৬. বলকৰণীযৱগ্গো

১. বলসুত্তং

১৪৯. সাৱত্থিনিদানং. ‘‘সেয্যথাপি, ভিক্খৱে, যে কেচি বলকৰণীযা কম্মন্তা কৰীযন্তি, সব্বে তে পথৱিং নিস্সায পথৱিযং পতিট্ঠায এৱমেতে বলকৰণীযা কম্মন্তা কৰীযন্তি; এৱমেৱ খো, ভিক্খৱে, ভিক্খু সীলং নিস্সায সীলে পতিট্ঠায অৰিযং অট্ঠঙ্গিকং মগ্গং ভাৱেতি অৰিযং অট্ঠঙ্গিকং মগ্গং বহুলীকৰোতি. কথঞ্চ, ভিক্খৱে, ভিক্খু সীলং নিস্সায সীলে পতিট্ঠায অৰিযং অট্ঠঙ্গিকং মগ্গং ভাৱেতি অৰিযং অট্ঠঙ্গিকং মগ্গং বহুলীকৰোতি? ইধ, ভিক্খৱে, ভিক্খু সম্মাদিট্ঠিং ভাৱেতি ৱিৱেকনিস্সিতং ৱিৰাগনিস্সিতং নিৰোধনিস্সিতং ৱোস্সগ্গপৰিণামিং…পে… এৱং খো, ভিক্খৱে, ভিক্খু সীলং নিস্সায সীলে পতিট্ঠায অৰিযং অট্ঠঙ্গিকং মগ্গং ভাৱেতি অৰিযং অট্ঠঙ্গিকং মগ্গং বহুলীকৰোতী’’তি.

(পৰগঙ্গাপেয্যালীৱণ্ণিযতো পৰিপুণ্ণসুত্তন্তি ৱিত্থাৰমগ্গী).

‘‘সেয্যথাপি, ভিক্খৱে, যে কেচি বলকৰণীযা কম্মন্তা কৰীযন্তি, সব্বে তে পথৱিং নিস্সায পথৱিযং পতিট্ঠায এৱমেতে বলকৰণীযা কম্মন্তা কৰীযন্তি; এৱমেৱ খো, ভিক্খৱে, ভিক্খু সীলং নিস্সায সীলে পতিট্ঠায অৰিযং অট্ঠঙ্গিকং মগ্গং ভাৱেতি অৰিযং অট্ঠঙ্গিকং মগ্গং বহুলীকৰোতি. কথঞ্চ, ভিক্খৱে, ভিক্খু সীলং নিস্সায সীলে পতিট্ঠায অৰিযং অট্ঠঙ্গিকং মগ্গং ভাৱেতি অৰিযং অট্ঠঙ্গিকং মগ্গং বহুলীকৰোতি? ইধ, ভিক্খৱে, ভিক্খু সম্মাদিট্ঠিং ভাৱেতি ৰাগৱিনযপৰিযোসানং দোসৱিনযপৰিযোসানং মোহৱিনযপৰিযোসানং…পে… সম্মাসমাধিং ভাৱেতি ৰাগৱিনযপৰিযোসানং দোসৱিনযপৰিযোসানং মোহৱিনযপৰিযোসানং. এৱং খো, ভিক্খৱে, ভিক্খু সীলং নিস্সায সীলে পতিট্ঠায অৰিযং অট্ঠঙ্গিকং মগ্গং ভাৱেতি অৰিযং অট্ঠঙ্গিকং মগ্গং বহুলীকৰোতী’’তি.

‘‘সেয্যথাপি, ভিক্খৱে, যে কেচি বলকৰণীযা কম্মন্তা কৰীযন্তি, সব্বে তে পথৱিং নিস্সায পথৱিযং পতিট্ঠায এৱমেতে বলকৰণীযা কম্মন্তা কৰীযন্তি; এৱমেৱ খো, ভিক্খৱে, ভিক্খু সীলং নিস্সায সীলে পতিট্ঠায অৰিযং অট্ঠঙ্গিকং মগ্গং ভাৱেতি অৰিযং অট্ঠঙ্গিকং মগ্গং বহুলীকৰোতি. কথঞ্চ, ভিক্খৱে, ভিক্খু সীলং নিস্সায সীলে পতিট্ঠায অৰিযং অট্ঠঙ্গিকং মগ্গং ভাৱেতি অৰিযং অট্ঠঙ্গিকং মগ্গং বহুলীকৰোতি? ইধ, ভিক্খৱে, ভিক্খু সম্মাদিট্ঠিং ভাৱেতি অমতোগধং অমতপৰাযনং অমতপৰিযোসানং…পে… সম্মাসমাধিং ভাৱেতি অমতোগধং অমতপৰাযনং অমতপৰিযোসানং. এৱং খো, ভিক্খৱে, ভিক্খু সীলং নিস্সায সীলে পতিট্ঠায অৰিযং অট্ঠঙ্গিকং মগ্গং ভাৱেতি অৰিযং অট্ঠঙ্গিকং মগ্গং বহুলীকৰোতী’’তি.

