৮. পৰিঞ্ঞাতসুত্তং

৪০৪. ‘‘চত্তাৰোমে, ভিক্খৱে, সতিপট্ঠানা. কতমে চত্তাৰো? ইধ, ভিক্খৱে, ভিক্খু কাযে কাযানুপস্সী ৱিহৰতি আতাপী সম্পজানো সতিমা, ৱিনেয্য লোকে অভিজ্ঝাদোমনস্সং. তস্স কাযে কাযানুপস্সিনো ৱিহৰতো কাযো পৰিঞ্ঞাতো হোতি. কাযস্স পৰিঞ্ঞাতত্তা অমতং সচ্ছিকতং হোতি.

‘‘ৱেদনাসু ৱেদনানুপস্সী ৱিহৰতি আতাপী সম্পজানো সতিমা, ৱিনেয্য লোকে অভিজ্ঝাদোমনস্সং. তস্স ৱেদনাসু ৱেদনানুপস্সিনো ৱিহৰতো ৱেদনা পৰিঞ্ঞাতা হোন্তি. ৱেদনানং পৰিঞ্ঞাতত্তা অমতং সচ্ছিকতং হোতি.

‘‘চিত্তে চিত্তানুপস্সী ৱিহৰতি আতাপী সম্পজানো সতিমা, ৱিনেয্য লোকে অভিজ্ঝাদোমনস্সং. তস্স চিত্তে চিত্তানুপস্সিনো ৱিহৰতো চিত্তং পৰিঞ্ঞাতং হোতি. চিত্তস্স পৰিঞ্ঞাতত্তা অমতং সচ্ছিকতং হোতি.

‘‘ধম্মেসু ধম্মানুপস্সী ৱিহৰতি আতাপী সম্পজানো সতিমা, ৱিনেয্য লোকে অভিজ্ঝাদোমনস্সং. তস্স ধম্মেসু ধম্মানুপস্সিনো ৱিহৰতো ধম্মা পৰিঞ্ঞাতা হোন্তি. ধম্মানং পৰিঞ্ঞাতত্তা অমতং সচ্ছিকতং হোতী’’তি. অট্ঠমং.