৪. ভাৰদ্ৱাজসুত্তং

১২৭. একং সমযং আযস্মা পিণ্ডোলভাৰদ্ৱাজো কোসম্বিযং ৱিহৰতি ঘোসিতাৰামে. অথ খো ৰাজা উদেনো যেনাযস্মা পিণ্ডোলভাৰদ্ৱাজো তেনুপসঙ্কমি; উপসঙ্কমিত্ৱা আযস্মতা পিণ্ডোলভাৰদ্ৱাজেন সদ্ধিং সম্মোদি. সম্মোদনীযং কথং সাৰণীযং ৱীতিসাৰেত্ৱা একমন্তং নিসীদি. একমন্তং নিসিন্নো খো ৰাজা উদেনো আযস্মন্তং পিণ্ডোলভাৰদ্ৱাজং এতদৱোচ – ‘‘কো নু খো, ভো ভাৰদ্ৱাজ, হেতু কো পচ্চযো যেনিমে দহৰা ভিক্খূ সুসূ [সুসু (সী. ক.)] কাড়কেসা ভদ্ৰেন যোব্বনেন সমন্নাগতা পঠমেন ৱযসা অনিকীড়িতাৱিনো কামেসু যাৱজীৱং পৰিপুণ্ণং পৰিসুদ্ধং ব্ৰহ্মচৰিযং চৰন্তি, অদ্ধানঞ্চ আপাদেন্তী’’তি? ‘‘ৱুত্তং খো এতং, মহাৰাজ, তেন ভগৱতা জানতা পস্সতা অৰহতা সম্মাসম্বুদ্ধেন – ‘এথ তুম্হে, ভিক্খৱে, মাতুমত্তীসু মাতুচিত্তং উপট্ঠপেথ, ভগিনিমত্তীসু ভগিনিচিত্তং উপট্ঠপেথ, ধীতুমত্তীসু ধীতুচিত্তং উপট্ঠপেথা’তি. অযং খো, মহাৰাজ, হেতু, অযং পচ্চযো যেনিমে দহৰা ভিক্খূ সুসূ কাড়কেসা ভদ্ৰেন যোব্বনেন সমন্নাগতা পঠমেন ৱযসা অনিকীড়িতাৱিনো কামেসু যাৱজীৱং পৰিপুণ্ণং পৰিসুদ্ধং ব্ৰহ্মচৰিযং চৰন্তি, অদ্ধানঞ্চ আপাদেন্তী’’তি.

‘‘লোলং [লোড়ং (স্যা. কং.)] খো, ভো ভাৰদ্ৱাজ, চিত্তং. অপ্পেকদা মাতুমত্তীসুপি লোভধম্মা উপ্পজ্জন্তি, ভগিনিমত্তীসুপি লোভধম্মা উপ্পজ্জন্তি, ধীতুমত্তীসুপি লোভধম্মা উপ্পজ্জন্তি. অত্থি নু খো, ভো ভাৰদ্ৱাজ, অঞ্ঞো চ হেতু, অঞ্ঞো চ পচ্চযো যেনিমে দহৰা ভিক্খূ সুসূ কাড়কেসা…পে… অদ্ধানঞ্চ আপাদেন্তী’’তি?

‘‘ৱুত্তং খো এতং, মহাৰাজ, তেন ভগৱতা জানতা পস্সতা অৰহতা সম্মাসম্বুদ্ধেন – ‘এথ তুম্হে, ভিক্খৱে, ইমমেৱ কাযং উদ্ধং পাদতলা অধো কেসমত্থকা তচপৰিযন্তং পূৰং নানপ্পকাৰস্স অসুচিনো পচ্চৱেক্খথ – অত্থি ইমস্মিং কাযে কেসা লোমা নখা দন্তা তচো মংসং ন্হাৰু [নহাৰু (সী. স্যা. কং. পী.)] অট্ঠি অট্ঠিমিঞ্জং [অট্ঠিমিঞ্জা (সী.)] ৱক্কং হদযং যকনং কিলোমকং পিহকং পপ্ফাসং অন্তং অন্তগুণং উদৰিযং কৰীসং পিত্তং সেম্হং পুব্বো লোহিতং সেদো মেদো অস্সু ৱসা খেড়ো সিঙ্ঘাণিকা লসিকা মুত্ত’ন্তি. অযম্পি খো, মহাৰাজ, হেতু, অযং পচ্চযো যেনিমে দহৰা ভিক্খূ সুসূ কাড়কেসা…পে… অদ্ধানঞ্চ আপাদেন্তী’’তি. ‘‘যে তে, ভো ভাৰদ্ৱাজ, ভিক্খূ ভাৱিতকাযা ভাৱিতসীলা ভাৱিতচিত্তা ভাৱিতপঞ্ঞা, তেসং তং সুকৰং হোতি. যে চ খো তে, ভো ভাৰদ্ৱাজ, ভিক্খূ অভাৱিতকাযা অভাৱিতসীলা অভাৱিতচিত্তা অভাৱিতপঞ্ঞা, তেসং তং দুক্কৰং হোতি. অপ্পেকদা, ভো ভাৰদ্ৱাজ, অসুভতো মনসি কৰিস্সামীতি [মনসি কৰিস্সামাতি (সী. স্যা. কং. পী.)] সুভতোৱ [সুভতো ৱা (সী.), সুভতো চ (স্যা. কং.)] আগচ্ছতি. অত্থি নু খো, ভো ভাৰদ্ৱাজ, অঞ্ঞো চ খো হেতু অঞ্ঞো চ পচ্চযো যেনিমে দহৰা ভিক্খূ সুসূ কাড়কেসা…পে… অদ্ধানঞ্চ আপাদেন্তী’’তি?

