১. পঠমো পৰিচ্ছেদো

নামত্তযৱিভাগো

৩. তত্থ চিত্তং চেতসিকং, নিব্বানন্তি মতং তিধা;

নামং ৰূপং তু দুৱিধং, ভূতোপাদাযভেদতো.

৪. কামভূমাদিভেদেন, তত্থ চিত্তং চতুব্বিধং;

চেতোযুত্তা দ্ৱিপঞ্ঞাস, ধম্মা চেতসিকা মতা.

৫. চক্খুসোতঘানজিৱ্হা-কাযৱিঞ্ঞাণধাতুযো;

সম্পটিচ্ছনচিত্তঞ্চ, তথা সন্তীৰণদ্ৱযং.

৬. সোমনস্সসহগতং, উপেক্খাসহিতন্তি চ;

ইচ্চাহেতুকচিত্তানি, পুঞ্ঞপাকানি অট্ঠধা.

৭. সোমনস্সযুতং তত্থ, হিত্ৱা সন্তীৰণং তথা;

সত্তাকুসলপাকানি, তানেৱাতি ৱিনিদ্দিসে.

৮. পঞ্চদ্ৱাৰমনোদ্ৱাৰাৱজ্জনং হসনন্তি চ;

ক্ৰিযচিত্তমুদীৰিতং, তিৱিধম্পি অহেতুকং.

৯. এৱং অট্ঠাৰসৱিধং, মানসং হোতিহেতুকং;

মূলভেদেনাকুসলং, চিত্তং তু তিৱিধং মতং.

১০. সোমনস্সসহগতং, উপেক্খাসহিতং তথা;

দিট্ঠিগতসম্পযুত্তং, ৱিপ্পযুত্তন্তি ভেদিতং.

১১. অসঙ্খাৰং সসঙ্খাৰমিতি ভিন্নং পনট্ঠধা;

লোভমূলং পকাসেন্তি, তত্থাকুসলমানসং.

১২. দোমনস্সসহগতং, পটিঘেন সমাযুতং;

দোসমূলমসঙ্খাৰং, সসঙ্খাৰন্তিপি দ্ৱিধা.

১৩. ৱিচিকিচ্ছাসহগতং, উদ্ধচ্চসহিতন্তি চ;

মোহমূলঞ্চ দুৱিধং, উপেক্খায সমাযুতং.

১৪. দ্ৱাদসাকুসলানেৱং, চিত্তানীতি ৱিভাৱযে;

হিত্ৱাহেতুকপাপানি, সোভনানি ততো পৰং.

১৫. সোমনস্সসহগতং, উপেক্খাসহিতং তথা;

দ্ৱিধা ঞাণেন সংযুত্তং, ৱিপ্পযুত্তন্তি ভেদিতং.

১৬. অসঙ্খাৰং সসঙ্খাৰমিতি ভিন্নং পনট্ঠধা;

সহেতুকামাৱচৰ-পুঞ্ঞপাকক্ৰিযা ভৱে.

১৭. কামে তেৱীস পাকানি, পুঞ্ঞাপুঞ্ঞানি ৱীসতি;

একাদস ক্ৰিযা চেতি, চতুপঞ্ঞাস সব্বথা.

১৮. তক্কচাৰপীতিসুখেকগ্গতাসহিতং পন;

পঠমজ্ঝানকুসলং, ৱিপাকঞ্চ ক্ৰিযা তথা.

১৯. দুতিযং তক্কতো হীনং, ততিযং তু ৱিচাৰতো;

চতুত্থং পীতিতো হীনং, উপেক্খেকগ্গতাযুতং.

২০. পঞ্চমং পঞ্চদসধা, ৰূপাৱচৰমীৰিতং;

পঞ্চমজ্ঝানমেৱেকমৰূপাৱচৰং পন.

২১. আকাসানঞ্চাযতনং, পুঞ্ঞপাকক্ৰিযা তথা;

ৱিঞ্ঞাণঞ্চাযতনঞ্চ, আকিঞ্চঞ্ঞাযতনকং;

নেৱসঞ্ঞানাসঞ্ঞাযতনং দ্ৱাদসধা ভৱে.

২২. সোতাপত্তিমগ্গচিত্তং, ফলচিত্তং তথাপৰং;

সকদাগামানাগামি, অৰহত্তন্তি অট্ঠধা.

২৩. ঝানঙ্গযোগভেদেন, কত্ৱেকেকং তু পঞ্চধা;

ৱিত্থাৰানুত্তৰং চিত্তং, চত্তালীসৱিধং ভৱে.

২৪. ৰূপাৱচৰচিত্তানি, গয্হন্তানুত্তৰানি চ;

পঠমাদিজ্ঝানভেদে, আৰুপ্পঞ্চাপি পঞ্চমে.

