১. অসঙ্খতসুত্তং

৩৭৭. ‘‘অসঙ্খতঞ্চ ৱো, ভিক্খৱে, দেসেস্সামি অসঙ্খতগামিঞ্চ মগ্গং. তং সুণাথ. কতমঞ্চ, ভিক্খৱে, অসঙ্খতং? যো, ভিক্খৱে, ৰাগক্খযো দোসক্খযো মোহক্খযো – ইদং ৱুচ্চতি, ভিক্খৱে, অসঙ্খতং. কতমো চ, ভিক্খৱে, অসঙ্খতগামিমগ্গো? সমথো. অযং ৱুচ্চতি, ভিক্খৱে, অসঙ্খতগামিমগ্গো. ইতি খো, ভিক্খৱে, দেসিতং ৱো মযা অসঙ্খতং, দেসিতো অসঙ্খতগামিমগ্গো. যং, ভিক্খৱে, সত্থাৰা কৰণীযং সাৱকানং হিতেসিনা অনুকম্পকেন অনুকম্পং উপাদায, কতং ৱো তং মযা. এতানি, ভিক্খৱে, ৰুক্খমূলানি, এতানি সুঞ্ঞাগাৰানি. ঝাযথ, ভিক্খৱে, মা পমাদত্থ; মা পচ্ছা ৱিপ্পটিসাৰিনো অহুৱত্থ. অযং ৱো অম্হাকং অনুসাসনীতি.

‘‘অসঙ্খতঞ্চ ৱো, ভিক্খৱে, দেসেস্সামি অসঙ্খতগামিঞ্চ মগ্গং. তং সুণাথ. কতমঞ্চ, ভিক্খৱে, অসঙ্খতং? যো, ভিক্খৱে, ৰাগক্খযো দোসক্খযো মোহক্খযো – ইদং ৱুচ্চতি, ভিক্খৱে, অসঙ্খতং. কতমো চ, ভিক্খৱে, অসঙ্খতগামিমগ্গো? ৱিপস্সনা. অযং ৱুচ্চতি, ভিক্খৱে, অসঙ্খতগামিমগ্গো. ইতি খো, ভিক্খৱে, দেসিতং ৱো মযা অসঙ্খতং…পে… অযং ৱো অম্হাকং অনুসাসনীতি.

‘‘কতমো চ, ভিক্খৱে, অসঙ্খতগামিমগ্গো? সৱিতক্কো সৱিচাৰো সমাধি. অযং ৱুচ্চতি, ভিক্খৱে, অসঙ্খতগামিমগ্গো…পে… কতমো চ, ভিক্খৱে, অসঙ্খতগামিমগ্গো? অৱিতক্কো ৱিচাৰমত্তো সমাধি. অযং ৱুচ্চতি, ভিক্খৱে, অসঙ্খতগামিমগ্গো…পে… কতমো চ, ভিক্খৱে, অসঙ্খতগামিমগ্গো? অৱিতক্কো অৱিচাৰো সমাধি. অযং ৱুচ্চতি, ভিক্খৱে, অসঙ্খতগামিমগ্গো…পে….

‘‘কতমো চ, ভিক্খৱে, অসঙ্খতগামিমগ্গো? সুঞ্ঞতো সমাধি. অযং ৱুচ্চতি, ভিক্খৱে, অসঙ্খতগামিমগ্গো…পে… কতমো চ, ভিক্খৱে, অসঙ্খতগামিমগ্গো? অনিমিত্তো সমাধি. অযং ৱুচ্চতি, ভিক্খৱে, অসঙ্খতগামিমগ্গো…পে… কতমো চ, ভিক্খৱে, অসঙ্খতগামিমগ্গো? অপ্পণিহিতো সমাধি. অযং ৱুচ্চতি, ভিক্খৱে, অসঙ্খতগামিমগ্গো…পে….

