১২. ৰাসিযসুত্তং

৩৬৪. অথ খো ৰাসিযো গামণি যেন ভগৱা তেনুপসঙ্কমি; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদি. একমন্তং নিসিন্নো খো ৰাসিযো গামণি ভগৱন্তং এতদৱোচ – ‘‘সুতং মেতং, ভন্তে, ‘সমণো গোতমো সব্বং তপং গৰহতি, সব্বং তপস্সিং লূখজীৱিং একংসেন উপৱদতি উপক্কোসতী’তি [উপক্কোসতি উপৱদতীতি (দী. নি. ১.৩৮১)]. যে তে, ভন্তে, এৱমাহংসু – ‘সমণো গোতমো সব্বং তপং গৰহতি, সব্বং তপস্সিং লূখজীৱিং একংসেন উপৱদতি উপক্কোসতী’তি, কচ্চি তে, ভন্তে, ভগৱতো ৱুত্তৱাদিনো, ন চ ভগৱন্তং অভূতেন অব্ভাচিক্খন্তি, ধম্মস্স চানুধম্মং ব্যাকৰোন্তি, ন চ কোচি সহধম্মিকো ৱাদানুৱাদো গাৰয্হং ঠানং আগচ্ছতী’’তি? ‘‘যে তে, গামণি, এৱমাহংসু – ‘সমণো গোতমো সব্বং তপং গৰহতি, সব্বং তপস্সিং লূখজীৱিং একংসেন উপৱদতি উপক্কোসতী’তি, ন মে তে ৱুত্তৱাদিনো, অব্ভাচিক্খন্তি চ পন মং তে অসতা তুচ্ছা অভূতেন’’.

‘‘দ্ৱেমে, গামণি, অন্তা পব্বজিতেন ন সেৱিতব্বা – যো চাযং কামেসু কামসুখল্লিকানুযোগো হীনো গম্মো পোথুজ্জনিকো অনৰিযো অনত্থসংহিতো, যো চাযং অত্তকিলমথানুযোগো দুক্খো অনৰিযো অনত্থসংহিতো. এতে তে, গামণি, উভো অন্তে অনুপগম্ম মজ্ঝিমা পটিপদা তথাগতেন অভিসম্বুদ্ধা – চক্খুকৰণী ঞাণকৰণী উপসমায অভিঞ্ঞায সম্বোধায নিব্বানায সংৱত্ততি. কতমা চ সা, গামণি, মজ্ঝিমা পটিপদা তথাগতেন অভিসম্বুদ্ধা – চক্খুকৰণী ঞাণকৰণী উপসমায অভিঞ্ঞায সম্বোধায নিব্বানায সংৱত্ততি? অযমেৱ অৰিযো অট্ঠঙ্গিকো মগ্গো, সেয্যথিদং – সম্মাদিট্ঠি…পে… সম্মাসমাধি. অযং খো সা, গামণি, মজ্ঝিমা পটিপদা তথাগতেন অভিসম্বুদ্ধা – চক্খুকৰণী ঞাণকৰণী উপসমায অভিঞ্ঞায সম্বোধায নিব্বানায সংৱত্ততি.

‘‘তযো খো মে, গামণি, কামভোগিনো সন্তো সংৱিজ্জমানা লোকস্মিং. কতমে তযো? ইধ, গামণি, একচ্চো কামভোগী অধম্মেন ভোগে পৰিযেসতি, সাহসেন অধম্মেন ভোগে পৰিযেসিত্ৱা সাহসেন ন অত্তানং সুখেতি ন পীণেতি ন সংৱিভজতি ন পুঞ্ঞানি কৰোতি. ইধ পন, গামণি, একচ্চো কামভোগী অধম্মেন ভোগে পৰিযেসতি সাহসেন. অধম্মেন ভোগে পৰিযেসিত্ৱা সাহসেন অত্তানং সুখেতি পীণেতি, ন সংৱিভজতি ন পুঞ্ঞানি কৰোতি. ইধ পন, গামণি, একচ্চো কামভোগী অধম্মেন ভোগে পৰিযেসতি সাহসেন. অধম্মেন ভোগে পৰিযেসিত্ৱা সাহসেন অত্তানং সুখেতি পীণেতি সংৱিভজতি পুঞ্ঞানি কৰোতি.

