৮. পঠমনতুম্হাকংসুত্তং

১০১. ‘‘যং [যম্পি (পী. ক.)], ভিক্খৱে, ন তুম্হাকং, তং পজহথ. তং ৱো পহীনং হিতায সুখায ভৱিস্সতি. কিঞ্চ, ভিক্খৱে, ন তুম্হাকং? চক্খু, ভিক্খৱে, ন তুম্হাকং. তং পজহথ. তং ৱো পহীনং হিতায সুখায ভৱিস্সতি. ৰূপা ন তুম্হাকং. তে পজহথ. তে ৱো পহীনা হিতায সুখায ভৱিস্সন্তি. চক্খুৱিঞ্ঞাণং ন তুম্হাকং. তং পজহথ. তং ৱো পহীনং হিতায সুখায ভৱিস্সতি. চক্খুসম্ফস্সো ন তুম্হাকং. তং পজহথ. সো ৱো পহীনো হিতায সুখায ভৱিস্সতি. যম্পিদং চক্খুসম্ফস্সপচ্চযা উপ্পজ্জতি ৱেদযিতং সুখং ৱা দুক্খং ৱা অদুক্খমসুখং ৱা তম্পি ন তুম্হাকং. তং পজহথ. তং ৱো পহীনং হিতায সুখায ভৱিস্সতি. সোতং ন তুম্হাকং. তং পজহথ. তং ৱো পহীনং হিতায সুখায ভৱিস্সতি. সদ্দা ন তুম্হাকং. তে পজহথ. তে ৱো পহীনা হিতায সুখায ভৱিস্সন্তি. সোতৱিঞ্ঞাণং ন তুম্হাকং. তং পজহথ. তং ৱো পহীনং হিতায সুখায ভৱিস্সতি. সোতসম্ফস্সো ন তুম্হাকং. তং পজহথ. সো ৱো পহীনা হিতায সুখায ভৱিস্সতি. যম্পিদং সোতসম্ফস্সপচ্চযা উপ্পজ্জতি ৱেদযিতং সুখং ৱা দুক্খং ৱা অদুক্খমসুখং ৱা তম্পি ন তুম্হাকং. তং পজহথ. তং ৱো পহীনং হিতায সুখায ভৱিস্সতি. ঘানং ন তুম্হাকং. তং পজহথ. তং ৱো পহীনং হিতায সুখায ভৱিস্সতি. গন্ধা ন তুম্হাকং. তে পজহথ. তে ৱো পহীনা হিতায সুখায ভৱিস্সন্তি. ঘানৱিঞ্ঞাণং ন তুম্হাকং. তং পজহথ. তং ৱো পহীনং হিতায সুখায ভৱিস্সতি. ঘানসম্ফস্সো ন তুম্হাকং. তং পজহথ. সো ৱো পহীনা হিতায সুখায ভৱিস্সতি. যম্পিদং ঘানসম্ফস্সপচ্চযা উপ্পজ্জতি ৱেদযিতং সুখং ৱা দুক্খং ৱা অদুক্খমসুখং ৱা তম্পি ন তুম্হাকং. তং পজহথ. তং ৱো পহীনং হিতায সুখায ভৱিস্সতি.

জিৱ্হা ন তুম্হাকং. তং পজহথ. সা ৱো পহীনা হিতায সুখায ভৱিস্সতি. ৰসা ন তুম্হাকং. তে পজহথ. তে ৱো পহীনা হিতায সুখায ভৱিস্সন্তি. জিৱ্হাৱিঞ্ঞাণং ন তুম্হাকং. তং পজহথ. তং ৱো পহীনং হিতায সুখায ভৱিস্সতি. জিৱ্হাসম্ফস্সো ন তুম্হাকং. তং পজহথ. সো ৱো পহীনা হিতায সুখায ভৱিস্সতি. যম্পিদং জিৱ্হাসম্ফস্সপচ্চযা উপ্পজ্জতি ৱেদযিতং সুখং ৱা দুক্খং ৱা অদুক্খমসুখং ৱা তম্পি ন তুম্হাকং. তং পজহথ. তং ৱো পহীনং হিতায সুখায ভৱিস্সতি …পে….

মনো ন তুম্হাকং. তং পজহথ. সো ৱো পহীনো হিতায সুখায ভৱিস্সতি. ধম্মা ন তুম্হাকং. তে পজহথ. তে ৱো পহীনা হিতায সুখায ভৱিস্সন্তি. মনোৱিঞ্ঞাণং ন তুম্হাকং. তং পজহথ. তং ৱো পহীনং হিতায সুখায ভৱিস্সতি. মনোসম্ফস্সো ন তুম্হাকং. তং পজহথ. সো ৱো পহীনো হিতায সুখায ভৱিস্সতি. যম্পিদং মনোসম্ফস্সপচ্চযা উপ্পজ্জতি ৱেদযিতং সুখং ৱা দুক্খং ৱা অদুক্খমসুখং ৱা তম্পি ন তুম্হাকং. তং পজহথ. তং ৱো পহীনং হিতায সুখায ভৱিস্সতি.

‘‘সেয্যথাপি, ভিক্খৱে, যং ইমস্মিং জেতৱনে তিণকট্ঠসাখাপলাসং তং জনো হৰেয্য ৱা ডহেয্য ৱা যথাপচ্চযং ৱা কৰেয্য, অপি নু তুম্হাকং এৱমস্স – ‘অম্হে জনো হৰতি ৱা ডহতি ৱা যথাপচ্চযং ৱা কৰোতী’’’তি?

‘‘নো হেতং, ভন্তে’’.

‘‘তং কিস্স হেতু’’?

‘‘ন হি নো এতং, ভন্তে, অত্তা ৱা অত্তনিযং ৱা’’তি.

‘‘এৱমেৱ খো, ভিক্খৱে, চক্খু ন তুম্হাকং. তং পজহথ. তং ৱো পহীনং হিতায সুখায ভৱিস্সতি. ৰূপা ন তুম্হাকং… চক্খুৱিঞ্ঞাণং… চক্খুসম্ফস্সো…পে… যম্পিদং মনোসম্ফস্সপচ্চযা উপ্পজ্জতি ৱেদযিতং সুখং ৱা দুক্খং ৱা অদুক্খমসুখং ৱা তম্পি ন তুম্হাকং. তং পজহথ. তং ৱো পহীনং হিতায সুখায ভৱিস্সতী’’তি. অট্ঠমং.