১. যোগক্খেমিসুত্তং

১০৪. সাৱত্থিনিদানং. ‘‘যোগক্খেমিপৰিযাযং ৱো, ভিক্খৱে, ধম্মপৰিযাযং দেসেস্সামি. তং সুণাথ. কতমো চ, ভিক্খৱে, যোগক্খেমিপৰিযাযো ধম্মপৰিযাযো? সন্তি, ভিক্খৱে, চক্খুৱিঞ্ঞেয্যা ৰূপা ইট্ঠা কন্তা মনাপা পিযৰূপা কামূপসংহিতা ৰজনীযা. তে তথাগতস্স পহীনা উচ্ছিন্নমূলা তালাৱত্থুকতা অনভাৱঙ্কতা আযতিং অনুপ্পাদধম্মা. তেসঞ্চ পহানায অক্খাসি যোগং, তস্মা তথাগতো ‘যোগক্খেমী’তি ৱুচ্চতি…পে… সন্তি, ভিক্খৱে, মনোৱিঞ্ঞেয্যা ধম্মা ইট্ঠা কন্তা মনাপা পিযৰূপা কামূপসংহিতা ৰজনীযা. তে তথাগতস্স পহীনা উচ্ছিন্নমূলা তালাৱত্থুকতা অনভাৱঙ্কতা আযতিং অনুপ্পাদধম্মা. তেসঞ্চ পহানায অক্খাসি যোগং, তস্মা তথাগতো ‘যোগক্খেমী’তি ৱুচ্চতি. অযং খো, ভিক্খৱে, যোগক্খেমিপৰিযাযো ধম্মপৰিযাযো’’তি. পঠমং.