৮. দুতিযএকধম্মপেয্যালৱগ্গো

১. কল্যাণমিত্তসুত্তং

৭৭. সাৱত্থিনিদানং. ‘‘নাহং, ভিক্খৱে, অঞ্ঞং একধম্মম্পি সমনুপস্সামি, যেন অনুপ্পন্নো ৱা অৰিযো অট্ঠঙ্গিকো মগ্গো উপ্পজ্জতি, উপ্পন্নো ৱা অৰিযো অট্ঠঙ্গিকো মগ্গো ভাৱনাপাৰিপূৰিং গচ্ছতি, যথযিদং, ভিক্খৱে, কল্যাণমিত্ততা. কল্যাণমিত্তস্সেতং, ভিক্খৱে, ভিক্খুনো পাটিকঙ্খং – অৰিযং অট্ঠঙ্গিকং মগ্গং ভাৱেস্সতি, অৰিযং অট্ঠঙ্গিকং মগ্গং বহুলীকৰিস্সতি. কথঞ্চ, ভিক্খৱে, ভিক্খু কল্যাণমিত্তো অৰিযং অট্ঠঙ্গিকং মগ্গং ভাৱেতি, অৰিযং অট্ঠঙ্গিকং মগ্গং বহুলীকৰোতি? ইধ, ভিক্খৱে, ভিক্খু সম্মাদিট্ঠিং ভাৱেতি ৱিৱেকনিস্সিতং…পে… সম্মাসমাধিং ভাৱেতি ৱিৱেকনিস্সিতং ৱিৰাগনিস্সিতং নিৰোধনিস্সিতং ৱোস্সগ্গপৰিণামিং. এৱং খো, ভিক্খৱে, ভিক্খু কল্যাণমিত্তো অৰিযং অট্ঠঙ্গিকং মগ্গং ভাৱেতি, অৰিযং অট্ঠঙ্গিকং মগ্গং বহুলীকৰোতী’’তি. পঠমং.

২-৬. সীলসম্পদাদিসুত্তপঞ্চকং

৭৮-৮২. ‘‘নাহং, ভিক্খৱে, অঞ্ঞং একধম্মম্পি সমনুপস্সামি, যেন অনুপ্পন্নো ৱা অৰিযো অট্ঠঙ্গিকো মগ্গো উপ্পজ্জতি, উপ্পন্নো ৱা অৰিযো অট্ঠঙ্গিকো মগ্গো ভাৱনাপাৰিপূৰিং গচ্ছতি, যথযিদং, ভিক্খৱে, সীলসম্পদা…পে… যথযিদং, ভিক্খৱে, ছন্দসম্পদা…পে… যথযিদং, ভিক্খৱে, অত্তসম্পদা…পে… যথযিদং, ভিক্খৱে, দিট্ঠিসম্পদা…পে… যথযিদং, ভিক্খৱে, অপ্পমাদসম্পদা…পে…. ছট্ঠং.

৭. যোনিসোমনসিকাৰসম্পদাসুত্তং

৮৩. ‘‘যথযিদং, ভিক্খৱে, যোনিসোমনসিকাৰসম্পদা. যোনিসোমনসিকাৰসম্পন্নস্সেতং, ভিক্খৱে, ভিক্খুনো পাটিকঙ্খং – অৰিযং অট্ঠঙ্গিকং মগ্গং ভাৱেস্সতি, অৰিযং অট্ঠঙ্গিকং মগ্গং বহুলীকৰিস্সতি. কথঞ্চ, ভিক্খৱে, ভিক্খু যোনিসোমনসিকাৰসম্পন্নো অৰিযং অট্ঠঙ্গিকং মগ্গং ভাৱেতি, অৰিযং অট্ঠঙ্গিকং মগ্গং বহুলীকৰোতি? ইধ, ভিক্খৱে, ভিক্খু সম্মাদিট্ঠিং ভাৱেতি ৱিৱেকনিস্সিতং…পে… সম্মাসমাধিং ভাৱেতি ৱিৱেকনিস্সিতং ৱিৰাগনিস্সিতং নিৰোধনিস্সিতং ৱোস্সগ্গপৰিণামিং. এৱং খো, ভিক্খৱে, ভিক্খু যোনিসোমনসিকাৰসম্পন্নো অৰিযং অট্ঠঙ্গিকং মগ্গং ভাৱেতি, অৰিযং অট্ঠঙ্গিকং মগ্গং বহুলীকৰোতী’’তি. সত্তমং.

