৫. সব্বঅনিচ্চৱগ্গো

১-৯. অনিচ্চাদিসুত্তনৱকং

৪৩. সাৱত্থিনিদানং. তত্ৰ খো…পে… ‘‘সব্বং, ভিক্খৱে, অনিচ্চং. কিঞ্চ, ভিক্খৱে, সব্বং অনিচ্চং? চক্খু, ভিক্খৱে, অনিচ্চং, ৰূপা অনিচ্চা, চক্খুৱিঞ্ঞাণং অনিচ্চং, চক্খুসম্ফস্সো অনিচ্চো. যম্পিদং চক্খুসম্ফস্সপচ্চযা উপ্পজ্জতি ৱেদযিতং সুখং ৱা দুক্খং ৱা অদুক্খমসুখং ৱা তম্পি অনিচ্চং…পে… জিৱ্হা অনিচ্চা, ৰসা অনিচ্চা, জিৱ্হাৱিঞ্ঞাণং অনিচ্চং, জিৱ্হাসম্ফস্সো অনিচ্চো. যম্পিদং জিৱ্হাসম্ফস্সপচ্চযা উপ্পজ্জতি ৱেদযিতং সুখং ৱা দুক্খং ৱা অদুক্খমসুখং ৱা তম্পি অনিচ্চং. কাযো অনিচ্চো…পে… মনো অনিচ্চো, ধম্মা অনিচ্চা, মনোৱিঞ্ঞাণং অনিচ্চং, মনোসম্ফস্সো অনিচ্চো. যম্পিদং মনোসম্ফস্সপচ্চযা উপ্পজ্জতি ৱেদযিতং সুখং ৱা দুক্খং ৱা অদুক্খমসুখং ৱা তম্পি অনিচ্চং. এৱং পস্সং, ভিক্খৱে, সুতৱা অৰিযসাৱকো চক্খুস্মিম্পি নিব্বিন্দতি, ৰূপেসুপি নিব্বিন্দতি, চক্খুৱিঞ্ঞাণেপি নিব্বিন্দতি, চক্খুসম্ফস্সেপি নিব্বিন্দতি. যম্পিদং চক্খুসম্ফস্সপচ্চযা উপ্পজ্জতি ৱেদযিতং সুখং ৱা দুক্খং ৱা অদুক্খমসুখং ৱা তস্মিম্পি নিব্বিন্দতি…পে… মনস্মিম্পি নিব্বিন্দতি, ধম্মেসুপি নিব্বিন্দতি, মনোৱিঞ্ঞাণেপি নিব্বিন্দতি, মনোসম্ফস্সেপি নিব্বিন্দতি, যম্পিদং মনোসম্ফস্সপচ্চযা উপ্পজ্জতি ৱেদযিতং সুখং ৱা দুক্খং ৱা অদুক্খমসুখং ৱা তস্মিম্পি নিব্বিন্দতি. নিব্বিন্দং ৱিৰজ্জতি; ৱিৰাগা ৱিমুচ্চতি; ৱিমুত্তস্মিং ৱিমুত্তমিতি ঞাণং হোতি. ‘খীণা জাতি, ৱুসিতং ব্ৰহ্মচৰিযং, কতং কৰণীযং, নাপৰং ইত্থত্তাযা’তি পজানাতী’’তি. পঠমং.

৪৪. ‘‘সব্বং, ভিক্খৱে, দুক্খং…পে…. দুতিযং.

৪৫. ‘‘সব্বং, ভিক্খৱে, অনত্তা…পে…. ততিযং.

৪৬. ‘‘সব্বং, ভিক্খৱে, অভিঞ্ঞেয্যং…পে…. চতুত্থং.

৪৭. ‘‘সব্বং, ভিক্খৱে, পৰিঞ্ঞেয্যং…পে…. পঞ্চমং.

৪৮. ‘‘সব্বং, ভিক্খৱে, পহাতব্বং…পে…. ছট্ঠং.

৪৯. ‘‘সব্বং, ভিক্খৱে, সচ্ছিকাতব্বং…পে…. সত্তমং.

৫০. ‘‘সব্বং, ভিক্খৱে, অভিঞ্ঞাপৰিঞ্ঞেয্যং…পে…. অট্ঠমং.

৫১. ‘‘সব্বং, ভিক্খৱে, উপদ্দুতং…পে…. নৱমং.

