১০. ততিযকোট্ঠিকসুত্তং

১৩৫. তঞ্ঞেৱ নিদানং. একমন্তং নিসিন্নো খো আযস্মা সাৰিপুত্তো আযস্মন্তং মহাকোট্ঠিকং এতদৱোচ – ‘‘‘অৱিজ্জা, অৱিজ্জা’তি, আৱুসো কোট্ঠিক, ৱুচ্চতি. কতমা নু খো, আৱুসো, অৱিজ্জা, কিত্তাৱতা চ অৱিজ্জাগতো হোতী’’তি?

‘‘ইধাৱুসো, অস্সুতৱা পুথুজ্জনো ৰূপং নপ্পজানাতি, ৰূপসমুদযং নপ্পজানাতি, ৰূপনিৰোধং নপ্পজানাতি, ৰূপনিৰোধগামিনিং পটিপদং নপ্পজানাতি. ৱেদনং নপ্পজানাতি…পে… সঞ্ঞং… সঙ্খাৰে… ৱিঞ্ঞাণং নপ্পজানাতি, ৱিঞ্ঞাণসমুদযং নপ্পজানাতি, ৱিঞ্ঞাণনিৰোধং নপ্পজানাতি, ৱিঞ্ঞাণনিৰোধগামিনিং পটিপদং নপ্পজানাতি. অযং ৱুচ্চতাৱুসো, অৱিজ্জা; এত্তাৱতা চ অৱিজ্জাগতো হোতী’’তি.

এৱং ৱুত্তে, আযস্মা সাৰিপুত্তো আযস্মন্তং মহাকোট্ঠিকং এতদৱোচ – ‘‘‘ৱিজ্জা, ৱিজ্জা’তি, আৱুসো কোট্ঠিক, ৱুচ্চতি. কতমা নু খো, আৱুসো, ৱিজ্জা, কিত্তাৱতা চ ৱিজ্জাগতো হোতী’’তি? ‘‘ইধাৱুসো, সুতৱা অৰিযসাৱকো ৰূপং পজানাতি, ৰূপসমুদযং পজানাতি, ৰূপনিৰোধং পজানাতি, ৰূপনিৰোধগামিনিং পটিপদং পজানাতি. ৱেদনং… সঞ্ঞং… সঙ্খাৰে… ৱিঞ্ঞাণং পজানাতি, ৱিঞ্ঞাণসমুদযং পজানাতি, ৱিঞ্ঞাণনিৰোধং পজানাতি, ৱিঞ্ঞাণনিৰোধগামিনিং পটিপদং পজানাতি. অযং ৱুচ্চতাৱুসো, ৱিজ্জা; এত্তাৱতা চ ৱিজ্জাগতো হোতী’’তি. দসমং.

অৱিজ্জাৱগ্গো তেৰসমো.

তস্সুদ্দানং –

সমুদযধম্মে তীণি, অস্সাদো অপৰে দুৱে;

সমুদযে চ দ্ৱে ৱুত্তা, কোট্ঠিকে অপৰে তযোতি.