৬. মোগ্গল্লানসংযুত্তং

১. পঠমঝানপঞ্হাসুত্তং

৩৩২. একং সমযং আযস্মা মহামোগ্গল্লানো সাৱত্থিযং ৱিহৰতি জেতৱনে অনাথপিণ্ডিকস্স আৰামে. তত্ৰ খো আযস্মা মহামোগ্গল্লানো ভিক্খূ আমন্তেসি – ‘‘আৱুসো, ভিক্খৱে’’তি. ‘‘আৱুসো’’তি খো তে ভিক্খূ আযস্মতো মহামোগ্গল্লানস্স পচ্চস্সোসুং. আযস্মা মহামোগ্গল্লানো এতদৱোচ –

‘‘ইধ ময্হং, আৱুসো, ৰহোগতস্স পটিসল্লীনস্স এৱং চেতসো পৰিৱিতক্কো উদপাদি – ‘পঠমং ঝানং, পঠমং ঝান’ন্তি ৱুচ্চতি. কতমং নু খো পঠমং ঝানন্তি? তস্স ময্হং, আৱুসো, এতদহোসি – ‘ইধ ভিক্খু ৱিৱিচ্চেৱ কামেহি ৱিৱিচ্চ অকুসলেহি ধম্মেহি সৱিতক্কং সৱিচাৰং ৱিৱেকজং পীতিসুখং পঠমং ঝানং উপসম্পজ্জ ৱিহৰতি. ইদং ৱুচ্চতি পঠমং ঝান’ন্তি. সো খ্ৱাহং, আৱুসো, ৱিৱিচ্চেৱ কামেহি ৱিৱিচ্চ অকুসলেহি ধম্মেহি সৱিতক্কং সৱিচাৰং ৱিৱেকজং পীতিসুখং পঠমং ঝানং উপসম্পজ্জ ৱিহৰামি. তস্স ময্হং, আৱুসো, ইমিনা ৱিহাৰেন ৱিহৰতো কামসহগতা সঞ্ঞামনসিকাৰা সমুদাচৰন্তি.

‘‘অথ খো মং, আৱুসো, ভগৱা ইদ্ধিযা উপসঙ্কমিত্ৱা এতদৱোচ – ‘মোগ্গল্লান, মোগ্গল্লান! মা, ব্ৰাহ্মণ, পঠমং ঝানং পমাদো, পঠমে ঝানে চিত্তং সণ্ঠপেহি, পঠমে ঝানে চিত্তং একোদিং কৰোহি [একোদিকৰোহি (পী.)], পঠমে ঝানে চিত্তং সমাদহা’তি. সো খ্ৱাহং, আৱুসো, অপৰেন সমযেন ৱিৱিচ্চেৱ কামেহি ৱিৱিচ্চ অকুসলেহি ধম্মেহি সৱিতক্কং সৱিচাৰং ৱিৱেকজং পীতিসুখং পঠমং ঝানং উপসম্পজ্জ ৱিহাসিং. যঞ্হি তং, আৱুসো, সম্মা ৱদমানো ৱদেয্য – ‘সত্থাৰানুগ্গহিতো সাৱকো মহাভিঞ্ঞতং পত্তো’তি, মমং তং সম্মা ৱদমানো ৱদেয্য – ‘সত্থাৰানুগ্গহিতো সাৱকো মহাভিঞ্ঞতং পত্তো’’’তি. পঠমং.

২. দুতিযঝানপঞ্হাসুত্তং

৩৩৩. ‘‘‘দুতিযং ঝানং, দুতিযং ঝান’ন্তি ৱুচ্চতি. কতমং নু খো দুতিযং ঝানন্তি? তস্স ময্হং, আৱুসো, এতদহোসি – ‘ইধ ভিক্খু ৱিতক্কৱিচাৰানং ৱূপসমা অজ্ঝত্তং সম্পসাদনং চেতসো একোদিভাৱং অৱিতক্কং অৱিচাৰং সমাধিজং পীতিসুখং দুতিযং ঝানং উপসম্পজ্জ ৱিহৰতি. ইদং ৱুচ্চতি দুতিযং ঝান’ন্তি. সো খ্ৱাহং, আৱুসো, ৱিতক্কৱিচাৰানং ৱূপসমা অজ্ঝত্তং সম্পসাদনং চেতসো একোদিভাৱং অৱিতক্কং অৱিচাৰং সমাধিজং পীতিসুখং দুতিযং ঝানং উপসম্পজ্জ ৱিহৰামি. তস্স ময্হং, আৱুসো, ইমিনা ৱিহাৰেন ৱিহৰতো ৱিতক্কসহগতা সঞ্ঞামনসিকাৰা সমুদাচৰন্তি.

‘‘অথ খো মং, আৱুসো, ভগৱা ইদ্ধিযা উপসঙ্কমিত্ৱা এতদৱোচ – ‘মোগ্গল্লান, মোগ্গল্লান! মা, ব্ৰাহ্মণ, দুতিযং ঝানং পমাদো, দুতিযে ঝানে চিত্তং সণ্ঠপেহি, দুতিযে ঝানে চিত্তং একোদিং কৰোহি, দুতিযে ঝানে চিত্তং সমাদহা’তি. সো খ্ৱাহং, আৱুসো, অপৰেন সমযেন ৱিতক্কৱিচাৰানং ৱূপসমা অজ্ঝত্তং সম্পসাদনং চেতসো একোদিভাৱং অৱিতক্কং অৱিচাৰং সমাধিজং পীতিসুখং দুতিযং ঝানং উপসম্পজ্জ ৱিহাসিং. যঞ্হি তং, আৱুসো, সম্মা ৱদমানো ৱদেয্য – ‘সত্থাৰানুগ্গহিতো সাৱকো মহাভিঞ্ঞতং পত্তো’তি, মমং তং সম্মা ৱদমানো ৱদেয্য – ‘সত্থাৰানুগ্গহিতো সাৱকো মহাভিঞ্ঞতং পত্তো’’’তি. দুতিযং.

