৩. ততিযো পৰিচ্ছেদো

ভেদসঙ্গহৱিভাগো

১২৩. এৱং ভেদসভাৱেসু, তেস্ৱেৱ পুন সঙ্গহং;

সভাৱত্থৱিসেসেহি, পৱক্খামি ইতো পৰং.

১২৪. অসাধাৰণঞাণেহি, সত্থা ৱত্থুৱিৱেচকো;

সঙ্গহেত্ৱা সভাগেহি, ধম্মে দস্সেসি চক্খুমা.

১২৫. দিট্ঠিভিনিৱেসট্ঠেন, যথাভূতসভাৱতো;

পৰমামসতিচ্চেকা, পৰামাসোতি ভাসিতা.

১২৬. কিলেসাসুচিভাৱেন, ৱণস্সাৱৰসো ৱিয;

আলিম্পন্তাৱ সন্তানং, সৱন্তীতি পকাসিতা.

১২৭. কামতণ্হা ভৱতণ্হা, দিট্ঠাৱিজ্জাতি আসৱা;

চত্তাৰো আসৱট্ঠেন, তযো ধম্মা সভাৱতো.

১২৮. এতেৱো ঘাতি ৱুত্তাৱ, দ্ৱাৰালম্বাভিৱাহিনো;

ওত্থৰিত্ৱা পৰাভূতে, হৰন্তা পাণিনো ভৱে.

১২৯. যোগাতি চাহু তে এৱ, পাণিনো ভৱযন্তকে;

দ্ৱাৰালম্বাভিসম্বন্ধা, যন্তবন্ধাৱ যোজিতা.

১৩০. সন্তানমধিগণ্হন্তা, মালুৱাৱ মহাতৰুং;

গণ্হন্তা দড়্হমালম্বং, মণ্ডূকমিৱ পন্নগো.

১৩১. কামতণ্হা চ দিট্ঠি চ, উপাদানা চতুব্বিধা;

দিট্ঠি দিট্ঠিসীলব্বত-মত্তৱাদোতি ভেদিতা.

১৩২. কাযেন কাযং গন্থেন্তা, দুপ্পমুঞ্চানুৱেঠিনো;

কথিতা কাযগন্থাতি, তণ্হাব্যাপাদদিট্ঠিযো.

১৩৩. সীলব্বতপৰামাসো, ইতি দিট্ঠি ৱিভেদিতা;

ইদংসচ্চাভিনিৱেসো, ইতি চেৱং চতুব্বিধা.

১৩৪. নেক্খম্মং পলিবোধেন্তা, ভাৱনাপৰিপন্থকা;

সন্তানমণ্ডকোসাৱ, পৰিযোনন্ধকাতি চ.

১৩৫. কামচ্ছন্দো চ ব্যাপাদো, থিনমিদ্ধঞ্চ সংসযো;

অৱিজ্জুদ্ধচ্চকুক্কুচ্চমিতি নীৱৰণা মতা.

১৩৬. আগাড়্হং পৰিযাদায, ওগয্হনুপ্পৱত্তিনো;

যোপ্পৰোগাৱ সন্তান-মনুসেন্তীতি ভাসিতা.

১৩৭. কামৰাগো ভৱৰাগো, পটিঘো মানদিট্ঠিযো;

কঙ্খাৱিজ্জাতি সত্তেৱ, ছ ধম্মানুসযা মতা.

১৩৮. দ্ৱাৰালম্বণবন্ধেন, পাণীনং ভৱমণ্ডলে;

সংযোজনানি ৱুত্তানি, পাসবন্ধাৱ পক্খিনং.

১৩৯. কামৰূপাৰূপৰাগা, পটিঘো মোহসংসযো;

দিট্ঠি সীলব্বতং মানো, উদ্ধচ্চেন দসা ভৱে.

১৪০. ৰূপাৰূপৰাগুদ্ধচ্চং, অভিধম্মে ৱিনা পুন;

ভৱৰাগিস্স মচ্ছেৰং, গহেত্ৱা দসধা সিযুং.

