৪. পুঞ্ঞাভিসন্দৱগ্গো

১. পঠমপুঞ্ঞাভিসন্দসুত্তং

১০২৭. সাৱত্থিনিদানং. ‘‘চত্তাৰোমে, ভিক্খৱে, পুঞ্ঞাভিসন্দা কুসলাভিসন্দা সুখস্সাহাৰা. কতমে চত্তাৰো? ইধ, ভিক্খৱে, অৰিযসাৱকো বুদ্ধে অৱেচ্চপ্পসাদেন সমন্নাগতো হোতি – ইতিপি সো ভগৱা…পে… সত্থা দেৱমনুস্সানং বুদ্ধো ভগৱাতি. অযং পঠমো পুঞ্ঞাভিসন্দো কুসলাভিসন্দো সুখস্সাহাৰো.

‘‘পুন চপৰং, ভিক্খৱে, অৰিযসাৱকো ধম্মে অৱেচ্চপ্পসাদেন সমন্নাগতো হোতি – স্ৱাক্খাতো ভগৱতা ধম্মো…পে… পচ্চত্তং ৱেদিতব্বো ৱিঞ্ঞূহীতি. অযং দুতিযো পুঞ্ঞাভিসন্দো কুসলাভিসন্দো সুখস্সাহাৰো.

‘‘পুন চপৰং, ভিক্খৱে, অৰিযসাৱকো সঙ্ঘে অৱেচ্চপ্পসাদেন সমন্নাগতো হোতি – সুপ্পটিপন্নো ভগৱতো সাৱকসঙ্ঘো…পে… অনুত্তৰং পুঞ্ঞক্খেত্তং লোকস্সাতি. অযং ততিযো পুঞ্ঞাভিসন্দো কুসলাভিসন্দো সুখস্সাহাৰো.

‘‘পুন চপৰং, ভিক্খৱে, অৰিযসাৱকো অৰিযকন্তেহি সীলেহি সমন্নাগতো হোতি অখণ্ডেহি…পে… সমাধিসংৱত্তনিকেহি. অযং চতুত্থো পুঞ্ঞাভিসন্দো কুসলাভিসন্দো সুখস্সাহাৰো. ইমে খো, ভিক্খৱে, চত্তাৰো পুঞ্ঞাভিসন্দা কুসলাভিসন্দা সুখস্সাহাৰা’’তি. পঠমং.

২. দুতিযপুঞ্ঞাভিসন্দসুত্তং

১০২৮. ‘‘চত্তাৰোমে, ভিক্খৱে, পুঞ্ঞাভিসন্দা কুসলাভিসন্দা সুখস্সাহাৰা. কতমে চত্তাৰো? ইধ, ভিক্খৱে, অৰিযসাৱকো বুদ্ধে অৱেচ্চপ্পসাদেন সমন্নাগতো হোতি – ইতিপি সো ভগৱা…পে… সত্থা দেৱমনুস্সানং বুদ্ধো ভগৱাতি. অযং পঠমো পুঞ্ঞাভিসন্দো কুসলাভিসন্দো সুখস্সাহাৰো.

‘‘পুন চপৰং, ভিক্খৱে, অৰিযসাৱকো ধম্মে…পে… সঙ্ঘে…পে….

‘‘পুন চপৰং, ভিক্খৱে, অৰিযসাৱকো ৱিগতমলমচ্ছেৰেন চেতসা অগাৰং অজ্ঝাৱসতি মুত্তচাগো পযতপাণি ৱোস্সগ্গৰতো যাচযোগো দানসংৱিভাগৰতো. অযং চতুত্থো পুঞ্ঞাভিসন্দো কুসলাভিসন্দো সুখস্সাহাৰো. ইমে খো, ভিক্খৱে, চত্তাৰো পুঞ্ঞাভিসন্দা কুসলাভিসন্দা সুখস্সাহাৰা’’তি. দুতিযং.

৩. ততিযপুঞ্ঞাভিসন্দসুত্তং

১০২৯. ‘‘চত্তাৰোমে, ভিক্খৱে, পুঞ্ঞাভিসন্দা কুসলাভিসন্দা সুখস্সাহাৰা. কতমে চত্তাৰো? ইধ, ভিক্খৱে, অৰিযসাৱকো বুদ্ধে অৱেচ্চপ্পসাদেন সমন্নাগতো হোতি – ইতিপি সো ভগৱা…পে… সত্থা দেৱমনুস্সানং বুদ্ধো ভগৱাতি. অযং পঠমো পুঞ্ঞাভিসন্দো কুসলাভিসন্দো সুখস্সাহাৰো.

