৫. অপ্পমাদপেয্যালৱগ্গো

১. তথাগতসুত্তং

১৩৯. সাৱত্থিনিদানং. ‘‘যাৱতা, ভিক্খৱে, সত্তা অপদা ৱা দ্ৱিপদা [দিপদা (সী.)] ৱা চতুপ্পদা ৱা বহুপ্পদা [বহুপদা (?)] ৱা ৰূপিনো ৱা অৰূপিনো ৱা সঞ্ঞিনো ৱা অসঞ্ঞিনো ৱা নেৱসঞ্ঞীনাসঞ্ঞিনো ৱা, তথাগতো তেসং অগ্গমক্খাযতি অৰহং সম্মাসম্বুদ্ধো; এৱমেৱ খো, ভিক্খৱে, যে কেচি কুসলা ধম্মা, সব্বে তে অপ্পমাদমূলকা অপ্পমাদসমোসৰণা; অপ্পমাদো তেসং ধম্মানং অগ্গমক্খাযতি. অপ্পমত্তস্সেতং, ভিক্খৱে, ভিক্খুনো পাটিকঙ্খং – অৰিযং অট্ঠঙ্গিকং মগ্গং ভাৱেস্সতি অৰিযং অট্ঠঙ্গিকং মগ্গং বহুলীকৰিস্সতি. কথঞ্চ, ভিক্খৱে, ভিক্খু অপ্পমত্তো অৰিযং অট্ঠঙ্গিকং মগ্গং ভাৱেতি অৰিযং অট্ঠঙ্গিকং মগ্গং বহুলীকৰোতি? ইধ, ভিক্খৱে, ভিক্খু সম্মাদিট্ঠিং ভাৱেতি ৱিৱেকনিস্সিতং ৱিৰাগনিস্সিতং নিৰোধনিস্সিতং ৱোস্সগ্গপৰিণামিং…পে… সম্মাসমাধিং ভাৱেতি ৱিৱেকনিস্সিতং ৱিৰাগনিস্সিতং নিৰোধনিস্সিতং ৱোস্সগ্গপৰিণামিং. এৱং খো, ভিক্খৱে, ভিক্খু অপ্পমত্তো অৰিযং অট্ঠঙ্গিকং মগ্গং ভাৱেতি অৰিযং অট্ঠঙ্গিকং মগ্গং বহুলীকৰোতী’’তি.

‘‘যাৱতা, ভিক্খৱে, সত্তা অপদা ৱা দ্ৱিপদা ৱা চতুপ্পদা ৱা বহুপ্পদা ৱা ৰূপিনো ৱা অৰূপিনো ৱা সঞ্ঞিনো ৱা অসঞ্ঞিনো ৱা নেৱসঞ্ঞীনাসঞ্ঞিনো ৱা, তথাগতো তেসং অগ্গমক্খাযতি অৰহং সম্মাসম্বুদ্ধো; এৱমেৱ খো, ভিক্খৱে, যে কেচি কুসলা ধম্মা, সব্বে তে অপ্পমাদমূলকা অপ্পমাদসমোসৰণা; অপ্পমাদো তেসং ধম্মানং অগ্গমক্খাযতি. অপ্পমত্তস্সেতং, ভিক্খৱে, ভিক্খুনো পাটিকঙ্খং – অৰিযং অট্ঠঙ্গিকং মগ্গং ভাৱেস্সতি, অৰিযং অট্ঠঙ্গিকং মগ্গং বহুলীকৰিস্সতি. কথঞ্চ, ভিক্খৱে, ভিক্খু অপ্পমত্তো অৰিযং অট্ঠঙ্গিকং মগ্গং ভাৱেতি অৰিযং অট্ঠঙ্গিকং মগ্গং বহুলীকৰোতি? ইধ, ভিক্খৱে, ভিক্খু সম্মাদিট্ঠিং ভাৱেতি ৰাগৱিনযপৰিযোসানং দোসৱিনযপৰিযোসানং মোহৱিনযপৰিযোসানং…পে… সম্মাসমাধিং ভাৱেতি ৰাগৱিনযপৰিযোসানং দোসৱিনযপৰিযোসানং মোহৱিনযপৰিযোসানং. এৱং খো, ভিক্খৱে, ভিক্খু অপ্পমত্তো অৰিযং অট্ঠঙ্গিকং মগ্গং ভাৱেতি অৰিযং অট্ঠঙ্গিকং মগ্গং বহুলীকৰোতী’’তি.

