২. দুতিযসমুদ্দসুত্তং

২২৯. ‘‘সমুদ্দো, সমুদ্দো’তি, ভিক্খৱে, অস্সুতৱা পুথুজ্জনো ভাসতি. নেসো, ভিক্খৱে, অৰিযস্স ৱিনযে সমুদ্দো. মহা এসো, ভিক্খৱে, উদকৰাসি মহাউদকণ্ণৱো. সন্তি, ভিক্খৱে, চক্খুৱিঞ্ঞেয্যা ৰূপা ইট্ঠা কন্তা মনাপা পিযৰূপা কামূপসংহিতা ৰজনীযা. অযং ৱুচ্চতি, ভিক্খৱে, অৰিযস্স ৱিনযে সমুদ্দো. এত্থাযং সদেৱকো লোকো সমাৰকো সব্ৰহ্মকো সস্সমণব্ৰাহ্মণী পজা সদেৱমনুস্সা যেভুয্যেন সমুন্না তন্তাকুলকজাতা কুলগণ্ঠিকজাতা [গুড়াগুণ্ঠিকজাতা (সী.), কুলগুণ্ডিকজাতা (স্যা. কং.), গুণগুণিকজাতা (পী.), কুলাগুণ্ডিকজাতা (ক.)] মুঞ্জপব্বজভূতা, অপাযং দুগ্গতিং ৱিনিপাতং সংসাৰং নাতিৱত্ততি…পে….

‘‘সন্তি, ভিক্খৱে, জিৱ্হাৱিঞ্ঞেয্যা ৰসা…পে… সন্তি, ভিক্খৱে, মনোৱিঞ্ঞেয্যা ধম্মা ইট্ঠা কন্তা মনাপা পিযৰূপা কামূপসংহিতা ৰজনীযা. অযং ৱুচ্চতি, ভিক্খৱে, অৰিযস্স ৱিনযে সমুদ্দো. এত্থাযং সদেৱকো লোকো সমাৰকো সব্ৰহ্মকো সস্সমণব্ৰাহ্মণী পজা সদেৱমনুস্সা যেভুয্যেন সমুন্না তন্তাকুলকজাতা কুলগণ্ঠিকজাতা মুঞ্জপব্বজভূতা অপাযং দুগ্গতিং ৱিনিপাতং সংসাৰং নাতিৱত্ততী’’তি.

‘‘যস্স ৰাগো চ দোসো চ, অৱিজ্জা চ ৱিৰাজিতা;

সো ইমং সমুদ্দং সগাহং সৰক্খসং, সঊমিভযং দুত্তৰং অচ্চতৰি.

‘‘সঙ্গাতিগো মচ্চুজহো নিৰুপধি, পহাসি দুক্খং অপুনব্ভৱায;

অত্থঙ্গতো সো ন পুনেতি [ন পমাণমেতি (সী. স্যা. কং. পী.)], অমোহযী, মচ্চুৰাজন্তি ব্ৰূমী’’তি. দুতিযং;