৫. সত্তিসুত্তং

২২৭. সাৱত্থিযং ৱিহৰতি…পে… ‘‘সেয্যথাপি, ভিক্খৱে, সত্তি তিণ্হফলা. অথ পুৰিসো আগচ্ছেয্য – ‘অহং ইমং সত্তিং তিণ্হফলং পাণিনা ৱা মুট্ঠিনা ৱা পটিলেণিস্সামি পটিকোট্টিস্সামি পটিৱট্টেস্সামী’তি. তং কিং মঞ্ঞথ, ভিক্খৱে, ভব্বো নু খো সো পুৰিসো অমুং সত্তিং তিণ্হফলং পাণিনা ৱা মুট্ঠিনা ৱা পটিলেণেতুং পটিকোট্টেতুং পটিৱট্টেতু’’ন্তি? ‘‘নো হেতং, ভন্তে’’. ‘‘তং কিস্স হেতু’’? ‘‘অসু হি, ভন্তে, সত্তি তিণ্হফলা ন সুকৰা পাণিনা ৱা মুট্ঠিনা ৱা পটিলেণেতুং পটিকোট্টেতুং পটিৱট্টেতুং. যাৱদেৱ চ পন সো পুৰিসো কিলমথস্স ৱিঘাতস্স ভাগী অস্সা’’তি.

‘‘এৱমেৱ খো, ভিক্খৱে, যস্স কস্সচি ভিক্খুনো মেত্তাচেতোৱিমুত্তি ভাৱিতা বহুলীকতা যানীকতা ৱত্থুকতা অনুট্ঠিতা পৰিচিতা সুসমাৰদ্ধা, তস্স চে অমনুস্সো চিত্তং খিপিতব্বং মঞ্ঞেয্য; অথ খো স্ৱেৱ অমনুস্সো কিলমথস্স ৱিঘাতস্স ভাগী অস্স. তস্মাতিহ, ভিক্খৱে, এৱং সিক্খিতব্বং – ‘মেত্তা নো চেতোৱিমুত্তি ভাৱিতা ভৱিস্সতি বহুলীকতা যানীকতা ৱত্থুকতা অনুট্ঠিতা পৰিচিতা সুসমাৰদ্ধা’তি. এৱঞ্হি ৱো, ভিক্খৱে, সিক্খিতব্ব’’ন্তি. পঞ্চমং.