১০. আনন্দসুত্তং

২১. সাৱত্থিযং … আৰামে. অথ খো আযস্মা আনন্দো যেন ভগৱা তেনুপসঙ্কমি; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদি. একমন্তং নিসিন্নো খো আযস্মা আনন্দো ভগৱন্তং এতদৱোচ – ‘‘‘নিৰোধো নিৰোধো’তি, ভন্তে, ৱুচ্চতি. কতমেসানং খো, ভন্তে, ধম্মানং নিৰোধো [নিৰোধা (সী. পী.)] ‘নিৰোধো’তি ৱুচ্চতী’’তি? ‘‘ৰূপং খো, আনন্দ, অনিচ্চং সঙ্খতং পটিচ্চসমুপ্পন্নং খযধম্মং ৱযধম্মং ৱিৰাগধম্মং নিৰোধধম্মং. তস্স নিৰোধো [নিৰোধা (সী. পী.)] ‘নিৰোধো’তি ৱুচ্চতি. ৱেদনা অনিচ্চা সঙ্খতা পটিচ্চসমুপ্পন্না খযধম্মা ৱযধম্মা ৱিৰাগধম্মা নিৰোধধম্মা. তস্সা নিৰোধো ‘নিৰোধো’তি ৱুচ্চতি. সঞ্ঞা… সঙ্খাৰা অনিচ্চা সঙ্খতা পটিচ্চসমুপ্পন্না খযধম্মা ৱযধম্মা ৱিৰাগধম্মা নিৰোধধম্মা. তেসং নিৰোধো ‘নিৰোধো’তি ৱুচ্চতি. ৱিঞ্ঞাণং অনিচ্চং সঙ্খতং পটিচ্চসমুপ্পন্নং খযধম্মং ৱযধম্মং ৱিৰাগধম্মং নিৰোধধম্মং. তস্স নিৰোধো ‘নিৰোধো’তি ৱুচ্চতি. ইমেসং খো, আনন্দ, ধম্মানং নিৰোধো ‘নিৰোধো’তি ৱুচ্চতী’’তি. দসমং.

অনিচ্চৱগ্গো দুতিযো.

তস্সুদ্দানং –

অনিচ্চং দুক্খং অনত্তা, যদনিচ্চাপৰে তযো;

হেতুনাপি তযো ৱুত্তা, আনন্দেন চ তে দসাতি.