৪. একধীতুসুত্তং

১৭৩. সাৱত্থিযং ৱিহৰতি…পে… ‘‘দাৰুণো, ভিক্খৱে, লাভসক্কাৰসিলোকো…পে… সদ্ধা ভিক্খৱে উপাসিকা একং ধীতৰং পিযং মনাপং এৱং সম্মা আযাচমানা আযাচেয্য – ‘তাদিসা, অয্যে, ভৱাহি যাদিসা খুজ্জুত্তৰা চ উপাসিকা ৱেড়ুকণ্ডকিযা [ৱেড়ুকণ্ডকী (সী. ছক্কঙ্গুত্তৰেপি)] চ নন্দমাতা’তি. এসা, ভিক্খৱে, তুলা এতং পমাণং মম সাৱিকানং উপাসিকানং, যদিদং খুজ্জুত্তৰা চ উপাসিকা ৱেড়ুকণ্ডকিযা চ নন্দমাতা. সচে খো ত্ৱং, অয্যে, অগাৰস্মা অনগাৰিযং পব্বজসি; তাদিসা, অয্যে, ভৱাহি যাদিসা খেমা চ ভিক্খুনী উপ্পলৱণ্ণা চাতি. এসা, ভিক্খৱে, তুলা এতং পমাণং মম সাৱিকানং ভিক্খুনীনং, যদিদং খেমা চ ভিক্খুনী উপ্পলৱণ্ণা চ. মা চ খো ত্ৱং, অয্যে, সেখং অপ্পত্তমানসং লাভসক্কাৰসিলোকো অনুপাপুণাতূতি. তং চে, ভিক্খৱে, ভিক্খুনিং সেখং অপ্পত্তমানসং লাভসক্কাৰসিলোকো অনুপাপুণাতি, সো তস্সা হোতি অন্তৰাযায. এৱং দাৰুণো খো, ভিক্খৱে, লাভসক্কাৰসিলোকো…পে… এৱঞ্হি ৱো, ভিক্খৱে, সিক্খিতব্ব’’ন্তি. চতুত্থং.