‘‘ইধ পন, গামণি, একচ্চো কামভোগী ধম্মাধম্মেন ভোগে পৰিযেসতি সাহসেনপি অসাহসেনপি. ধম্মাধম্মেন ভোগে পৰিযেসিত্ৱা সাহসেনপি অসাহসেনপি ন অত্তানং সুখেতি, ন পীণেতি, ন সংৱিভজতি, ন পুঞ্ঞানি কৰোতি. ইধ পন, গামণি, একচ্চো কামভোগী ধম্মাধম্মেন ভোগে পৰিযেসতি সাহসেনপি অসাহসেনপি. ধম্মাধম্মেন ভোগে পৰিযেসিত্ৱা সাহসেনপি অসাহসেনপি অত্তানং সুখেতি পীণেতি, ন সংৱিভজতি, ন পুঞ্ঞানি কৰোতি. ইধ পন, গামণি, একচ্চো কামভোগী ধম্মাধম্মেন ভোগে পৰিযেসতি, সাহসেনপি অসাহসেনপি. ধম্মাধম্মেন ভোগে পৰিযেসিত্ৱা সাহসেনপি অসাহসেনপি অত্তানং সুখেতি পীণেতি সংৱিভজতি পুঞ্ঞানি কৰোতি.

‘‘ইধ পন, গামণি, একচ্চো কামভোগী ধম্মেন ভোগে পৰিযেসতি অসাহসেন. ধম্মেন ভোগে পৰিযেসিত্ৱা অসাহসেন ন অত্তানং সুখেতি, ন পীণেতি, ন সংৱিভজতি, ন পুঞ্ঞানি কৰোতি. ইধ পন, গামণি, একচ্চো কামভোগী ধম্মেন ভোগে পৰিযেসতি অসাহসেন. ধম্মেন ভোগে পৰিযেসিত্ৱা অসাহসেন অত্তানং সুখেতি পীণেতি, ন সংৱিভজতি, ন পুঞ্ঞানি কৰোতি. ইধ পন, গামণি, একচ্চো কামভোগী ধম্মেন ভোগে পৰিযেসতি অসাহসেন. ধম্মেন ভোগে পৰিযেসিত্ৱা অসাহসেন অত্তানং সুখেতি পীণেতি সংৱিভজতি পুঞ্ঞানি কৰোতি. তে চ ভোগে গধিতো [গথিতো (সী.)] মুচ্ছিতো অজ্ঝোপন্নো অনাদীনৱদস্সাৱী অনিস্সৰণপঞ্ঞো পৰিভুঞ্জতি. ইধ পন, গামণি, একচ্চো কামভোগী ধম্মেন ভোগে পৰিযেসতি অসাহসেন. ধম্মেন ভোগে পৰিযেসিত্ৱা অসাহসেন অত্তানং সুখেতি পীণেতি সংৱিভজতি পুঞ্ঞানি কৰোতি. তে চ ভোগে অগধিতো অমুচ্ছিতো অনজ্ঝোপন্নো আদীনৱদস্সাৱী নিস্সৰণপঞ্ঞো পৰিভুঞ্জতি.

‘‘তত্ৰ, গামণি, য্ৱাযং কামভোগী অধম্মেন ভোগে পৰিযেসতি সাহসেন, অধম্মেন ভোগে পৰিযেসিত্ৱা সাহসেন ন অত্তানং সুখেতি, ন পীণেতি, ন সংৱিভজতি, ন পুঞ্ঞানি কৰোতি. অযং, গামণি, কামভোগী তীহি ঠানেহি গাৰয্হো. কতমেহি তীহি ঠানেহি গাৰয্হো? অধম্মেন ভোগে পৰিযেসতি সাহসেনাতি, ইমিনা পঠমেন ঠানেন গাৰয্হো. ন অত্তানং সুখেতি ন পীণেতীতি, ইমিনা দুতিযেন ঠানেন গাৰয্হো. ন সংৱিভজতি, ন পুঞ্ঞানি কৰোতীতি, ইমিনা ততিযেন ঠানেন গাৰয্হো. অযং, গামণি, কামভোগী ইমেহি তীহি ঠানেহি গাৰয্হো.

