৯. কুলসুত্তং

৩৬১. একং সমযং ভগৱা কোসলেসু চাৰিকং চৰমানো মহতা ভিক্খুসঙ্ঘেন সদ্ধিং যেন নাড়ন্দা তদৱসৰি. তত্ৰ সুদং ভগৱা নাড়ন্দাযং ৱিহৰতি পাৱাৰিকম্বৱনে.

তেন খো পন সমযেন নাড়ন্দা দুব্ভিক্খা হোতি দ্ৱীহিতিকা সেতট্ঠিকা সলাকাৱুত্তা. তেন খো পন সমযেন নিগণ্ঠো নাটপুত্তো নাড়ন্দাযং পটিৱসতি মহতিযা নিগণ্ঠপৰিসায সদ্ধিং. অথ খো অসিবন্ধকপুত্তো গামণি নিগণ্ঠসাৱকো যেন নিগণ্ঠো নাটপুত্তো তেনুপসঙ্কমি; উপসঙ্কমিত্ৱা নিগণ্ঠং নাটপুত্তং অভিৱাদেত্ৱা একমন্তং নিসীদি. একমন্তং নিসিন্নং খো অসিবন্ধকপুত্তং গামণিং নিগণ্ঠো নাটপুত্তো এতদৱোচ – ‘‘এহি ত্ৱং, গামণি, সমণস্স গোতমস্স ৱাদং আৰোপেহি. এৱং তে কল্যাণো কিত্তিসদ্দো অব্ভুগ্গচ্ছিস্সতি – ‘অসিবন্ধকপুত্তেন গামণিনা সমণস্স গোতমস্স এৱংমহিদ্ধিকস্স এৱংমহানুভাৱস্স ৱাদো আৰোপিতো’’’তি.

‘‘কথং পনাহং, ভন্তে, সমণস্স গোতমস্স এৱংমহিদ্ধিকস্স এৱংমহানুভাৱস্স ৱাদং আৰোপেস্সামী’’তি? ‘‘এহি ত্ৱং, গামণি, যেন সমণো গোতমো তেনুপসঙ্কম; উপসঙ্কমিত্ৱা সমণং গোতমং এৱং ৱদেহি – ‘ননু, ভন্তে, ভগৱা অনেকপৰিযাযেন কুলানং অনুদ্দযং [অনুদযং (স্যা. কং. পী. ক.)] ৱণ্ণেতি, অনুৰক্খং ৱণ্ণেতি, অনুকম্পং ৱণ্ণেতী’তি? সচে খো, গামণি, সমণো গোতমো এৱং পুট্ঠো এৱং ব্যাকৰোতি – ‘এৱং, গামণি, তথাগতো অনেকপৰিযাযেন কুলানং অনুদ্দযং ৱণ্ণেতি, অনুৰক্খং ৱণ্ণেতি, অনুকম্পং ৱণ্ণেতী’তি, তমেনং ত্ৱং এৱং ৱদেয্যাসি – ‘অথ কিঞ্চৰহি, ভন্তে, ভগৱা দুব্ভিক্খে দ্ৱীহিতিকে সেতট্ঠিকে সলাকাৱুত্তে মহতা ভিক্খুসঙ্ঘেন সদ্ধিং চাৰিকং চৰতি? উচ্ছেদায ভগৱা কুলানং পটিপন্নো, অনযায ভগৱা কুলানং পটিপন্নো, উপঘাতায ভগৱা কুলানং পটিপন্নো’তি! ইমং খো তে, গামণি, সমণো গোতমো উভতোকোটিকং পঞ্হং পুট্ঠো নেৱ সক্খতি [সক্খিতি (সী.) ম. নি. ২.৮৩] উগ্গিলিতুং, নেৱ সক্খতি ওগিলিতু’’ন্তি. ‘‘এৱং, ভন্তে’’তি খো অসিবন্ধকপুত্তো গামণি নিগণ্ঠস্স নাটপুত্তস্স পটিস্সুত্ৱা উট্ঠাযাসনা নিগণ্ঠং নাটপুত্তং অভিৱাদেত্ৱা পদক্খিণং কত্ৱা যেন ভগৱা তেনুপসঙ্কমি; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদি. একমন্তং নিসিন্নো খো অসিবন্ধকপুত্তো গামণি ভগৱন্তং এতদৱোচ –