‘‘পুন চপৰং, ভিক্খৱে, অৰিযসাৱকো ধম্মে…পে… সঙ্ঘে…পে….

‘‘পুন চপৰং, ভিক্খৱে, অৰিযসাৱকো পঞ্ঞৱা হোতি উদযত্থগামিনিযা পঞ্ঞায সমন্নাগতো অৰিযায নিব্বেধিকায সম্মা দুক্খক্খযগামিনিযা. অযং চতুত্থো পুঞ্ঞাভিসন্দো কুসলাভিসন্দো সুখস্সাহাৰো. ইমে খো, ভিক্খৱে, চত্তাৰো পুঞ্ঞাভিসন্দা কুসলাভিসন্দা সুখস্সাহাৰা’’তি. ততিযং.

৪. পঠমদেৱপদসুত্তং

১০৩০. সাৱত্থিনিদানং. চত্তাৰিমানি, ভিক্খৱে, দেৱানং দেৱপদানি অৱিসুদ্ধানং সত্তানং ৱিসুদ্ধিযা অপৰিযোদাতানং সত্তানং পৰিযোদপনায.

কতমানি চত্তাৰি? ইধ, ভিক্খৱে, অৰিযসাৱকো বুদ্ধে অৱেচ্চপ্পসাদেন সমন্নাগতো হোতি – ইতিপি সো ভগৱা…পে… সত্থা দেৱমনুস্সানং বুদ্ধো ভগৱাতি. ইদং পঠমং দেৱানং দেৱপদং অৱিসুদ্ধানং সত্তানং ৱিসুদ্ধিযা অপৰিযোদাতানং সত্তানং পৰিযোদপনায.

‘‘পুন চপৰং, ভিক্খৱে, অৰিযসাৱকো ধম্মে…পে… সঙ্ঘে…পে….

‘‘পুন চপৰং, ভিক্খৱে, অৰিযসাৱকো অৰিযকন্তেহি সীলেহি সমন্নাগতো হোতি অখণ্ডেহি…পে… সমাধিসংৱত্তনিকেহি. ইদং চতুত্থং দেৱানং দেৱপদং অৱিসুদ্ধানং সত্তানং ৱিসুদ্ধিযা অপৰিযোদাতানং সত্তানং পৰিযোদপনায. ইমানি খো, ভিক্খৱে, চত্তাৰি দেৱানং দেৱপদানি অৱিসুদ্ধানং সত্তানং ৱিসুদ্ধিযা অপৰিযোদাতানং সত্তানং পৰিযোদপনাযা’’তি. চতুত্থং.

৫. দুতিযদেৱপদসুত্তং

১০৩১. ‘‘চত্তাৰিমানি, ভিক্খৱে, দেৱানং দেৱপদানি অৱিসুদ্ধানং সত্তানং ৱিসুদ্ধিযা অপৰিযোদাতানং সত্তানং পৰিযোদপনায.

‘‘কতমানি চত্তাৰি? ইধ, ভিক্খৱে, অৰিযসাৱকো বুদ্ধে অৱেচ্চপ্পসাদেন সমন্নাগতো হোতি – ইতিপি সো ভগৱা…পে… সত্থা দেৱমনুস্সানং বুদ্ধো ভগৱাতি. সো ইতি পটিসঞ্চিক্খতি – ‘কিং নু খো দেৱানং দেৱপদ’ন্তি? সো এৱং পজানাতি – ‘অব্যাবজ্ঝপৰমে খ্ৱাহং এতৰহি দেৱে সুণামি. ন চ খো পনাহং কিঞ্চি ব্যাবাধেমি তসং ৱা থাৱৰং ৱা. অদ্ধাহং দেৱপদধম্মসমন্নাগতো ৱিহৰামী’’’তি. ইদং পঠমং দেৱানং দেৱপদং অৱিসুদ্ধানং সত্তানং ৱিসুদ্ধিযা অপৰিযোদাতানং সত্তানং পৰিযোদপনায.

‘‘পুন চপৰং, ভিক্খৱে, অৰিযসাৱকো ধম্মে…পে… সঙ্ঘে…পে….