‘‘সেয্যথাপি, ভিক্খৱে, যে কেচি বলকৰণীযা কম্মন্তা কৰীযন্তি, সব্বে তে পথৱিং নিস্সায পথৱিযং পতিট্ঠায এৱমেতে বলকৰণীযা কম্মন্তা কৰীযন্তি; এৱমেৱ খো, ভিক্খৱে, ভিক্খু সীলং নিস্সায সীলে পতিট্ঠায অৰিযং অট্ঠঙ্গিকং মগ্গং ভাৱেতি অৰিযং অট্ঠঙ্গিকং মগ্গং বহুলীকৰোতি. কথঞ্চ, ভিক্খৱে, ভিক্খু সীলং নিস্সায সীলে পতিট্ঠায অৰিযং অট্ঠঙ্গিকং মগ্গং ভাৱেতি অৰিযং অট্ঠঙ্গিকং মগ্গং বহুলীকৰোতি? ইধ, ভিক্খৱে, ভিক্খু সম্মাদিট্ঠিং ভাৱেতি নিব্বাননিন্নং নিব্বানপোণং নিব্বানপব্ভাৰং…পে… সম্মাসমাধিং ভাৱেতি নিব্বাননিন্নং নিব্বানপোণং নিব্বানপব্ভাৰং. এৱং খো, ভিক্খৱে, ভিক্খু সীলং নিস্সায সীলে পতিট্ঠায অৰিযং অট্ঠঙ্গিকং মগ্গং ভাৱেতি অৰিযং অট্ঠঙ্গিকং মগ্গং বহুলীকৰোতী’’তি. পঠমং.

২. বীজসুত্তং

১৫০. ‘‘সেয্যথাপি, ভিক্খৱে, যে কেচিমে বীজগামভূতগামা ৱুড্ঢিং ৱিৰূড়্হিং ৱেপুল্লং আপজ্জন্তি, সব্বে তে পথৱিং নিস্সায পথৱিযং পতিট্ঠায এৱমেতে বীজগামভূতগামা ৱুড্ঢিং ৱিৰূড়্হিং ৱেপুল্লং আপজ্জন্তি; এৱমেৱ খো, ভিক্খৱে, ভিক্খু সীলং নিস্সায সীলে পতিট্ঠায অৰিযং অট্ঠঙ্গিকং মগ্গং ভাৱেন্তো অৰিযং অট্ঠঙ্গিকং মগ্গং বহুলীকৰোন্তো ৱুড্ঢিং ৱিৰূড়্হিং ৱেপুল্লং পাপুণাতি ধম্মেসু. কথঞ্চ, ভিক্খৱে, ভিক্খু সীলং নিস্সায সীলে পতিট্ঠায অৰিযং অট্ঠঙ্গিকং মগ্গং ভাৱেন্তো অৰিযং অট্ঠঙ্গিকং মগ্গং বহুলীকৰোন্তো ৱুড্ঢিং ৱিৰূড়্হিং ৱেপুল্লং পাপুণাতি ধম্মেসু? ইধ, ভিক্খৱে, ভিক্খু সম্মাদিট্ঠিং ভাৱেতি ৱিৱেকনিস্সিতং…পে… সম্মাসমাধিং ভাৱেতি ৱিৱেকনিস্সিতং ৱিৰাগনিস্সিতং নিৰোধনিস্সিতং ৱোস্সগ্গপৰিণামিং…পে… এৱং খো, ভিক্খৱে, ভিক্খু সীলং নিস্সায সীলে পতিট্ঠায অৰিযং অট্ঠঙ্গিকং মগ্গং ভাৱেন্তো অৰিযং অট্ঠঙ্গিকং মগ্গং বহুলীকৰোন্তো ৱুড্ঢিং ৱিৰূড়্হিং ৱেপুল্লং পাপুণাতি ধম্মেসূ’’তি. দুতিযং.