‘‘কতমো চ, ভিক্খৱে, অসঙ্খতগামিমগ্গো? ইধ, ভিক্খৱে, ভিক্খু কাযে কাযানুপস্সী ৱিহৰতি আতাপী সম্পজানো সতিমা ৱিনেয্য লোকে অভিজ্ঝাদোমনস্সং. অযং ৱুচ্চতি, ভিক্খৱে, অসঙ্খতগামিমগ্গো…পে… কতমো চ, ভিক্খৱে, অসঙ্খতগামিমগ্গো? ইধ, ভিক্খৱে, ভিক্খু ৱেদনাসু ৱেদনানুপস্সী ৱিহৰতি…পে… অযং ৱুচ্চতি, ভিক্খৱে, অসঙ্খতগামিমগ্গো…পে… কতমো চ, ভিক্খৱে, অসঙ্খতগামিমগ্গো? ইধ, ভিক্খৱে, ভিক্খু চিত্তে চিত্তানুপস্সী…পে… অযং ৱুচ্চতি, ভিক্খৱে, অসঙ্খতগামিমগ্গো…পে… কতমো চ, ভিক্খৱে, অসঙ্খতগামিমগ্গো? ইধ, ভিক্খৱে, ভিক্খু ধম্মেসু ধম্মানুপস্সী ৱিহৰতি…পে… অযং ৱুচ্চতি, ভিক্খৱে, অসঙ্খতগামিমগ্গো…পে….

‘‘কতমো চ, ভিক্খৱে, অসঙ্খতগামিমগ্গো? ইধ, ভিক্খৱে, ভিক্খু অনুপ্পন্নানং পাপকানং অকুসলানং ধম্মানং অনুপ্পাদা ছন্দং জনেতি ৱাযমতি ৱীৰিযং আৰভতি চিত্তং পগ্গণ্হাতি পদহতি. অযং ৱুচ্চতি, ভিক্খৱে, অসঙ্খতগামিমগ্গো…পে… কতমো চ, ভিক্খৱে, অসঙ্খতগামিমগ্গো? ইধ, ভিক্খৱে, ভিক্খু উপ্পন্নানং পাপকানং অকুসলানং ধম্মানং পহানা ছন্দং জনেতি ৱাযমতি ৱীৰিযং আৰভতি চিত্তং পগ্গণ্হাতি পদহতি. অযং ৱুচ্চতি, ভিক্খৱে, অসঙ্খতগামিমগ্গো…পে… কতমো চ, ভিক্খৱে, অসঙ্খতগামিমগ্গো? ইধ, ভিক্খৱে, ভিক্খু অনুপ্পন্নানং কুসলানং ধম্মানং উপ্পাদা ছন্দং জনেতি ৱাযমতি ৱীৰিযং আৰভতি চিত্তং পগ্গণ্হাতি পদহতি. অযং ৱুচ্চতি, ভিক্খৱে, অসঙ্খতগামিমগ্গো…পে… কতমো চ, ভিক্খৱে, অসঙ্খতগামিমগ্গো? ইধ, ভিক্খৱে, ভিক্খু উপ্পন্নানং কুসলানং ধম্মানং ঠিতিযা অসম্মোসায ভিয্যোভাৱায ৱেপুল্লায ভাৱনায পাৰিপূৰিযা ছন্দং জনেতি ৱাযমতি ৱীৰিযং আৰভতি চিত্তং পগ্গণ্হাতি পদহতি. অযং ৱুচ্চতি, ভিক্খৱে, অসঙ্খতগামিমগ্গো…পে….

‘‘কতমো চ, ভিক্খৱে, অসঙ্খতগামিমগ্গো? ইধ, ভিক্খৱে, ভিক্খু ছন্দসমাধিপধানসঙ্খাৰসমন্নাগতং ইদ্ধিপাদং ভাৱেতি. অযং ৱুচ্চতি, ভিক্খৱে, অসঙ্খতগামিমগ্গো …পে… কতমো চ, ভিক্খৱে, অসঙ্খতগামিমগ্গো? ইধ, ভিক্খৱে, ভিক্খু ৱীৰিযসমাধিপধানসঙ্খাৰসমন্নাগতং ইদ্ধিপাদং ভাৱেতি. অযং ৱুচ্চতি, ভিক্খৱে, অসঙ্খতগামিমগ্গো…পে… কতমো চ, ভিক্খৱে, অসঙ্খতগামিমগ্গো? ইধ, ভিক্খৱে, ভিক্খু চিত্তসমাধিপধানসঙ্খাৰসমন্নাগতং ইদ্ধিপাদং ভাৱেতি. অযং ৱুচ্চতি, ভিক্খৱে, অসঙ্খতগামিমগ্গো…পে… কতমো চ, ভিক্খৱে, অসঙ্খতগামিমগ্গো? ইধ, ভিক্খৱে, ভিক্খু ৱীমংসসমাধিপধানসঙ্খাৰসমন্নাগতং ইদ্ধিপাদং ভাৱেতি. অযং ৱুচ্চতি, ভিক্খৱে, অসঙ্খতগামিমগ্গো…পে….