‘‘তত্ৰ, গামণি, য্ৱাযং কামভোগী অধম্মেন ভোগে পৰিযেসতি সাহসেন, অধম্মেন ভোগে পৰিযেসিত্ৱা সাহসেন অত্তানং সুখেতি পীণেতি, ন সংৱিভজতি, ন পুঞ্ঞানি কৰোতি. অযং, গামণি, কামভোগী দ্ৱীহি ঠানেহি গাৰয্হো, একেন ঠানেন পাসংসো. কতমেহি দ্ৱীহি ঠানেহি গাৰয্হো? অধম্মেন ভোগে পৰিযেসতি সাহসেনাতি, ইমিনা পঠমেন ঠানেন গাৰয্হো. ন সংৱিভজতি, ন পুঞ্ঞানি কৰোতীতি, ইমিনা দুতিযেন ঠানেন গাৰয্হো. কতমেন একেন ঠানেন পাসংসো? অত্তানং সুখেতি পীণেতীতি, ইমিনা একেন ঠানেন পাসংসো. অযং, গামণি, কামভোগী ইমেহি দ্ৱীহি ঠানেহি গাৰয্হো, ইমিনা একেন ঠানেন পাসংসো.

‘‘তত্ৰ, গামণি, য্ৱাযং কামভোগী অধম্মেন ভোগে পৰিযেসতি সাহসেন, অধম্মেন ভোগে পৰিযেসিত্ৱা সাহসেন অত্তানং সুখেতি পীণেতি সংৱিভজতি পুঞ্ঞানি কৰোতি. অযং, গামণি, কামভোগী একেন ঠানেন গাৰয্হো, দ্ৱীহি ঠানেহি পাসংসো. কতমেন একেন ঠানেন গাৰয্হো? অধম্মেন ভোগে পৰিযেসতি সাহসেনাতি, ইমিনা একেন ঠানেন গাৰয্হো. কতমেহি দ্ৱীহি ঠানেহি পাসংসো? অত্তানং সুখেতি পীণেতীতি, ইমিনা পঠমেন ঠানেন পাসংসো. সংৱিভজতি পুঞ্ঞানি কৰোতীতি, ইমিনা দুতিযেন ঠানেন পাসংসো. অযং, গামণি, কামভোগী, ইমিনা একেন ঠানেন গাৰয্হো, ইমেহি দ্ৱীহি ঠানেহি পাসংসো.

‘‘তত্ৰ, গামণি, য্ৱাযং কামভোগী ধম্মাধম্মেন ভোগে পৰিযেসতি সাহসেনপি অসাহসেনপি, ধম্মাধম্মেন ভোগে পৰিযেসিত্ৱা সাহসেনপি অসাহসেনপি ন অত্তানং সুখেতি, ন পীণেতি, ন সংৱিভজতি, ন পুঞ্ঞানি কৰোতি. অযং, গামণি, কামভোগী একেন ঠানেন পাসংসো, তীহি ঠানেহি গাৰয্হো. কতমেন একেন ঠানেন পাসংসো? ধম্মেন ভোগে পৰিযেসতি অসাহসেনাতি, ইমিনা একেন ঠানেন পাসংসো. কতমেহি তীহি ঠানেহি গাৰয্হো? অধম্মেন ভোগে পৰিযেসতি সাহসেনাতি, ইমিনা পঠমেন ঠানেন গাৰয্হো. ন অত্তানং সুখেতি, ন পীণেতীতি, ইমিনা দুতিযেন ঠানেন গাৰয্হো. ন সংৱিভজতি, ন পুঞ্ঞানি কৰোতীতি, ইমিনা ততিযেন ঠানেন গাৰয্হো. অযং, গামণি, কামভোগী ইমিনা একেন ঠানেন পাসংসো, ইমেহি তীহি ঠানেহি গাৰয্হো.

