮০. পুথুজ্জনেসু তেসট্ঠি, সোতাপন্নাদিকদ্ৱযে;

একূনসট্ঠি চিত্তানি, অনাগামিকপুগ্গলে.

২৮১. সত্তপঞ্ঞাস জাযন্তি, তেপঞ্ঞাস অনাসৱে;

মগ্গট্ঠেসু সকো মগ্গো, পুগ্গলেসু অযং নযো.

২৮২. তিহেতুকামচুতিযা, সব্বাপি পটিসন্ধিযো;

দ্ৱিহেতাহেতুচুতিযা, কামাৱচৰসন্ধিযো.

২৮৩. ৰূপাৱচৰচুতিযা, সহেতুপটিসন্ধিযো;

আৰুপ্পাৰুপ্পচুতিযা, হেট্ঠিমাৰুপ্পৱজ্জিতা.

২৮৪. পটিসন্ধি তথা কামে, তিহেতুপটিসন্ধিযো;

ভৱন্তীতি চ মেধাৱী, চুতিসন্ধিনযং নযে.