৩. ততিযঝানপঞ্হাসুত্তং

৩৩৪. ‘‘‘ততিযং ঝানং, ততিযং ঝান’ন্তি ৱুচ্চতি. কতমং নু খো ততিযং ঝানন্তি? তস্স ময্হং, আৱুসো, এতদহোসি – ইধ ভিক্খু পীতিযা চ ৱিৰাগা উপেক্খকো চ ৱিহৰতি সতো চ সম্পজানো সুখঞ্চ কাযেন পটিসংৱেদেতি, যং তং অৰিযা আচিক্খন্তি – ‘উপেক্খকো সতিমা সুখৱিহাৰী’তি ততিযং ঝানং উপসম্পজ্জ ৱিহৰতি. ইদং ৱুচ্চতি ততিযং ঝানন্তি. সো খ্ৱাহং, আৱুসো, পীতিযা চ ৱিৰাগা উপেক্খকো চ ৱিহৰামি সতো চ সম্পজানো সুখঞ্চ কাযেন পটিসংৱেদেমি. যং তং অৰিযা আচিক্খন্তি – ‘উপেক্খকো সতিমা সুখৱিহাৰী’তি ততিযং ঝানং উপসম্পজ্জ ৱিহৰামি. তস্স ময্হং, আৱুসো, ইমিনা ৱিহাৰেন ৱিহৰতো পীতিসহগতা সঞ্ঞামনসিকাৰা সমুদাচৰন্তি.

‘‘অথ খো মং, আৱুসো, ভগৱা ইদ্ধিযা উপসঙ্কমিত্ৱা এতদৱোচ – ‘মোগ্গল্লান, মোগ্গল্লান! মা, ব্ৰাহ্মণ, ততিযং ঝানং পমাদো, ততিযে ঝানে চিত্তং সণ্ঠপেহি, ততিযে ঝানে চিত্তং একোদিং কৰোহি, ততিযে ঝানে চিত্তং সমাদহা’তি. সো খ্ৱাহং, আৱুসো, অপৰেন সমযেন পীতিযা চ ৱিৰাগা উপেক্খকো চ ৱিহৰামি সতো চ সম্পজানো সুখঞ্চ কাযেন পটিসংৱেদেমি, যং তং অৰিযা আচিক্খন্তি – ‘উপেক্খকো সতিমা সুখৱিহাৰী’তি ততিযং ঝানং উপসম্পজ্জ ৱিহাসিং. যঞ্হি তং আৱুসো সম্মা ৱদমানো ৱদেয্য…পে… মহাভিঞ্ঞতং পত্তো’’তি. ততিযং.

৪. চতুত্থঝানপঞ্হাসুত্তং

৩৩৫. ‘‘‘চতুত্থং ঝানং, চতুত্থং ঝান’ন্তি ৱুচ্চতি. কতমং নু খো চতুত্থং ঝানন্তি? তস্স ময্হং, আৱুসো, এতদহোসি – ‘ইধ ভিক্খু সুখস্স চ পহানা দুক্খস্স চ পহানা পুব্বেৱ সোমনস্সদোমনস্সানং অত্থঙ্গমা অদুক্খমসুখং উপেক্খাসতিপাৰিসুদ্ধিং চতুত্থং ঝানং উপসম্পজ্জ ৱিহৰতি. ইদং ৱুচ্চতি চতুত্থং ঝান’ন্তি. সো খ্ৱাহং, আৱুসো, সুখস্স চ পহানা দুক্খস্স চ পহানা পুব্বেৱ সোমনস্সদোমনস্সানং অত্থঙ্গমা অদুক্খমসুখং উপেক্খাসতিপাৰিসুদ্ধিং চতুত্থং ঝানং উপসম্পজ্জ ৱিহৰামি. তস্স ময্হং, আৱুসো, ইমিনা ৱিহাৰেন ৱিহৰতো সুখসহগতা সঞ্ঞামনসিকাৰা সমুদাচৰন্তি.

‘‘অথ খো মং, আৱুসো, ভগৱা ইদ্ধিযা উপসঙ্কমিত্ৱা এতদৱোচ – ‘মোগ্গল্লান, মোগ্গল্লান! মা, ব্ৰাহ্মণ, চতুত্থং ঝানং পমাদো, চতুত্থে ঝানে চিত্তং সণ্ঠপেহি, চতুত্থে ঝানে চিত্তং একোদিং কৰোহি, চতুত্থে ঝানে চিত্তং সমাদহা’তি. সো খ্ৱাহং, আৱুসো, অপৰেন সমযেন সুখস্স চ পহানা দুক্খস্স চ পহানা পুব্বেৱ সোমনস্সদোমনস্সানং অত্থঙ্গমা অদুক্খমসুখং উপেক্খাসতিপাৰিসুদ্ধিং চতুত্থং ঝানং উপসম্পজ্জ ৱিহাসিং. যঞ্হি তং, আৱুসো, সম্মা ৱদমানো ৱদেয্য…পে… মহাভিঞ্ঞতং পত্তো’’তি. চতুত্থং.

৫. আকাসানঞ্চাযতনপঞ্হাসুত্তং

৩৩৬. ‘‘‘আকাসানঞ্চাযতনং, আকাসানঞ্চাযতন’ন্তি ৱুচ্চতি. কতমং নু খো আকাসানঞ্চাযতনন্তি? তস্স ময্হং, আৱুসো, এতদহোসি – ‘ইধ ভিক্খু সব্বসো ৰূপসঞ্ঞানং সমতিক্কমা পটিঘসঞ্ঞানং অত্থঙ্গমা নানত্তসঞ্ঞানং অমনসিকাৰা অনন্তো আকাসোতি আকাসানঞ্চাযতনং উপসম্পজ্জ ৱিহৰতি. ইদং ৱুচ্চতি আকাসানঞ্চাযতন’ন্তি. সো খ্ৱাহং, আৱুসো, সব্বসো ৰূপসঞ্ঞানং সমতিক্কমা পটিঘসঞ্ঞানং অত্থঙ্গমা নানত্তসঞ্ঞানং অমনসিকাৰা অনন্তো আকাসোতি আকাসানঞ্চাযতনং উপসম্পজ্জ ৱিহৰামি. তস্স ময্হং, আৱুসো, ইমিনা ৱিহাৰেন ৱিহৰতো ৰূপসহগতা সঞ্ঞামনসিকাৰা সমুদাচৰন্তি.