৩. নাগসুত্তং

১৫১. ‘‘সেয্যথাপি, ভিক্খৱে, হিমৱন্তং পব্বতৰাজং নিস্সায নাগা কাযং ৱড্ঢেন্তি, বলং গাহেন্তি; তে তত্থ কাযং ৱড্ঢেত্ৱা বলং গাহেত্ৱা কুসোব্ভে ওতৰন্তি, কুসোব্ভে [কুস্সুব্ভে (সী. স্যা.), কুসুব্ভে (পী. ক.)] ওতৰিত্ৱা মহাসোব্ভে ওতৰন্তি, মহাসোব্ভে ওতৰিত্ৱা কুন্নদিযো ওতৰন্তি, কুন্নদিযো ওতৰিত্ৱা মহানদিযো ওতৰন্তি, মহানদিযো ওতৰিত্ৱা মহাসমুদ্দং [মহাসমুদ্দসাগৰং (সব্বত্থ) সং. নি. ২.২৩] ওতৰন্তি, তে তত্থ মহন্তত্তং ৱেপুল্লত্তং আপজ্জন্তি কাযেন; এৱমেৱ খো, ভিক্খৱে, ভিক্খু সীলং নিস্সায সীলে পতিট্ঠায অৰিযং অট্ঠঙ্গিকং মগ্গং ভাৱেন্তো অৰিযং অট্ঠঙ্গিকং মগ্গং বহুলীকৰোন্তো মহন্তত্তং ৱেপুল্লত্তং পাপুণাতি ধম্মেসু. কথঞ্চ, ভিক্খৱে, ভিক্খু সীলং নিস্সায সীলে পতিট্ঠায অৰিযং অট্ঠঙ্গিকং মগ্গং ভাৱেন্তো অৰিযং অট্ঠঙ্গিকং মগ্গং বহুলীকৰোন্তো মহন্তত্তং ৱেপুল্লত্তং পাপুণাতি ধম্মেসু? ইধ, ভিক্খৱে, ভিক্খু সম্মাদিট্ঠিং ভাৱেতি ৱিৱেকনিস্সিতং ৱিৰাগনিস্সিতং নিৰোধনিস্সিতং ৱোস্সগ্গপৰিণামিং…পে… সম্মাসমাধিং ভাৱেতি ৱিৱেকনিস্সিতং ৱিৰাগনিস্সিতং নিৰোধনিস্সিতং ৱোস্সগ্গপৰিণামিং…পে… এৱং খো, ভিক্খৱে, ভিক্খু সীলং নিস্সায সীলে পতিট্ঠায অৰিযং অট্ঠঙ্গিকং মগ্গং ভাৱেন্তো অৰিযং অট্ঠঙ্গিকং মগ্গং বহুলীকৰোন্তো মহন্তত্তং ৱেপুল্লত্তং পাপুণাতি ধম্মেসূ’’তি. ততিযং.

৪. ৰুক্খসুত্তং

১৫২. ‘‘সেয্যথাপি, ভিক্খৱে, ৰুক্খো পাচীননিন্নো পাচীনপোণো পাচীনপব্ভাৰো. সো মূলচ্ছিন্নো [মূলচ্ছিন্দে কতে (স্যা.)] কতমেন পপতেয্যা’’তি? ‘‘যেন, ভন্তে, নিন্নো যেন পোণো যেন পব্ভাৰো’’তি. ‘‘এৱমেৱ খো, ভিক্খৱে, ভিক্খু অৰিযং অট্ঠঙ্গিকং মগ্গং ভাৱেন্তো অৰিযং অট্ঠঙ্গিকং মগ্গং বহুলীকৰোন্তো নিব্বাননিন্নো হোতি নিব্বানপোণো নিব্বানপব্ভাৰো. কথঞ্চ, ভিক্খৱে, ভিক্খু অৰিযং অট্ঠঙ্গিকং মগ্গং ভাৱেন্তো অৰিযং অট্ঠঙ্গিকং মগ্গং বহুলীকৰোন্তো নিব্বাননিন্নো হোতি নিব্বানপোণো নিব্বানপব্ভাৰো? ইধ, ভিক্খৱে, ভিক্খু সম্মাদিট্ঠিং ভাৱেতি ৱিৱেকনিস্সিতং ৱিৰাগনিস্সিতং নিৰোধনিস্সিতং ৱোস্সগ্গপৰিণামিং…পে… সম্মাসমাধিং ভাৱেতি ৱিৱেকনিস্সিতং ৱিৰাগনিস্সিতং নিৰোধনিস্সিতং ৱোস্সগ্গপৰিণামিং…পে… এৱং খো, ভিক্খৱে, ভিক্খু অৰিযং অট্ঠঙ্গিকং মগ্গং ভাৱেন্তো অৰিযং অট্ঠঙ্গিকং মগ্গং বহুলীকৰোন্তো নিব্বাননিন্নো হোতি নিব্বানপোণো নিব্বানপব্ভাৰো’’তি. চতুত্থং.