‘‘তত্ৰ, গামণি, য্ৱাযং কামভোগী ধম্মাধম্মেন ভোগে পৰিযেসতি সাহসেনপি অসাহসেনপি, ধম্মাধম্মেন ভোগে পৰিযেসিত্ৱা সাহসেনপি অসাহসেনপি অত্তানং সুখেতি পীণেতি, ন সংৱিভজতি, ন পুঞ্ঞানি কৰোতি. অযং, গামণি, কামভোগী দ্ৱীহি ঠানেহি পাসংসো, দ্ৱীহি ঠানেহি গাৰয্হো. কতমেহি দ্ৱীহি ঠানেহি পাসংসো? ধম্মেন ভোগে পৰিযেসতি অসাহসেনাতি, ইমিনা পঠমেন ঠানেন পাসংসো. অত্তানং সুখেতি পীণেতীতি, ইমিনা দুতিযেন ঠানেন পাসংসো. কতমেহি দ্ৱীহি ঠানেহি গাৰয্হো? অধম্মেন ভোগে পৰিযেসতি সাহসেনাতি, ইমিনা পঠমেন ঠানেন গাৰয্হো. ন সংৱিভজতি, ন পুঞ্ঞানি কৰোতীতি, ইমিনা দুতিযেন ঠানেন গাৰয্হো. অযং, গামণি, কামভোগী ইমেহি দ্ৱীহি ঠানেহি পাসংসো, ইমেহি দ্ৱীহি ঠানেহি গাৰয্হো.

‘‘তত্ৰ, গামণি, য্ৱাযং কামভোগী ধম্মাধম্মেন ভোগে পৰিযেসতি সাহসেনপি অসাহসেনপি, ধম্মাধম্মেন ভোগে পৰিযেসিত্ৱা সাহসেনপি অসাহসেনপি অত্তানং সুখেতি পীণেতি সংৱিভজতি পুঞ্ঞানি কৰোতি. অযং, গামণি, কামভোগী তীহি ঠানেহি পাসংসো, একেন ঠানেন গাৰয্হো. কতমেহি তীহি ঠানেহি পাসংসো? ধম্মেন ভোগে পৰিযেসতি অসাহসেনাতি, ইমিনা পঠমেন ঠানেন পাসংসো. অত্তানং সুখেতি পীণেতীতি, ইমিনা দুতিযেন ঠানেন পাসংসো. সংৱিভজতি পুঞ্ঞানি কৰোতীতি, ইমিনা ততিযেন ঠানেন পাসংসো. কতমেন একেন ঠানেন গাৰয্হো? অধম্মেন ভোগে পৰিযেসতি সাহসেনাতি, ইমিনা একেন ঠানেন গাৰয্হো. অযং, গামণি, কামভোগী ইমেহি তীহি ঠানেহি পাসংসো, ইমিনা একেন ঠানেন গাৰয্হো.

‘‘তত্ৰ, গামণি, য্ৱাযং কামভোগী ধম্মেন ভোগে পৰিযেসতি অসাহসেন, ধম্মেন ভোগে পৰিযেসিত্ৱা অসাহসেন, ন অত্তানং সুখেতি, ন পীণেতি, ন সংৱিভজতি, ন পুঞ্ঞানি কৰোতি. অযং, গামণি, কামভোগী একেন ঠানেন পাসংসো, দ্ৱীহি ঠানেহি গাৰয্হো. কতমেন একেন ঠানেন পাসংসো? ধম্মেন ভোগে পৰিযেসতি অসাহসেনাতি, ইমিনা একেন ঠানেন পাসংসো. কতমেহি দ্ৱীহি ঠানেহি গাৰয্হো? ন অত্তানং সুখেতি, ন পীণেতীতি, ইমিনা পঠমেন ঠানেন গাৰয্হো. ন সংৱিভজতি, ন পুঞ্ঞানি কৰোতীতি, ইমিনা দুতিযেন ঠানেন গাৰয্হো. অযং, গামণি, কামভোগী ইমিনা একেন ঠানেন পাসংসো, ইমেহি দ্ৱীহি ঠানেহি গাৰয্হো.

‘‘তত্ৰ, গামণি, য্ৱাযং কামভোগী ধম্মেন ভোগে পৰিযেসতি অসাহসেন, ধম্মেন ভোগে পৰিযেসিত্ৱা অসাহসেন অত্তানং সুখেতি পীণেতি, ন সংৱিভজতি, ন পুঞ্ঞানি কৰোতি. অযং, গামণি, কামভোগী দ্ৱীহি ঠানেহি পাসংসো, একেন ঠানেন গাৰয্হো. কতমেহি দ্ৱীহি ঠানেহি পাসংসো? ধম্মেন ভোগে পৰিযেসতি অসাহসেনাতি, ইমিনা পঠমেন ঠানেন পাসংসো. অত্তানং সুখেতি পীণেতীতি, ইমিনা দুতিযেন ঠানেন পাসংসো. কতমেন একেন ঠানেন গাৰয্হো? ন সংৱিভজতি, ন পুঞ্ঞানি কৰোতীতি, ইমিনা একেন ঠানেন গাৰয্হো. অযং, গামণি, কামভোগী ইমেহি দ্ৱীহি ঠানেহি পাসংসো, ইমিনা একেন ঠানেন গাৰয্হো.