১৪১. সংক্লেপযন্তি সন্তানং, উপঘাতেন্তি পাণিনো;

সহজাতেক্লেসেন্তীতি, কিলেসাতি পকাসিতা.

১৪২. লোভো দোসো চ মোহো চ,

দিট্ঠি মানো চ সংসযো;

থিনাহিৰিকনোত্তপ্প-

মুদ্ধচ্চেন সিযুং দস.

১৪৩. নৱসঙ্গহিতা এত্থ, দিট্ঠিলোভা পকাসিতা;

সত্তসঙ্গহিতাৱিজ্জা, পটিঘো পঞ্চসঙ্গহো.

১৪৪. চতুসঙ্গহিতা কঙ্খা, মানুদ্ধচ্চা তিসঙ্গহা;

দুকসঙ্গহিতং থীনং, কুক্কুচ্চমেকসঙ্গহং.

১৪৫. দ্ৱিধাহিৰিকনোত্তপ্প-মিস্সামচ্ছৰিযং তথা;

ইচ্চেৱং দসধা ৱুত্তা, পাপকেস্ৱেৱ সঙ্গহা.

১৪৬. পৰামাসাসৱোঘা চ, যোগুপাদানগন্থতো;

নীৱাৰণানুসযতো, সংযোজনকিলেসতো.

১৪৭. চুদ্দসেৱ তু সঙ্খেপা, সত্তপঞ্ঞাস ভেদতো;

যথাধম্মানুসাৰেন, চিত্তুপ্পাদেসু যোজযে.

১৪৮. ততোপৰে নোপৰামা-সাদিভেদিতসঙ্গহা;

চিত্তং চেতসিকং ৰূপং, নিব্বানমিতি দীপযে.

১৪৯. ইচ্চাকুসলধম্মানং, ঞত্ৱা সঙ্গহমুত্তৰং;

মিস্সকা নাম ৱিঞ্ঞেয্যা, যথাসম্ভৱতো কথং;

১৫০. লোভো দোসো চ মোহো চ,

একন্তাকুসলা তযো;

অলোভাদোসামোহো চ,

কুসলাব্যাকতা তথা.

১৫১. পাদপস্সেৱ মূলানি, থিৰভাৱায পচ্চযা;

মূলভাৱেন ধম্মানং, হেতূ ধম্মা ছ দীপিতা.

১৫২. ৱিতক্কো চ ৱিচাৰো চ, পীতি চেকগ্গতা তথা;

সোমনস্সং দোমনস্সং, উপেক্খাতি চ ৱেদনা.

১৫৩. আহচ্চুপনিজ্ঝাযন্তা, নিজ্ঝানট্ঠেন পচ্চযা;

ঝানধম্মাতি সত্থাহ, পঞ্চ ৱত্থুসভাৱতো.

১৫৪. সম্মাদিট্ঠি চ সঙ্কপ্পো, ৱাযামো ৱিৰতিত্তযং;

সম্মাসতি সমাধী চ, মিচ্ছাদিট্ঠি চ সম্ভৱা.

১৫৫. সম্মামিচ্ছা চ নীযন্তা, নিয্যানট্ঠেন পচ্চযা;

মগ্গঙ্গা দ্ৱাদসক্খাতা, নৱ ধম্মা সভাৱতো.

১৫৬. অত্তভাৱং পৱত্তেন্তা, ওজট্ঠমকৱেদনং;

পটিসন্ধিনামৰূপ-মাহৰন্তা যথাক্কমং.

১৫৭. কবড়ীকাৰো আহাৰো,

ফস্সো সঞ্চেতনা তথা;

ৱিঞ্ঞাণমিতি চত্তাৰো,

আহাৰাতি পকাসিতা.

১৫৮. ধম্মানং সহজাতানং, ইন্দ্ৰিযট্ঠেন পচ্চযা;

অত্তানমিস্সৰট্ঠেন, অনুৱত্তাপকা তথা.