‘‘যাৱতা, ভিক্খৱে, সত্তা অপদা ৱা দ্ৱিপদা ৱা চতুপ্পদা ৱা বহুপ্পদা ৱা ৰূপিনো ৱা অৰূপিনো ৱা সঞ্ঞিনো ৱা অসঞ্ঞিনো ৱা নেৱসঞ্ঞীনাসঞ্ঞিনো ৱা, তথাগতো তেসং অগ্গমক্খাযতি অৰহং সম্মাসম্বুদ্ধো; এৱমেৱ খো, ভিক্খৱে, যে কেচি কুসলা ধম্মা, সব্বে তে অপ্পমাদমূলকা অপ্পমাদসমোসৰণা; অপ্পমাদো তেসং ধম্মানং অগ্গমক্খাযতি. অপ্পমত্তস্সেতং, ভিক্খৱে, ভিক্খুনো পাটিকঙ্খং – অৰিযং অট্ঠঙ্গিকং মগ্গং ভাৱেস্সতি অৰিযং অট্ঠঙ্গিকং মগ্গং বহুলীকৰিস্সতি. কথঞ্চ, ভিক্খৱে, ভিক্খু অপ্পমত্তো অৰিযং অট্ঠঙ্গিকং মগ্গং ভাৱেতি অৰিযং অট্ঠঙ্গিকং মগ্গং বহুলীকৰোতি? ইধ, ভিক্খৱে, ভিক্খু সম্মাদিট্ঠিং ভাৱেতি অমতোগধং অমতপৰাযনং অমতপৰিযোসানং…পে… সম্মাসমাধিং ভাৱেতি অমতোগধং অমতপৰাযনং অমতপৰিযোসানং. এৱং খো, ভিক্খৱে, ভিক্খু অপ্পমত্তো অৰিযং অট্ঠঙ্গিকং মগ্গং ভাৱেতি অৰিযং অট্ঠঙ্গিকং মগ্গং বহুলীকৰোতী’’তি.

‘‘যাৱতা, ভিক্খৱে, সত্তা অপদা ৱা দ্ৱিপদা ৱা চতুপ্পদা ৱা বহুপ্পদা ৱা ৰূপিনো ৱা অৰূপিনো ৱা সঞ্ঞিনো ৱা অসঞ্ঞিনো ৱা নেৱসঞ্ঞীনাসঞ্ঞিনো ৱা, তথাগতো তেসং অগ্গমক্খাযতি অৰহং সম্মাসম্বুদ্ধো; এৱমেৱ খো, ভিক্খৱে, যে কেচি কুসলা ধম্মা, সব্বে তে অপ্পমাদমূলকা অপ্পমাদসমোসৰণা; অপ্পমাদো তেসং ধম্মানং অগ্গমক্খাযতি. অপ্পমত্তস্সেতং, ভিক্খৱে, ভিক্খুনো পাটিকঙ্খং – অৰিযং অট্ঠঙ্গিকং মগ্গং ভাৱেস্সতি অৰিযং অট্ঠঙ্গিকং মগ্গং বহুলীকৰিস্সতি. কথঞ্চ, ভিক্খৱে, ভিক্খু অপ্পমত্তো অৰিযং অট্ঠঙ্গিকং মগ্গং ভাৱেতি অৰিযং অট্ঠঙ্গিকং মগ্গং বহুলীকৰোতি? ইধ, ভিক্খৱে, ভিক্খু সম্মাদিট্ঠিং ভাৱেতি নিব্বাননিন্নং নিব্বানপোণং নিব্বানপব্ভাৰং…পে… সম্মাসমাধিং ভাৱেতি নিব্বাননিন্নং নিব্বানপোণং নিব্বানপব্ভাৰং. এৱং খো, ভিক্খৱে, ভিক্খু অপ্পমত্তো অৰিযং অট্ঠঙ্গিকং মগ্গং ভাৱেতি অৰিযং অট্ঠঙ্গিকং মগ্গং বহুলীকৰোতী’’তি. পঠমং.

২. পদসুত্তং

১৪০. ‘‘সেয্যথাপি, ভিক্খৱে, যানি কানিচি জঙ্গলানং পাণানং পদজাতানি, সব্বানি তানি হত্থিপদে সমোধানং গচ্ছন্তি; হত্থিপদং তেসং অগ্গমক্খাযতি, যদিদং – মহন্তত্তেন; এৱমেৱ খো, ভিক্খৱে, যে কেচি কুসলা ধম্মা, সব্বে তে অপ্পমাদমূলকা অপ্পমাদসমোসৰণা; অপ্পমাদো তেসং ধম্মানং অগ্গমক্খাযতি. অপ্পমত্তস্সেতং, ভিক্খৱে, ভিক্খুনো পাটিকঙ্খং – অৰিযং অট্ঠঙ্গিকং মগ্গং ভাৱেস্সতি অৰিযং অট্ঠঙ্গিকং মগ্গং বহুলীকৰিস্সতি. কথঞ্চ, ভিক্খৱে, ভিক্খু অপ্পমত্তো অৰিযং অট্ঠঙ্গিকং মগ্গং ভাৱেতি অৰিযং অট্ঠঙ্গিকং মগ্গং বহুলীকৰোতি? ইধ, ভিক্খৱে, ভিক্খু সম্মাদিট্ঠিং ভাৱেতি ৱিৱেকনিস্সিতং ৱিৰাগনিস্সিতং নিৰোধনিস্সিতং ৱোস্সগ্গপৰিণামিং…পে… সম্মাসমাধিং ভাৱেতি ৱিৱেকনিস্সিতং ৱিৰাগনিস্সিতং নিৰোধনিস্সিতং ৱোস্সগ্গপৰিণামিং…পে… এৱং খো, ভিক্খৱে, ভিক্খু অপ্পমত্তো অৰিযং অট্ঠঙ্গিকং মগ্গং ভাৱেতি অৰিযং অট্ঠঙ্গিকং মগ্গং বহুলীকৰোতী’’তি. দুতিযং.