‘‘তত্ৰ, গামণি, য্ৱাযং কামভোগী ধম্মেন ভোগে পৰিযেসতি অসাহসেন, ধম্মেন ভোগে পৰিযেসিত্ৱা অসাহসেন অত্তানং সুখেতি পীণেতি সংৱিভজতি পুঞ্ঞানি কৰোতি, তে চ ভোগে গধিতো মুচ্ছিতো অজ্ঝোপন্নো অনাদীনৱদস্সাৱী অনিস্সৰণপঞ্ঞো পৰিভুঞ্জতি. অযং, গামণি, কামভোগী তীহি ঠানেহি পাসংসো, একেন ঠানেন গাৰয্হো. কতমেহি তীহি ঠানেহি পাসংসো? ধম্মেন ভোগে পৰিযেসতি অসাহসেনাতি, ইমিনা পঠমেন ঠানেন পাসংসো. অত্তানং সুখেতি পীণেতীতি, ইমিনা দুতিযেন ঠানেন পাসংসো. সংৱিভজতি পুঞ্ঞানি কৰোতীতি, ইমিনা ততিযেন ঠানেন পাসংসো. কতমেন একেন ঠানেন গাৰয্হো? তে চ ভোগে গধিতো মুচ্ছিতো অজ্ঝোপন্নো অনাদীনৱদস্সাৱী অনিস্সৰণপঞ্ঞো পৰিভুঞ্জতীতি, ইমিনা একেন ঠানেন গাৰয্হো. অযং, গামণি, কামভোগী ইমেহি তীহি ঠানেহি পাসংসো, ইমিনা একেন ঠানেন গাৰয্হো.

‘‘তত্ৰ, গামণি, য্ৱাযং কামভোগী ধম্মেন ভোগে পৰিযেসতি অসাহসেন, ধম্মেন ভোগে পৰিযেসিত্ৱা অসাহসেন অত্তানং সুখেতি পীণেতি সংৱিভজতি পুঞ্ঞানি কৰোতি. তে চ ভোগে অগধিতো অমুচ্ছিতো অনজ্ঝোপন্নো আদীনৱদস্সাৱী নিস্সৰণপঞ্ঞো পৰিভুঞ্জতি. অযং, গামণি, কামভোগী চতূহি ঠানেহি পাসংসো. কতমেহি চতূহি ঠানেহি পাসংসো? ধম্মেন ভোগে পৰিযেসতি অসাহসেনাতি, ইমিনা পঠমেন ঠানেন পাসংসো. অত্তানং সুখেতি পীণেতীতি, ইমিনা দুতিযেন ঠানেন পাসংসো. সংৱিভজতি পুঞ্ঞানি কৰোতীতি, ইমিনা ততিযেন ঠানেন পাসংসো. তে চ ভোগে অগধিতো অমুচ্ছিতো অনজ্ঝোপন্নো আদীনৱদস্সাৱী নিস্সৰণপঞ্ঞো পৰিভুঞ্জতীতি, ইমিনা চতুত্থেন ঠানেন পাসংসো. অযং, গামণি, কামভোগী ইমেহি চতূহি ঠানেহি পাসংসো.

‘‘তযোমে, গামণি, তপস্সিনো লূখজীৱিনো সন্তো সংৱিজ্জমানা লোকস্মিং. কতমে তযো? ইধ, গামণি, একচ্চো তপস্সী লূখজীৱী সদ্ধা অগাৰস্মা অনগাৰিযং পব্বজিতো হোতি – ‘অপ্পেৱ নাম কুসলং ধম্মং অধিগচ্ছেয্যং, অপ্পেৱ নাম উত্তৰিমনুস্সধম্মা অলমৰিযঞাণদস্সনৱিসেসং সচ্ছিকৰেয্য’ন্তি. সো অত্তানং আতাপেতি পৰিতাপেতি, কুসলঞ্চ ধম্মং নাধিগচ্ছতি, উত্তৰি চ মনুস্সধম্মা অলমৰিযঞাণদস্সনৱিসেসং ন সচ্ছিকৰোতি.

