৭. আকাসসুত্তং

১৫৫. ‘‘সেয্যথাপি, ভিক্খৱে, আকাসে ৱিৱিধা ৱাতা ৱাযন্তি – পুৰত্থিমাপি ৱাতা ৱাযন্তি, পচ্ছিমাপি ৱাতা ৱাযন্তি, উত্তৰাপি ৱাতা ৱাযন্তি, দক্খিণাপি ৱাতা ৱাযন্তি, সৰজাপি ৱাতা ৱাযন্তি, অৰজাপি ৱাতা ৱাযন্তি, সীতাপি ৱাতা ৱাযন্তি, উণ্হাপি ৱাতা ৱাযন্তি, পৰিত্তাপি ৱাতা ৱাযন্তি, অধিমত্তাপি ৱাতা ৱাযন্তি; এৱমেৱ খো, ভিক্খৱে, ভিক্খুনো অৰিযং অট্ঠঙ্গিকং মগ্গং ভাৱযতো অৰিযং অট্ঠঙ্গিকং মগ্গং বহুলীকৰোতো চত্তাৰোপি সতিপট্ঠানা ভাৱনাপাৰিপূৰিং গচ্ছন্তি, চত্তাৰোপি সম্মপ্পধানা ভাৱনাপাৰিপূৰিং গচ্ছন্তি, চত্তাৰোপি ইদ্ধিপাদা ভাৱনাপাৰিপূৰিং গচ্ছন্তি, পঞ্চপি ইন্দ্ৰিযানি ভাৱনাপাৰিপূৰিং গচ্ছন্তি, পঞ্চপি বলানি ভাৱনাপৰিপূৰিং গচ্ছন্তি, সত্তপি বোজ্ঝঙ্গা ভাৱনাপাৰিপূৰিং গচ্ছন্তি. কথঞ্চ, ভিক্খৱে, ভিক্খুনো অৰিযং অট্ঠঙ্গিকং মগ্গং ভাৱযতো অৰিযং অট্ঠঙ্গিকং মগ্গং বহুলীকৰোতো চত্তাৰোপি সতিপট্ঠানা ভাৱনাপাৰিপূৰিং গচ্ছন্তি, চত্তাৰোপি সম্মপ্পধানা ভাৱনাপাৰিপূৰিং গচ্ছন্তি, চত্তাৰোপি ইদ্ধিপাদা ভাৱনাপাৰিপূৰিং গচ্ছন্তি, পঞ্চপি ইন্দ্ৰিযানি ভাৱনাপাৰিপূৰিং গচ্ছন্তি, পঞ্চপি বলানি ভাৱনাপাৰিপূৰিং গচ্ছন্তি, সত্তপি বোজ্ঝঙ্গা ভাৱনাপাৰিপূৰিং গচ্ছন্তি? ইধ, ভিক্খৱে, ভিক্খু সম্মাদিট্ঠিং ভাৱেতি…পে… সম্মাসমাধিং ভাৱেতি ৱিৱেকনিস্সিতং ৱিৰাগনিস্সিতং নিৰোধনিস্সিতং ৱোস্সগ্গপৰিণামিং…পে… এৱং খো, ভিক্খৱে, ভিক্খুনো অৰিযং অট্ঠঙ্গিকং মগ্গং ভাৱযতো অৰিযং অট্ঠঙ্গিকং মগ্গং বহুলীকৰোতো চত্তাৰোপি সতিপট্ঠানা ভাৱনাপাৰিপূৰিং গচ্ছন্তি, চত্তাৰোপি সম্মপ্পধানা ভাৱনাপাৰিপূৰিং গচ্ছন্তি, চত্তাৰোপি ইদ্ধিপাদা ভাৱনাপাৰিপূৰিং গচ্ছন্তি, পঞ্চপি ইন্দ্ৰিযানি ভাৱনাপাৰিপূৰিং গচ্ছন্তি, পঞ্চপি বলানি ভাৱনাপাৰিপূৰিং গচ্ছন্তি, সত্তপি বোজ্ঝঙ্গা ভাৱনাপাৰিপূৰিং গচ্ছন্তী’’তি. সত্তমং.