‘‘ৱুত্তং খো এতং, মহাৰাজ, তেন ভগৱতা জানতা পস্সতা অৰহতা সম্মাসম্বুদ্ধেন – ‘এথ তুম্হে, ভিক্খৱে, ইন্দ্ৰিযেসু গুত্তদ্ৱাৰা ৱিহৰথ. চক্খুনা ৰূপং দিস্ৱা মা নিমিত্তগ্গাহিনো অহুৱত্থ, মানুব্যঞ্জনগ্গাহিনো. যত্ৱাধিকৰণমেনং চক্খুন্দ্ৰিযং অসংৱুতং ৱিহৰন্তং অভিজ্ঝাদোমনস্সা পাপকা অকুসলা ধম্মা অন্ৱাস্সৱেয্যুং, তস্স সংৱৰায পটিপজ্জথ. ৰক্খথ চক্খুন্দ্ৰিযং; চক্খুন্দ্ৰিযে সংৱৰং আপজ্জথ. সোতেন সদ্দং সুত্ৱা…পে… ঘানেন গন্ধং ঘাযিত্ৱা… জিৱ্হায ৰসং সাযিত্ৱা… কাযেন ফোট্ঠব্বং ফুসিত্ৱা… মনসা ধম্মং ৱিঞ্ঞায মা নিমিত্তগ্গাহিনো অহুৱত্থ, মানুব্যঞ্জনগ্গাহিনো. যত্ৱাধিকৰণমেনং মনিন্দ্ৰিযং অসংৱুতং ৱিহৰন্তং অভিজ্ঝাদোমনস্সা পাপকা অকুসলা ধম্মা অন্ৱাস্সৱেয্যুং, তস্স সংৱৰায পটিপজ্জথ. ৰক্খথ মনিন্দ্ৰিযং; মনিন্দ্ৰিযে সংৱৰং আপজ্জথা’তি. অযম্পি খো, মহাৰাজ, হেতু অযং পচ্চযো যেনিমে দহৰা ভিক্খূ সুসূ কাড়কেসা ভদ্ৰেন যোব্বনেন সমন্নাগতা পঠমেন ৱযসা অনিকীড়িতাৱিনো কামেসু যাৱজীৱং পৰিপুণ্ণং পৰিসুদ্ধং ব্ৰহ্মচৰিযং চৰন্তি, অদ্ধানঞ্চ আপাদেন্তী’’তি.

‘‘অচ্ছৰিযং, ভো ভাৰদ্ৱাজ; অব্ভুতং, ভো ভাৰদ্ৱাজ! যাৱ সুভাসিতং চিদং [যাৱ সুভাসিতমিদং (সী.)], ভো ভাৰদ্ৱাজ, তেন ভগৱতা জানতা পস্সতা অৰহতা সম্মাসম্বুদ্ধেন. এসোৱ খো, ভো ভাৰদ্ৱাজ, হেতু, এস পচ্চযো যেনিমে দহৰা ভিক্খূ সুসূ কাড়কেসা ভদ্ৰেন যোব্বনেন সমন্নাগতা পঠমেন ৱযসা অনিকীড়িতাৱিনো কামেসু যাৱজীৱং পৰিপুণ্ণং পৰিসুদ্ধং ব্ৰহ্মচৰিযং চৰন্তি, অদ্ধানঞ্চ আপাদেন্তীতি. অহম্পি খো, ভো [অহম্পি ভো (সী. পী.)] ভাৰদ্ৱাজ, যস্মিং সমযে অৰক্খিতেনেৱ কাযেন, অৰক্খিতায ৱাচায, অৰক্খিতেন চিত্তেন, অনুপট্ঠিতায সতিযা, অসংৱুতেহি ইন্দ্ৰিযেহি অন্তেপুৰং পৱিসামি, অতিৱিয মং তস্মিং সমযে লোভধম্মা পৰিসহন্তি. যস্মিঞ্চ খ্ৱাহং, ভো ভাৰদ্ৱাজ, সমযে ৰক্খিতেনেৱ কাযেন, ৰক্খিতায ৱাচায, ৰক্খিতেন চিত্তেন, উপট্ঠিতায সতিযা, সংৱুতেহি ইন্দ্ৰিযেহি অন্তেপুৰং পৱিসামি, ন মং তথা তস্মিং সমযে লোভধম্মা পৰিসহন্তি. অভিক্কন্তং, ভো ভাৰদ্ৱাজ; অভিক্কন্তং, ভো ভাৰদ্ৱাজ! সেয্যথাপি, ভো ভাৰদ্ৱাজ, নিক্কুজ্জিতং [নিকুজ্জিতং (পী.)] ৱা উক্কুজ্জেয্য, পটিচ্ছন্নং ৱা ৱিৱৰেয্য, মূড়্হস্স ৱা মগ্গং আচিক্খেয্য, অন্ধকাৰে ৱা তেলপজ্জোতং ধাৰেয্য, চক্খুমন্তো ৰূপানি দক্খন্তীতি; এৱমেৱং ভোতা ভাৰদ্ৱাজেন অনেকপৰিযাযেন ধম্মো পকাসিতো. এসাহং, ভো ভাৰদ্ৱাজ, তং ভগৱন্তং সৰণং গচ্ছামি, ধম্মঞ্চ, ভিক্খুসঙ্ঘঞ্চ. উপাসকং মং ভৱং ভাৰদ্ৱাজো ধাৰেতু অজ্জতগ্গে পাণুপেতং সৰণং গত’’ন্তি. চতুত্থং.