১০. মণিচূড়কসুত্তং

৩৬২. একং সমযং ভগৱা ৰাজগহে ৱিহৰতি ৱেড়ুৱনে কলন্দকনিৱাপে. তেন খো পন সমযেন ৰাজন্তেপুৰে ৰাজপৰিসায সন্নিসিন্নানং সন্নিপতিতানং অযমন্তৰাকথা উদপাদি – ‘‘কপ্পতি সমণানং সক্যপুত্তিযানং জাতৰূপৰজতং, সাদিযন্তি সমণা সক্যপুত্তিযা জাতৰূপৰজতং, পটিগ্গণ্হন্তি সমণা সক্যপুত্তিযা জাতৰূপৰজত’’ন্তি!

তেন খো পন সমযেন মণিচূড়কো গামণি তস্সং পৰিসাযং নিসিন্নো হোতি. অথ খো মণিচূড়কো গামণি তং পৰিসং এতদৱোচ – ‘‘মা অয্যো [অয্যা (সী. পী.)] এৱং অৱচুত্থ. ন কপ্পতি সমণানং সক্যপুত্তিযানং জাতৰূপৰজতং, ন সাদিযন্তি সমণা সক্যপুত্তিযা জাতৰূপৰজতং, নপ্পটিগ্গণ্হন্তি সমণা সক্যপুত্তিযা জাতৰূপৰজতং, নিক্খিত্তমণিসুৱণ্ণা সমণা সক্যপুত্তিযা অপেতজাতৰূপৰজতা’’তি. অসক্খি খো মণিচূড়কো গামণি তং পৰিসং সঞ্ঞাপেতুং. অথ খো মণিচূড়কো গামণি যেন ভগৱা তেনুপসঙ্কমি; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদি. একমন্তং নিসিন্নো খো মণিচূড়কো গামণি ভগৱন্তং এতদৱোচ – ‘‘ইধ, ভন্তে, ৰাজন্তেপুৰে ৰাজপৰিসায সন্নিসিন্নানং সন্নিপতিতানং অযমন্তৰাকথা উদপাদি – ‘কপ্পতি সমণানং সক্যপুত্তিযানং জাতৰূপৰজতং, সাদিযন্তি সমণা সক্যপুত্তিযা জাতৰূপৰজতং, পটিগ্গণ্হন্তি সমণা সক্যপুত্তিযা জাতৰূপৰজত’ন্তি. এৱং ৱুত্তে, অহং, ভন্তে, তং পৰিসং এতদৱোচং – ‘মা অয্যো এৱং অৱচুত্থ. ন কপ্পতি সমণানং সক্যপুত্তিযানং জাতৰূপৰজতং, ন সাদিযন্তি সমণা সক্যপুত্তিযা জাতৰূপৰজতং, নপ্পটিগ্গণ্হন্তি সমণা সক্যপুত্তিযা জাতৰূপৰজতং, নিক্খিত্তমণিসুৱণ্ণা সমণা সক্যপুত্তিযা অপেতজাতৰূপৰজতা’তি. অসক্খিং খ্ৱাহং, ভন্তে, তং পৰিসং সঞ্ঞাপেতুং. কচ্চাহং, ভন্তে, এৱং ব্যাকৰমানো ৱুত্তৱাদী চেৱ ভগৱতো হোমি, ন চ ভগৱন্তং অভূতেন অব্ভাচিক্খামি, ধম্মস্স চানুধম্মং ব্যাকৰোমি, ন চ কোচি সহধম্মিকো ৱাদানুৱাদো গাৰয্হং ঠানং আগচ্ছতী’’তি?

‘‘তগ্ঘ ত্ৱং, গামণি, এৱং ব্যাকৰমানো ৱুত্তৱাদী চেৱ মে হোসি, ন চ মং অভূতেন অব্ভাচিক্খসি, ধম্মস্স চানুধম্মং ব্যাকৰোসি, ন চ কোচি সহধম্মিকো ৱাদানুৱাদো গাৰয্হং ঠানং আগচ্ছতি. ন হি, গামণি, কপ্পতি সমণানং সক্যপুত্তিযানং জাতৰূপৰজতং, ন সাদিযন্তি সমণা সক্যপুত্তিযা জাতৰূপৰজতং, নপ্পটিগ্গণ্হন্তি সমণা সক্যপুত্তিযা জাতৰূপৰজতং, নিক্খিত্তমণিসুৱণ্ণা সমণা সক্যপুত্তিযা অপেতজাতৰূপৰজতা. যস্স খো, গামণি, জাতৰূপৰজতং কপ্পতি, পঞ্চপি তস্স কামগুণা কপ্পন্তি. যস্স পঞ্চ কামগুণা কপ্পন্তি ( ) [(তস্সপি জাতৰূপৰজতং কপ্পতি,) (স্যা. কং.)], একংসেনেতং, গামণি, ধাৰেয্যাসি অস্সমণধম্মো অসক্যপুত্তিযধম্মোতি. অপি চাহং, গামণি, এৱং ৱদামি – তিণং তিণত্থিকেন পৰিযেসিতব্বং, দাৰু দাৰুত্থিকেন পৰিযেসিতব্বং, সকটং সকটত্থিকেন পৰিযেসিতব্বং, পুৰিসো পুৰিসত্থিকেন পৰিযেসিতব্বো [পৰিযেসিতব্বো’’তি (?)]. নত্ৱেৱাহং, গামণি, কেনচি পৰিযাযেন ‘জাতৰূপৰজতং সাদিতব্বং পৰিযেসিতব্ব’ন্তি ৱদামী’’তি. দসমং.