৮. কলিঙ্গৰসুত্তং

২৩০. এৱং মে সুতং – একং সমযং ভগৱা ৱেসালিযং ৱিহৰতি মহাৱনে কূটাগাৰসালাযং. তত্ৰ খো ভগৱা ভিক্খূ আমন্তেসি ‘‘ভিক্খৱো’’তি. ‘‘ভদন্তে’’তি তে ভিক্খূ ভগৱতো পচ্চস্সোসুং. ভগৱা এতদৱোচ –

‘‘কলিঙ্গৰূপধানা, ভিক্খৱে, এতৰহি লিচ্ছৱী ৱিহৰন্তি অপ্পমত্তা আতাপিনো উপাসনস্মিং. তেসং ৰাজা মাগধো অজাতসত্তু ৱেদেহিপুত্তো ন লভতি ওতাৰং ন লভতি আৰম্মণং. ভৱিস্সন্তি, ভিক্খৱে, অনাগতমদ্ধানং লিচ্ছৱী সুখুমালা [সুকুমালা (সী.), সুখুমা (ক.)] মুদুতলুনহত্থপাদা [মুদুতলাহত্থপাদা (স্যা. কং.)] তে মুদুকাসু সেয্যাসু তূলবিম্বোহনাসু [তূলবিম্বোহনাসু (স্যা. কং. পী.), তূলবিম্বোহনাদীসু (সী.), তূলবিব্বোহনাদীসু (ক.)] যাৱসূৰিযুগ্গমনা সেয্যং কপ্পিস্সন্তি. তেসং ৰাজা মাগধো অজাতসত্তু ৱেদেহিপুত্তো লচ্ছতি ওতাৰং লচ্ছতি আৰম্মণং.

‘‘কলিঙ্গৰূপধানা, ভিক্খৱে, এতৰহি ভিক্খূ ৱিহৰন্তি অপ্পমত্তা আতাপিনো পধানস্মিং. তেসং মাৰো পাপিমা ন লভতি ওতাৰং ন লভতি আৰম্মণং. ভৱিস্সন্তি, ভিক্খৱে, অনাগতমদ্ধানং ভিক্খূ সুখুমা মুদুতলুনহত্থপাদা. তে মুদুকাসু সেয্যাসু তূলবিম্বোহনাসু যাৱসূৰিযুগ্গমনা সেয্যং কপ্পিস্সন্তি. তেসং মাৰো পাপিমা লচ্ছতি ওতাৰং লচ্ছতি আৰম্মণং. তস্মাতিহ, ভিক্খৱে, এৱং সিক্খিতব্বং – ‘কলিঙ্গৰূপধানা ৱিহৰিস্সাম অপ্পমত্তা আতাপিনো পধানস্মি’ন্তি. এৱঞ্হি ৱো, ভিক্খৱে, সিক্খিতব্ব’’ন্তি. অট্ঠমং.