২৫. দ্ৱাদসাকুসলানেৱং, কুসলানেকৱীসতি;

ছত্তিংসেৱ ৱিপাকানি, ক্ৰিযচিত্তানি ৱীসতি.

২৬. একৱীসসতং ৱাথ, একূননৱুতীৱিধং;

চিত্তং তংসম্পযোগেন, ভিন্না চেতসিকা তথা.

২৭. ফস্সো চ ৱেদনা সঞ্ঞা, চেতনেকগ্গতা তথা;

জীৱিতং মনসীকাৰো, সব্বসাধাৰণা মতা.

২৮. তক্কচাৰাধিমোক্খা চ, ৱীৰিযং ছন্দপীতিযো;

পকিণ্ণকা ছ অক্খাতা, তেৰসঞ্ঞসমানতা.

২৯. পকিণ্ণকা ন ৱিঞ্ঞাণে, ৱিতক্কো দুতিযাদিসু;

ৱিচাৰো ততিযাদিম্হি, অধিমোক্খো তু কঙ্খিতে.

৩০. সন্তীৰণমনোধাতুত্তিকেসু ৱীৰিযং তথা;

চতুত্থসুখিতে পীতি, ছন্দোহেতুম্হি মোমুহে.

৩১. ছসট্ঠি পঞ্চপঞ্ঞাস, একাদস চ সোড়স;

সত্ততি ৱীসতি চেৱ, তানি চিত্তানি দীপযে.

৩২. মোহাহিৰিকানোত্তপ্প-মুদ্ধচ্চং সব্বপাপজং;

ইস্সামচ্ছেৰকুক্কুচ্চদোসা তু পটিঘে তথা.

৩৩. লোভো লোভে তু দিট্ঠি চ, দিট্ঠিযুত্তে ৱিযুত্তকে;

মানো চ থিনমিদ্ধং তু, সসঙ্খাৰেসু পঞ্চসু.

৩৪. কঙ্খিতে ৱিচিকিচ্ছাতি, চুদ্দসাকুসলানিমে;

দ্ৱাদসাকুসলেস্ৱেৱ, নিযমেন ৱৱত্থিতা.

৩৫. সদ্ধা সতি হিৰোত্তপ্পং, অলোভাদোসমজ্ঝতা;

কাযচিত্তানং পস্সদ্ধি, লহুতা মুদুতা তথা.

৩৬. কম্মঞ্ঞতা চ পাগুঞ্ঞউজুতাতি যুগা ছ চ;

একূনৱীসতি ধম্মা, অঞ্ঞমঞ্ঞাৱিযোগিনো;

একূনসট্ঠিচিত্তেসু, সোভনেসু পৱত্তিতা.

৩৭. সম্মাৱাচা চ কম্মন্তাজীৱাতি ৱিৰতী ইমা;

লোকুত্তৰে সদা সব্বা, সহ কামসুভে ৱিসুং.

৩৮. কৰুণামুদিতা নানা, ৰূপে পঞ্চমৱজ্জিতে;

কদাচি কামে কুসলে, ক্ৰিযচিত্তে সহেতুকে.

৩৯. তিহেতুকেসু চিত্তেসু, পঞ্ঞা সব্বত্থ লব্ভতি;

এতে সদ্ধাদযো ধম্মা, পঞ্চৱীসতি সোভনা.

৪০. ইস্সামচ্ছেৰকুক্কুচ্চৱিৰতীকৰুণাদযো;

নানা কদাচি মানো চ, থিনমিদ্ধং তথা সহ.

৪১. সত্ত সব্বত্থ জাযন্তি, ছ তু ধম্মা যথাৰহং;

চুদ্দসাকুসলেস্ৱেৱ, সোভনেস্ৱেৱ সোভনা.

৪২. দ্ৱেপঞ্ঞাস পনিচ্চেৱং, ধম্মে সঙ্গয্হ মানসে;

লব্ভমানে ৱিভাৱেয্য, পচ্চেকম্পি ৱিচক্খণো.

৪৩. সোভনঞ্ঞসমানা চ, পঠমে ৱিৰতী ৱিনা;

দুতিযাদীসু তক্কঞ্চ, ৱিচাৰং ততিযাদিসু.

৪৪. চতুত্থাদীসু পীতিঞ্চ, কৰুণাদিঞ্চ পঞ্চমে;

হিত্ৱা নেৱ ৱিযোজেয্য, সঙ্খিপিত্ৱান পঞ্চধা.

৪৫. পঞ্চতিংস চতুত্তিংস, তেত্তিংস চ যথাক্কমং;

দ্ৱত্তিংস তিংস এৱাথ, জাযন্তীতি মহগ্গতে.