‘‘কতমো চ, ভিক্খৱে, অসঙ্খতগামিমগ্গো? ইধ, ভিক্খৱে, ভিক্খু সদ্ধিন্দ্ৰিযং ভাৱেতি ৱিৱেকনিস্সিতং ৱিৰাগনিস্সিতং নিৰোধনিস্সিতং ৱোস্সগ্গপৰিণামিং. অযং ৱুচ্চতি, ভিক্খৱে, অসঙ্খতগামিমগ্গো…পে… কতমো চ, ভিক্খৱে, অসঙ্খতগামিমগ্গো? ইধ, ভিক্খৱে, ভিক্খু ৱীৰিযিন্দ্ৰিযং ভাৱেতি ৱিৱেকনিস্সিতং…পে… অযং ৱুচ্চতি, ভিক্খৱে, অসঙ্খতগামিমগ্গো…পে… কতমো চ, ভিক্খৱে, অসঙ্খতগামিমগ্গো? ইধ, ভিক্খৱে, ভিক্খু সতিন্দ্ৰিযং ভাৱেতি…পে… অযং ৱুচ্চতি, ভিক্খৱে, অসঙ্খতগামিমগ্গো…পে… কতমো চ, ভিক্খৱে, অসঙ্খতগামিমগ্গো? ইধ, ভিক্খৱে, ভিক্খু সমাধিন্দ্ৰিযং ভাৱেতি…পে… অযং ৱুচ্চতি, ভিক্খৱে, অসঙ্খতগামিমগ্গো…পে… কতমো চ, ভিক্খৱে, অসঙ্খতগামিমগ্গো? ইধ, ভিক্খৱে, ভিক্খু পঞ্ঞিন্দ্ৰিযং ভাৱেতি ৱিৱেকনিস্সিতং ৱিৰাগনিস্সিতং নিৰোধনিস্সিতং ৱোস্সগ্গপৰিণামিং. অযং ৱুচ্চতি, ভিক্খৱে, অসঙ্খতগামিমগ্গো…পে….

‘‘কতমো চ, ভিক্খৱে, অসঙ্খতগামিমগ্গো? ইধ, ভিক্খৱে, ভিক্খু সদ্ধাবলং ভাৱেতি ৱিৱেকনিস্সিতং…পে… অযং ৱুচ্চতি, ভিক্খৱে, অসঙ্খতগামিমগ্গো…পে… কতমো চ, ভিক্খৱে, অসঙ্খতগামিমগ্গো? ইধ, ভিক্খৱে, ভিক্খু ৱীৰিযবলং ভাৱেতি…পে… অযং ৱুচ্চতি, ভিক্খৱে, অসঙ্খতগামিমগ্গো…পে… কতমো চ, ভিক্খৱে, অসঙ্খতগামিমগ্গো? ইধ, ভিক্খৱে, ভিক্খু সতিবলং ভাৱেতি…পে… অযং ৱুচ্চতি, ভিক্খৱে, অসঙ্খতগামিমগ্গো…পে… কতমো চ, ভিক্খৱে, অসঙ্খতগামিমগ্গো? ইধ, ভিক্খৱে, ভিক্খু সমাধিবলং ভাৱেতি…পে… অযং ৱুচ্চতি, ভিক্খৱে, অসঙ্খতগামিমগ্গো…পে… কতমো চ, ভিক্খৱে, অসঙ্খতগামিমগ্গো? ইধ, ভিক্খৱে, ভিক্খু পঞ্ঞাবলং ভাৱেতি ৱিৱেকনিস্সিতং ৱিৰাগনিস্সিতং নিৰোধনিস্সিতং ৱোস্সগ্গপৰিণামিং. অযং ৱুচ্চতি, ভিক্খৱে, অসঙ্খতগামিমগ্গো…পে….