‘‘অথ খো মং, আৱুসো, ভগৱা ইদ্ধিযা উপসঙ্কমিত্ৱা এতদৱোচ – ‘মোগ্গল্লান, মোগ্গল্লান! মা, ব্ৰাহ্মণ, আকাসানঞ্চাযতনং পমাদো, আকাসানঞ্চাযতনে চিত্তং সণ্ঠপেহি, আকাসানঞ্চাযতনে চিত্তং একোদিং কৰোহি, আকাসানঞ্চাযতনে চিত্তং সমাদহা’তি. সো খ্ৱাহং, আৱুসো, অপৰেন সমযেন সব্বসো ৰূপসঞ্ঞানং সমতিক্কমা পটিঘসঞ্ঞানং অত্থঙ্গমা নানত্তসঞ্ঞানং অমনসিকাৰা অনন্তো আকাসোতি আকাসানঞ্চাযতনং উপসম্পজ্জ ৱিহাসিং. যঞ্হি তং, আৱুসো, সম্মা ৱদমানো ৱদেয্য…পে… মহাভিঞ্ঞতং পত্তো’’তি. পঞ্চমং.

৬. ৱিঞ্ঞাণঞ্চাযতনপঞ্হাসুত্তং

৩৩৭. ‘‘‘ৱিঞ্ঞাণঞ্চাযতনং, ৱিঞ্ঞাণঞ্চাযতন’ন্তি ৱুচ্চতি. কতমং নু খো ৱিঞ্ঞাণঞ্চাযতনন্তি? তস্স ময্হং, আৱুসো, এতদহোসি – ‘ইধ ভিক্খু সব্বসো আকাসানঞ্চাযতনং সমতিক্কম্ম অনন্তং ৱিঞ্ঞাণন্তি ৱিঞ্ঞাণঞ্চাযতনং উপসম্পজ্জ ৱিহৰতি. ইদং ৱুচ্চতি ৱিঞ্ঞাণঞ্চাযতন’ন্তি. সো খ্ৱাহং, আৱুসো, সব্বসো আকাসানঞ্চাযতনং সমতিক্কম্ম অনন্তং ৱিঞ্ঞাণন্তি ৱিঞ্ঞাণঞ্চাযতনং উপসম্পজ্জ ৱিহৰামি. তস্স ময্হং, আৱুসো, ইমিনা ৱিহাৰেন ৱিহৰতো আকাসানঞ্চাযতনসহগতা সঞ্ঞামনসিকাৰা সমুদাচৰন্তি.

‘‘অথ খো মং, আৱুসো, ভগৱা ইদ্ধিযা উপসঙ্কমিত্ৱা এতদৱোচ – ‘মোগ্গল্লান, মোগ্গল্লান! মা, ব্ৰাহ্মণ, ৱিঞ্ঞাণঞ্চাযতনং পমাদো, ৱিঞ্ঞাণঞ্চাযতনে চিত্তং সণ্ঠপেহি, ৱিঞ্ঞাণঞ্চাযতনে চিত্তং একোদিং কৰোহি, ৱিঞ্ঞাণঞ্চাযতনে চিত্তং সমাদহা’তি. সো খ্ৱাহং, আৱুসো, অপৰেন সমযেন সব্বসো আকাসানঞ্চাযতনং সমতিক্কম্ম অনন্তং ৱিঞ্ঞাণন্তি ৱিঞ্ঞাণঞ্চাযতনং উপসম্পজ্জ ৱিহাসিং. যঞ্হি তং, আৱুসো, সম্মা ৱদমানো ৱদেয্য…পে… মহাভিঞ্ঞতং পত্তো’’তি. ছট্ঠং.

৭. আকিঞ্চঞ্ঞাযতনপঞ্হাসুত্তং

৩৩৮. ‘‘‘আকিঞ্চঞ্ঞাযতনং, আকিঞ্চঞ্ঞাযতন’ন্তি ৱুচ্চতি. কতমং নু খো আকিঞ্চঞ্ঞাযতনন্তি? তস্স ময্হং, আৱুসো, এতদহোসি – ‘ইধ ভিক্খু সব্বসো ৱিঞ্ঞাণঞ্চাযতনং সমতিক্কম্ম নত্থি কিঞ্চীতি আকিঞ্চঞ্ঞাযতনং উপসম্পজ্জ ৱিহৰতি. ইদং ৱুচ্চতি আকিঞ্চঞ্ঞাযতন’ন্তি. সো খ্ৱাহং, আৱুসো, সব্বসো ৱিঞ্ঞাণঞ্চাযতনং সমতিক্কম্ম নত্থি কিঞ্চীতি আকিঞ্চঞ্ঞাযতনং উপসম্পজ্জ ৱিহৰামি. তস্স ময্হং, আৱুসো, ইমিনা ৱিহাৰেন ৱিহৰতো ৱিঞ্ঞাণঞ্চাযতনসহগতা সঞ্ঞামনসিকাৰা সমুদাচৰন্তি.

‘‘অথ খো মং, আৱুসো, ভগৱা ইদ্ধিযা উপসঙ্কমিত্ৱা এতদৱোচ – ‘মোগ্গল্লান, মোগ্গল্লান! মা, ব্ৰাহ্মণ, আকিঞ্চঞ্ঞাযতনং পমাদো, আকিঞ্চঞ্ঞাযতনে চিত্তং সণ্ঠপেহি, আকিঞ্চঞ্ঞাযতনে চিত্তং একোদিং কৰোহি, আকিঞ্চঞ্ঞাযতনে চিত্তং সমাদহা’তি. সো খ্ৱাহং, আৱুসো, অপৰেন সমযেন সব্বসো ৱিঞ্ঞাণঞ্চাযতনং সমতিক্কম্ম নত্থি কিঞ্চীতি আকিঞ্চঞ্ঞাযতনং উপসম্পজ্জ ৱিহাসিং. যঞ্হি তং, আৱুসো, সম্মা ৱদমানো ৱদেয্য…পে… মহাভিঞ্ঞতং পত্তো’’তি. সত্তমং.