৩-৭. কূটাদিসুত্তপঞ্চকং

১৪১. ‘‘সেয্যথাপি, ভিক্খৱে, কূটাগাৰস্স যা কাচি গোপানসিযো সব্বা তা কূটঙ্গমা কূটনিন্না কূটসমোসৰণা; কূটং তাসং অগ্গমক্খাযতি; এৱমেৱ খো, ভিক্খৱে…পে… ততিযং.

১৪২. ‘‘সেয্যথাপি, ভিক্খৱে, যে কেচি মূলগন্ধা, কাড়ানুসাৰিযং তেসং অগ্গমক্খাযতি; এৱমেৱ খো, ভিক্খৱে…পে… চতুত্থং.

১৪৩. ‘‘সেয্যথাপি, ভিক্খৱে, যে কেচি সাৰগন্ধা, লোহিতচন্দনং তেসং অগ্গমক্খাযতি; এৱমেৱ খো, ভিক্খৱে…পে… পঞ্চমং.

১৪৪. ‘‘সেয্যথাপি, ভিক্খৱে, যে কেচি পুপ্ফগন্ধা, ৱস্সিকং তেসং অগ্গমক্খাযতি; এৱমেৱ খো, ভিক্খৱে…পে… ছট্ঠং.

১৪৫. ‘‘সেয্যথাপি, ভিক্খৱে, যে কেচি কুট্টৰাজানো, সব্বে তে ৰঞ্ঞো চক্কৱত্তিস্স অনুযন্তা ভৱন্তি, ৰাজা তেসং চক্কৱত্তি অগ্গমক্খাযতি; এৱমেৱ খো, ভিক্খৱে…পে… সত্তমং.

৮-১০. চন্দিমাদিসুত্তততিযকং

১৪৬. ‘‘সেয্যথাপি, ভিক্খৱে, যা কাচি তাৰকৰূপানং পভা, সব্বা তা চন্দিমপ্পভায [চন্দিমাপভায (স্যা. ক.)] কলং নাগ্ঘন্তি সোড়সিং, চন্দপ্পভা তাসং অগ্গমক্খাযতি; এৱমেৱ খো, ভিক্খৱে…পে… অট্ঠমং.

১৪৭. ‘‘সেয্যথাপি, ভিক্খৱে, সৰদসমযে ৱিদ্ধে ৱিগতৱলাহকে দেৱে আদিচ্চো নভং অব্ভুস্সক্কমানো সব্বং আকাসগতং তমগতং অভিৱিহচ্চ ভাসতে চ তপতে চ ৱিৰোচতি চ; এৱমেৱ খো, ভিক্খৱে…পে… নৱমং.

১৪৮. ‘‘সেয্যথাপি, ভিক্খৱে, যানি কানিচি তন্তাৱুতানং ৱত্থানং, কাসিকৱত্থং তেসং অগ্গমক্খাযতি; এৱমেৱ খো, ভিক্খৱে, যে কেচি কুসলা ধম্মা, সব্বে তে অপ্পমাদমূলকা অপ্পমাদসমোসৰণা; অপ্পমাদো তেসং ধম্মানং অগ্গমক্খাযতি. অপ্পমত্তস্সেতং, ভিক্খৱে, ভিক্খুনো পাটিকঙ্খং – অৰিযং অট্ঠঙ্গিকং মগ্গং ভাৱেস্সতি অৰিযং অট্ঠঙ্গিকং মগ্গং বহুলীকৰিস্সতি. কথঞ্চ, ভিক্খৱে, ভিক্খু অপ্পমত্তো অৰিযং অট্ঠঙ্গিকং মগ্গং ভাৱেতি অৰিযং অট্ঠঙ্গিকং মগ্গং বহুলীকৰোতি? ইধ, ভিক্খৱে, ভিক্খু সম্মাদিট্ঠিং ভাৱেতি ৱিৱেকনিস্সিতং ৱিৰাগনিস্সিতং নিৰোধনিস্সিতং ৱোস্সগ্গপৰিণামিং…পে… সম্মাসমাধিং ভাৱেতি ৱিৱেকনিস্সিতং ৱিৰাগনিস্সিতং নিৰোধনিস্সিতং ৱোস্সগ্গপৰিণামিং…পে… এৱং খো, ভিক্খৱে, ভিক্খু অপ্পমত্তো অৰিযং অট্ঠঙ্গিকং মগ্গং ভাৱেতি অৰিযং অট্ঠঙ্গিকং মগ্গং বহুলীকৰোতী’’তি. দসমং.

(যদপি তথাগতং, তদপি ৱিত্থাৰেতব্বং).

অপ্পমাদপেয্যালৱগ্গো পঞ্চমো.

তস্সুদ্দানং –

তথাগতং পদং কূটং, মূলং সাৰো চ ৱস্সিকং;

ৰাজা চন্দিমসূৰিযা চ, ৱত্থেন দসমং পদং.