৯. লোকপঞ্হাসুত্তং

৮২. অথ খো অঞ্ঞতৰো ভিক্খু যেন ভগৱা…পে… একমন্তং নিসিন্নো খো সো ভিক্খু ভগৱন্তং এতদৱোচ –

‘‘‘লোকো, লোকো’তি, ভন্তে, ৱুচ্চতি. কিত্তাৱতা নু খো, ভন্তে, লোকোতি ৱুচ্চতী’’তি? ‘‘‘লুজ্জতী’তি খো, ভিক্খু, তস্মা লোকোতি ৱুচ্চতি. কিঞ্চ লুজ্জতি? চক্খু খো, ভিক্খু, লুজ্জতি. ৰূপা লুজ্জন্তি, চক্খুৱিঞ্ঞাণং লুজ্জতি, চক্খুসম্ফস্সো লুজ্জতি, যম্পিদং চক্খুসম্ফস্সপচ্চযা উপ্পজ্জতি ৱেদযিতং সুখং ৱা দুক্খং ৱা অদুক্খমসুখং ৱা তম্পি লুজ্জতি…পে… জিৱ্হা লুজ্জতি…পে… মনো লুজ্জতি, ধম্মা লুজ্জন্তি, মনোৱিঞ্ঞাণং লুজ্জতি, মনোসম্ফস্সো লুজ্জতি, যম্পিদং মনোসম্ফস্সপচ্চযা উপ্পজ্জতি ৱেদযিতং সুখং ৱা দুক্খং ৱা অদুক্খমসুখং ৱা তম্পি লুজ্জতি. লুজ্জতীতি খো, ভিক্খু, তস্মা লোকোতি ৱুচ্চতী’’তি. নৱমং.