৪. দুতিযসংভেজ্জসুত্তং

১১২৪. ‘‘সেয্যথাপি, ভিক্খৱে, যত্থিমা মহানদিযো সংসন্দন্তি সমেন্তি, সেয্যথিদং – গঙ্গা, যমুনা, অচিৰৱতী, সৰভূ, মহী, তং উদকং পৰিক্খযং পৰিযাদানং গচ্ছেয্য, ঠপেত্ৱা দ্ৱে ৱা তীণি ৱা উদকফুসিতানি. তং কিং মঞ্ঞথ, ভিক্খৱে, কতমং নু খো বহুতৰং – যং ৱা সংভেজ্জউদকং পৰিক্খীণং পৰিযাদিন্নং, যানি দ্ৱে ৱা তীণি ৱা উদকফুসিতানি অৱসিট্ঠানী’’তি? ‘‘এতদেৱ, ভন্তে, বহুতৰং সংভেজ্জউদকং যদিদং পৰিক্খীণং পৰিযাদিন্নং; অপ্পমত্তকানি দ্ৱে ৱা তীণি ৱা উদকফুসিতানি অৱসিট্ঠানি. সঙ্খম্পি ন উপেন্তি, উপনিধম্পি ন উপেন্তি, কলভাগম্পি ন উপেন্তি সংভেজ্জউদকং পৰিক্খীণং পৰিযাদিন্নং উপনিধায দ্ৱে ৱা তীণি ৱা উদকফুসিতানি অৱসিট্ঠানী’’তি. ‘‘এৱমেৱ খো, ভিক্খৱে, অৰিযসাৱকস্স…পে… যোগো কৰণীযো’’তি. চতুত্থং.