৯. পঠমসব্বুপাদানপৰিযাদানসুত্তং

৬১. ‘‘সব্বুপাদানপৰিযাদানায ৱো, ভিক্খৱে, ধম্মং দেসেস্সামি. তং সুণাথ. কতমো চ, ভিক্খৱে, সব্বুপাদানপৰিযাদানায ধম্মো? চক্খুঞ্চ পটিচ্চ ৰূপে চ উপ্পজ্জতি চক্খুৱিঞ্ঞাণং. তিণ্ণং সঙ্গতি ফস্সো. ফস্সপচ্চযা ৱেদনা. এৱং পস্সং, ভিক্খৱে, সুতৱা অৰিযসাৱকো চক্খুস্মিম্পি নিব্বিন্দতি, ৰূপেসুপি নিব্বিন্দতি, চক্খুৱিঞ্ঞাণেপি নিব্বিন্দতি, চক্খুসম্ফস্সেপি নিব্বিন্দতি, ৱেদনাযপি নিব্বিন্দতি. নিব্বিন্দং ৱিৰজ্জতি; ৱিৰাগা ৱিমুচ্চতি; ৱিমোক্খা ‘পৰিযাদিন্নং [সব্বত্থপি এৱমেৱ দিস্সতি দন্তজ-নকাৰেনেৱ] মে উপাদান’ন্তি পজানাতি…পে… জিৱ্হঞ্চ পটিচ্চ ৰসে চ উপ্পজ্জতি জিৱ্হাৱিঞ্ঞাণং…পে… মনঞ্চ পটিচ্চ ধম্মে চ উপ্পজ্জতি মনোৱিঞ্ঞাণং. তিণ্ণং সঙ্গতি ফস্সো. ফস্সপচ্চযা ৱেদনা. এৱং পস্সং, ভিক্খৱে, সুতৱা অৰিযসাৱকো মনস্মিম্পি নিব্বিন্দতি, ধম্মেসুপি নিব্বিন্দতি, মনোৱিঞ্ঞাণেপি নিব্বিন্দতি মনোসম্ফস্সেপি নিব্বিন্দতি, ৱেদনাযপি নিব্বিন্দতি. নিব্বিন্দং ৱিৰজ্জতি; ৱিৰাগা ৱিমুচ্চতি; ৱিমোক্খা ‘পৰিযাদিন্নং মে উপাদান’ন্তি পজানাতি. অযং খো, ভিক্খৱে, সব্বুপাদানপৰিযাদানায ধম্মো’’তি. নৱমং.