৮. নেৱসঞ্ঞানাসঞ্ঞাযতনপঞ্হাসুত্তং

৩৩৯. ‘‘‘নেৱসঞ্ঞানাসঞ্ঞাযতনং, নেৱসঞ্ঞানাসঞ্ঞাযতন’ন্তি ৱুচ্চতি. কতমং নু খো নেৱসঞ্ঞানাসঞ্ঞাযতনন্তি? তস্স ময্হং, আৱুসো, এতদহোসি – ‘ইধ ভিক্খু সব্বসো আকিঞ্চঞ্ঞাযতনং সমতিক্কম্ম নেৱসঞ্ঞানাসঞ্ঞাযতনং উপসম্পজ্জ ৱিহৰতি. ইদং ৱুচ্চতি নেৱসঞ্ঞানাসঞ্ঞাযতন’ন্তি. সো খ্ৱাহং, আৱুসো, সব্বসো আকিঞ্চঞ্ঞাযতনং সমতিক্কম্ম নেৱসঞ্ঞানাসঞ্ঞাযতনং উপসম্পজ্জ ৱিহৰামি. তস্স ময্হং, আৱুসো, ইমিনা ৱিহাৰেন ৱিহৰতো আকিঞ্চঞ্ঞাযতনসহগতা সঞ্ঞামনসিকাৰা সমুদাচৰন্তি.

‘‘অথ খো মং, আৱুসো, ভগৱা ইদ্ধিযা উপসঙ্কমিত্ৱা এতদৱোচ – ‘মোগ্গল্লান, মোগ্গল্লান! মা, ব্ৰাহ্মণ, নেৱসঞ্ঞানাসঞ্ঞাযতনং পমাদো, নেৱসঞ্ঞানাসঞ্ঞাযতনে চিত্তং সণ্ঠপেহি, নেৱসঞ্ঞানাসঞ্ঞাযতনে চিত্তং একোদিং কৰোহি, নেৱসঞ্ঞানাসঞ্ঞাযতনে চিত্তং সমাদহা’তি. সো খ্ৱাহং, আৱুসো, অপৰেন সমযেন সব্বসো আকিঞ্চঞ্ঞাযতনং সমতিক্কম্ম নেৱসঞ্ঞানাসঞ্ঞাযতনং উপসম্পজ্জ ৱিহাসিং. যঞ্হি তং, আৱুসো, সম্মা ৱদমানো ৱদেয্য…পে… মহাভিঞ্ঞতং পত্তো’’তি. অট্ঠমং.

৯. অনিমিত্তপঞ্হাসুত্তং

৩৪০. ‘‘‘অনিমিত্তো চেতোসমাধি, অনিমিত্তো চেতোসমাধী’তি ৱুচ্চতি. কতমো নু খো অনিমিত্তো চেতোসমাধীতি? তস্স ময্হং, আৱুসো, এতদহোসি – ‘ইধ ভিক্খু সব্বনিমিত্তানং অমনসিকাৰা অনিমিত্তং চেতোসমাধিং উপসম্পজ্জ ৱিহৰতি. অযং ৱুচ্চতি অনিমিত্তো চেতোসমাধী’তি. সো খ্ৱাহং, আৱুসো, সব্বনিমিত্তানং অমনসিকাৰা অনিমিত্তং চেতোসমাধিং উপসম্পজ্জ ৱিহৰামি. তস্স ময্হং, আৱুসো, ইমিনা ৱিহাৰেন ৱিহৰতো নিমিত্তানুসাৰি ৱিঞ্ঞাণং হোতি.

‘‘অথ খো মং, আৱুসো, ভগৱা ইদ্ধিযা উপসঙ্কমিত্ৱা এতদৱোচ – ‘মোগ্গল্লান, মোগ্গল্লান! মা, ব্ৰাহ্মণ, অনিমিত্তং চেতোসমাধিং পমাদো, অনিমিত্তে চেতোসমাধিস্মিং চিত্তং সণ্ঠপেহি, অনিমিত্তে চেতোসমাধিস্মিং চিত্তং একোদিং কৰোহি, অনিমিত্তে চেতোসমাধিস্মিং চিত্তং সমাদহা’তি. সো খ্ৱাহং, আৱুসো, অপৰেন সমযেন সব্বনিমিত্তানং অমনসিকাৰা অনিমিত্তং চেতোসমাধিং উপসম্পজ্জ ৱিহাসিং. যঞ্হি তং, আৱুসো, সম্মা ৱদমানো ৱদেয্য – ‘সত্থাৰানুগ্গহিতো সাৱকো মহাভিঞ্ঞতং পত্তো’তি, মমং তং সম্মা ৱদমানো ৱদেয্য – ‘সত্থাৰানুগ্গহিতো সাৱকো মহাভিঞ্ঞতং পত্তো’’’তি. নৱমং.

১০. সক্কসুত্তং

৩৪১. অথ খো আযস্মা মহামোগ্গল্লানো – সেয্যথাপি নাম বলৱা পুৰিসো সমিঞ্জিতং ৱা বাহং পসাৰেয্য, পসাৰিতং ৱা বাহং সমিঞ্জেয্য; এৱমেৱ – জেতৱনে অন্তৰহিতো দেৱেসু তাৱতিংসেসু পাতুৰহোসি. অথ খো সক্কো দেৱানমিন্দো পঞ্চহি দেৱতাসতেহি সদ্ধিং যেনাযস্মা মহামোগ্গল্লানো তেনুপসঙ্কমি; উপসঙ্কমিত্ৱা আযস্মন্তং মহামোগ্গল্লানং অভিৱাদেত্ৱা একমন্তং অট্ঠাসি. একমন্তং ঠিতং খো সক্কং দেৱানমিন্দং আযস্মা মহামোগ্গল্লানো এতদৱোচ –

