৮. ওঘৱগ্গো

১. ওঘসুত্তং

১৭২. সাৱত্থিনিদানং. ‘‘চত্তাৰোমে, ভিক্খৱে, ওঘা. কতমে চত্তাৰো? কামোঘো, ভৱোঘো, দিট্ঠোঘো, অৱিজ্জোঘো – ইমে খো, ভিক্খৱে, চত্তাৰো ওঘা. ইমেসং খো, ভিক্খৱে, চতুন্নং ওঘানং অভিঞ্ঞায পৰিঞ্ঞায পৰিক্খযায পহানায…পে… অযং অৰিযো অট্ঠঙ্গিকো মগ্গো ভাৱেতব্বো’’তি. (যথা এসনা, এৱং সব্বং ৱিত্থাৰেতব্বং.) পঠমং.

২. যোগসুত্তং

১৭৩. ‘‘চত্তাৰোমে, ভিক্খৱে, যোগা. কতমে চত্তাৰো? কামযোগো, ভৱযোগো, দিট্ঠিযোগো অৱিজ্জাযোগো – ইমে খো, ভিক্খৱে, চত্তাৰো যোগা. ইমেসং খো, ভিক্খৱে, চতুন্নং যোগানং অভিঞ্ঞায পৰিঞ্ঞায পৰিক্খযায পহানায…পে… অযং অৰিযো অট্ঠঙ্গিকো মগ্গো ভাৱেতব্বো’’তি. দুতিযং.

৩. উপাদানসুত্তং

১৭৪. ‘‘চত্তাৰিমানি, ভিক্খৱে, উপাদানানি. কতমানি চত্তাৰি? কামুপাদানং, দিট্ঠুপাদানং, সীলব্বতুপাদানং, অত্তৱাদুপাদানং – ইমানি খো, ভিক্খৱে, চত্তাৰি উপাদানানি. ইমেসং খো, ভিক্খৱে, চতুন্নং উপাদানানং অভিঞ্ঞায পৰিঞ্ঞায পৰিক্খযায পহানায…পে… অযং অৰিযো অট্ঠঙ্গিকো মগ্গো ভাৱেতব্বো’’তি. ততিযং.

৪. গন্থসুত্তং

১৭৫. ‘‘চত্তাৰোমে, ভিক্খৱে, গন্থা. কতমে চত্তাৰো? অভিজ্ঝা কাযগন্থো, ব্যাপাদো কাযগন্থো, সীলব্বতপৰামাসো কাযগন্থো, ইদংসচ্চাভিনিৱেসো কাযগন্থো – ইমে খো, ভিক্খৱে, চত্তাৰো গন্থা. ইমেসং খো, ভিক্খৱে, চতুন্নং গন্থানং অভিঞ্ঞায পৰিঞ্ঞায পৰিক্খযায পহানায…পে… অযং অৰিযো অট্ঠঙ্গিকো মগ্গো ভাৱেতব্বো’’তি. চতুত্থং.

৫. অনুসযসুত্তং

১৭৬. ‘‘সত্তিমে, ভিক্খৱে, অনুসযা. কতমে সত্ত? কামৰাগানুসযো, পটিঘানুসযো, দিট্ঠানুসযো, ৱিচিকিচ্ছানুসযো, মানানুসযো, ভৱৰাগানুসযো, অৱিজ্জানুসযো – ইমে খো, ভিক্খৱে, সত্তানুসযা. ইমেসং খো, ভিক্খৱে, সত্তন্নং অনুসযানং অভিঞ্ঞায পৰিঞ্ঞায পৰিক্খযায পহানায…পে… অযং অৰিযো অট্ঠঙ্গিকো মগ্গো ভাৱেতব্বো’’তি. পঞ্চমং.

