২. দুতিযো পৰিচ্ছেদো

লক্খণৰসুপট্ঠানৱিভাগো

৬৭. সভাৱো লক্খণং নাম, কিচ্চসম্পজ্জনা ৰসো;

গয্হাকাৰো উপট্ঠানং, পদট্ঠানং তু পচ্চযো.

৬৮. অত্তুপলদ্ধিসঙ্খাতা, সম্পত্তা চ পনত্থতো;

লক্খণৰসুপট্ঠানা, ৱোহাৰাভোগভেদিতা.

৬৯. তেপঞ্ঞাসসভাৱেসু, তস্মা ভেদং যথাৰহং;

লক্খণাদিপ্পকাৰেহি, পৱক্খামি ইতো পৰং.

৭০. চিন্তেতীতি ভৱে চিত্তং, চিন্তনমত্তমেৱ ৱা;

সম্পযুত্তাথ ৱা তেন, চিন্তেন্তীতি চ গোচৰং.

৭১. ফুসতীতি ভৱে ফস্সো, ফুসনং ৱাথ কেৱলং;

সম্পযুত্তাথ ৱা তেন, ফুসন্তীতি চ গোচৰং.

৭২. এৱং কত্তৰি ভাৱে চ, কৰণে চ যথাৰহং;

তেপঞ্ঞাসসভাৱেসু, সদ্দনিব্বচনং নযে.

৭৩. আলম্বণমনং চিত্তং, তংৱিজাননলক্খণং;

সহজাধিট্ঠানৰসং, চিন্তাকপ্পোতি গয্হতি.

৭৪. আলম্বণসমোধানো,

ফস্সো ফুসনলক্খণো;

সঙ্ঘট্টনৰসো তত্থ,

সন্নিপাতোতি গয্হতি.

৭৫. ৱেদনালম্বণৰসা, সা ৱেদযিতলক্খণা;

গোচৰানুভৱৰসা, অনুভুত্তীতি গয্হতি.

৭৬. আকাৰগহণং সঞ্ঞা, সা সঞ্জাননলক্খণা;

নিমিত্তুপ্পাদনৰসা, উপলক্খাতি গয্হতি.

৭৭. চেতনা চিত্তৱিপ্ফাৰা, সাযং ব্যাপাৰলক্খণা;

কম্মন্তাযূহনৰসা, সংৱিধানন্তি গয্হতি.

৭৮. একগ্গতা অৱিক্খেপো, সাৱিসাহাৰলক্খণা;

সম্পিণ্ডনৰসা চিত্তং, সমোধানন্তি গয্হতি.

৭৯. যাপনং সহজাতান-মনুপালনলক্খণং;

জীৱিতং জীৱনৰসং, আযুবন্ধোতি গয্হতি.

৮০. সাৰণা মনসীকাৰো, সমন্নাহাৰলক্খণো;

সংযোজনৰসো চিত্ত-পটিপত্তীতি গয্হতি.

৮১. সঙ্কপ্পনলক্খণো তক্কো, সহজাভিনিৰোপনো;

আলম্বাহননৰসো, সন্নিৰুজ্ঝোতি গয্হতি.

৮২. ৱিচাৰো অনুসন্ধানো, অনুমজ্জনলক্খণো;

চিত্তানুযোজনৰসো, অনুপেক্খাতি গয্হতি.

৮৩. অধিমোক্খো অসংসপ্পো, সুসন্নিট্ঠানলক্খণো;

নিচ্চলাপাদনৰসো, দড়্হৱুত্তীতি গয্হতি.

৮৪. ৱীৰিযং পন ৱাযামো, মহুস্সাহনলক্খণো;

কিচ্চাসংসীদনৰসো, উপত্থম্ভোতি গয্হতি.

৮৫. আলম্বত্থিকতা ছন্দো, কত্তুকামতলক্খণো;

আলম্বণেসনৰসো, হত্থাদানন্তি গয্হতি.

