১১. আগন্তুকসুত্তং

১৫৯. ‘‘সেয্যথাপি, ভিক্খৱে, আগন্তুকাগাৰং. তত্থ পুৰত্থিমাযপি দিসায আগন্ত্ৱা ৱাসং কপ্পেন্তি, পচ্ছিমাযপি দিসায আগন্ত্ৱা ৱাসং কপ্পেন্তি, উত্তৰাযপি দিসায আগন্ত্ৱা ৱাসং কপ্পেন্তি, দক্খিণাযপি দিসায আগন্ত্ৱা ৱাসং কপ্পেন্তি, খত্তিযাপি আগন্ত্ৱা ৱাসং কপ্পেন্তি, ব্ৰাহ্মণাপি আগন্ত্ৱা ৱাসং কপ্পেন্তি, ৱেস্সাপি আগন্ত্ৱা ৱাসং কপ্পেন্তি, সুদ্দাপি আগন্ত্ৱা ৱাসং কপ্পেন্তি; এৱমেৱ খো, ভিক্খৱে, ভিক্খু অৰিযং অট্ঠঙ্গিকং মগ্গং ভাৱেন্তো অৰিযং অট্ঠঙ্গিকং মগ্গং বহুলীকৰোন্তো যে ধম্মা অভিঞ্ঞা পৰিঞ্ঞেয্যা, তে ধম্মে অভিঞ্ঞা পৰিজানাতি, যে ধম্মা অভিঞ্ঞা পহাতব্বা, তে ধম্মে অভিঞ্ঞা পজহতি, যে ধম্মা অভিঞ্ঞা সচ্ছিকাতব্বা, তে ধম্মে অভিঞ্ঞা সচ্ছিকৰোতি, যে ধম্মা অভিঞ্ঞা ভাৱেতব্বা, তে ধম্মে অভিঞ্ঞা ভাৱেতি.

‘‘কতমে চ, ভিক্খৱে, ধম্মা অভিঞ্ঞা পৰিঞ্ঞেয্যা? পঞ্চুপাদানক্খন্ধাতিস্স ৱচনীযং. কতমে পঞ্চ? সেয্যথিদং – ৰূপুপাদানক্খন্ধো…পে… ৱিঞ্ঞাণুপাদানক্খন্ধো. ইমে, ভিক্খৱে, ধম্মা অভিঞ্ঞা পৰিঞ্ঞেয্যা. কতমে চ, ভিক্খৱে, ধম্মা অভিঞ্ঞা পহাতব্বা? অৱিজ্জা চ ভৱতণ্হা চ – ইমে, ভিক্খৱে, ধম্মা অভিঞ্ঞা পহাতব্বা. কতমে চ, ভিক্খৱে, ধম্মা অভিঞ্ঞা সচ্ছিকাতব্বা? ৱিজ্জা চ ৱিমুত্তি চ – ইমে, ভিক্খৱে, ধম্মা অভিঞ্ঞা সচ্ছিকাতব্বা. কতমে চ, ভিক্খৱে, ধম্মা অভিঞ্ঞা ভাৱেতব্বা? সমথো চ ৱিপস্সনা চ – ইমে, ভিক্খৱে, ধম্মা অভিঞ্ঞা ভাৱেতব্বা. কথঞ্চ, ভিক্খৱে, ভিক্খু অৰিযং অট্ঠঙ্গিকং মগ্গং ভাৱেন্তো অৰিযং অট্ঠঙ্গিকং মগ্গং বহুলীকৰোন্তো, যে ধম্মা অভিঞ্ঞা পৰিঞ্ঞেয্যা তে ধম্মে অভিঞ্ঞা পৰিজানাতি…পে… যে ধম্মা অভিঞ্ঞা ভাৱেতব্বা, তে ধম্মে অভিঞ্ঞা ভাৱেতি? ইধ, ভিক্খৱে, ভিক্খু সম্মাদিট্ঠিং ভাৱেতি…পে… সম্মাসমাধিং ভাৱেতি ৱিৱেকনিস্সিতং ৱিৰাগনিস্সিতং নিৰোধনিস্সিতং ৱোস্সগ্গপৰিণামিং…পে… এৱং খো, ভিক্খৱে, ভিক্খু অৰিযং অট্ঠঙ্গিকং মগ্গং ভাৱেন্তো অৰিযং অট্ঠঙ্গিকং মগ্গং বহুলীকৰোন্তো যে ধম্মা অভিঞ্ঞা পৰিঞ্ঞেয্যা, তে ধম্মে অভিঞ্ঞা পৰিজানাতি, যে ধম্মা অভিঞ্ঞা পহাতব্বা, তে ধম্মে অভিঞ্ঞা পজহতি, যে ধম্মা অভিঞ্ঞা সচ্ছিকাতব্বা, তে ধম্মে অভিঞ্ঞা সচ্ছিকৰোতি, যে ধম্মা অভিঞ্ঞা ভাৱেতব্বা, তে ধম্মে অভিঞ্ঞা ভাৱেতী’’তি. একাদসমং.