‘‘পুন চপৰং, ভিক্খৱে, অৰিযসাৱকো অৰিযকন্তেহি সীলেহি সমন্নাগতো হোতি অখণ্ডেহি…পে… সমাধিসংৱত্তনিকেহি. সো ইতি পটিসঞ্চিক্খতি – ‘কিং নু খো দেৱানং দেৱপদ’ন্তি? সো এৱং পজানাতি – ‘অব্যাবজ্ঝপৰমে খ্ৱাহং এতৰহি দেৱে সুণামি. ন খো পনাহং কিঞ্চি ব্যাবাধেমি তসং ৱা থাৱৰং ৱা. অদ্ধাহং দেৱপদধম্মসমন্নাগতো ৱিহৰামী’তি. ইদং চতুত্থং দেৱানং দেৱপদং অৱিসুদ্ধানং সত্তানং ৱিসুদ্ধিযা অপৰিযোদাতানং সত্তানং পৰিযোদপনায. ইমানি খো, ভিক্খৱে, চত্তাৰি দেৱানং দেৱপদানি অৱিসুদ্ধানং সত্তানং ৱিসুদ্ধিযা অপৰিযোদাতানং সত্তানং পৰিযোদপনাযা’’তি. পঞ্চমং.

৬. দেৱসভাগসুত্তং

১০৩২. ‘‘চতূহি, ভিক্খৱে, ধম্মেহি সমন্নাগতং অত্তমনা দেৱা সভাগতং কথেন্তি. কতমেহি চতূহি? ইধ, ভিক্খৱে, অৰিযসাৱকো বুদ্ধে অৱেচ্চপ্পসাদেন সমন্নাগতো হোতি – ইতিপি সো ভগৱা…পে… সত্থা দেৱমনুস্সানং বুদ্ধো ভগৱাতি. যা তা দেৱতা বুদ্ধে অৱেচ্চপ্পসাদেন সমন্নাগতা ইতো চুতা তত্ৰূপপন্না তাসং এৱং হোতি – ‘যথাৰূপেন খো মযং বুদ্ধে অৱেচ্চপ্পসাদেন সমন্নাগতা ততো চুতা ইধূপপন্না, অৰিযসাৱকোপি তথাৰূপেন বুদ্ধে অৱেচ্চপ্পসাদেন সমন্নাগতো এহীতি দেৱানং সন্তিকে’’’তি.

‘‘পুন চপৰং, ভিক্খৱে, অৰিযসাৱকো ধম্মে…পে… সঙ্ঘে…পে… অৰিযকন্তেহি সীলেহি সমন্নাগতো হোতি অখণ্ডেহি…পে… সমাধিসংৱত্তনিকেহি. যা তা দেৱতা অৰিযকন্তেহি সীলেহি সমন্নাগতা ইতো চুতা তত্ৰূপপন্না তাসং এৱং হোতি – ‘যথাৰূপেহি খো মযং অৰিযকন্তেহি সীলেহি সমন্নাগতা ততো চুতা ইধূপপন্না, অৰিযসাৱকোপি তথাৰূপেহি অৰিযকন্তেহি সীলেহি সমন্নাগতো এহীতি দেৱানং সন্তিকে’তি. ইমেহি খো, ভিক্খৱে, চতূহি ধম্মেহি সমন্নাগতং অত্তমনা দেৱা সভাগতং কথেন্তী’’তি. ছট্ঠং.

৭. মহানামসুত্তং

১০৩৩. একং সমযং ভগৱা সক্কেসু ৱিহৰতি কপিলৱত্থুস্মিং নিগ্ৰোধাৰামে. অথ খো মহানামো সক্কো যেন ভগৱা তেনুপসঙ্কমি; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদি. একমন্তং নিসিন্নো খো মহানামো সক্কো ভগৱন্তং এতদৱোচ –

‘‘কিত্তাৱতা নু খো, ভন্তে, উপাসকো হোতী’’তি? ‘‘যতো খো, মহানাম, বুদ্ধং সৰণং গতো হোতি, ধম্মং সৰণং গতো হোতি, সঙ্ঘং সৰণং গতো হোতি – এত্তাৱতা খো, মহানাম, উপাসকো হোতী’’তি.