৮৬. সহজাতানুফৰণা, সম্পিযাযনলক্খণা;

সম্পীননৰসা পীতি, পামোজ্জমিতি গয্হতি.

৮৭. চেতোসদ্দহনং সদ্ধা, ভূতোকপ্পনলক্খণা;

হিতপক্খন্দনৰসা, অধিমুত্তীতি গয্হতি.

৮৮. অসম্মোসা সভাৱেসু, সতি ধাৰণলক্খণা;

ধম্মাপিলাপনৰসা, অপ্পমাদোতি গয্হতি.

৮৯. হিৰী জেগুচ্ছা পাপেসু, সা হৰাযনলক্খণা;

হীড়সংকোচনৰসা, পাপলজ্জাতি গয্হতি.

৯০. পাপসাৰজ্জমোত্তপ্পং, উব্বেগুত্তাসলক্খণং;

ভযসঙ্কোচনৰসং, অৱিস্সাসোতি গয্হতি.

৯১. অলোভো অনভিসঙ্গো, অপৰিগ্গহলক্খণো;

মুত্তপ্পৱত্তনৰসো, অসংসগ্গোতি গয্হতি.

৯২. অদোসো চিত্তসাখল্যং, অব্যাপজ্জনলক্খণো;

সণ্হপ্পৱত্তনৰসো, সোম্মভাৱোতি গয্হতি.

৯৩. অমোহো খলিতাভাৱো, পটিৱিজ্ঝনলক্খণো;

ৱিসযোভাসনৰসো, পটিবোধোতি গয্হতি.

৯৪. তত্ৰমজ্ঝত্ততোপেক্খা, সমীকৰণলক্খণা;

অপক্খপাতনৰসা, সমৱাহোতি গয্হতি.

৯৫. পস্সদ্ধি কাযচিত্তানং, দৰথাভাৱলক্খণা;

অপৰিপ্ফন্দনৰসা, সীতিভাৱোতি গয্হতি.

৯৬. লহুতা কাযচিত্তানং, অদন্ধাকাৰলক্খণা;

অৱিত্থাৰৰসা সল্লহুকৱুত্তীতি গয্হতি.

৯৭. মুদুতা কাযচিত্তানং, কক্খড়াভাৱলক্খণা;

কিচ্চাৱিৰোধনৰসা, অনুকুল্যন্তি গয্হতি.

৯৮. কম্মঞ্ঞতা উভিন্নম্পি, অলংকিচ্চস্স লক্খণা;

পৱত্তিসম্পত্তিৰসা, যোগভাৱোতি গয্হতি.

৯৯. তথা পাগুঞ্ঞতা দ্ৱিন্নং, ৱিসদাকাৰলক্খণা;

সুখপ্পৱত্তনৰসা, সেৰিভাৱোতি গয্হতি.

১০০. উজুতা কাযচিত্তানং, কুটিলাভাৱলক্খণা;

জিম্হনিম্মদনৰসা, উজুৱুত্তীতি গয্হতি.

১০১. সম্মাৱাচা ৱচীসুদ্ধি, ৱাচাসংযমলক্খণা;

মিচ্ছাৱাচোৰমৰসা, ৱচীৱেলাতি গয্হতি.

১০২. সম্মাকম্মং ক্ৰিযাসুদ্ধং, সম্মাকৰণলক্খণং;

মিচ্ছাকম্মোৰমৰসং, ক্ৰিযাৱেলাতি গয্হতি.

১০৩. সম্মাজীৱো ৱিসুদ্ধেট্ঠি, অল্লিট্ঠাজীৱলক্খণো;

মিচ্ছাজীৱোৰমৰসো, সম্মাৱুত্তীতি গয্হতি.

১০৪. কৰুণা দীনসত্তেসু, দুক্খাপনযলক্খণা;

সোত্থিতাপত্থনৰসা, অনুকম্পাতি গয্হতি.

১০৫. সুখট্ঠিতেসু মুদিতা, অনুমোদনলক্খণা;

চেতোৱিকাসনৰসা, অৱিৰোধোতি গয্হতি.

