৯. নাগসুত্তং

২৩১. এৱং মে সুতং – একং সমযং ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন অঞ্ঞতৰো নৱো ভিক্খু অতিৱেলং কুলানি উপসঙ্কমতি. তমেনং ভিক্খূ এৱমাহংসু – ‘‘মাযস্মা অতিৱেলং কুলানি উপসঙ্কমী’’তি. সো ভিক্খু ভিক্খূহি ৱুচ্চমানো এৱমাহ – ‘‘ইমে হি নাম থেৰা ভিক্খূ কুলানি উপসঙ্কমিতব্বং মঞ্ঞিস্সন্তি, কিমঙ্গং [কিমঙ্গ (সী.)] পনাহ’’ন্তি?

অথ খো সম্বহুলা ভিক্খূ যেন ভগৱা তেনুপসঙ্কমিংসু; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদিংসু. একমন্তং নিসিন্না খো তে ভিক্খূ ভগৱন্তং এতদৱোচুং – ‘‘ইধ, ভন্তে, অঞ্ঞতৰো নৱো ভিক্খু অতিৱেলং কুলানি উপসঙ্কমতি. তমেনং ভিক্খূ এৱমাহংসু – ‘মাযস্মা অতিৱেলং কুলানি উপসঙ্কমী’তি. সো ভিক্খু ভিক্খূহি ৱুচ্চমানো এৱমাহ – ‘ইমে হি নাম থেৰা ভিক্খূ কুলানি উপসঙ্কমিতব্বং মঞ্ঞিস্সন্তি, কিমঙ্গং পনাহ’’’ন্তি.

‘‘ভূতপুব্বং, ভিক্খৱে, অৰঞ্ঞাযতনে মহাসৰসী. তং নাগা উপনিস্সায ৱিহৰন্তি. তে তং সৰসিং ওগাহেত্ৱা সোণ্ডায ভিসমুড়ালং অব্বুহেত্ৱা [অব্ভূহেত্ৱা (ক.), অব্বাহিত্ৱা (মহাৱ. ২৭৮)] সুৱিক্খালিতং ৱিক্খালেত্ৱা অকদ্দমং সঙ্খাদিত্ৱা [সঙ্খৰিত্ৱা (পী. ক.)] অজ্ঝোহৰন্তি. তেসং তং ৱণ্ণায চেৱ হোতি বলায চ, ন চ ততোনিদানং মৰণং ৱা নিগচ্ছন্তি মৰণমত্তং ৱা দুক্খং. তেসংযেৱ খো পন, ভিক্খৱে, মহানাগানং অনুসিক্খমানা তৰুণা ভিঙ্কচ্ছাপা তং সৰসিং ওগাহেত্ৱা সোণ্ডায ভিসমুড়ালং অব্বুহেত্ৱা ন সুৱিক্খালিতং ৱিক্খালেত্ৱা সকদ্দমং অসঙ্খাদিত্ৱা অজ্ঝোহৰন্তি. তেসং তং নেৱ ৱণ্ণায হোতি ন বলায. ততোনিদানং মৰণং ৱা নিগচ্ছন্তি মৰণমত্তং ৱা দুক্খং.

‘‘এৱমেৱ খো, ভিক্খৱে, ইধ থেৰা ভিক্খূ পুব্বণ্হসমযং নিৱাসেত্ৱা পত্তচীৱৰমাদায গামং ৱা নিগমং ৱা পিণ্ডায পৱিসন্তি. তে তত্থ ধম্মং ভাসন্তি. তেসং গিহী পসন্নাকাৰং কৰোন্তি. তে তং লাভং অগধিতা অমুচ্ছিতা অনজ্ঝোপন্না [অনজ্ঝাপন্না (সব্বত্থ) ম. নি. ১ পাসৰাসিসুত্তৱণ্ণনা ওলোকেতব্বা] আদীনৱদস্সাৱিনো নিস্সৰণপঞ্ঞা পৰিভুঞ্জন্তি. তেসং তং ৱণ্ণায চেৱ হোতি বলায চ, ন চ ততোনিদানং মৰণং ৱা নিগচ্ছন্তি মৰণমত্তং ৱা দুক্খং. তেসংযেৱ খো পন, ভিক্খৱে, থেৰানং ভিক্খূনং অনুসিক্খমানা নৱা ভিক্খূ পুব্বণ্হসমযং নিৱাসেত্ৱা পত্তচীৱৰমাদায গামং ৱা নিগমং ৱা পিণ্ডায পৱিসন্তি. তে তত্থ ধম্মং ভাসন্তি. তেসং গিহী পসন্নাকাৰং কৰোন্তি. তে তং লাভং গধিতা মুচ্ছিতা অজ্ঝোপন্না অনাদীনৱদস্সাৱিনো অনিস্সৰণপঞ্ঞা পৰিভুঞ্জন্তি. তেসং তং নেৱ ৱণ্ণায হোতি ন বলায, তে ততোনিদানং মৰণং ৱা নিগচ্ছন্তি মৰণমত্তং ৱা দুক্খং. তস্মাতিহ, ভিক্খৱে, এৱং সিক্খিতব্বং – ‘অগধিতা অমুচ্ছিতা অনজ্ঝোপন্না আদীনৱদস্সাৱিনো নিস্সৰণপঞ্ঞা তং লাভং পৰিভুঞ্জিস্সামা’তি. এৱঞ্হি ৱো, ভিক্খৱে, সিক্খিতব্ব’’ন্তি. নৱমং.