৫. কুম্ভসুত্তং

১৫৩. ‘‘সেয্যথাপি, ভিক্খৱে, কুম্ভো নিক্কুজ্জো ৱমতেৱ উদকং, নো পচ্চাৱমতি; এৱমেৱ খো, ভিক্খৱে, ভিক্খু অৰিযং অট্ঠঙ্গিকং মগ্গং ভাৱেন্তো অৰিযং অট্ঠঙ্গিকং মগ্গং বহুলীকৰোন্তো ৱমতেৱ পাপকে অকুসলে ধম্মে, নো পচ্চাৱমতি. কথঞ্চ, ভিক্খৱে, ভিক্খু অৰিযং অট্ঠঙ্গিকং মগ্গং ভাৱেন্তো অৰিযং অট্ঠঙ্গিকং মগ্গং বহুলীকৰোন্তো ৱমতেৱ পাপকে অকুসলে ধম্মে, নো পচ্চাৱমতি? ইধ, ভিক্খৱে, ভিক্খু সম্মাদিট্ঠিং ভাৱেতি ৱিৱেকনিস্সিতং ৱিৰাগনিস্সিতং নিৰোধনিস্সিতং ৱোস্সগ্গপৰিণামিং…পে… সম্মাসমাধিং ভাৱেতি ৱিৱেকনিস্সিতং ৱিৰাগনিস্সিতং নিৰোধনিস্সিতং ৱোস্সগ্গপৰিণামিং…পে… এৱং খো, ভিক্খৱে, ভিক্খু অৰিযং অট্ঠঙ্গিকং মগ্গং ভাৱেন্তো অৰিযং অট্ঠঙ্গিকং মগ্গং বহুলীকৰোন্তো ৱমতেৱ পাপকে অকুসলে ধম্মে, নো পচ্চাৱমতী’’তি. পঞ্চমং.