৫. পঠমনোচেঅস্সাদসুত্তং

১৭. ‘‘নো চেদং, ভিক্খৱে, চক্খুস্স অস্সাদো অভৱিস্স, নযিদং সত্তা চক্খুস্মিং সাৰজ্জেয্যুং. যস্মা চ খো, ভিক্খৱে, অত্থি চক্খুস্স অস্সাদো তস্মা সত্তা চক্খুস্মিং সাৰজ্জন্তি. নো চেদং, ভিক্খৱে, চক্খুস্স আদীনৱো অভৱিস্স, নযিদং সত্তা চক্খুস্মিং নিব্বিন্দেয্যুং. যস্মা চ খো, ভিক্খৱে, অত্থি চক্খুস্স আদীনৱো তস্মা সত্তা চক্খুস্মিং নিব্বিন্দন্তি. নো চেদং, ভিক্খৱে, চক্খুস্স নিস্সৰণং অভৱিস্স, নযিদং সত্তা চক্খুস্মা নিস্সৰেয্যুং. যস্মা চ খো, ভিক্খৱে, অত্থি চক্খুস্স নিস্সৰণং তস্মা সত্তা চক্খুস্মা নিস্সৰন্তি. নো চেদং, ভিক্খৱে, সোতস্স অস্সাদো অভৱিস্স… নো চেদং, ভিক্খৱে, ঘানস্স অস্সাদো অভৱিস্স… নো চেদং, ভিক্খৱে, জিৱ্হায অস্সাদো অভৱিস্স, নযিদং সত্তা জিৱ্হায সাৰজ্জেয্যুং. যস্মা চ খো, ভিক্খৱে, অত্থি জিৱ্হায অস্সাদো, তস্মা সত্তা জিৱ্হায সাৰজ্জন্তি. নো চেদং, ভিক্খৱে, জিৱ্হায আদীনৱো অভৱিস্স, নযিদং সত্তা জিৱ্হায নিব্বিন্দেয্যুং. যস্মা চ খো, ভিক্খৱে, অত্থি জিৱ্হায আদীনৱো, তস্মা সত্তা জিৱ্হায নিব্বিন্দন্তি. নো চেদং, ভিক্খৱে, জিৱ্হায নিস্সৰণং অভৱিস্স, নযিদং সত্তা জিৱ্হায নিস্সৰেয্যুং. যস্মা চ খো, ভিক্খৱে, অত্থি জিৱ্হায নিস্সৰণং, তস্মা সত্তা জিৱ্হায নিস্সৰন্তি. নো চেদং, ভিক্খৱে, কাযস্স অস্সাদো অভৱিস্স… নো চেদং, ভিক্খৱে, মনস্স অস্সাদো অভৱিস্স, নযিদং সত্তা মনস্মিং সাৰজ্জেয্যুং. যস্মা চ খো, ভিক্খৱে, অত্থি মনস্স অস্সাদো, তস্মা সত্তা মনস্মিং সাৰজ্জন্তি. নো চেদং, ভিক্খৱে, মনস্স আদীনৱো অভৱিস্স, নযিদং সত্তা মনস্মিং নিব্বিন্দেয্যুং. যস্মা চ খো, ভিক্খৱে, অত্থি মনস্স আদীনৱো, তস্মা সত্তা মনস্মিং নিব্বিন্দন্তি. নো চেদং, ভিক্খৱে, মনস্স নিস্সৰণং অভৱিস্স, নযিদং সত্তা মনস্মা নিস্সৰেয্যুং. যস্মা চ খো, ভিক্খৱে, অত্থি মনস্স নিস্সৰণং, তস্মা সত্তা মনস্মা নিস্সৰন্তি.

‘‘যাৱকীৱঞ্চ, ভিক্খৱে, সত্তা ইমেসং ছন্নং অজ্ঝত্তিকানং আযতনানং অস্সাদঞ্চ অস্সাদতো, আদীনৱঞ্চ আদীনৱতো, নিস্সৰণঞ্চ নিস্সৰণতো যথাভূতং নাব্ভঞ্ঞংসু, নেৱ তাৱ, ভিক্খৱে, সত্তা সদেৱকা লোকা সমাৰকা সব্ৰহ্মকা সস্সমণব্ৰাহ্মণিযা পজায সদেৱমনুস্সায নিস্সটা ৱিসঞ্ঞুত্তা ৱিপ্পমুত্তা ৱিমৰিযাদীকতেন [ৱিপৰিযাদিকতেন (সী. পী.), ৱিপৰিযাদিকতেন (স্যা. কং. ক.)] চেতসা ৱিহৰিংসু. যতো চ খো, ভিক্খৱে, সত্তা ইমেসং ছন্নং অজ্ঝত্তিকানং আযতনানং অস্সাদঞ্চ অস্সাদতো, আদীনৱঞ্চ আদীনৱতো, নিস্সৰণঞ্চ নিস্সৰণতো যথাভূতং অব্ভঞ্ঞংসু, অথ, ভিক্খৱে, সত্তা সদেৱকা লোকা সমাৰকা সব্ৰহ্মকা সস্সমণব্ৰাহ্মণিযা পজায সদেৱমনুস্সায নিস্সটা ৱিসঞ্ঞুত্তা ৱিপ্পমুত্তা ৱিমৰিযাদীকতেন চেতসা ৱিহৰন্তী’’তি. পঞ্চমং.