‘‘সাধু খো, দেৱানমিন্দ, বুদ্ধসৰণগমনং [বুদ্ধং সৰণগমনং (সী.)] হোতি. বুদ্ধসৰণগমনহেতু [বুদ্ধং সৰণগমনহেতু (সী.)] খো, দেৱানমিন্দ, এৱমিধেকচ্চে সত্তা কাযস্স ভেদা পৰং মৰণা সুগতিং সগ্গং লোকং উপপজ্জন্তি. সাধু খো, দেৱানমিন্দ, ধম্মসৰণগমনং হোতি. ধম্মসৰণগমনহেতু খো, দেৱানমিন্দ, এৱমিধেকচ্চে সত্তা কাযস্স ভেদা পৰং মৰণা সুগতিং সগ্গং লোকং উপপজ্জন্তি. সাধু খো, দেৱানমিন্দ, সঙ্ঘসৰণগমনং হোতি. সঙ্ঘসৰণগমনহেতু খো, দেৱানমিন্দ, এৱমিধেকচ্চে সত্তা কাযস্স ভেদা পৰং মৰণা সুগতিং সগ্গং লোকং উপপজ্জন্তী’’তি.

‘‘সাধু খো, মাৰিস মোগ্গল্লান, বুদ্ধসৰণগমনং হোতি. বুদ্ধসৰণগমনহেতু খো, মাৰিস মোগ্গল্লান, এৱমিধেকচ্চে সত্তা কাযস্স ভেদা পৰং মৰণা সুগতিং সগ্গং লোকং উপপজ্জন্তি. সাধু খো, মাৰিস মোগ্গল্লান, ধম্মসৰণগমনং হোতি. ধম্মসৰণগমনহেতু খো, মাৰিস মোগ্গল্লান, এৱমিধেকচ্চে সত্তা কাযস্স ভেদা পৰং মৰণা সুগতিং সগ্গং লোকং উপপজ্জন্তি. সাধু খো, মাৰিস মোগ্গল্লান, সঙ্ঘ…পে… সুগতিং সগ্গং লোকং উপপজ্জন্তী’’তি.

অথ খো সক্কো দেৱানমিন্দো ছহি দেৱতাসতেহি সদ্ধিং…পে… অথ খো সক্কো দেৱানমিন্দো সত্তহি দেৱতাসতেহি সদ্ধিং…পে… অথ খো সক্কো দেৱানমিন্দো অট্ঠহি দেৱতাসতেহি সদ্ধিং…পে… অথ খো সক্কো দেৱানমিন্দো অসীতিযা দেৱতাসহস্সেহি সদ্ধিং যেনাযস্মা মহামোগ্গল্লানো তেনুপসঙ্কমি; উপসঙ্কমিত্ৱা আযস্মন্তং মহামোগ্গল্লানং অভিৱাদেত্ৱা একমন্তং অট্ঠাসি. একমন্তং ঠিতং খো সক্কং দেৱানমিন্দং আযস্মা মহামোগ্গল্লানো এতদৱোচ –

‘‘সাধু খো, দেৱানমিন্দ, বুদ্ধসৰণগমনং হোতি. বুদ্ধসৰণগমনহেতু খো, দেৱানমিন্দ, এৱমিধেকচ্চে সত্তা কাযস্স ভেদা পৰং মৰণা সুগতিং সগ্গং লোকং উপপজ্জন্তি. সাধু খো, দেৱানমিন্দ, ধম্মসৰণগমনং হোতি. ধম্মসৰণগমনহেতু খো, দেৱানমিন্দ, এৱমিধেকচ্চে সত্তা কাযস্স ভেদা পৰং মৰণা সুগতিং সগ্গং লোকং উপপজ্জন্তি. সাধু খো, দেৱানমিন্দ, সঙ্ঘসৰণগমনং হোতি. সঙ্ঘসৰণগমনহেতু খো, দেৱানমিন্দ, এৱমিধেকচ্চে সত্তা কাযস্স ভেদা পৰং মৰণা সুগতিং সগ্গং লোকং উপপজ্জন্তী’’তি.

‘‘সাধু খো, মাৰিস মোগ্গল্লান, বুদ্ধসৰণগমনং হোতি. বুদ্ধসৰণগমনহেতু খো, মাৰিস মোগ্গল্লান, এৱমিধেকচ্চে সত্তা কাযস্স ভেদা পৰং মৰণা সুগতিং সগ্গং লোকং উপপজ্জন্তি. সাধু খো, মাৰিস মোগ্গল্লান, ধম্মসৰণগমনং হোতি…পে… সাধু খো, মাৰিস মোগ্গল্লান, সঙ্ঘসৰণগমনং হোতি. সঙ্ঘসৰণগমনহেতু খো, মাৰিস মোগ্গল্লান, এৱমিধেকচ্চে সত্তা কাযস্স ভেদা পৰং মৰণা সুগতিং সগ্গং লোকং উপপজ্জন্তী’’তি.

অথ খো সক্কো দেৱানমিন্দো পঞ্চহি দেৱতাসতেহি সদ্ধিং যেনাযস্মা মহামোগ্গল্লানো তেনুপসঙ্কমি; উপসঙ্কমিত্ৱা আযস্মন্তং মহামোগ্গল্লানং অভিৱাদেত্ৱা একমন্তং অট্ঠাসি. একমন্তং ঠিতং খো সক্কং দেৱানমিন্দং আযস্মা মহামোগ্গল্লানো এতদৱোচ –

‘‘সাধু খো, দেৱানমিন্দ, ধম্মে অৱেচ্চপ্পসাদেন সমন্নাগমনং হোতি – ‘স্ৱাক্খাতো ভগৱতা ধম্মো সন্দিট্ঠিকো অকালিকো এহিপস্সিকো ওপনেয্যিকো পচ্চত্তং ৱেদিতব্বো ৱিঞ্ঞূহী’তি. ধম্মে অৱেচ্চপ্পসাদেন সমন্নাগমনহেতু খো, দেৱানমিন্দ, এৱমিধেকচ্চে সত্তা কাযস্স ভেদা পৰং মৰণা সুগতিং সগ্গং লোকং উপপজ্জন্তি.

