৮. পঠমকুক্কুটাৰামসুত্তং

১৮. এৱং মে সুতং – একং সমযং আযস্মা চ আনন্দো আযস্মা চ ভদ্দো পাটলিপুত্তে ৱিহৰন্তি কুক্কুটাৰামে. অথ খো আযস্মা ভদ্দো সাযন্হসমযং পটিসল্লানা ৱুট্ঠিতো যেনাযস্মা আনন্দো তেনুপসঙ্কমি; উপসঙ্কমিত্ৱা আযস্মতা আনন্দেন সদ্ধিং সম্মোদি. সম্মোদনীযং কথং সাৰণীযং ৱীতিসাৰেত্ৱা একমন্তং নিসীদি. একমন্তং নিসিন্নো খো আযস্মা ভদ্দো আযস্মন্তং আনন্দং এতদৱোচ –

‘‘‘অব্ৰহ্মচৰিযং, অব্ৰহ্মচৰিয’ন্তি, আৱুসো আনন্দ, ৱুচ্চতি. কতমং নু খো, আৱুসো, অব্ৰহ্মচৰিয’’ন্তি? ‘‘সাধু সাধু, আৱুসো ভদ্দ! ভদ্দকো খো তে, আৱুসো ভদ্দ, উম্মঙ্গো, ভদ্দকং পটিভানং, কল্যাণী পৰিপুচ্ছা. এৱঞ্হি ত্ৱং, আৱুসো ভদ্দ, পুচ্ছসি – ‘অব্ৰহ্মচৰিযং, অব্ৰহ্মচৰিযন্তি, আৱুসো আনন্দ, ৱুচ্চতি. কতমং নু খো, আৱুসো, অব্ৰহ্মচৰিয’’’ন্তি? ‘‘এৱমাৱুসো’’তি. ‘‘অযমেৱ খো, আৱুসো, অট্ঠঙ্গিকো মিচ্ছামগ্গো অব্ৰহ্মচৰিযং, সেয্যথিদং – মিচ্ছাদিট্ঠি…পে… মিচ্ছাসমাধী’’তি. অট্ঠমং.