‘‘ননু, ভন্তে, ভগৱা অনেকপৰিযাযেন কুলানং অনুদ্দযং ৱণ্ণেতি, অনুৰক্খং ৱণ্ণেতি, অনুকম্পং ৱণ্ণেতী’’তি? ‘‘এৱং, গামণি, তথাগতো অনেকপৰিযাযেন কুলানং অনুদ্দযং ৱণ্ণেতি, অনুৰক্খং ৱণ্ণেতি, অনুকম্পং ৱণ্ণেতী’’তি. ‘‘অথ কিঞ্চৰহি, ভন্তে, ভগৱা দুব্ভিক্খে দ্ৱীহিতিকে সেতট্ঠিকে সলাকাৱুত্তে মহতা ভিক্খুসঙ্ঘেন সদ্ধিং চাৰিকং চৰতি? উচ্ছেদায ভগৱা কুলানং পটিপন্নো, অনযায ভগৱা কুলানং পটিপন্নো, উপঘাতায ভগৱা কুলানং পটিপন্নো’’তি. ‘‘ইতো সো, গামণি, একনৱুতিকপ্পে [একনৱুতো কপ্পো (স্যা. কং.), একনৱুতিকপ্পো (পী.)] যমহং অনুস্সৰামি, নাভিজানামি কিঞ্চি কুলং পক্কভিক্খানুপ্পদানমত্তেন উপহতপুব্বং. অথ খো যানি তানি কুলানি অড্ঢানি মহদ্ধনানি মহাভোগানি পহূতজাতৰূপৰজতানি পহূতৱিত্তূপকৰণানি পহূতধনধঞ্ঞানি, সব্বানি তানি দানসম্ভূতানি চেৱ সচ্চসম্ভূতানি চ সামঞ্ঞসম্ভূতানি চ. অট্ঠ খো, গামণি, হেতূ, অট্ঠ পচ্চযা কুলানং উপঘাতায. ৰাজতো ৱা কুলানি উপঘাতং গচ্ছন্তি, চোৰতো ৱা কুলানি উপঘাতং গচ্ছন্তি, অগ্গিতো ৱা কুলানি উপঘাতং গচ্ছন্তি, উদকতো ৱা কুলানি উপঘাতং গচ্ছন্তি, নিহিতং ৱা ঠানা ৱিগচ্ছতি [নিহিতং ৱা নাধিগচ্ছন্তি (সী. পী.)], দুপ্পযুত্তা ৱা কম্মন্তা ৱিপজ্জন্তি, কুলে ৱা কুলঙ্গাৰোতি [কুলানং ৱা কুলঙ্গাৰো (সী.)] উপ্পজ্জতি, যো তে ভোগে ৱিকিৰতি ৱিধমতি ৱিদ্ধংসেতি, অনিচ্চতাযে অট্ঠমীতি. ইমে খো, গামণি, অট্ঠ হেতূ, অট্ঠ পচ্চযা কুলানং উপঘাতায. ইমেসু খো, গামণি, অট্ঠসু হেতূসু, অট্ঠসু পচ্চযেসু সংৱিজ্জমানেসু যো মং এৱং ৱদেয্য – ‘উচ্ছেদায ভগৱা কুলানং পটিপন্নো, অনযায ভগৱা কুলানং পটিপন্নো, উপঘাতায ভগৱা কুলানং পটিপন্নো’তি, তং, গামণি, ৱাচং অপ্পহায তং চিত্তং অপ্পহায তং দিট্ঠিং অপ্পটিনিস্সজ্জিত্ৱা যথাভতং নিক্খিত্তো এৱং নিৰযে’’তি. এৱং ৱুত্তে, অসিবন্ধকপুত্তো গামণি ভগৱন্তং এতদৱোচ – ‘‘অভিক্কন্তং, ভন্তে, অভিক্কন্তং, ভন্তে…পে… উপাসকং মং ভগৱা ধাৰেতু অজ্জতগ্গে পাণুপেতং সৰণং গত’’ন্তি. নৱমং.