৫. কুম্ভসুত্তং

১৫৩. ‘‘সেয্যথাপি, ভিক্খৱে, কুম্ভো নিক্কুজ্জো ৱমতেৱ উদকং, নো পচ্চাৱমতি; এৱমেৱ খো, ভিক্খৱে, ভিক্খু অৰিযং অট্ঠঙ্গিকং মগ্গং ভাৱেন্তো অৰিযং অট্ঠঙ্গিকং মগ্গং বহুলীকৰোন্তো ৱমতেৱ পাপকে অকুসলে ধম্মে, নো পচ্চাৱমতি. কথঞ্চ, ভিক্খৱে, ভিক্খু অৰিযং অট্ঠঙ্গিকং মগ্গং ভাৱেন্তো অৰিযং অট্ঠঙ্গিকং মগ্গং বহুলীকৰোন্তো ৱমতেৱ পাপকে অকুসলে ধম্মে, নো পচ্চাৱমতি? ইধ, ভিক্খৱে, ভিক্খু সম্মাদিট্ঠিং ভাৱেতি ৱিৱেকনিস্সিতং ৱিৰাগনিস্সিতং নিৰোধনিস্সিতং ৱোস্সগ্গপৰিণামিং…পে… সম্মাসমাধিং ভাৱেতি ৱিৱেকনিস্সিতং ৱিৰাগনিস্সিতং নিৰোধনিস্সিতং ৱোস্সগ্গপৰিণামিং…পে… এৱং খো, ভিক্খৱে, ভিক্খু অৰিযং অট্ঠঙ্গিকং মগ্গং ভাৱেন্তো অৰিযং অট্ঠঙ্গিকং মগ্গং বহুলীকৰোন্তো ৱমতেৱ পাপকে অকুসলে ধম্মে, নো পচ্চাৱমতী’’তি. পঞ্চমং.

৬. সূকসুত্তং

১৫৪. ‘‘সেয্যথাপি, ভিক্খৱে, সালিসূকং ৱা যৱসূকং ৱা সম্মাপণিহিতং হত্থেন ৱা পাদেন ৱা অক্কন্তং হত্থং ৱা পাদং ৱা ভিন্দিস্সতি লোহিতং ৱা উপ্পাদেস্সতীতি – ঠানমেতং ৱিজ্জতি. তং কিস্স হেতু? সম্মাপণিহিতত্তা, ভিক্খৱে, সূকস্স. এৱমেৱ খো, ভিক্খৱে, ভিক্খু সম্মাপণিহিতায দিট্ঠিযা সম্মাপণিহিতায মগ্গভাৱনায অৱিজ্জং ভিন্দিস্সতি, ৱিজ্জং উপ্পাদেস্সতি, নিব্বানং সচ্ছিকৰিস্সতীতি – ঠানমেতং ৱিজ্জতি. তং কিস্স হেতু? সম্মাপণিহিতত্তা, ভিক্খৱে, দিট্ঠিযা. কথঞ্চ, ভিক্খৱে, ভিক্খু সম্মাপণিহিতায দিট্ঠিযা সম্মাপণিহিতায মগ্গভাৱনায অৱিজ্জং ভিন্দতি, ৱিজ্জং উপ্পাদেতি, নিব্বানং সচ্ছিকৰোতি? ইধ, ভিক্খৱে, ভিক্খু সম্মাদিট্ঠিং ভাৱেতি ৱিৱেকনিস্সিতং…পে… সম্মাসমাধিং ভাৱেতি ৱিৱেকনিস্সিতং ৱিৰাগনিস্সিতং নিৰোধনিস্সিতং ৱোস্সগ্গপৰিণামিং…পে… এৱং খো, ভিক্খৱে, ভিক্খু সম্মাপণিহিতায দিট্ঠিযা সম্মাপণিহিতায মগ্গভাৱনায অৱিজ্জং ভিন্দতি, ৱিজ্জং উপ্পাদেতি, নিব্বানং সচ্ছিকৰোতী’’তি. ছট্ঠং.