১. কল্যাণমিত্তসুত্তং

৮৪. ‘‘নাহং, ভিক্খৱে, অঞ্ঞং একধম্মম্পি সমনুপস্সামি, যেন অনুপ্পন্নো ৱা অৰিযো অট্ঠঙ্গিকো মগ্গো উপ্পজ্জতি, উপ্পন্নো ৱা অৰিযো অট্ঠঙ্গিকো মগ্গো ভাৱনাপাৰিপূৰিং গচ্ছতি, যথযিদং, ভিক্খৱে, কল্যাণমিত্ততা. কল্যাণমিত্তস্সেতং, ভিক্খৱে, ভিক্খুনো পাটিকঙ্খং – অৰিযং অট্ঠঙ্গিকং মগ্গং ভাৱেস্সতি, অৰিযং অট্ঠঙ্গিকং মগ্গং বহুলীকৰিস্সতি. কথঞ্চ, ভিক্খৱে, ভিক্খু কল্যাণমিত্তো অৰিযং অট্ঠঙ্গিকং মগ্গং ভাৱেতি, অৰিযং অট্ঠঙ্গিকং মগ্গং বহুলীকৰোতি? ইধ, ভিক্খৱে, ভিক্খু সম্মাদিট্ঠিং ভাৱেতি ৰাগৱিনযপৰিযোসানং দোসৱিনযপৰিযোসানং মোহৱিনযপৰিযোসানং…পে… সম্মাসমাধিং ভাৱেতি ৰাগৱিনযপৰিযোসানং দোসৱিনযপৰিযোসানং মোহৱিনযপৰিযোসানং. এৱং খো, ভিক্খৱে, ভিক্খু কল্যাণমিত্তো অৰিযং অট্ঠঙ্গিকং মগ্গং ভাৱেতি, অৰিযং অট্ঠঙ্গিকং মগ্গং বহুলীকৰোতী’’তি. পঠমং.

২-৬. সীলসম্পদাদিসুত্তপঞ্চকং

৮৫-৮৯. ‘‘নাহং, ভিক্খৱে, অঞ্ঞং একধম্মম্পি সমনুপস্সামি, যেন অনুপ্পন্নো ৱা অৰিযো অট্ঠঙ্গিকো মগ্গো উপ্পজ্জতি, উপ্পন্নো ৱা অৰিযো অট্ঠঙ্গিকো মগ্গো ভাৱনাপাৰিপূৰিং গচ্ছতি, যথযিদং, ভিক্খৱে, সীলসম্পদা…পে… যথযিদং, ভিক্খৱে, ছন্দসম্পদা…পে… যথযিদং, ভিক্খৱে, অত্তসম্পদা…পে… যথযিদং, ভিক্খৱে, দিট্ঠিসম্পদা…পে… যথযিদং, ভিক্খৱে, অপ্পমাদসম্পদা…পে…. ছট্ঠং.

৭. যোনিসোমনসিকাৰসম্পদাসুত্তং

৯০. ‘‘যথযিদং, ভিক্খৱে, যোনিসোমনসিকাৰসম্পদা. যোনিসোমনসিকাৰসম্পন্নস্সেতং, ভিক্খৱে, ভিক্খুনো পাটিকঙ্খং – অৰিযং অট্ঠঙ্গিকং মগ্গং ভাৱেস্সতি, অৰিযং অট্ঠঙ্গিকং মগ্গং বহুলীকৰিস্সতি. কথঞ্চ, ভিক্খৱে, ভিক্খু যোনিসোমনসিকাৰসম্পন্নো অৰিযং অট্ঠঙ্গিকং মগ্গং ভাৱেতি, অৰিযং অট্ঠঙ্গিকং মগ্গং বহুলীকৰোতি? ইধ, ভিক্খৱে, ভিক্খু সম্মাদিট্ঠিং ভাৱেতি ৰাগৱিনযপৰিযোসানং দোসৱিনযপৰিযোসানং মোহৱিনযপৰিযোসানং…পে… সম্মাসমাধিং ভাৱেতি ৰাগৱিনযপৰিযোসানং দোসৱিনযপৰিযোসানং মোহৱিনযপৰিযোসানং. এৱং খো, ভিক্খৱে, ভিক্খু যোনিসোমনসিকাৰসম্পন্নো অৰিযং অট্ঠঙ্গিকং মগ্গং ভাৱেতি, অৰিযং অট্ঠঙ্গিকং মগ্গং বহুলীকৰোতী’’তি. সত্তমং.

দুতিযএকধম্মপেয্যালৱগ্গো অট্ঠমো.

তস্সুদ্দানং –

কল্যাণমিত্তং সীলঞ্চ, ছন্দো চ অত্তসম্পদা;

দিট্ঠি চ অপ্পমাদো চ, যোনিসো ভৱতি সত্তমং.