১. অৱিজ্জাপহানসুত্তং

৫৩. সাৱত্থিনিদানং. অথ খো অঞ্ঞতৰো ভিক্খু যেন ভগৱা তেনুপসঙ্কমি; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদি. একমন্তং নিসিন্নো খো সো ভিক্খু ভগৱন্তং এতদৱোচ – ‘‘কথং নু খো, ভন্তে, জানতো কথং পস্সতো অৱিজ্জা পহীযতি, ৱিজ্জা উপ্পজ্জতী’’তি?

‘‘চক্খুং খো, ভিক্খু, অনিচ্চতো জানতো পস্সতো অৱিজ্জা পহীযতি, ৱিজ্জা উপ্পজ্জতি. ৰূপে অনিচ্চতো জানতো পস্সতো অৱিজ্জা পহীযতি, ৱিজ্জা উপ্পজ্জতি. চক্খুৱিঞ্ঞাণং… চক্খুসম্ফস্সং… যম্পিদং চক্খুসম্ফস্সপচ্চযা উপ্পজ্জতি ৱেদযিতং সুখং ৱা দুক্খং ৱা অদুক্খমসুখং ৱা তম্পি অনিচ্চতো জানতো পস্সতো অৱিজ্জা পহীযতি, ৱিজ্জা উপ্পজ্জতি. সোতং… ঘানং… জিৱ্হং… কাযং… মনং অনিচ্চতো জানতো পস্সতো অৱিজ্জা পহীযতি, ৱিজ্জা উপ্পজ্জতি. ধম্মে … মনোৱিঞ্ঞাণং… মনোসম্ফস্সং… যম্পিদং মনোসম্ফস্সপচ্চযা উপ্পজ্জতি ৱেদযিতং সুখং ৱা দুক্খং ৱা অদুক্খমসুখং ৱা তম্পি অনিচ্চতো জানতো পস্সতো অৱিজ্জা পহীযতি, ৱিজ্জা উপ্পজ্জতি. এৱং খো, ভিক্খু, জানতো এৱং পস্সতো অৱিজ্জা পহীযতি, ৱিজ্জা উপ্পজ্জতী’’তি. পঠমং.