৭. আকাসসুত্তং

১৫৫. ‘‘সেয্যথাপি, ভিক্খৱে, আকাসে ৱিৱিধা ৱাতা ৱাযন্তি – পুৰত্থিমাপি ৱাতা ৱাযন্তি, পচ্ছিমাপি ৱাতা ৱাযন্তি, উত্তৰাপি ৱাতা ৱাযন্তি, দক্খিণাপি ৱাতা ৱাযন্তি, সৰজাপি ৱাতা ৱাযন্তি, অৰজাপি ৱাতা ৱাযন্তি, সীতাপি ৱাতা ৱাযন্তি, উণ্হাপি ৱাতা ৱাযন্তি, পৰিত্তাপি ৱাতা ৱাযন্তি, অধিমত্তাপি ৱাতা ৱাযন্তি; এৱমেৱ খো, ভিক্খৱে, ভিক্খুনো অৰিযং অট্ঠঙ্গিকং মগ্গং ভাৱযতো অৰিযং অট্ঠঙ্গিকং মগ্গং বহুলীকৰোতো চত্তাৰোপি সতিপট্ঠানা ভাৱনাপাৰিপূৰিং গচ্ছন্তি, চত্তাৰোপি সম্মপ্পধানা ভাৱনাপাৰিপূৰিং গচ্ছন্তি, চত্তাৰোপি ইদ্ধিপাদা ভাৱনাপাৰিপূৰিং গচ্ছন্তি, পঞ্চপি ইন্দ্ৰিযানি ভাৱনাপাৰিপূৰিং গচ্ছন্তি, পঞ্চপি বলানি ভাৱনাপৰিপূৰিং গচ্ছন্তি, সত্তপি বোজ্ঝঙ্গা ভাৱনাপাৰিপূৰিং গচ্ছন্তি. কথঞ্চ, ভিক্খৱে, ভিক্খুনো অৰিযং অট্ঠঙ্গিকং মগ্গং ভাৱযতো অৰিযং অট্ঠঙ্গিকং মগ্গং বহুলীকৰোতো চত্তাৰোপি সতিপট্ঠানা ভাৱনাপাৰিপূৰিং গচ্ছন্তি, চত্তাৰোপি সম্মপ্পধানা ভাৱনাপাৰিপূৰিং গচ্ছন্তি, চত্তাৰোপি ইদ্ধিপাদা ভাৱনাপাৰিপূৰিং গচ্ছন্তি, পঞ্চপি ইন্দ্ৰিযানি ভাৱনাপাৰিপূৰিং গচ্ছন্তি, পঞ্চপি বলানি ভাৱনাপাৰিপূৰিং গচ্ছন্তি, সত্তপি বোজ্ঝঙ্গা ভাৱনাপাৰিপূৰিং গচ্ছন্তি? ইধ, ভিক্খৱে, ভিক্খু সম্মাদিট্ঠিং ভাৱেতি…পে… সম্মাসমাধিং ভাৱেতি ৱিৱেকনিস্সিতং ৱিৰাগনিস্সিতং নিৰোধনিস্সিতং ৱোস্সগ্গপৰিণামিং…পে… এৱং খো, ভিক্খৱে, ভিক্খুনো অৰিযং অট্ঠঙ্গিকং মগ্গং ভাৱযতো অৰিযং অট্ঠঙ্গিকং মগ্গং বহুলীকৰোতো চত্তাৰোপি সতিপট্ঠানা ভাৱনাপাৰিপূৰিং গচ্ছন্তি, চত্তাৰোপি সম্মপ্পধানা ভাৱনাপাৰিপূৰিং গচ্ছন্তি, চত্তাৰোপি ইদ্ধিপাদা ভাৱনাপাৰিপূৰিং গচ্ছন্তি, পঞ্চপি ইন্দ্ৰিযানি ভাৱনাপাৰিপূৰিং গচ্ছন্তি, পঞ্চপি বলানি ভাৱনাপাৰিপূৰিং গচ্ছন্তি, সত্তপি বোজ্ঝঙ্গা ভাৱনাপাৰিপূৰিং গচ্ছন্তী’’তি. সত্তমং.

৮. পঠমমেঘসুত্তং

১৫৬. ‘‘সেয্যথাপি, ভিক্খৱে, গিম্হানং পচ্ছিমে মাসে ঊহতং ৰজোজল্লং, তমেনং মহাঅকালমেঘো ঠানসো অন্তৰধাপেতি ৱূপসমেতি; এৱমেৱ খো, ভিক্খৱে, ভিক্খু অৰিযং অট্ঠঙ্গিকং মগ্গং ভাৱেন্তো অৰিযং অট্ঠঙ্গিকং মগ্গং বহুলীকৰোন্তো উপ্পন্নুপ্পন্নে পাপকে অকুসলে ধম্মে ঠানসো অন্তৰধাপেতি ৱূপসমেতি. কথঞ্চ, ভিক্খৱে, ভিক্খু অৰিযং অট্ঠঙ্গিকং মগ্গং ভাৱেন্তো অৰিযং অট্ঠঙ্গিকং মগ্গং বহুলীকৰোন্তো উপ্পন্নুপ্পন্নে পাপকে অকুসলে ধম্মে ঠানসো অন্তৰধাপেতি ৱূপসমেতি? ইধ, ভিক্খৱে, ভিক্খু সম্মাদিট্ঠিং ভাৱেতি…পে… সম্মাসমাধিং ভাৱেতি ৱিৱেকনিস্সিতং ৱিৰাগনিস্সিতং নিৰোধনিস্সিতং ৱোস্সগ্গপৰিণামিং…পে… এৱং খো, ভিক্খৱে, ভিক্খু অৰিযং অট্ঠঙ্গিকং মগ্গং ভাৱেন্তো অৰিযং অট্ঠঙ্গিকং মগ্গং বহুলীকৰোন্তো উপ্পন্নুপ্পন্নে পাপকে অকুসলে ধম্মে ঠানসো অন্তৰধাপেতি ৱূপসমেতী’’তি. অট্ঠমং.