‘‘কিত্তাৱতা পন, ভন্তে, উপাসকো সীলসম্পন্নো হোতী’’তি? ‘‘যতো খো, মহানাম, উপাসকো পাণাতিপাতা পটিৱিৰতো হোতি, অদিন্নাদানা পটিৱিৰতো হোতি, কামেসুমিচ্ছাচাৰা পটিৱিৰতো হোতি, মুসাৱাদা পটিৱিৰতো হোতি, সুৰামেৰযমজ্জপ্পমাদট্ঠানা পটিৱিৰতো হোতি, – এত্তাৱতা খো, মহানাম, উপাসকো সীলসম্পন্নো হোতী’’তি.

‘‘কিত্তাৱতা পন, ভন্তে, উপাসকো সদ্ধাসম্পন্নো হোতী’’তি? ‘‘ইধ, মহানাম, উপাসকো সদ্ধো হোতি, সদ্দহতি তথাগতস্স বোধিং – ইতিপি সো ভগৱা…পে… সত্থা দেৱমনুস্সানং বুদ্ধো ভগৱাতি. এত্তাৱতা খো, মহানাম, উপাসকো সদ্ধাসম্পন্নো হোতী’’তি.

‘‘কিত্তাৱতা পন, ভন্তে, উপাসকো চাগসম্পন্নো হোতী’’তি? ‘‘ইধ, মহানাম, উপাসকো ৱিগতমলমচ্ছেৰেন চেতসা অগাৰং অজ্ঝাৱসতি মুত্তচাগো পযতপাণি ৱোস্সগ্গৰতো যাচযোগো দানসংৱিভাগৰতো – এত্তাৱতা খো, মহানাম, উপাসকো চাগসম্পন্নো হোতী’’তি.

‘‘কিত্তাৱতা পন, ভন্তে, উপাসকো পঞ্ঞাসম্পন্নো হোতী’’তি? ‘‘ইধ, মহানাম, উপাসকো পঞ্ঞৱা হোতি উদযত্থগামিনিযা পঞ্ঞায সমন্নাগতো অৰিযায নিব্বেধিকায সম্মা দুক্খক্খযগামিনিযা – এত্তাৱতা খো, মহানাম, উপাসকো পঞ্ঞাসম্পন্নো হোতী’’তি. সত্তমং.

৮. ৱস্সসুত্তং

১০৩৪. ‘‘সেয্যথাপি, ভিক্খৱে, উপৰিপব্বতে থুল্লফুসিতকে দেৱে ৱস্সন্তে তং উদকং যথানিন্নং পৱত্তমানং পব্বতকন্দৰপদৰসাখা পৰিপূৰেতি, পব্বতকন্দৰপদৰসাখা পৰিপূৰা কুসোব্ভে পৰিপূৰেন্তি, কুসোব্ভা পৰিপূৰা মহাসোব্ভে পৰিপূৰেন্তি, মহাসোব্ভা পৰিপূৰা কুন্নদিযো পৰিপূৰেন্তি, কুন্নদিযো পৰিপূৰা মহানদিযো পৰিপূৰেন্তি, মহানদিযো পৰিপূৰা মহাসমুদ্দং [মহাসমুদ্দসাগৰং (সব্বত্থ) সং. নি. ৪.৭০] পৰিপূৰেন্তি; এৱমেৱ খো, ভিক্খৱে, অৰিযসাৱকস্স যো চ বুদ্ধে অৱেচ্চপ্পসাদো, যো চ ধম্মে অৱেচ্চপ্পসাদো, যো চ সঙ্ঘে অৱেচ্চপ্পসাদো, যানি চ অৰিযকন্তানি সীলানি – ইমে ধম্মা সন্দমানা পাৰং গন্ত্ৱা আসৱানং খযায সংৱত্তন্তী’’তি. অট্ঠমং.

৯. কাড়িগোধসুত্তং

১০৩৫. একং সমযং ভগৱা সক্কেসু ৱিহৰতি কপিলৱত্থুস্মিং নিগ্ৰোধাৰামে. অথ খো ভগৱা পুব্বণ্হসমযং নিৱাসেত্ৱা পত্তচীৱৰমাদায যেন কাড়িগোধায সাকিযানিযা নিৱেসনং তেনুপসঙ্কমি; উপসঙ্কমিত্ৱা পঞ্ঞত্তে আসনে নিসীদি. অথ খো কাড়িগোধা সাকিযানী যেন ভগৱা তেনুপসঙ্কমি; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদি. একমন্তং নিসিন্নং খো কাড়িগোধং সাকিযানিং ভগৱা এতদৱোচ –

