৪. পঠমঅপৰিজাননসুত্তং

২৬. ‘‘সব্বং, ভিক্খৱে, অনভিজানং অপৰিজানং অৱিৰাজযং অপ্পজহং অভব্বো দুক্খক্খযায. কিঞ্চ, ভিক্খৱে, অনভিজানং অপৰিজানং অৱিৰাজযং অপ্পজহং অভব্বো দুক্খক্খযায? চক্খুং, ভিক্খৱে, অনভিজানং অপৰিজানং অৱিৰাজযং অপ্পজহং অভব্বো দুক্খক্খযায. ৰূপে অনভিজানং অপৰিজানং অৱিৰাজযং অপ্পজহং অভব্বো দুক্খক্খযায. চক্খুৱিঞ্ঞাণং অনভিজানং অপৰিজানং অৱিৰাজযং অপ্পজহং অভব্বো দুক্খক্খযায. চক্খুসম্ফস্সং অনভিজানং অপৰিজানং অৱিৰাজযং অপ্পজহং অভব্বো দুক্খক্খযায. যম্পিদং চক্খুসম্ফস্সপচ্চযা উপ্পজ্জতি ৱেদযিতং সুখং ৱা দুক্খং ৱা অদুক্খমসুখং ৱা তম্পি অনভিজানং অপৰিজানং অৱিৰাজযং অপ্পজহং অভব্বো দুক্খক্খযায…পে… জিৱ্হং অনভিজানং অপৰিজানং অৱিৰাজযং অপ্পজহং অভব্বো দুক্খক্খযায. ৰসে…পে… জিৱ্হাৱিঞ্ঞাণং…পে… জিৱ্হাসম্ফস্সং…পে… যম্পিদং জিৱ্হাসম্ফস্সপচ্চযা উপ্পজ্জতি ৱেদযিতং সুখং ৱা দুক্খং ৱা অদুক্খমসুখং ৱা তম্পি অনভিজানং অপৰিজানং অৱিৰাজযং অপ্পজহং অভব্বো দুক্খক্খযায. কাযং…পে… মনং অনভিজানং অপৰিজানং অৱিৰাজযং অপ্পজহং অভব্বো দুক্খক্খযায. ধম্মে…পে… মনোৱিঞ্ঞাণং…পে… মনোসম্ফস্সং…পে… যম্পিদং মনোসম্ফস্সপচ্চযা উপ্পজ্জতি ৱেদযিতং সুখং ৱা দুক্খং ৱা অদুক্খমসুখং ৱা তম্পি অনভিজানং অপৰিজানং অৱিৰাজযং অপ্পজহং অভব্বো দুক্খক্খযায. ইদং খো, ভিক্খৱে, সব্বং অনভিজানং অপৰিজানং অৱিৰাজযং অপ্পজহং অভব্বো দুক্খক্খযায.

‘‘সব্বঞ্চ খো, ভিক্খৱে, অভিজানং পৰিজানং ৱিৰাজযং পজহং ভব্বো দুক্খক্খযায. কিঞ্চ, ভিক্খৱে, সব্বং অভিজানং পৰিজানং ৱিৰাজযং পজহং ভব্বো দুক্খক্খযায? চক্খুং, ভিক্খৱে, অভিজানং পৰিজানং ৱিৰাজযং পজহং ভব্বো দুক্খক্খযায. ৰূপে অভিজানং পৰিজানং ৱিৰাজযং পজহং ভব্বো দুক্খক্খযায. চক্খুৱিঞ্ঞাণং অভিজানং পৰিজানং ৱিৰাজযং পজহং ভব্বো দুক্খক্খযায. চক্খুসম্ফস্সং অভিজানং পৰিজানং ৱিৰাজযং পজহং ভব্বো দুক্খক্খযায. যম্পিদং চক্খুসম্ফস্সপচ্চযা উপ্পজ্জতি ৱেদযিতং সুখং ৱা দুক্খং ৱা অদুক্খমসুখং ৱা তম্পি অভিজানং পৰিজানং ৱিৰাজযং পজহং ভব্বো দুক্খক্খযায…পে… জিৱ্হং অভিজানং পৰিজানং ৱিৰাজযং পজহং ভব্বো দুক্খক্খযায. ৰসে…পে… জিৱ্হাৱিঞ্ঞাণং…পে… জিৱ্হাসম্ফস্সং…পে… যম্পিদং জিৱ্হাসম্ফস্সপচ্চযা উপ্পজ্জতি ৱেদযিতং সুখং ৱা দুক্খং ৱা অদুক্খমসুখং ৱা তম্পি অভিজানং পৰিজানং ৱিৰাজযং পজহং ভব্বো দুক্খক্খযায. কাযং…পে… মনং অভিজানং পৰিজানং ৱিৰাজযং পজহং ভব্বো দুক্খক্খযায. ধম্মে…পে… মনোৱিঞ্ঞাণং…পে… মনোসম্ফস্সং…পে… যম্পিদং মনোসম্ফস্সপচ্চযা উপ্পজ্জতি ৱেদযিতং সুখং ৱা দুক্খং ৱা অদুক্খমসুখং ৱা তম্পি অভিজানং পৰিজানং ৱিৰাজযং পজহং ভব্বো দুক্খক্খযায. ইদং খো, ভিক্খৱে, সব্বং অভিজানং পৰিজানং ৱিৰাজযং পজহং ভব্বো দুক্খক্খযাযা’’তি. চতুত্থং.