৪৬. গহেত্ৱা ৱিৰতী সব্বা, হিত্ৱান কৰুণাদযো;

পঠমে দুতিযাদিম্হি, ৱিতক্কাদিং ৱিনা তথা.

৪৭. পঞ্চধাৱ গণেয্যেৱং, ছত্তিংসা চ যথাক্কমং;

পঞ্চতিংস চতুত্তিংস, তেত্তিংসদ্ৱযমুত্তৰে.

৪৮. সোভনঞ্ঞসমানা চ, কামেসু কুসলে ক্ৰিযে;

হিত্ৱা ৱিৰতিযো পাকে, ৱিৰতীকৰুণাদযো.

৪৯. ঞাণযুত্তে সোমনস্সে, ৱিযুত্তে ঞাণৱজ্জিতা;

উপেক্খকে পীতিহীনা, ৱিপ্পযুত্তে দ্ৱযং ৱিনা.

৫০. চতুধা তিৱিধেস্ৱেৱং, ৱিগণেয্য দ্ৱযং দ্ৱযং;

ন সন্তুপেক্খাসহিতে, কৰুণাদীতি কেচন.

৫১. অট্ঠতিংস সত্ততিংসদ্ৱযং ছত্তিংসকং সুভে;

পঞ্চতিংস চতুত্তিংসদ্ৱযং তেত্তিংসকং ক্ৰিযে.

৫২. তেত্তিংস পাকে দ্ৱত্তিংসদ্ৱযেকতিংসকং ভৱে;

সহেতুকামাৱচৰপুঞ্ঞপাকক্ৰিযামনে.

৫৩. মোহাদযো সমানা চ, পঠমে লোভদিট্ঠিযা;

ততিযে লোভমানেন, জাযন্তেকূনৱীসতি.

৫৪. অট্ঠাৰস পীতিহীনা, পঞ্চমে সত্তমে তথা;

নৱমে দোসকুক্কুচ্চমচ্ছৰিস্সাহি ৱীসতি.

৫৫. পঠমাদীসু ৱুত্তাৱ, দুতিযাদীসু জাযৰে;

থিনমিদ্ধেনেকৱীস, ৱীস দ্ৱেৱীসতিক্কমা.

৫৬. ছন্দপীতিং ৱিনুদ্ধচ্চে, কঙ্খিতে নিচ্ছযং ৱিনা;

পঞ্চদসেৱ কঙ্খায, অসুভেসু ৱিভাৱযে.

৫৭. সিতে সমানা নিচ্ছন্দা, দ্ৱাদসেকাদসেৱ তু;

পীতিং হিত্ৱান ৱোট্ঠব্বে, ৱীৰিযং সুখতীৰণে.

৫৮. দ্ৱযং হিত্ৱা মনোধাতু, উপেক্খাতীৰণে দস;

সত্ত সাধাৰণা এৱ, পঞ্চৱিঞ্ঞাণসম্ভৱা.

৫৯. ইতি চেতসি সম্ভূতা,

দ্ৱেপঞ্ঞাস যথাৰহং;

ঞেয্যা চেতসিকা ধম্মা,

চেতোভেদপ্পভেদিনো.

৬০. সুঞ্ঞতঞ্চানিমিত্তঞ্চ, তথাপণিহিতন্তি চ;

তিৱিধাকাৰমীৰেন্তি, নিব্বানমমতং বুধা.

৬১. যং আৰব্ভ পৱত্তন্তং, তত্থানুত্তৰমানসং;

সুঞ্ঞতাদিৱিমোক্খোতি, নামমালম্বতো লভে.

৬২. সোপাদিসেসনিব্বানধাতু চেৱ তথাপৰা;

অনুপাদিসেসা চাতি, দুৱিধা পৰিযাযতো.

৬৩. তদেতং ৱাননিক্খন্তমচ্চন্তং সন্তিলক্খণং;

অস্সাসকৰণৰসং, খেমভাৱেন গয্হতি.

৬৪. তং নামেতীতি নিব্বানং, নমন্তীতি ততোপৰে;

তেপঞ্ঞাসাতি নামানি, চতুপঞ্ঞাস সব্বথা.

৬৫. চিত্তচেতসিকযোজনানযং,

চিত্তমুত্তমমিদং পকাসিতং;

সাধু চেতসি নিধায পণ্ডিতা,

সাধু সাসনধৰা ভৱন্তি তে.

৬৬. বুদ্ধপ্পৱত্তমৱগাহিতবোধিঞাণ-

মিচ্চাভিধম্মমৱগাহিতসব্বধম্মং;

ওগয্হ নামগতৰাসিমসেসযিত্ৱা,

সঙ্গয্হ সব্বমিধ যোজিতমাদৰেন.

ইতি নামৰূপপৰিচ্ছেদে নামত্তযৱিভাগো নাম

পঠমো পৰিচ্ছেদো.