৩. পঠমঅস্সাদপৰিযেসনসুত্তং

১৫. ‘‘চক্খুস্সাহং, ভিক্খৱে, অস্সাদপৰিযেসনং অচৰিং. যো চক্খুস্স অস্সাদো তদজ্ঝগমং. যাৱতা চক্খুস্স অস্সাদো পঞ্ঞায মে সো সুদিট্ঠো. চক্খুস্সাহং, ভিক্খৱে, আদীনৱপৰিযেসনং অচৰিং. যো চক্খুস্স আদীনৱো তদজ্ঝগমং. যাৱতা চক্খুস্স আদীনৱো পঞ্ঞায মে সো সুদিট্ঠো. চক্খুস্সাহং, ভিক্খৱে, নিস্সৰণপৰিযেসনং অচৰিং. যং চক্খুস্স নিস্সৰণং তদজ্ঝগমং. যাৱতা চক্খুস্স নিস্সৰণং, পঞ্ঞায মে তং সুদিট্ঠং. সোতস্সাহং, ভিক্খৱে… ঘানস্সাহং, ভিক্খৱে… জিৱ্হাযাহং ভিক্খৱে, অস্সাদপৰিযেসনং অচৰিং. যো জিৱ্হায অস্সাদো তদজ্ঝগমং. যাৱতা জিৱ্হায অস্সাদো পঞ্ঞায মে সো সুদিট্ঠো. জিৱ্হাযাহং, ভিক্খৱে, আদীনৱপৰিযেসনং অচৰিং. যো জিৱ্হায আদীনৱো তদজ্ঝগমং. যাৱতা জিৱ্হায আদীনৱো পঞ্ঞায মে সো সুদিট্ঠো. জিৱ্হাযাহং, ভিক্খৱে, নিস্সৰণপৰিযেসনং অচৰিং. যং জিৱ্হায নিস্সৰণং তদজ্ঝগমং. যাৱতা জিৱ্হায নিস্সৰণং, পঞ্ঞায মে তং সুদিট্ঠং. মনস্সাহং, ভিক্খৱে, অস্সাদপৰিযেসনং অচৰিং. যো মনস্স অস্সাদো তদজ্ঝগমং. যাৱতা মনস্স অস্সাদো পঞ্ঞায মে সো সুদিট্ঠো. মনস্সাহং, ভিক্খৱে, আদীনৱপৰিযেসনং অচৰিং. যো মনস্স আদীনৱো তদজ্ঝগমং. যাৱতা মনস্স আদীনৱো পঞ্ঞায মে সো সুদিট্ঠো. মনস্সাহং, ভিক্খৱে, নিস্সৰণপৰিযেসনং অচৰিং. যং মনস্স নিস্সৰণং তদজ্ঝগমং. যাৱতা মনস্স নিস্সৰণং, পঞ্ঞায মে তং সুদিট্ঠং.

‘‘যাৱকীৱঞ্চাহং, ভিক্খৱে, ইমেসং ছন্নং অজ্ঝত্তিকানং আযতনানং অস্সাদঞ্চ অস্সাদতো, আদীনৱঞ্চ আদীনৱতো, নিস্সৰণঞ্চ নিস্সৰণতো যথাভূতং নাব্ভঞ্ঞাসিং…পে… পচ্চঞ্ঞাসিং. ঞাণঞ্চ পন মে দস্সনং উদপাদি – ‘অকুপ্পা মে ৱিমুত্তি, অযমন্তিমা জাতি, নত্থি দানি পুনব্ভৱো’’’তি. ততিযং.