৬. কামগুণসুত্তং

১৭৭. ‘‘পঞ্চিমে, ভিক্খৱে, কামগুণা. কতমে পঞ্চ? চক্খুৱিঞ্ঞেয্যা ৰূপা ইট্ঠা কন্তা মনাপা পিযৰূপা কামূপসংহিতা ৰজনীযা, সোতৱিঞ্ঞেয্যা সদ্দা…পে… ঘানৱিঞ্ঞেয্যা গন্ধা…পে… জিৱ্হাৱিঞ্ঞেয্যা ৰসা…পে… কাযৱিঞ্ঞেয্যা ফোট্ঠব্বা ইট্ঠা কন্তা মনাপা পিযৰূপা কামূপসংহিতা ৰজনীযা – ইমে খো, ভিক্খৱে, পঞ্চ কামগুণা. ইমেসং খো, ভিক্খৱে, পঞ্চন্নং কামগুণানং অভিঞ্ঞায পৰিঞ্ঞায পৰিক্খযায পহানায…পে… অযং অৰিযো অট্ঠঙ্গিকো মগ্গো ভাৱেতব্বো’’তি. ছট্ঠং.

৭. নীৱৰণসুত্তং

১৭৮. ‘‘পঞ্চিমানি, ভিক্খৱে, নীৱৰণানি. কতমানি পঞ্চ? কামচ্ছন্দনীৱৰণং, ব্যাপাদনীৱৰণং, থিনমিদ্ধনীৱৰণং, উদ্ধচ্চকুক্কুচ্চনীৱৰণং, ৱিচিকিচ্ছানীৱৰণং – ইমানি খো, ভিক্খৱে, পঞ্চ নীৱৰণানি. ইমেসং খো, ভিক্খৱে, পঞ্চন্নং নীৱৰণানং অভিঞ্ঞায পৰিঞ্ঞায পৰিক্খযায পহানায…পে… অযং অৰিযো অট্ঠঙ্গিকো মগ্গো ভাৱেতব্বো’’তি. সত্তমং.

৮. উপাদানক্খন্ধসুত্তং

১৭৯. ‘‘পঞ্চিমে, ভিক্খৱে, উপাদানক্খন্ধা. কতমে পঞ্চ? সেয্যথিদং – ৰূপুপাদানক্খন্ধো, ৱেদনুপাদানক্খন্ধো, সঞ্ঞুপাদানক্খন্ধো, সঙ্খাৰুপাদানক্খন্ধো, ৱিঞ্ঞাণুপাদানক্খন্ধো. ইমে খো, ভিক্খৱে, পঞ্চুপাদানক্খন্ধা. ইমেসং খো, ভিক্খৱে, পঞ্চন্নং উপাদানক্খন্ধানং অভিঞ্ঞায পৰিঞ্ঞায পৰিক্খযায পহানায…পে… অযং অৰিযো অট্ঠঙ্গিকো মগ্গো ভাৱেতব্বো’’তি. অট্ঠমং.

৯. ওৰম্ভাগিযসুত্তং

১৮০. ‘‘পঞ্চিমানি, ভিক্খৱে, ওৰম্ভাগিযানি সংযোজনানি. কতমানি পঞ্চ? সক্কাযদিট্ঠি, ৱিচিকিচ্ছা, সীলব্বতপৰামাসো, কামচ্ছন্দো, ব্যাপাদো – ইমানি খো, ভিক্খৱে, পঞ্চোৰম্ভাগিযানি সংযোজনানি. ইমেসং খো ভিক্খৱে, পঞ্চন্নং ওৰম্ভাগিযানং সংযোজনানং অভিঞ্ঞায পৰিঞ্ঞায পৰিক্খযায পহানায…পে… অযং অৰিযো অট্ঠঙ্গিকো মগ্গো ভাৱেতব্বো’’তি. নৱমং.