‘‘সাধু খো, দেৱানমিন্দ, সঙ্ঘে অৱেচ্চপ্পসাদেন সমন্নাগমনং হোতি – ‘সুপ্পটিপন্নো ভগৱতো সাৱকসঙ্ঘো, উজুপ্পটিপন্নো ভগৱতো সাৱকসঙ্ঘো, ঞাযপ্পটিপন্নো ভগৱতো সাৱকসঙ্ঘো, সামীচিপ্পটিপন্নো ভগৱতো সাৱকসঙ্ঘো, যদিদং চত্তাৰি পুৰিসযুগানি অট্ঠ পুৰিসপুগ্গলা এস ভগৱতো সাৱকসঙ্ঘো আহুনেয্যো পাহুনেয্যো দক্খিণেয্যো অঞ্জলিকৰণীযো অনুত্তৰং পুঞ্ঞক্খেত্তং লোকস্সা’তি. সঙ্ঘে অৱেচ্চপ্পসাদেন সমন্নাগমনহেতু খো, দেৱানমিন্দ, এৱমিধেকচ্চে সত্তা কাযস্স ভেদা পৰং মৰণা সুগতিং সগ্গং লোকং উপপজ্জন্তি.

‘‘সাধু খো, মাৰিস মোগ্গল্লান, বুদ্ধে অৱেচ্চপ্পসাদেন সমন্নাগমনং হোতি – ‘ইতিপি সো…পে… সত্থা দেৱমনুস্সানং বুদ্ধো ভগৱা’তি. বুদ্ধে অৱেচ্চপ্পসাদেন সমন্নাগমনহেতু খো, মাৰিস মোগ্গল্লান, এৱমিধেকচ্চে সত্তা কাযস্স ভেদা পৰং মৰণা সুগতিং সগ্গং লোকং উপপজ্জন্তি.

‘‘সাধু খো, মাৰিস মোগ্গল্লান, ধম্মে অৱেচ্চপ্পসাদেন সমন্নাগমনং হোতি – ‘স্ৱাক্খাতো ভগৱতা ধম্মো…পে… পচ্চত্তং ৱেদিতব্বো ৱিঞ্ঞূহী’তি. ধম্মে অৱেচ্চপ্পসাদেন সমন্নাগমনহেতু খো, মাৰিস মোগ্গল্লান, এৱমিধেকচ্চে সত্তা কাযস্স ভেদা পৰং মৰণা সুগতিং সগ্গং লোকং উপপজ্জন্তি.

‘‘সাধু খো, মাৰিস মোগ্গল্লান, সঙ্ঘে অৱেচ্চপ্পসাদেন সমন্নাগমনং হোতি – ‘সুপ্পটিপন্নো ভগৱতো সাৱকসঙ্ঘো…পে… অনুত্তৰং পুঞ্ঞক্খেত্তং লোকস্সা’তি. সঙ্ঘে অৱেচ্চপ্পসাদেন সমন্নাগমনহেতু খো, মাৰিস মোগ্গল্লান, এৱমিধেকচ্চে সত্তা কাযস্স ভেদা পৰং মৰণা সুগতিং সগ্গং লোকং উপপজ্জন্তি.

অথ খো সক্কো দেৱানমিন্দো ছহি দেৱতাসতেহি সদ্ধিং…পে…. অথ খো সক্কো দেৱানমিন্দো সত্তহি দেৱতাসতেহি সদ্ধিং…পে…. অথ খো সক্কো দেৱানমিন্দো অট্ঠহি দেৱতাসতেহি সদ্ধিং…পে…. অথ খো সক্কো দেৱানমিন্দো অসীতিযা দেৱতাসহস্সেহি সদ্ধিং যেনাযস্মা মহামোগ্গল্লানো তেনুপসঙ্কমি; উপসঙ্কমিত্ৱা আযস্মন্তং মহামোগ্গল্লানং অভিৱাদেত্ৱা একমন্তং অট্ঠাসি. একমন্তং ঠিতং খো সক্কং দেৱানমিন্দং আযস্মা মহামোগ্গল্লানো এতদৱোচ –

‘‘সাধু খো, দেৱানমিন্দ, বুদ্ধে অৱেচ্চপ্পসাদেন সমন্নাগমনং হোতি – ‘ইতিপি সো ভগৱা…পে… সত্থা দেৱমনুস্সানং বুদ্ধো ভগৱা’তি. বুদ্ধে অৱেচ্চপ্পসাদেন সমন্নাগমনহেতু খো, দেৱানমিন্দ, এৱমিধেকচ্চে সত্তা কাযস্স ভেদা পৰং মৰণা সুগতিং সগ্গং লোকং উপপজ্জন্তি.

‘‘সাধু খো, দেৱানমিন্দ, ধম্মে অৱেচ্চপ্পসাদেন সমন্নাগমনং হোতি – ‘স্ৱাক্খাতো ভগৱতা ধম্মো…পে… পচ্চত্তং ৱেদিতব্বো ৱিঞ্ঞূহী’তি. ধম্মে অৱেচ্চপ্পসাদেন সমন্নাগমনহেতু খো, দেৱানমিন্দ, এৱমিধেকচ্চে সত্তা কাযস্স ভেদা পৰং মৰণা সুগতিং সগ্গং লোকং উপপজ্জন্তি.

‘‘সাধু খো, দেৱানমিন্দ, সঙ্ঘে অৱেচ্চপ্পসাদেন সমন্নাগমনং হোতি – ‘সুপ্পটিপন্নো ভগৱতো সাৱকসঙ্ঘো…পে… অনুত্তৰং পুঞ্ঞক্খেত্তং লোকস্সা’তি. সঙ্ঘে অৱেচ্চপ্পসাদেন সমন্নাগমনহেতু খো, দেৱানমিন্দ, এৱমিধেকচ্চে সত্তা কাযস্স ভেদা পৰং মৰণা সুগতিং সগ্গং লোকং উপপজ্জন্তি.

