৫৫. সাতচ্চমূলকসপ্পাযকাৰীসুত্তং

৭১৬. সাৱত্থিনিদানং. ‘‘চতাৰোমে, ভিক্খৱে, ঝাযী. কতমে চত্তাৰো? ইধ, ভিক্খৱে, একচ্চো ঝাযী সমাধিস্মিং সাতচ্চকাৰী হোতি, ন সমাধিস্মিং সপ্পাযকাৰী. ইধ পন, ভিক্খৱে, একচ্চো ঝাযী সমাধিস্মিং সপ্পাযকাৰী হোতি, ন সমাধিস্মিং সাতচ্চকাৰী. ইধ পন, ভিক্খৱে, একচ্চো ঝাযী নেৱ সমাধিস্মিং সাতচ্চকাৰী হোতি, ন চ সমাধিস্মিং সপ্পাযকাৰী. ইধ পন, ভিক্খৱে, একচ্চো ঝাযী সমাধিস্মিং সাতচ্চকাৰী চ হোতি, সমাধিস্মিং সপ্পাযকাৰী চ. তত্ৰ, ভিক্খৱে, য্ৱাযং ঝাযী সমাধিস্মিং সাতচ্চকাৰী চ হোতি সমাধিস্মিং সপ্পাযকাৰী চ অযং ইমেসং চতুন্নং ঝাযীনং অগ্গো চ সেট্ঠো চ মোক্খো চ উত্তমো চ পৱৰো চ. সেয্যথাপি, ভিক্খৱে, গৱা খীৰং, খীৰম্হা দধি, দধিম্হা নৱনীতং, নৱনীতম্হা সপ্পি, সপ্পিম্হা সপ্পিমণ্ডো তত্ৰ অগ্গমক্খাযতি; এৱমেৱ খো, ভিক্খৱে, য্ৱাযং ঝাযী সমাধিস্মিং সাতচ্চকাৰী চ হোতি, সমাধিস্মিং সপ্পাযকাৰী অযং ইমেসং চতুন্নং ঝাযীনং অগ্গো চ সেট্ঠো চ মোক্খো চ উত্তমো চ পৱৰো চা’’তি. ইদমৱোচ ভগৱা. অত্তমনা তে ভিক্খূ ভগৱতো ভাসিতং অভিনন্দুন্তি. পঞ্চপঞ্ঞাসমং. (যথা পঞ্চপঞ্ঞাসং ৱেয্যাকৰণানি হোন্তি তথা ৱিত্থাৰেতব্বানি.)

ঝানসংযুত্তং [সমাধিসংযুত্তং (স্যা. কং.)] সমত্তং.