১০. উদ্ধম্ভাগিযসুত্তং

১৮১. ‘‘পঞ্চিমানি, ভিক্খৱে, উদ্ধম্ভাগিযানি সংযোজনানি. কতমানি পঞ্চ? ৰূপৰাগো, অৰূপৰাগো, মানো, উদ্ধচ্চং, অৱিজ্জা – ইমানি খো, ভিক্খৱে, পঞ্চুদ্ধম্ভাগিযানি সংযোজনানি. ইমেসং খো, ভিক্খৱে, পঞ্চন্নং উদ্ধম্ভাগিযানং সংযোজনানং অভিঞ্ঞায পৰিঞ্ঞায পৰিক্খযায পহানায অৰিযো অট্ঠঙ্গিকো মগ্গো ভাৱেতব্বো. কতমো অৰিযো অট্ঠঙ্গিকো মগ্গো? ইধ, ভিক্খৱে, ভিক্খু সম্মাদিট্ঠিং ভাৱেতি ৱিৱেকনিস্সিতং…পে… সম্মাসমাধিং ভাৱেতি ৱিৱেকনিস্সিতং ৱিৰাগনিস্সিতং নিৰোধনিস্সিতং ৱোস্সগ্গপৰিণামিং. ইমেসং খো, ভিক্খৱে, পঞ্চন্নং উদ্ধম্ভাগিযানং সংযোজনানং অভিঞ্ঞায পৰিঞ্ঞায পৰিক্খযায পহানায অযং অৰিযো অট্ঠঙ্গিকো মগ্গো ভাৱেতব্বো’’তি.

‘‘পঞ্চিমানি, ভিক্খৱে, উদ্ধম্ভাগিযানি সংযোজনানি. কতমানি পঞ্চ? ৰূপৰাগো, অৰূপৰাগো, মানো, উদ্ধচ্চং, অৱিজ্জা – ইমানি খো, ভিক্খৱে, পঞ্চুদ্ধম্ভাগিযানি সংযোজনানি. ইমেসং খো, ভিক্খৱে, পঞ্চন্নং উদ্ধম্ভাগিযানং সংযোজনানং অভিঞ্ঞায পৰিঞ্ঞায পৰিক্খযায পহানায অৰিযো অট্ঠঙ্গিকো মগ্গো ভাৱেতব্বো. কতমো অৰিযো অট্ঠঙ্গিকো মগ্গো? ইধ, ভিক্খৱে, ভিক্খু সম্মাদিট্ঠিং ভাৱেতি…পে… সম্মাসমাধিং ভাৱেতি ৰাগৱিনযপৰিযোসানং দোসৱিনযপৰিযোসানং মোহৱিনযপৰিযোসানং… অমতোগধং অমতপৰাযনং অমতপৰিযোসানং… নিব্বাননিন্নং নিব্বানপোণং নিব্বানপব্ভাৰং. ইমেসং খো, ভিক্খৱে, পঞ্চন্নং উদ্ধম্ভাগিযানং সংযোজনানং অভিঞ্ঞায পৰিঞ্ঞায পৰিক্খযায পহানায অযং অৰিযো অট্ঠঙ্গিকো মগ্গো ভাৱেতব্বো’’তি. দসমং.

ওঘৱগ্গো অট্ঠমো.

তস্সুদ্দানং –

ওঘো যোগো উপাদানং, গন্থং অনুসযেন চ;

কামগুণা নীৱৰণং, খন্ধা ওৰুদ্ধম্ভাগিযাতি.

ৱগ্গুদ্দানং –

অৱিজ্জাৱগ্গো পঠমো, দুতিযং ৱিহাৰং ৱুচ্চতি;

মিচ্ছত্তং ততিযো ৱগ্গো, চতুত্থং পটিপন্নেনেৱ.

তিত্থিযং পঞ্চমো ৱগ্গো, ছট্ঠো সূৰিযেন চ;

বহুকতে সত্তমো ৱগ্গো, উপ্পাদো অট্ঠমেন চ.

দিৱসৱগ্গো নৱমো, দসমো অপ্পমাদেন চ;

একাদসবলৱগ্গো, দ্ৱাদস এসনা পাড়িযং;

ওঘৱগ্গো ভৱতি তেৰসাতি.

মগ্গসংযুত্তং পঠমং.