১. কূটসুত্তং

২২৩. এৱং মে সুতং – একং সমযং ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তত্ৰ খো ভগৱা ভিক্খূ আমন্তেসি – ‘‘ভিক্খৱো’’তি. ‘‘ভদন্তে’’তি তে ভিক্খূ ভগৱতো পচ্চস্সোসুং. ভগৱা এতদৱোচ – ‘‘সেয্যথাপি, ভিক্খৱে, কূটাগাৰস্স যা কাচি গোপানসিযো সব্বা তা কূটঙ্গমা কূটসমোসৰণা কূটসমুগ্ঘাতা সব্বা তা সমুগ্ঘাতং গচ্ছন্তি; এৱমেৱ খো, ভিক্খৱে, যে কেচি অকুসলা ধম্মা সব্বে তে অৱিজ্জামূলকা অৱিজ্জাসমোসৰণা অৱিজ্জাসমুগ্ঘাতা, সব্বে তে সমুগ্ঘাতং গচ্ছন্তি. তস্মাতিহ, ভিক্খৱে, এৱং সিক্খিতব্বং – ‘অপ্পমত্তা ৱিহৰিস্সামা’তি. এৱঞ্হি ৱো, ভিক্খৱে, সিক্খিতব্ব’’ন্তি. পঠমং.