‘‘ইধ পন, গামণি, একচ্চো তপস্সী লূখজীৱী সদ্ধা অগাৰস্মা অনগাৰিযং পব্বজিতো হোতি – ‘অপ্পেৱ নাম কুসলং ধম্মং অধিগচ্ছেয্যং, অপ্পেৱ নাম উত্তৰিমনুস্সধম্মা অলমৰিযঞাণদস্সনৱিসেসং সচ্ছিকৰেয্য’ন্তি. সো অত্তানং আতাপেতি পৰিতাপেতি, কুসলঞ্হি খো ধম্মং অধিগচ্ছতি, উত্তৰিমনুস্সধম্মা অলমৰিযঞাণদস্সনৱিসেসং ন সচ্ছিকৰোতি.

‘‘ইধ পন, গামণি, একচ্চো তপস্সী লূখজীৱী সদ্ধা অগাৰস্মা অনগাৰিযং পব্বজিতো হোতি – ‘অপ্পেৱ নাম কুসলং ধম্মং অধিগচ্ছেয্যং, অপ্পেৱ নাম উত্তৰিমনুস্সধম্মা অলমৰিযঞাণদস্সনৱিসেসং সচ্ছিকৰেয্য’ন্তি. সো অত্তানং আতাপেতি পৰিতাপেতি, কুসলঞ্চ ধম্মং অধিগচ্ছতি, উত্তৰি চ মনুস্সধম্মা অলমৰিযঞাণদস্সনৱিসেসং সচ্ছিকৰোতি.

‘‘তত্ৰ, গামণি, য্ৱাযং তপস্সী লূখজীৱী অত্তানং আতাপেতি পৰিতাপেতি, কুসলঞ্চ ধম্মং নাধিগচ্ছতি, উত্তৰি চ মনুস্সধম্মা অলমৰিযঞাণদস্সনৱিসেসং ন সচ্ছিকৰোতি. অযং, গামণি, তপস্সী লূখজীৱী তীহি ঠানেহি গাৰয্হো. কতমেহি তীহি ঠানেহি গাৰয্হো? অত্তানং আতাপেতি পৰিতাপেতীতি, ইমিনা পঠমেন ঠানেন গাৰয্হো. কুসলঞ্চ ধম্মং নাধিগচ্ছতীতি, ইমিনা দুতিযেন ঠানেন গাৰয্হো. উত্তৰি চ মনুস্সধম্মা অলমৰিযঞাণদস্সনৱিসেসং ন সচ্ছিকৰোতীতি, ইমিনা ততিযেন ঠানেন গাৰয্হো. অযং, গামণি, তপস্সী লূখজীৱী, ইমেহি তীহি ঠানেহি গাৰয্হো.

‘‘তত্ৰ, গামণি, য্ৱাযং তপস্সী লূখজীৱী অত্তানং আতাপেতি পৰিতাপেতি, কুসলঞ্হি খো ধম্মং অধিগচ্ছতি, উত্তৰি চ মনুস্সধম্মা অলমৰিযঞাণদস্সনৱিসেসং ন সচ্ছিকৰোতি. অযং, গামণি, তপস্সী লূখজীৱী দ্ৱীহি ঠানেহি গাৰয্হো, একেন ঠানেন পাসংসো. কতমেহি দ্ৱীহি ঠানেহি গাৰয্হো? অত্তানং আতাপেতি পৰিতাপেতীতি, ইমিনা পঠমেন ঠানেন গাৰয্হো. উত্তৰি চ মনুস্সধম্মা অলমৰিযঞাণদস্সনৱিসেসং ন সচ্ছিকৰোতীতি, ইমিনা দুতিযেন ঠানেন গাৰয্হো. কতমেন একেন ঠানেন পাসংসো? কুসলঞ্হি খো ধম্মং অধিগচ্ছতীতি, ইমিনা একেন ঠানেন পাসংসো. অযং, গামণি, তপস্সী লূখজীৱী ইমেহি দ্ৱীহি ঠানেহি গাৰয্হো, ইমিনা একেন ঠানেন পাসংসো.