‘‘কতমো চ, ভিক্খৱে, অসঙ্খতগামিমগ্গো? ইধ, ভিক্খৱে, ভিক্খু সতিসম্বোজ্ঝঙ্গং ভাৱেতি…পে… অযং ৱুচ্চতি, ভিক্খৱে, অসঙ্খতগামিমগ্গো…পে… কতমো চ, ভিক্খৱে, অসঙ্খতগামিমগ্গো? ইধ, ভিক্খৱে, ভিক্খু ধম্মৱিচযসম্বোজ্ঝঙ্গং ভাৱেতি…পে… ৱীৰিযসম্বোজ্ঝঙ্গং ভাৱেতি…পে… পীতিসম্বোজ্ঝঙ্গং ভাৱেতি…পে… পস্সদ্ধিসম্বোজ্ঝঙ্গং ভাৱেতি…পে… সমাধিসম্বোজ্ঝঙ্গং ভাৱেতি…পে… উপেক্খাসম্বোজ্ঝঙ্গং ভাৱেতি ৱিৱেকনিস্সিতং ৱিৰাগনিস্সিতং নিৰোধনিস্সিতং ৱোস্সগ্গপৰিণামিং. অযং ৱুচ্চতি, ভিক্খৱে, অসঙ্খতগামিমগ্গো…পে….

‘‘কতমো চ, ভিক্খৱে, অসঙ্খতগামিমগ্গো? ইধ, ভিক্খৱে, ভিক্খু সম্মাদিট্ঠিং ভাৱেতি ৱিৱেকনিস্সিতং ৱিৰাগনিস্সিতং নিৰোধনিস্সিতং ৱোস্সগ্গপৰিণামিং. অযং ৱুচ্চতি, ভিক্খৱে, অসঙ্খতগামিমগ্গো…পে… কতমো চ, ভিক্খৱে, অসঙ্খতগামিমগ্গো? ইধ, ভিক্খৱে, ভিক্খু সম্মাসঙ্কপ্পং ভাৱেতি …পে… সম্মাৱাচং ভাৱেতি…পে… সম্মাকম্মন্তং ভাৱেতি…পে… সম্মাআজীৱং ভাৱেতি…পে… সম্মাৱাযামং ভাৱেতি…পে… সম্মাসতিং ভাৱেতি…পে… অসঙ্খতঞ্চ ৱো ভিক্খৱে, দেসেস্সামি অসঙ্খতগামিঞ্চ মগ্গং. তং সুণাথ. কতমঞ্চ, ভিক্খৱে, অসঙ্খতং…পে…? কতমো চ, ভিক্খৱে, অসঙ্খতগামিমগ্গো? ইধ, ভিক্খৱে, ভিক্খু সম্মাসমাধিং ভাৱেতি ৱিৱেকনিস্সিতং ৱিৰাগনিস্সিতং নিৰোধনিস্সিতং ৱোস্সগ্গপৰিণামিং. অযং ৱুচ্চতি, ভিক্খৱে, অসঙ্খতগামিমগ্গো. ইতি খো, ভিক্খৱে, দেসিতং ৱো মযা অসঙ্খতং, দেসিতো অসঙ্খতগামিমগ্গো. যং, ভিক্খৱে, সত্থাৰা কৰণীযং সাৱকানং হিতেসিনা অনুকম্পকেন অনুকম্পং উপাদায, কতং ৱো তং মযা. এতানি, ভিক্খৱে, ৰুক্খমূলানি, এতানি সুঞ্ঞাগাৰানি. ঝাযথ, ভিক্খৱে, মা পমাদত্থ; মা পচ্ছা ৱিপ্পটিসাৰিনো অহুৱত্থ. অযং ৱো অম্হাকং অনুসাসনী’’তি. পঠমং.