১-১০. ওঘাদিসুত্তদসকং

৬৪১-৬৫০. ‘‘পঞ্চিমানি, ভিক্খৱে, উদ্ধম্ভাগিযানি সংযোজনানি. কতমানি পঞ্চ? ৰূপৰাগো, অৰূপৰাগো, মানো, উদ্ধচ্চং, অৱিজ্জা – ইমানি খো, ভিক্খৱে, পঞ্চুদ্ধম্ভাগিযানি সংযোজনানি. ইমেসং খো, ভিক্খৱে, পঞ্চন্নং উদ্ধম্ভাগিযানং সংযোজনানং অভিঞ্ঞায পৰিঞ্ঞায পৰিক্খযায পহানায পঞ্চিন্দ্ৰিযানি ভাৱেতব্বানি. কতমানি পঞ্চ? ইধ, ভিক্খৱে, ভিক্খু সদ্ধিন্দ্ৰিযং ভাৱেতি ৰাগৱিনযপৰিযোসানং দোসৱিনযপৰিযোসানং মোহৱিনযপৰিযোসানং. ৱীৰিযিন্দ্ৰিযং …পে… সতিন্দ্ৰিযং… সমাধিন্দ্ৰিযং … পঞ্ঞিন্দ্ৰিযং ভাৱেতি ৰাগৱিনযপৰিযোসানং দোসৱিনযপৰিযোসানং মোহৱিনযপৰিযোসানং. ইমেসং খো, ভিক্খৱে, পঞ্চন্নং উদ্ধম্ভাগিযানং সংযোজনানং অভিঞ্ঞায পৰিঞ্ঞায পৰিক্খযায পহানায ইমানি পঞ্চিন্দ্ৰিযানি ভাৱেতব্বানী’’তি.

ওঘৱগ্গো সত্তৰসমো.

তস্সুদ্দানং –

ওঘো যোগো উপাদানং, গন্থা অনুসযেন চ;

কামগুণা নীৱৰণা, খন্ধা ওৰুদ্ধম্ভাগিযাতি.

ইন্দ্ৰিযসংযুত্তং চতুত্থং.