‘‘তত্ৰ, গামণি, য্ৱাযং তপস্সী লূখজীৱী অত্তানং আতাপেতি পৰিতাপেতি, কুসলঞ্চ ধম্মং অধিগচ্ছতি, উত্তৰি চ মনুস্সধম্মা অলমৰিযঞাণদস্সনৱিসেসং সচ্ছিকৰোতি. অযং, গামণি, তপস্সী লূখজীৱী একেন ঠানেন গাৰয্হো, দ্ৱীহি ঠানেহি পাসংসো. কতমেন একেন ঠানেন গাৰয্হো? অত্তানং আতাপেতি পৰিতাপেতীতি, ইমিনা একেন ঠানেন গাৰয্হো. কতমেহি দ্ৱীহি ঠানেহি পাসংসো? কুসলঞ্চ ধম্মং অধিগচ্ছতীতি, ইমিনা পঠমেন ঠানেন পাসংসো. উত্তৰি চ মনুস্সধম্মা অলমৰিযঞাণদস্সনৱিসেসং সচ্ছিকৰোতীতি, ইমিনা দুতিযেন ঠানেন পাসংসো. অযং, গামণি, তপস্সী লূখজীৱী ইমিনা একেন ঠানেন গাৰয্হো, ইমেহি দ্ৱীহি ঠানেহি পাসংসো.

‘‘তিস্সো ইমা, গামণি, সন্দিট্ঠিকা নিজ্জৰা অকালিকা এহিপস্সিকা ওপনেয্যিকা পচ্চত্তং ৱেদিতব্বা ৱিঞ্ঞূহি. কতমা তিস্সো? যং ৰত্তো ৰাগাধিকৰণং অত্তব্যাবাধাযপি চেতেতি, পৰব্যাবাধাযপি চেতেতি, উভযব্যাবাধাযপি চেতেতি. ৰাগে পহীনে নেৱত্তব্যাবাধায চেতেতি, ন পৰব্যাবাধায চেতেতি, ন উভযব্যাবাধায চেতেতি. সন্দিট্ঠিকা নিজ্জৰা অকালিকা এহিপস্সিকা ওপনেয্যিকা পচ্চত্তং ৱেদিতব্বা ৱিঞ্ঞূহি. যং দুট্ঠো দোসাধিকৰণং অত্তব্যাবাধাযপি চেতেতি, পৰব্যাবাধাযপি চেতেতি, উভযব্যাবাধাযপি চেতেতি. দোসে পহীনে নেৱত্তব্যাবাধায চেতেতি, ন পৰব্যাবাধায চেতেতি, ন উভযব্যাবাধায চেতেতি. সন্দিট্ঠিকা নিজ্জৰা অকালিকা এহিপস্সিকা ওপনেয্যিকা পচ্চত্তং ৱেদিতব্বা ৱিঞ্ঞূহি. যং মূড়্হো মোহাধিকৰণং অত্তব্যাবাধাযপি চেতেতি, পৰব্যাবাধাযপি চেতেতি, উভযব্যাবাধাযপি চেতেতি. মোহে পহীনে নেৱত্তব্যাবাধায চেতেতি, ন পৰব্যাবাধায চেতেতি, ন উভযব্যাবাধায চেতেতি. সন্দিট্ঠিকা নিজ্জৰা অকালিকা এহিপস্সিকা ওপনেয্যিকা পচ্চত্তং ৱেদিতব্বা ৱিঞ্ঞূহি. ইমা খো, গামণি, তিস্সো সন্দিট্ঠিকা নিজ্জৰা অকালিকা এহিপস্সিকা ওপনেয্যিকা পচ্চত্তং ৱেদিতব্বা ৱিঞ্ঞূহী’’তি.

এৱং ৱুত্তে, ৰাসিযো গামণি ভগৱন্তং এতদৱোচ – ‘‘অভিক্কন্তং, ভন্তে…পে… উপাসকং মং ভগৱা ধাৰেতু অজ্জতগ্গে পাণুপেতং সৰণং গত’’ন্তি. দ্ৱাদসমং.