১৫৯. সদ্ধা চ সতি পঞ্ঞা চ, ৱীৰিযেকগ্গতাপি চ;

ৱেদনা জীৱিতং চিত্তং, অট্ঠ ৰূপিন্দ্ৰিযানি চ.

১৬০. কথং জীৱিতমেকং তু, সুখং দুক্খন্তি ৱেদনা;

সোমনস্সং দোমনস্সং, উপেক্খাতি চ ভেদিতা.

১৬১. পঞ্ঞাদিমগ্গেনঞ্ঞাত-ঞ্ঞস্সামীতিন্দ্ৰিযং ভৱে;

মজ্ঝে অঞ্ঞিন্দ্ৰিযমন্তে, অঞ্ঞাতাৱিন্দ্ৰিযং তথা.

১৬২. সোড়সেৱ সভাৱেন, ইন্দ্ৰিযট্ঠৱিভাগতো;

ইন্দ্ৰিযানীতি ৱুত্তানি, বাৱীসতি ৱিভাৱযে.

১৬৩. দড়্হাধিট্ঠিতসন্তানা, ৱিপক্খেহি অকম্পিযা;

বলৱন্তসভাৱেন, বলধম্মা পকাসিতা.

১৬৪. সদ্ধা সতি হিৰোত্তপ্পং, ৱীৰিযেকগ্গতা তথা;

পঞ্ঞাহিৰিকানোত্তপ্প-মিচ্চেৱং নৱধা মতা.

১৬৫. জেট্ঠা পুব্বঙ্গমট্ঠেন, পুঞ্ঞাপুঞ্ঞপৱত্তিযং;

পচ্চযাধিপ্পতেয্যেন, সহজানং যথাৰহং.

১৬৬. চত্তাৰোধিপতী ৱুত্তা, আধিপ্পচ্চসভাৱতো;

ছন্দো চিত্তঞ্চ ৱীৰিযং, ৱীমংসাতি চ তাদিনা.

১৬৭. পঞ্চসঙ্গহিতা পঞ্ঞা, ৱাযামেকগ্গতা পন;

চতুসঙ্গহিতা চিত্তং, সতি চেৱ তিসঙ্গহা.

১৬৮. সঙ্কপ্পো ৱেদনা সদ্ধা, দুকসঙ্গহিতা মতা;

একেকসঙ্গহা সেসা, অট্ঠৱীসতি ভাসিতা;

ইচ্চেৱং সত্তধা ভেদো, ৱুত্তো মিস্সকসঙ্গহো.

১৬৯. হেতুঝানঙ্গমগ্গঙ্গা, আহাৰিন্দ্ৰিযতো তথা;

বলাধিপ্পতিতো চেৱ, পুঞ্ঞাপুঞ্ঞাদিমিস্সতা;

ছত্তিংসেৱ সভাৱেন, চতুসট্ঠি পভেদতো.

১৭০. ইচ্চেৱং সঙ্গহেত্ৱান, ৱিভাৱেয্য ততো পৰং;

চিত্তুপ্পাদপভেদেসু, যথাসম্ভৱতো কথং.

১৭১. সিতাৱজ্জনৱিঞ্ঞাণং, সম্পটিচ্ছনতীৰণা;

অট্ঠাৰসাহেতুকাৱ, মোমূহা একহেতুকা.

১৭২. সেসা তু কুসলা ঞাণৱিযুত্তা চ দ্ৱিহেতুকা;

চিত্তুপ্পাদাপৰে সত্ত-চত্তালীস তিহেতুকা.

১৭৩. পঞ্চৱিঞ্ঞাণমজ্ঝানং, দ্ৱিঝানঙ্গিকমীৰিতং;

চতুত্থপঞ্চমজ্ঝানং, তিঝানং ততিযং মতা.

