৫. আকাসানঞ্চাযতনপঞ্হাসুত্তং

৩৩৬. ‘‘‘আকাসানঞ্চাযতনং, আকাসানঞ্চাযতন’ন্তি ৱুচ্চতি. কতমং নু খো আকাসানঞ্চাযতনন্তি? তস্স ময্হং, আৱুসো, এতদহোসি – ‘ইধ ভিক্খু সব্বসো ৰূপসঞ্ঞানং সমতিক্কমা পটিঘসঞ্ঞানং অত্থঙ্গমা নানত্তসঞ্ঞানং অমনসিকাৰা অনন্তো আকাসোতি আকাসানঞ্চাযতনং উপসম্পজ্জ ৱিহৰতি. ইদং ৱুচ্চতি আকাসানঞ্চাযতন’ন্তি. সো খ্ৱাহং, আৱুসো, সব্বসো ৰূপসঞ্ঞানং সমতিক্কমা পটিঘসঞ্ঞানং অত্থঙ্গমা নানত্তসঞ্ঞানং অমনসিকাৰা অনন্তো আকাসোতি আকাসানঞ্চাযতনং উপসম্পজ্জ ৱিহৰামি. তস্স ময্হং, আৱুসো, ইমিনা ৱিহাৰেন ৱিহৰতো ৰূপসহগতা সঞ্ঞামনসিকাৰা সমুদাচৰন্তি.

‘‘অথ খো মং, আৱুসো, ভগৱা ইদ্ধিযা উপসঙ্কমিত্ৱা এতদৱোচ – ‘মোগ্গল্লান, মোগ্গল্লান! মা, ব্ৰাহ্মণ, আকাসানঞ্চাযতনং পমাদো, আকাসানঞ্চাযতনে চিত্তং সণ্ঠপেহি, আকাসানঞ্চাযতনে চিত্তং একোদিং কৰোহি, আকাসানঞ্চাযতনে চিত্তং সমাদহা’তি. সো খ্ৱাহং, আৱুসো, অপৰেন সমযেন সব্বসো ৰূপসঞ্ঞানং সমতিক্কমা পটিঘসঞ্ঞানং অত্থঙ্গমা নানত্তসঞ্ঞানং অমনসিকাৰা অনন্তো আকাসোতি আকাসানঞ্চাযতনং উপসম্পজ্জ ৱিহাসিং. যঞ্হি তং, আৱুসো, সম্মা ৱদমানো ৱদেয্য…পে… মহাভিঞ্ঞতং পত্তো’’তি. পঞ্চমং.