৫. অস্সাসপ্পত্তসুত্তং

৩১৮. ‘‘‘অস্সাসপ্পত্তো, অস্সাসপ্পত্তো’তি, আৱুসো সাৰিপুত্ত, ৱুচ্চতি. কিত্তাৱতা নু খো, আৱুসো, অস্সাসপ্পত্তো হোতী’’তি? ‘‘যতো খো, আৱুসো, ভিক্খু ছন্নং ফস্সাযতনানং সমুদযঞ্চ অত্থঙ্গমঞ্চ অস্সাদঞ্চ আদীনৱঞ্চ নিস্সৰণঞ্চ যথাভূতং পজানাতি, এত্তাৱতা খো, আৱুসো, অস্সাসপ্পত্তো হোতী’’তি. ‘‘অত্থি পনাৱুসো, মগ্গো অত্থি পটিপদা, এতস্স অস্সাসস্স সচ্ছিকিৰিযাযা’’তি? ‘‘অত্থি খো, আৱুসো, মগ্গো অত্থি পটিপদা, এতস্স অস্সাসস্স সচ্ছিকিৰিযাযা’’তি. ‘‘কতমো পনাৱুসো, মগ্গো কতমা পটিপদা, এতস্স অস্সাসস্স সচ্ছিকিৰিযাযা’’তি? ‘‘অযমেৱ খো, আৱুসো, অৰিযো অট্ঠঙ্গিকো মগ্গো এতস্স অস্সাসস্স সচ্ছিকিৰিযায, সেয্যথিদং – সম্মাদিট্ঠি সম্মাসঙ্কপ্পো সম্মাৱাচা সম্মাকম্মন্তো সম্মাআজীৱো সম্মাৱাযামো সম্মাসতি সম্মাসমাধি. অযং খো, আৱুসো, মগ্গো অযং পটিপদা, এতস্স অস্সাসস্স সচ্ছিকিৰিযাযা’’তি. ‘‘ভদ্দকো, আৱুসো, মগ্গো ভদ্দিকা পটিপদা, এতস্স অস্সাসস্স সচ্ছিকিৰিযায. অলঞ্চ পনাৱুসো সাৰিপুত্ত, অপ্পমাদাযা’’তি. পঞ্চমং.