‘‘সাধু খো, দেৱানমিন্দ, অৰিযকন্তেহি সীলেহি সমন্নাগমনং হোতি অখণ্ডেহি…পে… সমাধিসংৱত্তনিকেহি. অৰিযকন্তেহি সীলেহি সমন্নাগমনহেতু খো, দেৱানমিন্দ, এৱমিধেকচ্চে সত্তা কাযস্স ভেদা পৰং মৰণা সুগতিং সগ্গং লোকং উপপজ্জন্তী’’তি.

‘‘সাধু খো, মাৰিস মোগ্গল্লান, বুদ্ধে অৱেচ্চপ্পসাদেন সমন্নাগমনং হোতি – ‘ইতিপি সো ভগৱা…পে… সত্থা দেৱমনুস্সানং বুদ্ধো ভগৱা’তি. বুদ্ধে অৱেচ্চপ্পসাদেন সমন্নাগমনহেতু খো, মাৰিস মোগ্গল্লান, এৱমিধেকচ্চে সত্তা কাযস্স ভেদা পৰং মৰণা সুগতিং সগ্গং লোকং উপপজ্জন্তি.

অথ খো সক্কো দেৱানমিন্দো পঞ্চহি দেৱতাসতেহি সদ্ধিং যেনাযস্মা মহামোগ্গল্লানো তেনুপসঙ্কমি …পে… একমন্তং ঠিতং খো সক্কং দেৱানমিন্দং আযস্মা মহামোগ্গল্লানো এতদৱোচ –

‘‘সাধু খো, দেৱানমিন্দ, বুদ্ধসৰণগমনং হোতি. বুদ্ধসৰণগমনহেতু খো, দেৱানমিন্দ, এৱমিধেকচ্চে সত্তা কাযস্স ভেদা পৰং মৰণা সুগতিং সগ্গং লোকং উপপজ্জন্তি. তে অঞ্ঞে দেৱে দসহি ঠানেহি অধিগণ্হন্তি – দিব্বেন আযুনা, দিব্বেন ৱণ্ণেন, দিব্বেন সুখেন, দিব্বেন যসেন, দিব্বেন আধিপতেয্যেন, দিব্বেহি ৰূপেহি, দিব্বেহি সদ্দেহি, দিব্বেহি গন্ধেহি, দিব্বেহি ৰসেহি, দিব্বেহি ফোট্ঠব্বেহি.

‘‘সাধু খো, দেৱানমিন্দ, ধম্মসৰণগমনং হোতি. ধম্মসৰণগমনহেতু খো, দেৱানমিন্দ, এৱমিধেকচ্চে সত্তা কাযস্স ভেদা পৰং মৰণা সুগতিং সগ্গং লোকং উপপজ্জন্তি. তে অঞ্ঞে দেৱে দসহি ঠানেহি অধিগণ্হন্তি – দিব্বেন আযুনা, দিব্বেন ৱণ্ণেন, দিব্বেন সুখেন, দিব্বেন যসেন, দিব্বেন আধিপতেয্যেন, দিব্বেহি ৰূপেহি, দিব্বেহি সদ্দেহি, দিব্বেহি গন্ধেহি, দিব্বেহি ৰসেহি, দিব্বেহি ফোট্ঠব্বেহি.

‘‘সাধু খো, দেৱানমিন্দ, সঙ্ঘসৰণগমনং হোতি. সঙ্ঘসৰণগমনহেতু খো, দেৱানমিন্দ, এৱমিধেকচ্চে সত্তা কাযস্স ভেদা পৰং মৰণা সুগতিং সগ্গং লোকং উপপজ্জন্তি. তে অঞ্ঞে দেৱে দসহি ঠানেহি অধিগণ্হন্তি – দিব্বেন আযুনা, দিব্বেন ৱণ্ণেন, দিব্বেন সুখেন, দিব্বেন যসেন, দিব্বেন আধিপতেয্যেন, দিব্বেহি ৰূপেহি, দিব্বেহি সদ্দেহি, দিব্বেহি গন্ধেহি, দিব্বেহি ৰসেহি, দিব্বেহি ফোট্ঠব্বেহী’’তি.

‘‘সাধু খো, মাৰিস মোগ্গল্লান, বুদ্ধসৰণগমনং হোতি. বুদ্ধসৰণগমনহেতু খো, মাৰিস মোগ্গল্লান, এৱমিধেকচ্চে সত্তা কাযস্স ভেদা পৰং মৰণা সুগতিং সগ্গং লোকং উপপজ্জন্তি. তে অঞ্ঞে দেৱে দসহি ঠানেহি অধিগণ্হন্তি – দিব্বেন আযুনা…পে… দিব্বেহি ফোট্ঠব্বেহি.

‘‘সাধু খো, মাৰিস মোগ্গল্লান, ধম্মসৰণগমনং হোতি…পে….

‘‘সাধু খো, মাৰিস মোগ্গল্লান, সঙ্ঘসৰণগমনং হোতি. সঙ্ঘসৰণগমনহেতু খো, মাৰিস মোগ্গল্লান, এৱমিধেকচ্চে সত্তা কাযস্স ভেদা পৰং মৰণা সুগতিং সগ্গং লোকং উপপজ্জন্তি. তে অঞ্ঞে দেৱে দসহি ঠানেহি অধিগণ্হন্তি – দিব্বেন আযুনা, দিব্বেন ৱণ্ণেন, দিব্বেন সুখেন, দিব্বেন যসেন, দিব্বেন আধিপতেয্যেন, দিব্বেহি ৰূপেহি, দিব্বেহি সদ্দেহি, দিব্বেহি গন্ধেহি, দিব্বেহি ৰসেহি, দিব্বেহি ফোট্ঠব্বেহী’’তি.

‘‘সাধু খো, দেৱানমিন্দ, ধম্মসৰণগমনং হোতি…পে….

