৬. দুতিযপুব্বাৰামসুত্তং

৫১৬. তংযেৱ নিদানং. ‘‘কতিনং নু খো, ভিক্খৱে, ইন্দ্ৰিযানং ভাৱিতত্তা বহুলীকতত্তা খীণাসৱো ভিক্খু অঞ্ঞং ব্যাকৰোতি – ‘খীণা জাতি, ৱুসিতং ব্ৰহ্মচৰিযং, কতং কৰণীযং, নাপৰং ইত্থত্তাযা’তি পজানামী’’তি? ভগৱংমূলকা নো, ভন্তে, ধম্মা…পে… ‘‘দ্ৱিন্নং খো, ভিক্খৱে, ইন্দ্ৰিযানং ভাৱিতত্তা বহুলীকতত্তা খীণাসৱো ভিক্খু অঞ্ঞং ব্যাকৰোতি – ‘খীণা জাতি, ৱুসিতং ব্ৰহ্মচৰিযং, কতং কৰণীযং, নাপৰং ইত্থত্তাযা’তি পজানামীতি. কতমেসং দ্ৱিন্নং? অৰিযায চ পঞ্ঞায, অৰিযায চ ৱিমুত্তিযা. যা হিস্স, ভিক্খৱে, অৰিযা পঞ্ঞা তদস্স পঞ্ঞিন্দ্ৰিযং. যা হিস্স, ভিক্খৱে, অৰিযা ৱিমুত্তি তদস্স সমাধিন্দ্ৰিযং. ইমেসং খো, ভিক্খৱে, দ্ৱিন্নং ইন্দ্ৰিযানং ভাৱিতত্তা বহুলীকতত্তা খীণাসৱো ভিক্খু অঞ্ঞং ব্যাকৰোতি – ‘খীণা জাতি, ৱুসিতং ব্ৰহ্মচৰিযং, কতং কৰণীযং, নাপৰং ইত্থত্তাযা’তি পজানামী’’তি. ছট্ঠং.