৯. দুতিযমেঘসুত্তং

১৫৭. ‘‘সেয্যথাপি, ভিক্খৱে, উপ্পন্নং মহামেঘং, তমেনং মহাৱাতো অন্তৰাযেৱ অন্তৰধাপেতি ৱূপসমেতি; এৱমেৱ খো, ভিক্খৱে, ভিক্খু অৰিযং অট্ঠঙ্গিকং মগ্গং ভাৱেন্তো অৰিযং অট্ঠঙ্গিকং মগ্গং বহুলীকৰোন্তো উপ্পন্নুপ্পন্নে পাপকে অকুসলে ধম্মে অন্তৰাযেৱ অন্তৰধাপেতি ৱূপসমেতি. কথঞ্চ, ভিক্খৱে, ভিক্খু অৰিযং অট্ঠঙ্গিকং মগ্গং ভাৱেন্তো অৰিযং অট্ঠঙ্গিকং মগ্গং বহুলীকৰোন্তো উপ্পন্নুপ্পন্নে পাপকে অকুসলে ধম্মে অন্তৰাযেৱ অন্তৰধাপেতি ৱূপসমেতি? ইধ, ভিক্খৱে, ভিক্খু সম্মাদিট্ঠিং ভাৱেতি…পে… সম্মাসমাধিং ভাৱেতি ৱিৱেকনিস্সিতং ৱিৰাগনিস্সিতং নিৰোধনিস্সিতং ৱোস্সগ্গপৰিণামিং…পে… এৱং খো, ভিক্খৱে, ভিক্খু অৰিযং অট্ঠঙ্গিকং মগ্গং ভাৱেন্তো অৰিযং অট্ঠঙ্গিকং মগ্গং বহুলীকৰোন্তো উপ্পন্নুপ্পন্নে পাপকে অকুসলে ধম্মে অন্তৰাযেৱ অন্তৰধাপেতি ৱূপসমেতী’’তি. নৱমং.

১০. নাৱাসুত্তং

১৫৮. ‘‘সেয্যথাপি, ভিক্খৱে, সামুদ্দিকায নাৱায ৱেত্তবন্ধনবন্ধায ছ মাসানি উদকে পৰিযাদায [পৰিযাতায (ক.), পৰিযাহতায (?)] হেমন্তিকেন থলং উক্খিত্তায ৱাতাতপপৰেতানি বন্ধনানি তানি পাৱুস্সকেন মেঘেন অভিপ্পৱুট্ঠানি অপ্পকসিৰেনেৱ পটিপ্পস্সম্ভন্তি, পূতিকানি ভৱন্তি; এৱমেৱ খো, ভিক্খৱে, ভিক্খুনো অৰিযং অট্ঠঙ্গিকং মগ্গং ভাৱযতো অৰিযং অট্ঠঙ্গিকং মগ্গং বহুলীকৰোতো অপ্পকসিৰেনেৱ সংযোজনানি পটিপ্পস্সম্ভন্তি, পূতিকানি ভৱন্তি. কথঞ্চ, ভিক্খৱে, ভিক্খুনো অৰিযং অট্ঠঙ্গিকং মগ্গং ভাৱযতো অৰিযং অট্ঠঙ্গিকং মগ্গং বহুলীকৰোতো অপ্পকসিৰেনেৱ সংযোজনানি পটিপ্পস্সম্ভন্তি, পূতিকানি ভৱন্তি? ইধ, ভিক্খৱে, ভিক্খু সম্মাদিট্ঠিং ভাৱেতি…পে… সম্মাসমাধিং ভাৱেতি ৱিৱেকনিস্সিতং ৱিৰাগনিস্সিতং নিৰোধনিস্সিতং ৱোস্সগ্গপৰিণামিং…পে… এৱং খো, ভিক্খৱে, ভিক্খুনো অৰিযং অট্ঠঙ্গিকং মগ্গং ভাৱযতো অৰিযং অট্ঠঙ্গিকং মগ্গং বহুলীকৰোতো অপ্পকসিৰেনেৱ সংযোজনানি পটিপ্পস্সম্ভন্তি, পূতিকানি ভৱন্তী’’তি. দসমং.