‘‘সাধু খো, মাৰিস মোগ্গল্লান, বুদ্ধসৰণগমনং হোতি…পে… সাধু খো, মাৰিস মোগ্গল্লান, ধম্মসৰণগমনং হোতি…পে… সাধু খো মাৰিস মোগ্গল্লান, সঙ্ঘসৰণগমনং হোতি. সঙ্ঘসৰণগমনহেতু খো, মাৰিস মোগ্গল্লান, এৱমিধেকচ্চে সত্তা কাযস্স ভেদা পৰং মৰণা সুগতিং সগ্গং লোকং উপপজ্জন্তি. তে অঞ্ঞে দেৱে দসহি ঠানেহি অধিগণ্হন্তি – দিব্বেন আযুনা, দিব্বেন ৱণ্ণেন, দিব্বেন সুখেন, দিব্বেন যসেন, দিব্বেন আধিপতেয্যেন, দিব্বেহি ৰূপেহি, দিব্বেহি সদ্দেহি, দিব্বেহি গন্ধেহি, দিব্বেহি ৰসেহি, দিব্বেহি ফোট্ঠব্বেহী’’তি.

‘‘সাধু খো, দেৱানমিন্দ, সঙ্ঘে অৱেচ্চপ্পসাদেন সমন্নাগমনং হোতি – ‘সুপ্পটিপন্নো ভগৱতো সাৱকসঙ্ঘো…পে… লোকস্সা’তি. সঙ্ঘে অৱেচ্চপ্পসাদেন সমন্নাগমনহেতু খো, দেৱানমিন্দ, এৱমিধেকচ্চে সত্তা কাযস্স ভেদা পৰং মৰণা সুগতিং সগ্গং লোকং উপপজ্জন্তি…পে….

‘‘সাধু খো, মাৰিস মোগ্গল্লান, সঙ্ঘে অৱেচ্চপ্পসাদেন সমন্নাগমনং হোতি – ‘সুপ্পটিপন্নো ভগৱতো সাৱকসঙ্ঘো…পে… লোকস্সা’তি. সঙ্ঘে অৱেচ্চপ্পসাদেন সমন্নাগমনহেতু খো, মাৰিস মোগ্গল্লান, এৱমিধেকচ্চে সত্তা কাযস্স ভেদা পৰং মৰণা সুগতিং সগ্গং লোকং উপপজ্জন্তি…পে….

‘‘সাধু খো, দেৱানমিন্দ, বুদ্ধে অৱেচ্চপ্পসাদেন সমন্নাগমনং হোতি – ‘ইতিপি সো ভগৱা অৰহং সম্মাসম্বুদ্ধো ৱিজ্জাচৰণসম্পন্নো সুগতো লোকৱিদূ অনুত্তৰো পুৰিসদম্মসাৰথি সত্থা দেৱমনুস্সানং বুদ্ধো ভগৱা’তি. বুদ্ধে অৱেচ্চপ্পসাদেন সমন্নাগমনহেতু খো, দেৱানমিন্দ, এৱমিধেকচ্চে সত্তা কাযস্স ভেদা পৰং মৰণা সুগতিং সগ্গং লোকং উপপজ্জন্তি. তে অঞ্ঞে দেৱে দসহি ঠানেহি অধিগণ্হন্তি – দিব্বেন আযুনা, দিব্বেন ৱণ্ণেন, দিব্বেন সুখেন, দিব্বেন যসেন, দিব্বেন আধিপতেয্যেন, দিব্বেহি ৰূপেহি, দিব্বেহি সদ্দেহি, দিব্বেহি গন্ধেহি, দিব্বেহি ৰসেহি, দিব্বেহি ফোট্ঠব্বেহি.

‘‘সাধু খো, দেৱানমিন্দ, অৰিযকন্তেহি সীলেহি সমন্নাগমনং হোতি অখণ্ডেহি অচ্ছিদ্দেহি অসবলেহি অকম্মাসেহি ভুজিস্সেহি ৱিঞ্ঞুপ্পসত্থেহি অপৰামট্ঠেহি সমাধিসংৱত্তনিকেহি. অৰিযকন্তেহি সীলেহি সমন্নাগমনহেতু খো, দেৱানমিন্দ, এৱমিধেকচ্চে সত্তা কাযস্স ভেদা পৰং মৰণা সুগতিং সগ্গং লোকং উপপজ্জন্তি. তে অঞ্ঞে দেৱে দসহি ঠানেহি অধিগণ্হন্তি – দিব্বেন আযুনা, দিব্বেন ৱণ্ণেন, দিব্বেন সুখেন, দিব্বেন যসেন, দিব্বেন আধিপতেয্যেন, দিব্বেহি ৰূপেহি, দিব্বেহি সদ্দেহি, দিব্বেহি গন্ধেহি, দিব্বেহি ৰসেহি, দিব্বেহি ফোট্ঠব্বেহী’’তি.

‘‘সাধু খো, মাৰিস মোগ্গল্লান, অৰিযকন্তেহি সীলেহি সমন্নাগমনং হোতি অখণ্ডেহি…পে… সমাধিসংৱত্তনিকেহি. অৰিযকন্তেহি সীলেহি সমন্নাগমনহেতু খো, মাৰিস মোগ্গল্লান, এৱমিধেকচ্চে সত্তা কাযস্স ভেদা পৰং মৰণা সুগতিং সগ্গং লোকং উপপজ্জন্তি. তে অঞ্ঞে দেৱে দসহি ঠানেহি অধিগণ্হন্তি – দিব্বেন আযুনা, দিব্বেন ৱণ্ণেন, দিব্বেন সুখেন, দিব্বেন যসেন, দিব্বেন আধিপতেয্যেন, দিব্বেহি ৰূপেহি, দিব্বেহি সদ্দেহি, দিব্বেহি গন্ধেহি, দিব্বেহি ৰসেহি, দিব্বেহি ফোট্ঠব্বেহী’’তি. দসমং.

১১. চন্দনসুত্তং

৩৪২. অথ খো চন্দনো [নন্দনো (সী.)] দেৱপুত্তো…পে….

অথ খো সুযামো দেৱপুত্তো…পে….

অথ খো সন্তুসিতো দেৱপুত্তো…পে….

অথ খো সুনিম্মিতো দেৱপুত্তো…পে….

অথ খো ৱসৱত্তি দেৱপুত্তো…পে….

(যথা সক্কসুত্তং তথা ইমে পঞ্চ পেয্যালা ৱিত্থাৰেতব্বা). একাদসমং.

মোগ্গল্লানসংযুত্তং সমত্তং.