‘‘চতূহি খো, গোধে, ধম্মেহি সমন্নাগতা অৰিযসাৱিকা সোতাপন্না হোতি অৱিনিপাতধম্মা নিযতা সম্বোধিপৰাযণা. কতমেহি চতূহি? ইধ, গোধে, অৰিযসাৱিকা বুদ্ধে অৱেচ্চপ্পসাদেন সমন্নাগতা হোতি – ইতিপি সো ভগৱা…পে… সত্থা দেৱমনুস্সানং বুদ্ধো ভগৱাতি. ধম্মে…পে… সঙ্ঘে…পে… ৱিগতমলমচ্ছেৰেন চেতসা অগাৰং অজ্ঝাৱসতি মুত্তচাগা পযতপাণিনী [পযতপাণী (সব্বত্থ) ৩.৩০ মোগ্গল্লানসুত্তং ওলোকেতব্বং] ৱোস্সগ্গৰতা যাচযোগা দানসংৱিভাগৰতা. ইমেহি খো, গোধে, চতূহি ধম্মেহি সমন্নাগতা অৰিযসাৱিকা সোতাপন্না হোতি অৱিনিপাতধম্মা নিযতা সম্বোধিপৰাযণা’’তি.

‘‘যানিমানি, ভন্তে, ভগৱতা চত্তাৰি সোতাপত্তিযঙ্গানি দেসিতানি, সংৱিজ্জন্তে তে ধম্মা মযি, অহঞ্চ তেসু ধম্মেসু সন্দিস্সামি. অহঞ্হি, ভন্তে, বুদ্ধে অৱেচ্চপ্পসাদেন সমন্নাগতা – ইতিপি সো ভগৱা…পে… সত্থা দেৱমনুস্সানং বুদ্ধো ভগৱাতি. ধম্মে…পে… সঙ্ঘে…পে… যং খো পন কিঞ্চি কুলে দেয্যধম্মং সব্বং তং অপ্পটিৱিভত্তং সীলৱন্তেহি কল্যাণধম্মেহী’’তি. ‘‘লাভা তে, গোধে, সুলদ্ধং তে, গোধে! সোতাপত্তিফলং তযা, গোধে, ব্যাকত’’ন্তি. নৱমং.

১০. নন্দিযসক্কসুত্তং

১০৩৬. একং সমযং ভগৱা সক্কেসু ৱিহৰতি কপিলৱত্থুস্মিং নিগ্ৰোধাৰামে. অথ খো নন্দিযো সক্কো যেন ভগৱা তেনুপসঙ্কমি; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদি. একমন্তং নিসিন্নো খো নন্দিযো সক্কো ভগৱন্তং এতদৱোচ – ‘‘যস্সেৱ নু খো, ভন্তে, অৰিযসাৱকস্স চত্তাৰি সোতাপত্তিযঙ্গানি সব্বেন সব্বং সব্বথা সব্বং নত্থি স্ৱেৱ নু খো, ভন্তে, অৰিযসাৱকো পমাদৱিহাৰী’’তি.

‘‘‘যস্স খো, নন্দিয, চত্তাৰি সোতাপত্তিযঙ্গানি সব্বেন সব্বং সব্বথা সব্বং নত্থি তমহং বাহিৰো পুথুজ্জনপক্খে ঠিতো’তি ৱদামি. অপি চ, নন্দিয, যথা অৰিযসাৱকো পমাদৱিহাৰী চেৱ হোতি, অপ্পমাদৱিহাৰী চ তং সুণাহি, সাধুকং মনসি কৰোহি; ভাসিস্সামী’’তি. ‘‘এৱং, ভন্তে’’তি খো নন্দিযো সক্কো ভগৱতো পচ্চস্সোসি. ভগৱা এতদৱোচ –

‘‘কথঞ্চ, নন্দিয, অৰিযসাৱকো পমাদৱিহাৰী হোতি? ইধ নন্দিয, অৰিযসাৱকো বুদ্ধে অৱেচ্চপ্পসাদেন সমন্নাগতো হোতি – ইতিপি সো ভগৱা…পে… সত্থা দেৱমনুস্সানং বুদ্ধো ভগৱাতি. সো তেন বুদ্ধে অৱেচ্চপ্পসাদেন সন্তুট্ঠো ন উত্তৰি ৱাযমতি দিৱা পৱিৱেকায, ৰত্তিং পটিসল্লানায. তস্স এৱং পমত্তস্স ৱিহৰতো পামোজ্জং ন হোতি. পামোজ্জে অসতি, পীতি ন হোতি. পীতিযা অসতি, পস্সদ্ধি ন হোতি. পস্সদ্ধিযা অসতি, দুক্খং ৱিহৰতি. দুক্খিনো চিত্তং ন সমাধিযতি. অসমাহিতে চিত্তে ধম্মা ন পাতুভৱন্তি. ধম্মানং অপাতুভাৱা পমাদৱিহাৰী ত্ৱেৱ সঙ্খ্যং গচ্ছতি.