১০৬. চেতোসাৰজ্জনা লোভো, অপৰিচ্চাগলক্খণো;

আলম্বগিজ্ঝনৰসো, অভিলগ্গোতি গয্হতি.

১০৭. চেতোব্যাপজ্জনং দোসো, সম্পদুস্সনলক্খণো;

আলম্বণঘাতৰসো, চণ্ডিক্কমিতি গয্হতি.

১০৮. চেতোসম্মুয্হনং মোহো,

সো সম্মুয্হনলক্খণো;

সভাৱচ্ছাদনৰসো,

অন্ধভাৱোতি গয্হতি.

১০৯. পাপাজিগুচ্ছাহিৰিকং, নিল্লজ্জাকাৰলক্খণং;

পাপোপলাপনৰসং, মলগ্গাহোতি গয্হতি.

১১০. অসাৰজ্জনমনোত্তপ্পমনুত্তাসনলক্খণং;

পাপপক্খন্দনৰসং, পাগব্ভমিতি গয্হতি.

১১১. দিট্ঠি দড়্হৱিপল্লাসো, সা পৰামাসলক্খণা;

তুচ্ছাভিনিৱেসনৰসা, মিচ্ছাগাহোতি গয্হতি.

১১২. ‘‘অহস্মী’’তি মঞ্ঞমানো, সো সমুন্নতিলক্খণো;

কেতুসম্পগ্গহৰসো, অহংকাৰোতি গয্হতি.

১১৩. পৰসম্পত্তীসু ইস্সা, অক্খমাকাৰলক্খণা;

চেতোৱিকুচনৰসা, ৱিমুখত্তন্তি গয্হতি.

১১৪. পৰিগ্গহেসু মচ্ছেৰং, সন্নিগূহনলক্খণং;

সামঞ্ঞাসহনৰসং, ৱেৱিচ্ছমিতি গয্হতি.

১১৫. চেতোপহননং থীনং, তং সংসীদনলক্খণং;

উস্সাহভঞ্জনৰসং, সংখিত্তত্তন্তি গয্হতি.

১১৬. ৱিঘাতো সহজাতানং, মিদ্ধং মোহনলক্খণং;

সত্তিসংভঞ্জনৰসং, আতুৰত্তন্তি গয্হতি.

১১৭. উদ্ধচ্চং চিত্তৱিক্খেপো, অৱূপসমলক্খণং;

চেতোনৱট্ঠানৰসং, ভন্তত্তমিতি গয্হতি.

১১৮. ৱিপ্পটিসাৰো কুক্কুচ্চমনুসোচনলক্খণং;

অত্তানুসোচনৰসং, পচ্ছাতাপোতি গয্হতি.

১১৯. কঙ্খাযনা ৱিচিকিচ্ছা, অসন্নিট্ঠানলক্খণা;

অনেকগাহনৰসা, অপ্পতিট্ঠাতি গয্হতি.

১২০. ইচ্চেৱং লক্খণাদীহি, ৱিভাৱেয্য ৱিচক্খণো;

তেপঞ্ঞাসসভাৱেসু, সভাৱাকাৰলক্খণং.

১২১. লক্খণত্থকুসলা সলক্খণে,

লক্খণত্থপৰমেপি কেৱলং;

লক্খণুগ্গহসুখায ৱণ্ণযুং,

লক্খণাদিমুখতো সলক্খণং.

১২২. অত্থং তমেৱমনুগম্ম মযেত্থ ৱুত্ত-

মত্থানমত্থনযনত্থমনেকধাপি;

পত্থেয্য মেত্থ ৱচনত্থনযেহি ঞাণ-

মত্থেসু বুদ্ধৱচনত্থনযত্থিকেহি.

ইতি নামৰূপপৰিচ্ছেদে লক্খণৰসুপট্ঠানৱিভাগো নাম

দুতিযো পৰিচ্ছেদো.