৯. দুতিযকোট্ঠিকসুত্তং

১৩৪. বাৰাণসিযং ৱিহৰন্তি ইসিপতনে মিগদাযে…পে… ‘‘‘অৱিজ্জা, অৱিজ্জা’তি, আৱুসো কোট্ঠিক, ৱুচ্চতি. কতমা নু খো, আৱুসো, অৱিজ্জা, কিত্তাৱতা চ অৱিজ্জাগতো হোতী’’তি?

‘‘ইধাৱুসো, অস্সুতৱা পুথুজ্জনো ৰূপস্স সমুদযঞ্চ অত্থঙ্গমঞ্চ অস্সাদঞ্চ আদীনৱঞ্চ নিস্সৰণঞ্চ যথাভূতং নপ্পজানাতি. ৱেদনায…পে… সঞ্ঞায… সঙ্খাৰানং… ৱিঞ্ঞাণস্স সমুদযঞ্চ অত্থঙ্গমঞ্চ অস্সাদঞ্চ আদীনৱঞ্চ নিস্সৰণঞ্চ যথাভূতং নপ্পজানাতি. অযং ৱুচ্চতাৱুসো, অৱিজ্জা; এত্তাৱতা চ অৱিজ্জাগতো হোতী’’তি.

এৱং ৱুত্তে, আযস্মা সাৰিপুত্তো আযস্মন্তং মহাকোট্ঠিকং এতদৱোচ – ‘‘‘ৱিজ্জা, ৱিজ্জা’তি, আৱুসো কোট্ঠিক, ৱুচ্চতি. কতমা নু খো, আৱুসো, ৱিজ্জা, কিত্তাৱতা চ ৱিজ্জাগতো হোতী’’তি?

‘‘ইধাৱুসো, সুতৱা অৰিযসাৱকো ৰূপস্স সমুদযঞ্চ অত্থঙ্গমঞ্চ অস্সাদঞ্চ আদীনৱঞ্চ নিস্সৰণঞ্চ যথাভূতং পজানাতি. ৱেদনায…পে… সঞ্ঞায… সঙ্খাৰানং… ৱিঞ্ঞাণস্স সমুদযঞ্চ অত্থঙ্গমঞ্চ অস্সাদঞ্চ আদীনৱঞ্চ নিস্সৰণঞ্চ যথাভূতং পজানাতি. অযং ৱুচ্চতাৱুসো, ৱিজ্জা; এত্তাৱতা চ ৱিজ্জাগতো হোতী’’তি. নৱমং.