‘‘পুন চপৰং, নন্দিয, অৰিযসাৱকো ধম্মে…পে… সঙ্ঘে…পে… অৰিযকন্তেহি সীলেহি সমন্নাগতো হোতি অখণ্ডেহি…পে… সমাধিসংৱত্তনিকেহি. সো তেহি অৰিযকন্তেহি সীলেহি সন্তুট্ঠো ন উত্তৰি ৱাযমতি দিৱা পৱিৱেকায ৰত্তিং পটিসল্লানায. তস্স এৱং পমত্তস্স ৱিহৰতো পামোজ্জং ন হোতি. পামোজ্জে অসতি, পীতি ন হোতি. পীতিযা অসতি, পস্সদ্ধি ন হোতি. পস্সদ্ধিযা অসতি, দুক্খং ৱিহৰতি. দুক্খিনো চিত্তং ন সমাধিযতি. অসমাহিতে চিত্তে ধম্মা ন পাতুভৱন্তি. ধম্মানং অপাতুভাৱা পমাদৱিহাৰী ত্ৱেৱ সঙ্খ্যং গচ্ছতি. এৱং খো, নন্দিয, অৰিযসাৱকো পমাদৱিহাৰী হোতি.

‘‘কথঞ্চ, নন্দিয, অৰিযসাৱকো অপ্পমাদৱিহাৰী হোতি? ইধ, নন্দিয, অৰিযসাৱকো বুদ্ধে অৱেচ্চপ্পসাদেন সমন্নাগতো হোতি – ইতিপি সো ভগৱা…পে… সত্থা দেৱমনুস্সানং বুদ্ধো ভগৱাতি. সো তেন বুদ্ধে অৱেচ্চপ্পসাদেন অসন্তুট্ঠো উত্তৰি ৱাযমতি দিৱা পৱিৱেকায ৰত্তিং পটিসল্লানায. তস্স এৱং অপ্পমত্তস্স ৱিহৰতো পামোজ্জং জাযতি. পমুদিতস্স পীতি জাযতি. পীতিমনস্স কাযো পস্সম্ভতি. পস্সদ্ধকাযো সুখং ৱেদিযতি. সুখিনো চিত্তং সমাধিযতি. সমাহিতে চিত্তে ধম্মা পাতুভৱন্তি. ধম্মানং পাতুভাৱা অপ্পমাদৱিহাৰী ত্ৱেৱ সঙ্খ্যং গচ্ছতি.

‘‘পুন চপৰং, নন্দিয, অৰিযসাৱকো ধম্মে…পে… সঙ্ঘে…পে… অৰিযকন্তেহি সীলেহি সমন্নাগতো হোতি অখণ্ডেহি…পে… সমাধিসংৱত্তনিকেহি. সো তেহি অৰিযকন্তেহি সীলেহি অসন্তুট্ঠো উত্তৰি ৱাযমতি দিৱা পৱিৱেকায ৰত্তিং পটিসল্লানায. তস্স এৱং অপ্পমত্তস্স ৱিহৰতো পামোজ্জং জাযতি. পমুদিতস্স পীতি জাযতি. পীতিমনস্স কাযো পস্সম্ভতি. পস্সদ্ধকাযো সুখং ৱেদিযতি. সুখিনো চিত্তং সমাধিযতি. সমাহিতে চিত্তে ধম্মা পাতুভৱন্তি. ধম্মানং পাতুভাৱা অপ্পমাদৱিহাৰী ত্ৱেৱ সঙ্খ্যং গচ্ছতি. এৱং খো, নন্দিয, অৰিযসাৱকো অপ্পমাদৱিহাৰী হোতী’’তি. দসমং.

পুঞ্ঞাভিসন্দৱগ্গো চতুত্থো.

তস্সুদ্দানং –

অভিসন্দা তযো ৱুত্তা, দুৱে দেৱপদানি চ;

সভাগতং মহানামো, ৱস্সং কাড়ী চ নন্দিযাতি.