৬. ধনুগ্গহসুত্তং

২২৮. সাৱত্থিযং ৱিহৰতি…পে… ‘‘সেয্যথাপি, ভিক্খৱে, চত্তাৰো দড়্হধম্মা ধনুগ্গহা সুসিক্খিতা কতহত্থা কতূপাসনা চতুদ্দিসা ঠিতা অস্সু. অথ পুৰিসো আগচ্ছেয্য – ‘অহং ইমেসং চতুন্নং দড়্হধম্মানং ধনুগ্গহানং সুসিক্খিতানং কতহত্থানং কতূপাসনানং চতুদ্দিসা কণ্ডে খিত্তে অপ্পতিট্ঠিতে পথৱিযং গহেত্ৱা আহৰিস্সামী’তি. তং কিং মঞ্ঞথ, ভিক্খৱে, ‘জৱনো পুৰিসো পৰমেন জৱেন সমন্নাগতো’তি অলং ৱচনাযা’’তি?

‘‘একস্স চেপি, ভন্তে, দড়্হধম্মস্স ধনুগ্গহস্স সুসিক্খিতস্স কতহত্থস্স কতূপাসনস্স কণ্ডং খিত্তং অপ্পতিট্ঠিতং পথৱিযং গহেত্ৱা আহৰেয্য – ‘জৱনো পুৰিসো পৰমেন জৱেন সমন্নাগতো’তি অলং ৱচনায, কো পন ৱাদো চতুন্নং দড়্হধম্মানং ধনুগ্গহানং সুসিক্খিতানং কতহত্থানং কতূপাসনান’’ন্তি?

‘‘যথা চ, ভিক্খৱে, তস্স পুৰিসস্স জৱো, যথা চ চন্দিমসূৰিযানং জৱো, ততো সীঘতৰো. যথা চ, ভিক্খৱে, তস্স পুৰিসস্স জৱো যথা চ চন্দিমসূৰিযানং জৱো যথা চ যা দেৱতা চন্দিমসূৰিযানং পুৰতো ধাৱন্তি তাসং দেৱতানং জৱো, ( ) [(ততো সীঘতৰো. যথা চ ভিক্খৱে তস্স পুৰিসস্স জৱো, যথা চ চন্দিমসুৰিযানং জৱো, যথা চ যা দেৱতা চন্দিমসুৰিযানং পুৰতো ধাৱন্তি, তাসং দেৱতানং জৱো,) (সী. স্যা. কং.)] ততো সীঘতৰং আযুসঙ্খাৰা খিযন্তি. তস্মাতিহ, ভিক্খৱে, এৱং সিক্খিতব্বং – ‘অপ্পমত্তা ৱিহৰিস্সামা’তি. এৱঞ্হি ৱো, ভিক্খৱে, সিক্খিতব্ব’’ন্তি. ছট্ঠং.