১০. উপস্সট্ঠসুত্তং

৫২. ‘‘সব্বং, ভিক্খৱে, উপস্সট্ঠং [উপসট্ঠং (ক.)]. কিঞ্চ, ভিক্খৱে, সব্বং উপস্সট্ঠং? চক্খু, ভিক্খৱে, উপস্সট্ঠং, ৰূপা উপস্সট্ঠা, চক্খুৱিঞ্ঞাণং উপস্সট্ঠং, চক্খুসম্ফস্সো উপস্সট্ঠো. যম্পিদং চক্খুসম্ফস্সপচ্চযা উপ্পজ্জতি ৱেদযিতং সুখং ৱা দুক্খং ৱা অদুক্খমসুখং ৱা তম্পি উপস্সট্ঠং…পে… জিৱ্হা উপস্সট্ঠা, ৰসা উপস্সট্ঠা, জিৱ্হাৱিঞ্ঞাণং উপস্সট্ঠং, জিৱ্হাসম্ফস্সো উপস্সট্ঠো. যম্পিদং জিৱ্হাসম্ফস্সপচ্চযা উপ্পজ্জতি ৱেদযিতং সুখং ৱা দুক্খং ৱা অদুক্খমসুখং ৱা তম্পি উপস্সট্ঠং. কাযো উপস্সট্ঠো… মনো উপস্সট্ঠো, ধম্মা উপস্সট্ঠা, মনোৱিঞ্ঞাণং উপস্সট্ঠং, মনোসম্ফস্সো উপস্সট্ঠো. যম্পিদং মনোসম্ফস্সপচ্চযা উপ্পজ্জতি ৱেদযিতং সুখং ৱা দুক্খং ৱা অদুক্খমসুখং ৱা তম্পি উপস্সট্ঠং. এৱং পস্সং, ভিক্খৱে, সুতৱা অৰিযসাৱকো চক্খুস্মিম্পি নিব্বিন্দতি, ৰূপেসুপি নিব্বিন্দতি, চক্খুৱিঞ্ঞাণেপি নিব্বিন্দতি, চক্খুসম্ফস্সেপি নিব্বিন্দতি. যম্পিদং চক্খুসম্ফস্সপচ্চযা উপ্পজ্জতি ৱেদযিতং সুখং ৱা দুক্খং ৱা অদুক্খমসুখং ৱা তস্মিম্পি নিব্বিন্দতি…পে… মনস্মিম্পি নিব্বিন্দতি, ধম্মেসুপি নিব্বিন্দতি, মনোৱিঞ্ঞাণেপি নিব্বিন্দতি, মনোসম্ফস্সেপি নিব্বিন্দতি. যম্পিদং মনোসম্ফস্সপচ্চযা উপ্পজ্জতি ৱেদযিতং সুখং ৱা দুক্খং ৱা অদুক্খমসুখং ৱা তস্মিম্পি নিব্বিন্দতি. নিব্বিন্দং ৱিৰজ্জতি; ৱিৰাগা ৱিমুচ্চতি; ৱিমুত্তস্মিং ৱিমুত্তমিতি ঞাণং হোতি. ‘খীণা জাতি, ৱুসিতং ব্ৰহ্মচৰিযং, কতং কৰণীযং, নাপৰং ইত্থত্তাযা’তি পজানাতী’’তি. দসমং.

সব্বঅনিচ্চৱগ্গো পঞ্চমো.

তস্সুদ্দানং –

অনিচ্চং দুক্খং অনত্তা, অভিঞ্ঞেয্যং পৰিঞ্ঞেয্যং;

পহাতব্বং সচ্ছিকাতব্বং, অভিঞ্ঞেয্যপৰিঞ্ঞেয্যং [অভিঞ্ঞেয্যং পৰিঞ্ঞেয্যং (সী. স্যা. কং.), অভিঞ্ঞাতং পৰিঞ্ঞেয্যং (পী. ক.)];

উপদ্দুতং উপস্সট্ঠং, ৱগ্গো তেন পৱুচ্চতীতি.

সড়াযতনৱগ্গে পঠমপণ্ণাসকো সমত্তো.

তস্স ৱগ্গুদ্দানং –

অনিচ্চৱগ্গং যমকং, সব্বং ৱগ্গং জাতিধম্মং;

অনিচ্চৱগ্গেন পঞ্ঞাসং, পঞ্চমো তেন পৱুচ্চতীতি.