২. পহানসুত্তং

২৪. ‘‘সব্বপ্পহানায [সব্বং পহানায (স্যা. কং. ক.)] ৱো, ভিক্খৱে, ধম্মং দেসেস্সামি. তং সুণাথ. কতমো চ, ভিক্খৱে, সব্বপ্পহানায ধম্মো? চক্খুং, ভিক্খৱে, পহাতব্বং, ৰূপা পহাতব্বা, চক্খুৱিঞ্ঞাণং পহাতব্বং, চক্খুসম্ফস্সো পহাতব্বো, যম্পিদং চক্খুসম্ফস্সপচ্চযা উপ্পজ্জতি ৱেদযিতং সুখং ৱা দুক্খং ৱা অদুক্খমসুখং ৱা তম্পি পহাতব্বং…পে… যম্পিদং সোতসম্ফস্সপচ্চযা উপ্পজ্জতি ৱেদযিতং সুখং ৱা দুক্খং ৱা অদুক্খমসুখং ৱা তম্পি পহাতব্বং… যম্পিদং ঘানসম্ফস্সপচ্চযা উপ্পজ্জতি ৱেদযিতং সুখং ৱা দুক্খং ৱা অদুক্খমসুখং ৱা তম্পি পহাতব্বং. জিৱ্হা পহাতব্বা, ৰসা পহাতব্বা, জিৱ্হাৱিঞ্ঞাণং পহাতব্বং, জিৱ্হাসম্ফস্সো পহাতব্বো, যম্পিদং জিৱ্হাসম্ফস্সপচ্চযা উপ্পজ্জতি ৱেদযিতং সুখং ৱা দুক্খং ৱা অদুক্খমসুখং ৱা তম্পি পহাতব্বং. কাযো পহাতব্বো… মনো পহাতব্বো, ধম্মা পহাতব্বা, মনোৱিঞ্ঞাণং পহাতব্বং, মনোসম্ফস্সো পহাতব্বো, যম্পিদং মনোসম্ফস্সপচ্চযা উপ্পজ্জতি ৱেদযিতং সুখং ৱা দুক্খং ৱা অদুক্খমসুখং ৱা তম্পি পহাতব্বং. অযং খো, ভিক্খৱে, সব্বপ্পহানায ধম্মো’’তি. দুতিযং.