১. চণ্ডসুত্তং

৩৫৩. সাৱত্থিনিদানং. অথ খো চণ্ডো গামণি যেন ভগৱা তেনুপসঙ্কমি; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদি. একমন্তং নিসিন্নো খো চণ্ডো গামণি ভগৱন্তং এতদৱোচ – ‘‘কো নু খো, ভন্তে, হেতু, কো পচ্চযো যেন মিধেকচ্চো চণ্ডো চণ্ডোত্ৱেৱ [যেন মিধেকচ্চো চণ্ডোতেৱ (সী. পী.)] সঙ্খং গচ্ছতি. কো পন, ভন্তে, হেতু, কো পচ্চযো যেন মিধেকচ্চো সোৰতো সোৰতোত্ৱেৱ [যেন মিধেকচ্চো সুৰতোতেৱ (সী. পী.)] সঙ্খং গচ্ছতী’’তি? ‘‘ইধ, গামণি, একচ্চস্স ৰাগো অপ্পহীনো হোতি. ৰাগস্স অপ্পহীনত্তা পৰে কোপেন্তি, পৰেহি কোপিযমানো কোপং পাতুকৰোতি. সো চণ্ডোত্ৱেৱ সঙ্খং গচ্ছতি. দোসো অপ্পহীনো হোতি. দোসস্স অপ্পহীনত্তা পৰে কোপেন্তি, পৰেহি কোপিযমানো কোপং পাতুকৰোতি. সো চণ্ডোত্ৱেৱ সঙ্খং গচ্ছতি. মোহো অপ্পহীনো হোতি. মোহস্স অপ্পহীনত্তা পৰে কোপেন্তি, পৰেহি কোপিযমানো কোপং পাতুকৰোতি. সো চণ্ডোত্ৱেৱ সঙ্খং গচ্ছতি. অযং খো, গামণি, হেতু, অযং পচ্চযো যেন মিধেকচ্চো চণ্ডো চণ্ডোত্ৱেৱ সঙ্খং গচ্ছতি’’.

‘‘ইধ পন, গামণি, একচ্চস্স ৰাগো পহীনো হোতি. ৰাগস্স পহীনত্তা পৰে ন কোপেন্তি, পৰেহি কোপিযমানো কোপং ন পাতুকৰোতি. সো সোৰতোত্ৱেৱ সঙ্খং গচ্ছতি. দোসো পহীনো হোতি. দোসস্স পহীনত্তা পৰে ন কোপেন্তি, পৰেহি কোপিযমানো কোপং ন পাতুকৰোতি. সো সোৰতোত্ৱেৱ সঙ্খং গচ্ছতি. মোহো পহীনো হোতি. মোহস্স পহীনত্তা পৰে ন কোপেন্তি, পৰেহি কোপিযমানো কোপং ন পাতুকৰোতি. সো সোৰতোত্ৱেৱ সঙ্খং গচ্ছতি. অযং খো, গামণি, হেতু অযং পচ্চযো যেন মিধেকচ্চো সোৰতো সোৰতোত্ৱেৱ সঙ্খং গচ্ছতী’’তি.

এৱং ৱুত্তে, চণ্ডো গামণি ভগৱন্তং এতদৱোচ – ‘‘অভিক্কন্তং, ভন্তে, অভিক্কন্তং, ভন্তে! সেয্যথাপি, ভন্তে, নিক্কুজ্জিতং ৱা উক্কুজ্জেয্য, পটিচ্ছন্নং ৱা ৱিৱৰেয্য, মূড়্হস্স ৱা মগ্গং আচিক্খেয্য, অন্ধকাৰে ৱা তেলপজ্জোতং ধাৰেয্য – চক্খুমন্তো ৰূপানি দক্খন্তীতি; এৱমেৱং ভগৱতা অনেকপৰিযাযেন ধম্মো পকাসিতো. এসাহং, ভন্তে, ভগৱন্তং সৰণং গচ্ছামি ধম্মঞ্চ ভিক্খুসঙ্ঘঞ্চ. উপাসকং মং ভগৱা ধাৰেতু অজ্জতগ্গে পাণুপেতং সৰণং গত’’ন্তি. পঠমং.