১১. আগন্তুকসুত্তং

১৫৯. ‘‘সেয্যথাপি, ভিক্খৱে, আগন্তুকাগাৰং. তত্থ পুৰত্থিমাযপি দিসায আগন্ত্ৱা ৱাসং কপ্পেন্তি, পচ্ছিমাযপি দিসায আগন্ত্ৱা ৱাসং কপ্পেন্তি, উত্তৰাযপি দিসায আগন্ত্ৱা ৱাসং কপ্পেন্তি, দক্খিণাযপি দিসায আগন্ত্ৱা ৱাসং কপ্পেন্তি, খত্তিযাপি আগন্ত্ৱা ৱাসং কপ্পেন্তি, ব্ৰাহ্মণাপি আগন্ত্ৱা ৱাসং কপ্পেন্তি, ৱেস্সাপি আগন্ত্ৱা ৱাসং কপ্পেন্তি, সুদ্দাপি আগন্ত্ৱা ৱাসং কপ্পেন্তি; এৱমেৱ খো, ভিক্খৱে, ভিক্খু অৰিযং অট্ঠঙ্গিকং মগ্গং ভাৱেন্তো অৰিযং অট্ঠঙ্গিকং মগ্গং বহুলীকৰোন্তো যে ধম্মা অভিঞ্ঞা পৰিঞ্ঞেয্যা, তে ধম্মে অভিঞ্ঞা পৰিজানাতি, যে ধম্মা অভিঞ্ঞা পহাতব্বা, তে ধম্মে অভিঞ্ঞা পজহতি, যে ধম্মা অভিঞ্ঞা সচ্ছিকাতব্বা, তে ধম্মে অভিঞ্ঞা সচ্ছিকৰোতি, যে ধম্মা অভিঞ্ঞা ভাৱেতব্বা, তে ধম্মে অভিঞ্ঞা ভাৱেতি.

‘‘কতমে চ, ভিক্খৱে, ধম্মা অভিঞ্ঞা পৰিঞ্ঞেয্যা? পঞ্চুপাদানক্খন্ধাতিস্স ৱচনীযং. কতমে পঞ্চ? সেয্যথিদং – ৰূপুপাদানক্খন্ধো…পে… ৱিঞ্ঞাণুপাদানক্খন্ধো. ইমে, ভিক্খৱে, ধম্মা অভিঞ্ঞা পৰিঞ্ঞেয্যা. কতমে চ, ভিক্খৱে, ধম্মা অভিঞ্ঞা পহাতব্বা? অৱিজ্জা চ ভৱতণ্হা চ – ইমে, ভিক্খৱে, ধম্মা অভিঞ্ঞা পহাতব্বা. কতমে চ, ভিক্খৱে, ধম্মা অভিঞ্ঞা সচ্ছিকাতব্বা? ৱিজ্জা চ ৱিমুত্তি চ – ইমে, ভিক্খৱে, ধম্মা অভিঞ্ঞা সচ্ছিকাতব্বা. কতমে চ, ভিক্খৱে, ধম্মা অভিঞ্ঞা ভাৱেতব্বা? সমথো চ ৱিপস্সনা চ – ইমে, ভিক্খৱে, ধম্মা অভিঞ্ঞা ভাৱেতব্বা. কথঞ্চ, ভিক্খৱে, ভিক্খু অৰিযং অট্ঠঙ্গিকং মগ্গং ভাৱেন্তো অৰিযং অট্ঠঙ্গিকং মগ্গং বহুলীকৰোন্তো, যে ধম্মা অভিঞ্ঞা পৰিঞ্ঞেয্যা তে ধম্মে অভিঞ্ঞা পৰিজানাতি…পে… যে ধম্মা অভিঞ্ঞা ভাৱেতব্বা, তে ধম্মে অভিঞ্ঞা ভাৱেতি? ইধ, ভিক্খৱে, ভিক্খু সম্মাদিট্ঠিং ভাৱেতি…পে… সম্মাসমাধিং ভাৱেতি ৱিৱেকনিস্সিতং ৱিৰাগনিস্সিতং নিৰোধনিস্সিতং ৱোস্সগ্গপৰিণামিং…পে… এৱং খো, ভিক্খৱে, ভিক্খু অৰিযং অট্ঠঙ্গিকং মগ্গং ভাৱেন্তো অৰিযং অট্ঠঙ্গিকং মগ্গং বহুলীকৰোন্তো যে ধম্মা অভিঞ্ঞা পৰিঞ্ঞেয্যা, তে ধম্মে অভিঞ্ঞা পৰিজানাতি, যে ধম্মা অভিঞ্ঞা পহাতব্বা, তে ধম্মে অভিঞ্ঞা পজহতি, যে ধম্মা অভিঞ্ঞা সচ্ছিকাতব্বা, তে ধম্মে অভিঞ্ঞা সচ্ছিকৰোতি, যে ধম্মা অভিঞ্ঞা ভাৱেতব্বা, তে ধম্মে অভিঞ্ঞা ভাৱেতী’’তি. একাদসমং.