১৭৪. চতুঝানং তু দুতিযং, কামে চ সুখৱজ্জিতা;

পঞ্চঝানং তু পঠমং, কামে চ সুখিতা মতা.

১৭৫. পঠমানুত্তৰং ঝানং, অট্ঠমগ্গঙ্গিকং মতং;

সত্তমগ্গঙ্গিকং নাম, সেসঝানমনুত্তৰং.

১৭৬. লোকিযং পঠমং ঝানং, তথা কামে তিহেতুকা;

পঞ্চমগ্গঙ্গিকা নাম, চিত্তুপ্পাদা পকাসিতা.

১৭৭. সেসং মহগ্গতং ঝানং, সম্পযুত্তা চ দিট্ঠিযা;

ঞাণেন ৱিপ্পযুত্তা চ, চতুমগ্গঙ্গিকা মতা.

১৭৮. পটিঘুদ্ধচ্চযুত্তা চ, ৱিপ্পযুত্তা চ দিট্ঠিযা;

তিমগ্গঙ্গং দুমগ্গঙ্গং, কঙ্খিতং সমুদীৰিতং.

১৭৯. ন হোন্তাহেতুকে মগ্গা, চিত্তট্ঠিতি চ কঙ্খিতে;

ৱিদিতা নিযততা চ, লোকিযেসু ন উদ্ধটা.

১৮০. কামেসু কবড়ীকাৰো, অনাহাৰো অসঞ্ঞিনো;

চিত্তুপ্পাদেসু সব্বত্থ, আহাৰত্তযমীৰিতং.

১৮১. ইন্দ্ৰিযানি ৱিভাৱেয্য, নৱধানুত্তৰে বুধো;

অট্ঠধা সমুদীৰেয্য, লোকিযেসু তিহেতুকে.

১৮২. সত্তধা পন ঞাণেন, ৱিপ্পযুত্তে পকাসযে;

সিতৱোট্ঠব্বনাপুঞ্ঞে, পঞ্চধা কঙ্খিতে পন.

১৮৩. চতুধা তিৱিধা সেসে, চিত্তুপ্পাদে সমীৰযে;

তিহেতুকা সত্তবলা, ছবলা তু দুহেতুকা.

১৮৪. চতুবলা অকুসলা, কঙ্খিতং তিবলং মতং;

দ্ৱিবলং সিতৱোট্ঠব্ব-মবলং সেসমীৰিতং.

১৮৫. জৱনেধিপতীনং তু, যো কোচেকো তিহেতুকে;

দ্ৱিহেতুকে ৱা কুসলে, ৱীমংসা নোপলব্ভতি.

১৮৬. লোকিযেসু ৱিপাকেসু,

মোহমূলে অহেতুকে;

যথাসম্ভৱৱুত্তিত্তা,

নত্থাধিপতি কোচিপি.

১৮৭. সম্ভোতি কাযৱিঞ্ঞাণে, পুঞ্ঞপাকে সুখিন্দ্ৰিযং;

দুক্খিন্দ্ৰিযম্পি তত্থেৱ, পাপপাকম্হি ভাসিতং.

১৮৮. সন্তীৰণঞ্চ হসনং, সোমনস্সানি সোড়স;

পঠমাদিচতুজ্ঝানং, সোমনস্সযুতং ভৱে.

১৮৯. দোমনস্সযুত্তা দ্ৱেৱ, চিত্তুপ্পাদা পকাসিতা;

তদঞ্ঞে পন সব্বেপি, পঞ্চপঞ্ঞাসুপেক্খকা.

১৯০. ৱেদনাসম্পযোগঞ্চ, ৱিনিব্ভুজ্জেৱমট্ঠধা;

হেতুযোগাদিভেদেহি, চিত্তুপ্পাদা পকাসিতা.

১৯১. তংতংৱিযোগভেদঞ্চ, পচ্চেকমথ মিস্সিতং;

যথাৱুত্তানুসাৰেন, যথাসম্ভৱতো নযে.