১২. নদীসুত্তং

১৬০. ‘‘সেয্যথাপি, ভিক্খৱে, গঙ্গা নদী পাচীননিন্না পাচীনপোণা পাচীনপব্ভাৰা. অথ মহাজনকাযো আগচ্ছেয্য কুদ্দাল-পিটকং আদায – ‘মযং ইমং গঙ্গং নদিং পচ্ছানিন্নং কৰিস্সাম পচ্ছাপোণং পচ্ছাপব্ভাৰ’ন্তি. তং কিং মঞ্ঞথ, ভিক্খৱে, অপি নু সো মহাজনকাযো গঙ্গং নদিং পচ্ছানিন্নং কৰেয্য পচ্ছাপোণং পচ্ছাপব্ভাৰ’’ন্তি? ‘‘নো হেতং, ভন্তে’’. ‘‘তং কিস্স হেতু’’? ‘‘গঙ্গা, ভন্তে, নদী পাচীননিন্না পাচীনপোণা পাচীনপব্ভাৰা. সা ন সুকৰা পচ্ছানিন্নং কাতুং পচ্ছাপোণং পচ্ছাপব্ভাৰং. যাৱদেৱ পন সো মহাজনকাযো কিলমথস্স ৱিঘাতস্স ভাগী অস্সা’’তি. ‘‘এৱমেৱ খো, ভিক্খৱে, ভিক্খুং অৰিযং অট্ঠঙ্গিকং মগ্গং ভাৱেন্তং অৰিযং অট্ঠঙ্গিকং মগ্গং বহুলীকৰোন্তং ৰাজানো ৱা ৰাজমহামত্তা ৱা মিত্তা ৱা অমচ্চা ৱা ঞাতী ৱা ঞাতিসালোহিতা ৱা ভোগেহি অভিহট্ঠুং পৱাৰেয্যুং – ‘এহম্ভো পুৰিস, কিং তে ইমে কাসাৱা অনুদহন্তি, কিং মুণ্ডো কপালমনুসংচৰসি! এহি, হীনাযাৱত্তিত্ৱা ভোগে চ ভুঞ্জস্সু, পুঞ্ঞানি চ কৰোহী’তি. সো ৱত, ভিক্খৱে, ভিক্খু অৰিযং অট্ঠঙ্গিকং মগ্গং ভাৱেন্তো অৰিযং অট্ঠঙ্গিকং মগ্গং বহুলীকৰোন্তো সিক্খং পচ্চক্খায হীনাযাৱত্তিস্সতীতি – নেতং ঠানং ৱিজ্জতি. তং কিস্স হেতু? যঞ্হি তং, ভিক্খৱে, চিত্তং দীঘৰত্তং ৱিৱেকনিন্নং ৱিৱেকপোণং ৱিৱেকপব্ভাৰং তং ৱত হীনাযাৱত্তিস্সতীতি – নেতং ঠানং ৱিজ্জতি. কথঞ্চ, ভিক্খৱে, ভিক্খু অৰিযং অট্ঠঙ্গিকং মগ্গং ভাৱেতি অৰিযং অট্ঠঙ্গিকং মগ্গং বহুলীকৰোতি? ইধ, ভিক্খৱে, ভিক্খু সম্মাদিট্ঠিং ভাৱেতি ৱিৱেকনিস্সিতং…পে… সম্মাসমাধিং ভাৱেতি ৱিৱেকনিস্সিতং ৱিৰাগনিস্সিতং নিৰোধনিস্সিতং ৱোস্সগ্গপৰিণামিং…পে… এৱং খো, ভিক্খৱে, ভিক্খু অৰিযং অট্ঠঙ্গিকং মগ্গং ভাৱেতি, অৰিযং অট্ঠঙ্গিকং মগ্গং বহুলীকৰোতী’’তি. (যদপি বলকৰণীযং, তদপি ৱিত্থাৰেতব্বং.) দ্ৱাদসমং.

বলকৰণীযৱগ্গো ছট্ঠো.

তস্সুদ্দানং –

বলং বীজঞ্চ নাগো চ, ৰুক্খো কুম্ভেন সূকিযা;

আকাসেন চ দ্ৱে মেঘা, নাৱা আগন্তুকা নদীতি.